KE N̄KPỌ nte 1987 esịm 1989, ikesikama idem Enyọn̄-Ukpeme kiet kpọt inịm ukpepn̄kpọ Enyọn̄-Ukpeme; eyenete emi enịmde ukpepn̄kpọ oro ekesikama. Ekesiwak ndidi enye emi ẹdade ubọk ẹsion̄o ẹwet. Mma n̄ka n̄kọdọhọ ebiowo emi ekekerede Genadi Gudadze nte yak idomo ndimịn̄ n̄wed nnyịn ke idem nnyịn.

Mbemiso oro, nditọete ẹkesida ekpri n̄kpọ ẹfotokọpi mme n̄wed ikọ Abasi, edi ikesiwakke. Man mmọ ẹkeme ndinyene mme magazine kpukpru ini, ima iyom masịn fotokọpi emi ọfọnde akan oro, iyom ukwak utaip n̄wed, iyom owo emi ọdiọn̄ọde nditaip n̄kpọ, ye itie emi ididepde pepa kpukpru ini. Edi ini oro kpukpru n̄kpọ umịn̄n̄wed ye pepa ẹkesịne san̄asan̄a mbon ukara ke ubọk.

Mma n̄ka n̄kọbọ ete kiet ukwak utaip n̄wed emi ukara mîkoyomke aba. Udun̄wan eka mi ama ọdiọn̄ọ nditaip n̄kpọ; mma nnyụn̄ ndiọn̄ọ ke enye eyekeme ndin̄wam nnyịn. Nditọete  ẹma ẹnam obufa n̄kpọ umịn̄n̄wed ẹnyụn̄ ẹkụt itie emi ẹdisidepde pepa. Ima inyene kpukpru n̄kpọ, ndien ikebịghike ima imịn̄ akpa Enyọn̄-Ukpeme ke usem Georgian.

Edi ima inyene mfịna en̄wen. Usen kiet, Genadi ama ọdọhọ mi ete: “Ana iyom itie en̄wen emi idisidepde pepa.” Enye ama okụt ediwak pepa ke itie emi ukara ẹkesinyamde pepa, edi enye ikekemeke ndidep sia ukara ẹma ẹdọn̄ mme bodisi ẹte ẹsisan̄a ẹyep enye. Mma n̄kere m̀mê idinam didie. Mma ndọhọ kwa ini kwa ini nte: “Nnyịn idikemeke!” Genadi ama ọdọhọ mi uko uko ete: “Tre ndidọhọ, ‘nnyịn idikemeke.’ ‘Abasi ekeme ndinam kpukpru n̄kpọ’!”​—⁠Matt. 19:⁠26.

Mma n̄ka ọfis oro edem usen. Idem ama enyek mi etieti nte n̄kosụk n̄kerede n̄kpọ emi. Edi Jehovah ama an̄wam mi n̄kokụt mma kiet emi esitaipde n̄kpọ do, emi okonyụn̄ anamde n̄kpọ ufan ufan. Mma oro ama enyịme ndin̄wam mi. Enye ama emen se n̄koyomde ndidep ọsọk ebe esie emi ekedide akwa owo do. Mma ntọn̄ọ ndisidep pepa do ke ubọk ke ubọk; nnyịn ikananake pepa aba.