Ibuot 38

Nso ke Ndida Uwem Mi Nnam?

“Ke akpa, n̄ketịmekede esịt mban̄a ini iso. Edi nte n̄kekperede ndikụre n̄wed, mma ndikụt ke mmọn̄ ntọn̄ọ uwem, ke ana nnam utom, ndien ke ami ndidep se ededi oro nyomde.”—Alex.

YAK idọhọ ke afo ke etịm idem ndika isan̄ ke ebiet emi enen̄erede oyom usụn̄ ọkpọn̄ edem mbufo. Anaedi eyebem kan̄a iso ese n̄wed ndise obio man ọfiọk usụn̄ emi ọfọnde akan ndisan̄a nsịm do. Ukem oro ke edi ye ndidiomi se edinamde ke ini iso. Akparawa kiet emi ekerede Michael, emi odude idahaemi ke kiet ke otu n̄kọk itieutom Mme Ntiense Jehovah, ọdọhọ ete: “Ana emek kiet ke otu ediwak n̄kpọ oro ẹdude.” Edinam didie ọfiọk se ekpemekde ke emi n̄kpọ ẹwakde ntem? Michael ọbọrọ ete: “Ana ọfiọk se oyomde ndida uwem fo nnam.”

Da nte ke se oyomde ndida uwem fo nnam etie nte ebiet oro oyomde ndika. Etie nte udusịmke do edieke mûdiọn̄ọke usụn̄ oro akpasan̄ade aka. Ekpenen̄ede ọfọn osio n̄wed ndise obio ese usụn̄ oro akpasan̄ade. Ndinam ntem ọwọrọ ke afo anam item oro ẹnọde ke Mme N̄ke 4:26 emi ọdọhọde ete: “Nam usụn̄ ukot fo ọdọnọ.” Contemporary English Version akabade enye ntem: “Fiọk ebiet emi akade.”

 Ke mme isua oro ẹdide ke iso, afo eyebiere ediwak akpan n̄kpọ, ke uwụtn̄kpọ, nte akpatuakde ibuot ọnọ Abasi, utọ utom oro akpanamde, owo oro edidọde, nte ubon fo editiede, ye mme akpan n̄kpọ eken. Idisọn̄ke fi ndinam nti ubiere edieke ọfiọkde ebiet emi akade. Nte ebierede se edinamde ke ini iso, odu n̄kpọ kiet emi mûkpudehedei ufre.

“Ti Andibot Fi”

Man enen̄ede okop inemesịt, ana eti ikọ oro enyene-ọniọn̄ Edidem Solomon eketịn̄de ete: “Ti Andibot fi ke adan̄aemi osụk edide uyen.” (Ecclesiastes 12:1, Today’s English Version) Emi ọwọrọ ke ndiyom ndinem Abasi esịt anam fi emek se ededi oro emekde.

Ntak emi ọfọnde ebem iso oyom ndinem Abasi esịt? Ke Ediyarade 4:11, Bible ọdọhọ ete: “Jehovah, Abasi nnyịn, afo omodot ndibọ ubọn̄ ye ukpono ye odudu, koro afo okobotde kpukpru n̄kpọ, ndien ke ntak uduak fo ke mmọ  ẹkedu, oro okonyụn̄ anam ẹbot mmọ.” Kpukpru edibotn̄kpọ ke heaven ye ke isọn̄ ẹkpenyene ndikọm Andibot. Ndi emesikọm Abasi ke “ibifịk ye kpukpru n̄kpọ” emi enye ọnọde fi? (Utom 17:25) Ndi isidọn̄ke fi ndinam n̄kpọ Jehovah Abasi man owụt esịtekọm ke kpukpru se enye ọnọde fi?

Nditi Andibot anam ediwak uyen ke otu Mme Ntiense Jehovah ẹdụk utom uyọhọ ini. Kere ban̄a ndusụk inem inem ifetutom oro afo ekemede ndinyene.

Utom Usiakusụn̄. Mme asiakusụn̄ ofụri ini ẹsibiat ekese ini ke an̄wautom. Ukpep oro mmọ ẹbọde ye ifiọkutom oro mmọ ẹnyenede ẹnam mmọ ẹnyene usọ ke ndikpep mme owo Bible.

