EYENETE an̄wan emi ekerede Gulizar ọdọhọ ete: “Mmesikọm Jehovah ke ndinam ẹnịm mbono esop ke usem emana mi.”

Gulizar ekedi asuanetop emi mînaha baptism ke ofụri isua itiaita. Edi enye akana baptism ke ini emi enye ọkọtọn̄ọde ndidụk mbono esop ke usem emana esie. Enye edi kiet ke otu mbon Kurd ke Georgia emi ẹtọn̄ọde ndinam n̄kpọ Abasi isua ifan̄ emi. Edi mmanie ẹdi mbon Kurd?

Mbon Kurd ẹdụn̄ ke Ufọt Ufọt Edem Usiahautịn ke ata  ediwak isua idahaemi. Ndusụk ntaifiọk ẹdọhọ ke mmọ ẹdi mbon Media emi ẹtịn̄de ẹban̄a ke Bible. (2 Ndi. 18:11; Utom 2:⁠9) Usem mmọ edi kiet ke otu usem Iranian.

Mfịn, ata ediwak mbon Kurd ẹdụn̄ ke nsio nsio idụt, utọ nte Armenia, Iran, Iraq, Syria, ye Turkey. N̄kpọ nte mbon Kurd 20,000 ẹdụn̄ ke Georgia. Mmọ ẹnen̄ede ẹma Abasi ẹnyụn̄ ẹma ndinam n̄kpọ Abasi.

Esop usem Kurdish ita odu ke Georgia, ndien mme asuanetop emi ẹsemde usem Kurdish ke Georgia ẹdi 500. Esịt ama enem kpukpru nditọete ke ini ẹkenịmde akpa akamba mbono usem Kurdish do ke 2014. Nditọete ẹma ẹto Armenia, Germany, Turkey, ye Ukraine ẹdidụk mbono emi ke Tbilisi.