IDEM mbemiso Sanel akamanade, mme dọkta ẹma ẹdọhọ ete ye eka esie ke enye eyenyene nsio nsio udọn̄ọ emi ẹkemede ndida enye ibuot, edieke enye mîkam ikpaha-kpa ke idịbi. Ntre ke ini enye akamanade, ama oyom ẹsiak enye idem kpa usen oro. Edi ete ye eka esie ikekwe dọkta ke idụt mmọ emi edisiakde enye idem isịnke iyịp. Mmọ ẹkedụn̄ ke Abkhazia, emi mîkesịneke aba ke idak Georgia.

Ete ye eka Sanel ẹma ẹkot Kọmiti Unyene Nneme ye Mbon Ufọkibọk. * Esịt ama enem mmọ ndikop ke kọmiti emi ẹkụt dọkta emi enyịmede ndisiak Sanel idem isịnke iyịp ke Tbilisi, ibuot obio Georgia. Edi sia idem okosụk ememde-mem eka Sanel, enye ikekemeke ndika Tbilisi. Ntre, ẹma ẹdọhọ yak eka ete ye eka eka Sanel emi ẹdide Mme Ntiense Jehovah ẹmen enye ẹka ufọkibọk oro ke Tbilisi.

Kpa ye oro mîkememke, ẹma ẹsiak Sanel idem owo isịnke iyịp. Eka ete ye eka eka Sanel ẹkewet ẹte: “Ima idu ke ufọkibọk oro ibe usen 20. Ke ofụri ini oro, ediwak nditọete ke Georgia ẹma ẹsidi ẹdise nnyịn ẹnyụn̄ ẹn̄wam nnyịn. Mmọ ẹma ẹsọn̄ọ nnyịn idem. Isikokot iban̄a nte nditọete nnyịn ẹmade kiet eken, edi idahaemi imada enyịn nnyịn ikụt ima emi.”