Ibuot 15

Ndi Ọdiọk Edieke Mmenyomke Ẹfiọk Kpukpru N̄kpọ Ẹban̄a Mi?

 Sịn idiọn̄ọ emi ✔ kpere se ekpetịn̄de aban̄a mme idaha oro ẹtienede mi:

1. Emeberi usụn̄ esịne ke ubet fo, edi etise eyenuka eberede usụn̄ inikiet inikiet odụk, ikọn̄ke usụn̄.

□ ‘Mfịna idụhe. Ami n̄ko mmesinam ntre ndusụk ini.’

□ ‘Nso usọn̄enyịn ikpedi oro! Nso edieke ekpedide n̄kosụk ndomo ndisịne ọfọn̄?’

2. Afo ndisụk nsịm ufọk edi oro, ndien ete ye eka fo ẹtọn̄ọ ndifak fi mbụme. “Akaka m̀mọ̀n̄? Akanam nso do? Akasan̄a ye anie?”

□ ‘Mfịna idụhe. Mmesitịn̄ kpukpru n̄kpọ nnọ mmọ.’

□ ‘Ọbọp mi ibifịk tutu! Ete ye eka mi inyeneke mbuọtidem ke idem mi!’

KE INI ekedide eyenọwọn̄, ekeme ndidi ikesifịnake fi ke ini mbon en̄wen ẹdomode ndifiọk kpukpru n̄kpọ mban̄a fi? Edieke ekpri eyenuka odụkde ubet fo edi ikọn̄ke usụn̄, ama esidara enye. Edieke ete ye eka fo ẹbụpde fi mbụme, ukûsumen̄eke ndibọrọ. Ini oro, uwem fo eketie nte ufọk oro ẹbererede usụn̄ ẹnịm. Edi idahaemi ọdọn̄ fi nte ekpeberide usụn̄ oro. Corey emi edide isua 14 ọdọhọ ete: “Esinem mi ke ini mbon en̄wen mîdomoke ndifiọk kpukpru n̄kpọ mban̄a mi.” Ẹyak ineme iban̄a ikpehe iba oro ẹkemede ndisọn̄ fi ndinyene ifụre oro oyomde.

Ke Ini Oyomde Ndidu Ikpọn̄

Nti ntak ẹdu oro akpanamde oyom ndidu ikpọn̄. Ekeme ndidi onyụn̄ oyom ‘ndiduọk odudu esisịt.’ (Mark 6:31) Mîdịghe, ke ini oyomde ndibọn̄ akam, ekeme ndidi oyom ndinam nte Jesus eketemede mbet esie ete: “Dụk ke ubet fo, ndien ke ama ekeberi usụn̄, bọn̄ akam nọ Ete fo.” (Matthew 6:6; Mark 1:35) Mfịna oro odude edi ke  ama eberi usụn̄ ubet fo (edieke edide emenyene ọkpọkpọ ubet), ekeme ndidi ete ye eka fo idikereke ke ọbọn̄ akam. Ekeme ndidi nditọuka idifiọkke ini emi akpamade ndidu ikpọn̄.

Se akpanamde. Utu ke nditọhọ ye mbon en̄wen ke ntak emi mmọ ẹyomde ndifiọk kpukpru n̄kpọ mban̄a fi, nam se itienede mi:

● Edieke edide nditọuka ẹdi mfịna, domo ndinịm ibet ifan̄ emi ẹdotde man ekeme ndinyene ini nnọ idemfo. Se m̀mê edi se ẹkpekade ẹbịne ete ye eka mbufo man ẹn̄wam mbufo ke afan̄ emi. a

● Edieke edide ete ye eka fo ẹdi mfịna, domo ndifiọk se idide ekikere mmọ. Rebekah emi edide isua 16 ọdọhọ ete: “Ndusụk ini, ete ye eka mi ẹsibụp mme owo n̄kpọ ẹban̄a mi. Edi ke nditịn̄ akpanikọ, n̄kponyụn̄ nnam ntre ye eyen mi edieke n̄kpedide eka—akpan akpan sia mfiọkde ofụri idomo oro mme uyen ẹsobode mfịn!” Ukem nte Rebekah, ndi emekeme ndikụt se inamde ete ye eka fo ẹfịna idem ntre?—Mme N̄ke 19:11.

● Nen̄ede bụp idemfo ete: ‘Ndi mmọnọ ete ye eka mi ntak ndikere ke enyene idiọkn̄kpọ emi nsinamde ke ini mberide usụn̄ ubet mi? Ndi mmesidịp mmọ n̄kpọ tutu mmọ ẹkere ke ana ida n̄kari ifiọk n̄kpọ iban̄a mi?’ Edieke ọbọrọde ihih ke mbụme mbiba emi, edi osụk etie  nte ke ete ye eka fo isụk inyeneke mbuọtidem ke idemfo, neme nte etiede fi ke idem ye mmọ ke sụn̄sụn̄ ido ye ke ido ukpono. Nen̄ede kpan̄ utọn̄ kop se inamde mmọ ẹfịna idem ntre, nyụn̄ kụt ete ke idịghe afo edi ntak mfịna oro ke baba usụn̄ kiet.—James 1:19.

Ke Ini Anamde Ufan

Nte owo okponde, esidọn̄ enye ndinam ufan ye mbon en̄wen oro mîdịghe mbonubon esie. Ukem ntre, ẹsidọn̄ ete ye eka fo ndifiọk mme ufan fo, mmọ esinyụn̄ ẹkere m̀mê nso ke esinam ke ini odude ye mmọ. Edi emekeme ndikere ndusụk ini ke ete ye eka fo ẹfịna idem ẹkaha. Amy emi edide isua 16 ọdọhọ ete: “Nyomke ete ye eka mi ẹbụp mi kpukpru minit duop oro ẹbede m̀mê anie ke nnọ m̀mê mbọ etop ke telefon mi.”

