UDUAK ediye ekpri n̄wed emi idịghe ndineme mme edinịm ke akpanikọ ido ukpono eke Mme Ntiense Jehovah ọyọhọ ọyọhọ. Utu ke oro, nnyịn idomo ndinam ndusụk edumbet oro Mme Ntiense ẹnịmde ke akpanikọ an̄wan̄a ndinyụn̄ n̄wụt in̄wan̄în̄wan̄ mme orụk odudu ubon oro ẹkarade eyen ufọkn̄wed fo edieke ete m̀mê eka m̀mê mbiba ẹdide Mme Ntiense.

Mme Ntiense Jehovah ẹnen̄ede ẹdori nsọn̄uyo ke n̄kọri eke spirit nditọ mmọ. Mmọ ẹnyụn̄ ẹnen̄ede ẹnịm nte ke emi anam nditọ mmimọ ẹkọri ke mme ikpehe eken. Mme edinịm ke akpanikọ oro mmọ ẹnyịmede ye mme edumbet oro mmọ ẹtienede ẹnam uwem mmọ ẹnyene se ẹwọrọde ẹnyụn̄ ẹn̄wam mmọ ndiyọ mme mfịna mmọ eke usen ke usen. Ke adianade do, mme edinịm ke akpanikọ ye mme edumbet oro ẹkpenyene ndinụk mmọ ndidomo ndidi ifịk ifịk nditọ ufọkn̄wed ye nti nditọ obio ke ofụri uwem.

Mme Ntiense ẹdomo ndinyịme akpanikọ oro odude ke uwem, ntre mmọ ẹda ubọ ukpep ke ata akpan n̄kpọ. Ke ntre, edi uduak mmọ ndidiana kiet ye afo ke adan̄a nte mmọ ẹkekeme. Ke n̄kan̄ mmọ, ke mme ufọkidụn̄ mmọ ye ke mme itie utuakibuot mmọ ke ofụri ererimbot, mmọ ẹyeka iso ndisịn udọn̄ nnọ nditọ mmọ ndinam udeme mmọ ke edidianakiet emi on̄wụmde mfri mi.