Ndinam utom ke ebiet oro udọn̄ okponde. Ndusụk owo ẹsiwọrọ ẹka ebiet oro mme anditan̄a etop Obio Ubọn̄ mîwakke. Mbon en̄wen ẹsikpep obufa usem ẹnyụn̄ ẹka ẹkenam utom ye esop oro ẹsemde usem oro, emi odude ekpere mmọ mîdịghe ẹwọrọ ẹka esenidụt. a

Utom isụn̄utom. Ẹsinọ mme asiakusụn̄ oro ẹdotde ẹnyụn̄ ẹnyenede nsọn̄idem ye ukeme ukpep man ẹka  ẹkenam utom ke esenidụt. Mme isụn̄utom ẹsikop inemesịt ke utom mmọ.

Utom Bethel. Mbonubon Bethel ẹsinam utom ke n̄kọk itieutom Mme Ntiense Jehovah. Ke ndusụk idụt, mmọ ẹsinam mme n̄kpọ oro ẹsidade ẹkpep Bible ẹnọ ẹwọrọ.

Utom ofụri ererimbot. Mme asan̄autom ofụri ererimbot ẹsika mme idụt en̄wen ẹken̄wam ke ndibọp mme Ufọkmbono Obio Ubọn̄, Ufọk Mbono, ye mme n̄kọk itieutom.

Ufọkn̄wed Ukpep Bible Eke Nditọete Iren Emi Mîdọhọ Ndọ. Ẹsikpep mbiowo ye mme asan̄autom unamutom oro mîdọhọ ndọ, emi ẹnyụn̄ ẹdotde, nte ẹsitịmde esop ye nte ẹkpenọde utịn̄ikọ. Ẹsinọ ndusụk mbon oro ẹkụrede ukpep ke ufọkn̄wed emi ẹkenam utom ke esenidụt.

Biere Se Aduakde Ndinam

Utom uyọhọ ini edi ata eti utom emi asan̄ade ye akpakịp edidiọn̄. Edi oyoyom ebem iso ekere nte edinamde utom emi. Ke uwụtn̄kpọ, bụp idemfo ete, ‘Nso ke n̄kpanam nda nse mban̄a idemmi?’

Kelly okoyom ndikabade ndi asiakusụn̄, ntre enye ama ebem iso ebiere se enye edinamde ada ese aban̄a idem esie. Enye ọdọhọ ete:  “N̄kenyene ndimek utom oro ndikemede ndida nse mban̄a idemmi nte nsụk nnamde utom usiakusụn̄.”

Kelly ama ọtọn̄ọ n̄wed ke ufọkn̄wed ukpep ubọkutom. Emi ama an̄wam enye anam akpan n̄kpọ oro enye okoyomde ndinam. Kelly ọdọhọ ete: “Se ikebehede mi ikan ekedi ndidụk utom uyọhọ ini. N̄kadaha mme n̄kpọ eken ke akpan n̄kpọ nte utom oro.” Kelly enem esịt aban̄a se enye ekemekde. Enye ọdọhọ ete: “N̄kere ke mfọnn̄kan ubiere ke n̄kanam oro.”

Dọhọ Ẹn̄wam Fi

Edieke akade ebiet emi mûtịmke udiọn̄ọ, etie nte oyosụk atuak ada obụp owo usụn̄. Emekeme ndinam ukem oro nte osụk odiomide se edinamde ke ini iso. Dọhọ mbon en̄wen ẹn̄wam fi. Mme N̄ke 20:18 ọdọhọ ete: “Item anam uduak ọsọn̄ọ ada.”

 Ete ye eka fo ẹdi ata mbon oro ẹkemede ndinọ fi item. Edi emekeme ndikọbọ item n̄ko nto mme Christian oro ẹma ẹkekọri ẹsịm ọyọhọ idaha, kpa mbon oro ẹdude uwem nte Ikọ Abasi etemede. Roberto emi edide isua 27 onyụn̄ edide owo ubon Bethel ọnọ ekikere ete: “Kpebe ikpọ owo oro ẹnịmde nti uwụtn̄kpọ ke esop mbufo m̀mê ke mbọhọ esop mbufo.”

Ke akande kpukpru, Jehovah Abasi oyom ndin̄wam fi anam nti ubiere emi ẹdinamde fi enen̄ede okop inemesịt. Ntre ben̄e Jehovah an̄wam fi ‘aka iso ọfiọk se uduak esie edide’ man ọfiọk se akpanamde ke ini iso. (Ephesus 5:17) Ke kpukpru n̄kpọ, nam se Mme N̄ke 3:5, 6 etemede ete: “Buọt idem ye Jehovah ke ofụri esịt fo kûnyụn̄ uberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.”

