OWO akwaifiọk Netherlands oro Spinoza ekewet ete: “Mmodomo nditre ndisak mme edinam owo, nditre nditua mmọ, m̀mê ndisua mmọ, edi ndifiọk mmọ.” Nte andikpep, afo omosobo n̄kpọ-ata eke edidomo ndifiọk mme ekikere, idaha ke uwem, ye mme edinịm ke akpanikọ nditọ ufọkn̄wed ẹmi ẹdude ke idak ukpeme fo, esịnede nditọ ufọkn̄wed ẹmi ẹdide nditọ Mme Ntiense Jehovah. Ndusụk ini, mme utọ nditọ ufọkn̄wed oro ẹkeme ndida se itiede nte idaha emi owo mîmeheke ke ndusụk n̄kpọ. Edi ke ini mme utọ edinam oro nte an̄wan̄ade ẹtode mme edinịm ke akpanikọ eke ido ukpono ye eke ido uwem eyen ufọkn̄wed, mmọ ẹyom ntịn̄enyịn fo. Watch Tower Bible and Tract Society (n̄ka umịn̄ n̄wed Mme Ntiense Jehovah) osio ediye ekpri n̄wed emi ẹnyụn̄ ẹnam enye man an̄wam fi otịm ọfiọk nditọ ufọkn̄wed ẹdide Mme Ntiense. Nnyịn imodori enyịn ite ke afo eyeda ini etịn̄ enyịn okot enye.

Ndifiọk mme edinịm ke akpanikọ ido ukpono mbon efen iyomke afo onyịme m̀mê etiene mmọ, ndien ndisian owo n̄kpọ idịghe ndikabade owo esịt. Idịghe uduak ediye ekpri n̄wed emi ndinyịk mme ekikere ido ukpono eke Mme Ntiense ndori fi m̀mê nditọ ufọkn̄wed fo. Udọn̄ nnyịn edi sụk ndinam fi ọfiọk aban̄a mme edumbet ye mme edinịm ke akpanikọ ẹmi mme ete ye eka ẹkpepde ndusụk nditọ ufọkn̄wed fo man otodo emem fi utom ndidiọn̄ọ nditọ Ntiense nnyụn̄ ndiana kiet ye mmọ. Edi akpanikọ, se ẹkpepde nditọwọn̄ ye se mmọ ẹnamde ẹkeme nditre ndidu ke n̄kemuyo kpukpru ini, sia eyenọwọn̄ kiet kiet ekpepde ndifori ubieresịt esie.

Ukem nte ata ediwak ete ye eka, Mme Ntiense Jehovah ẹyom nditọ mmọ ẹbọ ekese ufọn ẹto ufọkn̄wed. Ke ntak oro, mmọ ẹsikpep nditọ mmọ ndidiana kiet ye mme andikpep mmọ. N̄ko, mme ete ye eka ẹdide Mme Ntiense ye nditọ mmọ ẹsidara ke ini mme andikpep ẹnamde n̄kpọ ye mmọ ke ifiọk ye ukpono.

Mme Ntiense Jehovah ẹdi mme Christian oro ẹfiọkde ke ofụri ererimbot. Nte ededi, ndusụk ini ẹsida mmọ ke usụn̄ efen. Ke ntre, idotenyịn nnyịn edi nte ke ediye ekpri n̄wed emi eyen̄wam fi otịm ọfiọk nditọ Mme Ntiense ẹmi ẹdude ke idak ukpeme fo. Akpan akpan, nnyịn idori enyịn ke afo eyekụt ntak, ke ndusụk akpan idaha, mmọ ẹkemede ndiyom unen edidi isio.