Ibuot 35

N̄kpanam Didie Ntre Ndisida N̄kpọsọn̄ Ibọk?

NDI emenyene mbumehe edida n̄kpọsọn̄ ibọk? Ekeme ndidi ọmọfiọk ke edinam emi ifọnke ye afo, ke enye ke onyụn̄ abiat fi idem. Anaedi emesidomo nditre edida n̄kpọsọn̄ ibọk, edi ekem afiak ọtọn̄ọ. Edieke edide ntre, kûkere ke udukemeke nditre. Mbon en̄wen ẹma ẹtre edinam emi, afo n̄ko emekeme nditre! Ke uwụtn̄kpọ, kere ban̄a se nsio nsio owo ita emi ẹtode nsio nsio ebiet ẹtịn̄de ẹban̄a nte mmọ ẹkesan̄ade ẹtre.

ENYỊN̄ Marta

NTE N̄KESIDUDE UWEM Eka mi ikọdọhọ ndọ ke ini enye akamande mi, ntre enye ikpọn̄ ọkọbọk mi ye eyeneka mi. Ọtọn̄ọde ke ini oro n̄kedide n̄kpọ nte isua 12, mma ntọn̄ọ ndisisan̄a ye eyeneka eka mi oro ekesimade unek n̄ka disco. N̄kedi owo ofụri owo, ndien ikebịghike mma ntọn̄ọ ndisidụk ndụk ye mbon oro ẹkedude idiọk uwem. Mma ntọn̄ọ ndisida n̄kpọsọn̄ ibọk ke ini n̄kedide isua 13. Mma nnyụn̄ ntọn̄ọ ndisin̄wọn̄ cocaine. Cocaine ama esinem mi etieti ke nsonso oro. Edi nte ini akakade, enye ama anam ntọn̄ọ ndisinyene ndap ndap ekikere onyụn̄ anam kpukpru n̄kpọ ẹnam mi ndịk. Odudu ibọk oro ama ọkpọkpọhọ mi, mma nsitọn̄ọ ndikere ke akpana n̄wot idem. Mma nsiyom nditre ndida n̄kpọsọn̄ ibọk, edi n̄kekemeke.

NTE N̄KETREDE Mma ntọn̄ọ ndikere mban̄a Abasi, nnyụn̄ n̄ka ufọkabasi usen ifan̄. Edi emi akakam ananam ndọdiọn̄ n̄kop mfụhọ. Ke ini n̄kedide isua 18, mma n̄wọrọ n̄kodụn̄ ye erenowo nnyụn̄ mman eyen nnọ enye. Ndinyene eyen ama anam nnen̄ede nyom ndikpụhọde usụn̄uwem mi. Akani ufan mi kiet ama ọwọrọ edidụn̄ ke nsakiso ufọk oro n̄kodụn̄de.  Enye ama edise mi onyụn̄ obụp mi nte n̄kpọ etiede. Mma ntịn̄ ofụri se ikesịnede mi ke esịt nnọ enye. Enye ama asian mi ke imọ ima ikabade idi kiet ke otu Mme Ntiense Jehovah, onyụn̄ obụp mi m̀mê n̄kpama nditiene imọ n̄kpep Bible. Mma nnyịme.

Mma ndifiọk ke Abasi ikamaha nte n̄kodude uwem ye nte ke ana ntre ndisida n̄kpọsọn̄ ibọk nnyụn̄ ntre ndisin̄wọn̄ sika ye ikọn̄ekpo. Edi ikememke utom ndision̄o idem n̄kpọn̄ n̄kpọsọn̄ ibọk. Mma mben̄e Jehovah Abasi ediwak ini nte an̄wam mi ntre idiọk edinam emi. N̄koyom ndinem enye esịt. (Mme N̄ke 27:11) Ke mma n̄kekpep Bible nnyụn̄ ndụk mbono esop Mme Ntiense Jehovah ke ọfiọn̄ itiokiet, mma ntre ndisida n̄kpọsọn̄ ibọk. Uwem mi enyene uduak idahaemi. Ntiehe aba mfụhọ mfụhọ. Mma nsobo ye Christian eren kiet ndien ima idọ idem nnyịn. Nda mme edumbet Bible mbọk eyen mi. Mmọkọm Jehovah etieti ke emi enye okokopde akam mi onyụn̄ an̄wamde mi!