Edieke oyomde ndifiọk n̄kpọ efen mban̄a se inemede emi, se DVD oro “Young People Ask—What Will I Do With My Life?” Enye odu idahaemi ke se ibede usem 30

[Ikọ Idakisọn̄]

AKPAN ITIE N̄WED ABASI

“‘Ẹda emi ẹdomo mi ẹse,’ Jehovah mme udịm ọdọhọ, ‘m̀mê ami ndiberekede window heaven nnọ mbufo nnyụn̄ n̄n̄wan̄a edidiọn̄ nnọ mbufo tutu mbufo inanake baba n̄kpọ kiet.’”—Malachi 3:10.

ITEM

Nyene nneme ye ndusụk mbon oro ẹma ẹkenam utom uyọhọ ini ke ediwak isua. Bụp mmọ se ikanamde mmọ ẹmek utom oro ye se inamde mmọ ẹkere ke ẹdiọn̄ mmimọ.

NDI AMA ỌFIỌK . . . ?

Odudu ikan̄ ilektrik ekeme ndinam radio ebre ikwọ. Kpasụk ntre, edisana spirit Abasi ekeme ndin̄wam fi anam ekese ke utom Abasi.​—Utom 1:8.

SE NDINAMDE

Man n̄keme ndinen̄ede n̄kop inem utom ukwọrọikọ, nyenyene nneme ye ․․․․․

Se ndibụpde ete m̀mê eka mi mban̄a n̄kpọ emi edi ․․․․․

AFO EKERE DIDIE?

● Nso ke ekeme ndinam nda nse mban̄a idemfo?

● Didie ke ekeme ndida ukeme fo ntoro Jehovah?

● Ewe ikpehe utom uyọhọ ini oro ẹsiakde ke ibuotikọ emi ke ama akan?

[Se ẹwetde ke ikpọ abisi ke page 313]

“Mmenen̄ede mma nnyụn̄ n̄kpono ete ye eka mi. Nte mmọ ẹsọn̄ọde ẹda ẹnam utom ukwọrọikọ, nte mmọ ẹyọde nsọn̄ọn̄kpọ, ọkọrọ ye nsịnudọn̄ oro mmọ ẹkenọde mi ẹte ndụk utom uyọhọ ini, kpukpru emi ẹnen̄ede ẹn̄wam mi.”​—Jarrod

 [Ekebe ke page 314]

Utomufọk

Se Nduakde Ndinam

Sịn idiọn̄ọ ke mme n̄kpọ oro aduakde ndinam. Wet n̄kpọ yọhọ ufan̄ oro ẹnịmde mîdịghe wet mbufa n̄kpọ oro aduakde ndinam.

Se Nduakde Ndinam ke An̄wautom

□ Nyanam ini oro ndade n̄kwọrọ ikọ awak esịm hour ․․․․․ ke ọfiọn̄

□ Nyesinịm n̄wed ․․․․․ ke ọfiọn̄ kiet kiet

□ Nyesikot Bible ke ini n̄kwọrọde ikọ

□ Nyesinam mfiakn̄ka ․․․․․ ke ọfiọn̄ kiet kiet

□ Nyọtọn̄ọ ukpepn̄kpọ Bible

□ N̄kpọ en̄wen: ․․․․․

Nte Ndikpepde N̄kpọ

□ Nyokot page ․․․․․ ke Bible kpukpru usen

□ Nyesitịm idem nnọ mbono esop kpukpru urua

□ Nyanam ndụn̄ọde ke Bible man mfiọk mme n̄kpọ emi:․․․․․

Se Nduakde Ndinam ke Esop

□ Nyesibọrọ ke nsụhọde n̄kaha mbụme kiet ke kpukpru mbono esop

□ Nyọkọtọn̄ọ nneme ye akwa owo oro n̄kpamade ndimehe

□ N̄yaka n̄kese akanieren m̀mê akanian̄wan m̀mê owo n̄kpọnnam ke esop nnyịn

□ N̄kpọ en̄wen: ․․․․․

Usenọfiọn̄ Mfịn ․․․․․

Ke ufan̄ ọfiọn̄ itiokiet, dụn̄ọde se ekewetde man ese m̀mê amanam mmọ. Emekeme ndinam ukpụhọde ifan̄ mîdịghe ewet n̄kpọ en̄wen esịn.

[Ndise ke page 312]

Ndibiere se edinamde ke ini iso idiyakke abaha odudu fo ke n̄kpọ oro mîwọrọke usụn̄