Se akpanamde. Utu ke ndinyene mfịna ye ete ye eka fo ke ntak mme ufan oro emekde, domo ndinam se itienede mi:

● Kûdedịp mme ufan fo, edi nam ete ye eka fo ẹmehe ye mmọ. N̄kọm udumaha ete ye eka fo ẹsan̄a edem edem ẹdụn̄ọde ẹfiọk mbon oro ẹdide mme ufan fo, edi idụhe se mmọ ẹdinamde ikan oro edieke edịpde-dịp mme ufan fo. Ti ke edieke ete ye eka fo ẹfiọkde mbon emi afo esidude kiet, ekeme ndidi mmọ ẹyenen̄ede ẹma mme ufan fo.

● Tịn̄ akpanikọ ise, Ndi mfịna fo edi ke uyomke ẹfiọk kpukpru n̄kpọ ẹban̄a fi, mîdịghe ndi akam edi ke enyene idiọkn̄kpọ emi odomode ndidịp ete ye eka fo? Brittany emi edide isua 22 ọdọhọ ete: “Edieke odụn̄de ye ete ye eka fo ndien afo ekere ke enyene se mmọ ẹyomde ndifiọk mban̄a fi, bụp idemfo ete, ‘Nnamke idiọkn̄kpọ ndomokiet nan̄a, ntre ntak n̄kpedịpde  mmọ n̄kpọ?’ Edi edieke anade edịp mmọ n̄kpọ, ọwọrọ enyene idiọkn̄kpọ emi anamde.”

Se Akpanamde Mbak Mbon En̄wen Ẹdifiọk Kpukpru N̄kpọ Ẹban̄a Fi

Idahaemi afo emenyene ifet ndikere mban̄a ndusụk n̄kpọ oro akpanamde mbak mbon en̄wen ẹdifiọk kpukpru n̄kpọ ẹban̄a fi. Ke idak emi, wet nte ọkpọbọrọde mme mbụme oro ẹtienede mme n̄kpọ oro ẹsiakde mi:

Akpa: Fiọk se idide mfịna. Nso ke mûkpamaha mbon en̄wen ẹfiọk ẹban̄a fi?

․․․․․

 Ọyọhọ Iba: Kere ban̄a nte ete ye eka fo ẹsede n̄kpọ oro. Afo ekere ke nso ikeme ndinam n̄kpọ emi afịna mmọ?

․․․․․

Ọyọhọ Ita: Nam n̄kpọ man ọkọk mfịna oro. Okûdi enyene se eduede anam oro ekemede nditịp nsịn ke mfịna oro? Nso ke akpanam aban̄a mfịna emi? Didie ke akpama ete ye eka fo ẹse ẹban̄a mfịna fo emi?

․․․․․

Ọyọhọ Inan̄: Neme n̄kpọ emi. Tịn̄ nte ekemede ndineme n̄kpọ emi ye ete ye eka fo.

․․․․․

KE IBUOTIKỌ ORO ETIENEDE

Ndi ete m̀mê eka fo akpa? Edieke edide ntre, m̀mọ̀n̄ ke ekeme ndibọ ndọn̄esịt?

[Ikọ Idakisọn̄]

AKPAN ITIE N̄WED ABASI

“Sịn ofụri ukeme fo ndiwụt idemfo nte owo emi Abasi enyịmede, anamutom emi mînyeneke ntak ndikop bụt.”​—2 Timothy 2:15.

ITEM

Ke ini enemede ye ete ye eka fo aban̄a ifụre oro oyomde ẹnọ fi, kûdomo ndikụt ndudue nnọ mmọ. Kam tịn̄ se ifịnade fi. Nditịn̄ se ifịnade fi utu ke ndikụt ndudue nnọ mmọ ayanam kpukpru mbufo ẹfiọk nte ẹkpesede ẹban̄a n̄kpọ emi.

NDI AMA ỌFIỌK . . . ?

Edieke etiede in̄wan̄-in̄wan̄ ye ete ye eka fo, mmọ idinen̄ekede inyene eyịghe iban̄a fi.

SE NDINAMDE

Man ete ye eka mi ẹnyene mbuọtidem ke idemmi, se ndinamde edi

Se ndibụpde ete ye eka mi mban̄a n̄kpọ emi edi

AFO EKERE DIDIE?

● Ntak emi ete ye eka fo ẹnyenede unen ndifiọk n̄kpọ mban̄a fi?

● Didie ke ukeme oro afo esịnde ndineme nneme ọfọn ye ete ye eka fo edin̄wam fi ekeme ndineme nneme ye ikpọ owo eken ke ini iso?

[Se ẹwetde ke ikpọ abisi ke page 108]

“Ete ye eka fo iyomke n̄kpọ anam fi, ndien ndusụk ini ekeme nditie nte mmọ ẹdodụn̄ọde fi. Utọ n̄kpọ oro ekeme ndinen̄ede nyat owo. Edi ke nditịm ntịn̄, edieke n̄kpenyenede eyen, n̄kponyụn̄ nnam ukem oro.”​—Alana

[Ndise ke page 109]

Mûnamke utom, owo idikpehe fi okụkọfiọn̄​—mûnamke akpanikọ, owo idinyeneke mbuọtidem ke idemfo