ENYỊN̄ Marcio

NTE N̄KESIDUDE UWEM Ẹkebọk mi ke mbọhọ Santa André emi odude ke São Paulo ke Brazil. Mme owo ẹwak etieti ke obio emi. Ke ini n̄kosụk ndide eyenọwọn̄, ẹma ẹtap mi ẹsịn ke edin̄wọn̄ sika, edisịn un̄wọn̄, edida n̄kpọsọn̄ ibọk, ye uwo n̄wo. Ndusụk ufan mi ẹma ẹsiyịp ubomisọn̄ ẹnyụn̄ ẹdịbe ẹnyam n̄kpọsọn̄ ibọk. Kiet ke otu mmọ ama esideme n̄kpọsọn̄ ibọk ọnọ mme uyen oro ẹkedude ke edem nnyịn ke mfọn. Ndondo oro enye atapde mmọ ẹsịn, mmọ ẹma ẹsitọn̄ọ ndibọ enye n̄kpọsọn̄ ibọk ndep.

Mme bodisi ẹma ẹsisan̄a ẹkanade obio nnyịn, ndien mmọ ẹma ẹmụm mi ediwak ini ke n̄kpri ibet oro n̄kabiatde. Enyene isan̄ kiet emi mmọ ẹkekam ẹmụmde mi  ẹte ke mmesidịbe nnyam n̄kpọsọn̄ ibọk. Mma nsibọ n̄ka mme abiatibet se mmọ ẹkeyịpde ye ikan̄ mmọ mbon ke ufọk mi.

Mme owo ẹkesifefehe mi. Enyịn mi ekesidadat kpukpru ini. N̄kesisọpke ndisak imam. Ke nditịm ntịn̄, n̄kesikama iso kpukpru ini nte n̄kpọ eke ẹdọhọde ke mmọn̄ n̄wot owo. Ẹkesikot mi “Tufão” (emi ọwọrọde Oyobio) ke ntak emi n̄kesisịnde ntịme ke ebiet ekededi oro n̄kade. Mma nsin̄wọn̄ ọkpọsọn̄ mmịn etieti nnyụn̄ ndu oburobụt uwem. Ediwak ke otu mme ufan mi ẹma ẹkpan̄a mîdịghe ẹka n̄kpọkọbi. Mma nnen̄ede n̄kop mfụhọ tutu ntebe urụk ke n̄kọk eto nyom ndiyịri idem n̄wot.

NTE N̄KASAN̄ADE NTRE NDISIDA N̄KPỌSỌN̄ IBỌK Mma mben̄e Abasi an̄wam mi. Nte ini akakade, mma nsobo ye Mme Ntiense Jehovah nnyụn̄ ntọn̄ọ ndikpep Bible. Mma ndifiọk ke Abasi enyene enyịn̄ ndien ke enye ekere Jehovah, ye nte ke enye ekere aban̄a owo esinyụn̄ an̄wam mbon oro ẹnen̄erede ẹdomo ndida mme edumbet esie ndu uwem. (Psalm 83:18; 1 Peter 5:​6, 7) Akana nnam ekese ukpụhọde. Kiet ke otu mme n̄kpọ oro ẹkesọn̄de mi ẹkan ekedi ndikpep ndisisak imam.

Mma mben̄e Jehovah ediwak ini nte an̄wam mi, nnyụn̄ nnam item Bible. Ke uwụtn̄kpọ, mma ntre ndidụk nsan̄a ye n̄kani “ufan” mi nnyụn̄ ntre ndisika itie un̄wọn̄ mmịn. Utu ke oro, n̄kakam mmek ndidụk nsan̄a ye mbon oro ẹkedade mme edumbet Bible ẹdu uwem. Imemke utom inọ mi ndinam ukpụhọde, edi ndịghe aba inọ nsinyụn̄ nsịnke ntịme aba. Ndien ke se ikande isua duop idahaemi, ndaha n̄kpọsọn̄ ibọk aba.

ENYỊN̄ Craig

NTE N̄KESIDUDE UWEM Ẹkebọk mi ke obio-in̄wan̄ kiet ke South Australia. Ete mi ekedi  owo mmịn, ndien enye ye eka mi ẹma ẹdian̄ade ke ini n̄kedide isua itiaita. Eka mi ama afiak ọdọ ndọ, ndien n̄kodụn̄ ye enye tutu nsịm isua 17. Ke mma n̄kesịm isua 17, mma n̄kpep ndisifat erọn̄ idet nnyụn̄ n̄wọrọ n̄kodụn̄ ye otu mme afat erọn̄ idet emi ẹkesisan̄ade-san̄a ẹyom utom. Mma ntọn̄ọ ndisida nsio nsio n̄kpọsọn̄ ibọk, nsinyụn̄ n̄n̄wọn̄ ọkpọsọn̄ mmịn mbe ubọk. Mma nyak idet mi ọniọn̄, nsisịn n̄kpọ ntan̄ nnyụn̄ ndọn̄ n̄kwa. Mma nsifịbe ufụp, nsụn̄i mme owo, nnyụn̄ nsisọp iyatesịt. Ke akpatre, mma n̄ka n̄kpọkọbi.

