GEORGIA ẹketọn̄ọ ndikara idemmọ ke 1991, kpa isua oro ke ukara Soviet Union akasuana. Ukpụhọ ukara ye ntịme mbio obio ama anam uwem ọsọn̄ etieti ye mme owo. Genadi Gudadze emi ekedide esenyịn circuit ini oro ọdọhọ ke mme owo ẹma ẹsida ke udịm tọn̄ọ ke usenubọk tutu eyo ekpere ndikụt man ẹdep bred.

Mme Ntiense ẹma ẹsiwak ndikwọrọ ikọ nnọ mbon emi ẹdade ke udịm ẹyom ndidep bred. Genadi ọdọhọ ete: “Nsọn̄ọn̄kpọ ama anam kpukpru owo ẹyom ndikop akpanikọ. Ima ibọ adres ediwak owo emi ẹkeyomde ẹdi ẹdikpep mmimọ Bible.”

 Ke utịt mbono esop, nditọete emi ẹkedade usụn̄ ẹma ẹsikot enyịn̄ ye adres mbon emi ẹkedọhọde ẹdikpep mmimọ Bible. Ekem mme asuanetop ẹyemek owo emi mmọ ẹdikade ikekpep Bible.

Brọda Levani Sabashvili emi ekedide ebiowo ke Tbilisi etịn̄ mbụk ebe ye n̄wan kiet, Roini ye Nana Grigalashvili, emi ẹkeyomde ẹdikpep mmimọ Bible. Enye ọdọhọ ete: “Mme asuanetop ẹma ẹbọ adres nsio nsio owo emi ẹkedọhọde ẹdikpep mmimọ Bible, edi idụhe eke akamade ndibọ eke ebe ye n̄wan emi. Ebiet emi mmọ ẹkedụn̄de ama oyom usụn̄ etieti, ndien ediwak nnyịn ima inyenyene ediwak nditọ ukpepn̄kpọ Bible.”

Ke ọfiọn̄ ifan̄ ama ekebe, ebe ye n̄wan oro ẹma ẹfiak ẹwet ẹdọhọ ke imoyom owo edikpep mmimọ Bible. Ọyọhọ ikata emi mmọ ẹkewetde, mmọ ẹma ẹkpe Mme Ntiense ubọk ẹte ẹdikpep mmimọ Bible man iyịp mmimọ okûkọbọ mmọ. (Utom 20:​26, 27) Levani ọdọhọ ete: “Ekedi ini ẹdiade usọrọ obufa isua, nnyịn ikesimaha ndika mbịne mme owo ke ini usọrọ oro. Edi ima ikere ke edi se ikade ndien ikekpep ebe ye n̄wan emi Bible.”

Idem ama akpa Roini ye Nana emi ẹkeyomde-yom owo edikpep mmimọ Bible, ke ini Levani ye eyenete en̄wen ẹkedide ufọk mmọ usenubọk kiet, kpa ye emi ekebịtde n̄kpa n̄kpa. Mmọ ẹma ẹtọn̄ọ ndikpep Bible inikiet inikiet. Idahaemi Roini ye Nana ye nditọ mmọ ẹdi mme asiakusụn̄ ofụri ini.

Mbon emi ẹma ẹkedọdiọn̄ọ akpanikọ ẹma ẹma se mmọ ẹkekpepde ẹnyụn̄ ẹda ini ye okụk mmọ ẹn̄wam mbon en̄wen ẹkop eti mbụk. Kpa ye oro Badri Kopaliani ye  Marina an̄wan esie ẹkenyenede nditọ, mmọ ẹma ẹsitiene ẹka ata nsannsan ebiet man ẹkenam mbon en̄wen ẹkop eti mbụk.

Ke utịturua, Badri, Marina, ye nditọ mmọ irenowo iba emi ẹkekerede Gocha ye Levani, ẹma ẹsika Dusheti ẹkekwọrọ ikọ. Dusheti ekedi ediye obio emi etiede obot obot, okonyụn̄ odu ke edere edere Tbilisi. Ndusụk ini, mmọ ẹma ẹsiwat itiat 90 ke n̄wọn̄ọde n̄wọn̄ọde usụn̄ man ẹkeme ndisịm mme obio emi ẹdude ke ata esịt esịt.

Usen kiet mma kiet ama ọdọhọ Badri ye n̄wan esie ẹdi itieutom mmimọ. Badri ọdọhọ ete: “Ke ima ikodụk do, ima ikụt ke n̄kpọ nte owo 50 ke ẹketie ẹbet nnyịn! Ama akpa mi idem etieti, edi mma mbọn̄ akam nnọ Jehovah nnyụn̄ ntọn̄ọ ndineme mme ufan̄ikọ ke Matthew ibuot 24 emi aban̄ade idiọn̄ọ akpatre usen. Se n̄ketịn̄de ama akpa owo kiet idem tutu enye ọdọhọ ete, ‘Ntak emi oku ufọkabasi nnyịn mîsitịn̄ke utọ n̄kpọ emi inọ nnyịn?’ ”

Editi n̄kpa Jesus ama anam ediwak mbon emi ẹmade ikọ Abasi ke Georgia ẹkop eti mbụk. Ke uwụtn̄kpọ, ẹkenịm Editi eke isua 1990 ke ufọk Sista Ia Badridze ke Tbilisi. Edinam emi ama anam mbọhọidụn̄ esie ẹbụp mbụme ẹban̄a se nnyịn isinamde.

Sista Badridze ama ọdọhọ ẹdinịm Editi oro ke ufọk esie emi okodude ke ọyọhọ enyọn̄ 13 ke ufọkenyọn̄ kiet. Nditọ esie ẹma ẹn̄wam enye ẹtan̄ n̄kpọ ẹsio ke ufọtufọk man ufan̄ odu. Mfịna ekedi nte enye edisan̄ade inyene n̄kpọitie ekem mbon emi ẹdidụkde Editi. Ke Georgia, edieke ẹbọde n̄kpọitie ke ukpeokụk ẹnam usọrọ, ana ẹbọ okpokoro ẹdian. Sista Badridze ọkọbọ n̄kpọitie kpọt, ntre ẹma ẹbụp enye ẹte: “Ubọhọ okpokoro udian? Ẹdidori udia ke m̀mọ̀n̄ ẹdia?”

Owo 200 ẹkedụk Editi n̄kpa Christ ke ufọk Sista Badridze. Imosụk ise mbọhọidụn̄ esie ẹkebụpde enye ediwak mbụme ẹban̄a utom Mme Ntiense Jehovah!

Ke 1992, ẹkesibọ ikpọ efembono ẹda ẹnịm Editi ke nsio nsio itie ke Georgia. Davit Samkharadze, emi okodụn̄de ke Gori ọdọhọ ke isua oro, esenyịn circuit ama obụp mmimọ m̀mê m̀mọ̀n̄ ke mmimọ iduak ndinịm Editi.

 Ke ini esenyịn circuit okokopde ke mmọ ẹduak ndinịm ke ufọk owo, enye ama obụp mmọ ete: “Ndi akamba efembono idụhe ke obio emi? Nso inam mbufo mîkaha ikọbọ enye oro?” Efembono oro ẹtetịn̄ mi ama ekeme ndidụk owo ebe tọsịn kiet, edi mme asuanetop ẹkedi owo ikie ye ifan̄ kpọt, ntre mmọ ẹkekere ke ufọn idụhe ndibọ utọ akamba efembono oro.

Esenyịn circuit ama ọdọhọ mmọ ete: “Edieke asuanetop kiet kiet ekemede ndisan̄a ye owo duop ndi Editi, ẹyeyọhọ ufọk emi.” Eketie nditọete nte ke utọ n̄kpọ oro ikemeke nditịbe, edi mmọ ẹma ẹbiere ndinam se esenyịn oro eketịn̄de. Idem ama akpa mmọ etieti ndikụt owo 1,036 ẹdide ẹdidụk Editi! *

Ke 1992, ediwak itie okosụk ododu ke Georgia emi ikọt Jehovah mîkọkwọrọke ikọ kan̄a. Mmọ ẹdinam didie ikọkwọrọ ikọ do ke ini nsọn̄ọn̄kpọ oro?