Mma n̄wọrọ n̄ka ekpri obio kiet ke Edem Usoputịn Australia n̄kodụn̄ ye ufan mi an̄wan emi ekesinamde utom ke ufọkisen oro okodude do. Nnyịn mbiba ima isin̄wọn̄ sika, ikọn̄ekpo, ye mmịn; ikọtọtọ ikọn̄ekpo nnyịn.

NTE N̄KASAN̄ADE NTRE NDISIDA N̄KPỌSỌN̄ IBỌK Usen kiet, ke ndondo oro iketetde ikọn̄ekpo nnyịn ima, Mme Ntiense Jehovah ẹma ẹkọn̄ usụn̄ ntan̄wan̄ ufọk oro ikodụn̄de. Mma nnen̄ede n̄kpan̄ utọn̄ n̄kop se mmọ ẹketịn̄de, edi  ikokụreke ke oro. Nte ini akade, mma nnam ndụn̄ọde ke idemmi nnyụn̄ n̄kụt ke se Bible ekpepde edi akpanikọ. Ekem, mma ntọn̄ọ ndinam ukpụhọde ke uwem mi.

Ikebịghike, mma ndifiọk ke ana ntre ndisin̄wọn̄ ikọn̄ekpo. Ndinam didie ntre? Mma nnen̄ede nsịn idem ntọ ikọn̄ekpo, ntre ke ntọn̄ọ n̄kekere ke akpana nyak in̄wan̄ oro nnọ owo. Edi mma mbiere ke oro idifọnke, ntre mma mbiat in̄wan̄ oro mfep. Akam ama enen̄ede an̄wam mi ntre ndisida n̄kpọsọn̄ ibọk nnyụn̄ ntre ndisin̄wọn̄ n̄kpọsọn̄ mmịn mbe ubọk. Mma mben̄e Abasi ọnọ mi spirit esie man an̄wam mi ntre ndiọi edinam emi. Mma ntre n̄ko ndidụk nsan̄a ye mbon oro ẹkesinamde mme n̄kpọ emi. Nte n̄kakade iso n̄kpep Bible nnyụn̄ nda se n̄kpepde nsịn ke edinam, mma n̄keme nditre ndusụk ndiọi edu oro n̄kenyenede. Ufan mi an̄wan ama etiene ekpep Bible n̄ko onyụn̄ okpụhọde nte enye ekesidude uwem. Ima idọ idem nnyịn. Imenen̄ede ikop nsọn̄idem ke isua 21 emi ẹbede, imonyụn̄ ikop inemesịt ndinyene nditọ iba. Idem esinyek mi ke ini n̄kerede nte uwem mi ekpetiede edieke Jehovah mîkpakan̄wamke mi n̄kpụhọde nte n̄kesidude uwem.

AKPAN ITIE N̄WED ABASI

“Jehovah [edi] odudu mi ye ukeme mi.”​—Isaiah 12:2.

ITEM

Edieke ekemede, sion̄o idem kpọn̄ owo, ebiet, ye n̄kpọ ekededi oro ekemede ndinam afiak ọtọn̄ọ ndisida n̄kpọsọn̄ ibọk. Ndụn̄ọde owụt ke ndikụt ekededi ke otu emi ekeme ndinam afiak oyom ndida n̄kpọsọn̄ ibọk.

NDI AMA ỌFIỌK . . . ?

Ndida n̄kpọsọn̄ ibọk ekeme ndibiat fi mfre.

SE NDINAMDE

Edieke mfiakde nda ọkpọsọn̄ ibọk, se ndinamde edi ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Ntak emi ekemede ndiyom owo anam ikpọ ukpụhọde ke uwem esie edieke enye oyomde nditre ndida n̄kpọsọn̄ ibọk?

● Didie ke ndinyene ifiọk Abasi ekeme ndin̄wam owo anam emi?

[Se ẹwetde ke ikpọ abisi ke page 253]

“Ndidu uwem nte N̄wed Abasi etemede anam n̄kop inemesịt onyụn̄ anam uwem mi enyene uduak.”​—Marta

[Ndise ke page 256]

Nditre mbumehe etie nte ndifehe n̄wọrọ ke ufọk oro ikan̄ odụkde​—n̄kpọ ayatak fi, edi ayanyan̄a uwem fo