Tamazi Biblaia, emi okodụn̄de ke edem usoputịn Georgia ọdọhọ ete: “Esenyịn circuit kiet ama osobo ye nnyịn owo ifan̄ eneme nte ẹdisan̄ade ikọkwọrọ ikọ do. Nnyịn ikọdiọn̄ọke ndutịm emi esop Abasi ẹnamde ẹban̄a mbon emi ẹkpedide mme akpan asiakusụn̄. Se ikebehede nnyịn ekedi nte ẹdisan̄ade ikwọrọ ikọ usọp usọp.” (2 Tim. 4:⁠2) Mmọ ẹma ẹmek mme asiakusụn̄ 16 ẹnọ ẹka nsio nsio itie ke idụt oro ẹkekwọrọ ikọ.​—⁠Se map ke page 117.

Ke May 1992, ẹma ẹnịm mboho hour ita ke Tbilisi ye mme asiakusụn̄ oro ẹkedọhọde ẹkekwọrọ ikọ ke nsio nsio itie oro ke ọfiọn̄ ition. Ẹkenịm mboho emi man ẹsọn̄ọ mmọ idem. Kpukpru ọfiọn̄, mbiowo ẹma ẹsika ẹkese mmọ,  ẹda Ikọ Abasi ẹsọn̄ọ mmọ idem, ẹnyụn̄ ẹnọ mmọ n̄kpọ ẹda ẹn̄wam idem.

Ẹma ẹnọ nditọete iban iba ẹka Ozurgeti ẹkekwọrọ ikọ. Asiakusụn̄ iba emi ẹkedi Manea Aduashvili ye Nazy Zhvania. Manea ekedi isua 60 ini oro. Enye ọkọdọhọ ete: “Ima idiọn̄ọ ke mma kiet emi akamade ikọ Abasi odụn̄ ekpere Ozurgeti. Ntre ini isịmde do, ima idiomi ndikese enye. Ke ini isịmde ufọk mma oro, enye ye owo 30 ẹketetie ẹbet nnyịn. Ima inyụn̄ itọn̄ọ ndikpep ediwak owo Bible usen oro.”

Ke mmọ ẹma ẹkesịm do, mmọ ẹma ẹda ọfiọn̄ ifan̄ kpọt ẹn̄wam ediwak owo. Ke ufan̄ ọfiọn̄ ition, owo 12 ẹma ẹben̄e idem ndina baptism.

Ẹma ẹnọ nditọete iba, Brọda Pavle Abdushelishvili ye Brọda Paata Morbedadze, emi ẹkedide mme asiakusụn̄ ẹka Tsageri. Se mme owo do ẹnịmde edi ido mme ete ete mmọ emi ẹbuakde ye ukpepn̄kpọ ufọkabasi.

 Ọfiọn̄ ition oro ẹkedọhọde mme asiakusụn̄ ẹkwọrọ ikọ ke Tsageri ama edisịm utịt ke ini tuep ye snow okodude etieti. Edi ẹma ẹdọhọ Brọda Paata aka akan̄wam ẹkabade n̄wed ke ebiet en̄wen. Akana Brọda Pavle ebiere m̀mê iyọnyọn̄ m̀mê idinyọn̄ke. Pavle ọdọhọ ete: “Mma ndiọn̄ọ ke ini etuep isimemke ke Tsageri, edi mma ndiọn̄ọ n̄ko ke mbon emi isikpepde Bible ẹyeyom un̄wam etieti, ntre mma mbiere ndidu do.”

Pavle ọdọhọ ete: “N̄kodụn̄ ye ubon kiet do. Mma nsikwọrọ ikọ tọn̄ọ usenubọk tutu ekpere ndisịm mbubreyo. Ekem ke mbubreyo, mma nsitiene mme enyeneufọk ntie n̄webe ikan̄ ke ufọtufọk, ke ufọkenyọn̄ mmọ. Ke ini nyomde ndikodụk idap, mma nsimen itam nyara; n̄kesinyụn̄ mfụhọ ata akamba abran̄kịn nde idap.”

Ini mbiowo iba ẹkade ndise Pavle ke ini ndaeyo, owo 11 ẹma ẹdedi mme asuanetop emi mînaha baptism. Ikebịghike kpukpru mmọ ẹma ẹna baptism.