IKEBỊGHIKE ke mma n̄kana baptism, mbiowo ẹma ẹbụp mi m̀mê n̄kpama ndika obio en̄wen n̄kọkwọrọ ikọ. Ke May 4, 1992, mma ntiene ndụk mboho emi ẹkenịmde ẹnọ mbon ẹyomde ndika obio emi ẹnen̄erede ẹyom mme owo ẹkekwọrọ ikọ. Edem usen oro, ami ye owo emi n̄kesisan̄ade ntre n̄kwọrọ ikọ ima iwọrọ ika mbenesụk Batumi ke n̄kan̄ Ajaria.

Idem ama enyek mi etieti akpa usen emi ikọtọn̄ọde ukwọrọikọ ke Batumi. Mma n̄kere nte, ‘Nditọtọn̄ọ didie?’ Akpa owo emi n̄koyomde ndikwọrọ ikọ nnọ ekedi n̄wan. Se enye eketịn̄de ama akpa mi idem etieti. Enye ama obụp mi ete, “Mbufo ẹkedu ke m̀mọ̀n̄ ofụri emi?” Mma oro ama enen̄ede oyom ndidiọn̄ọ mbon emi Mme Ntiense Jehovah ẹdide, ntre enye ama enyịme itọn̄ọ ndikpep enye Bible edem usen.

Mbemiso ikedide Batumi, ẹma ẹnọnọ nnyịn enyịn̄ mbon emi ẹkeyomde idikpep mmọ Bible ye enyịn̄ efak emi mmọ ẹdụn̄de. Ima isisan̄a ibụp mme owo sia nnyịn ikọdiọn̄ọke  efak ndomokiet do. Ediwak owo ikekemeke nditeme nnyịn usụn̄ sia ẹma ẹkpụhọde enyịn̄ ediwak efak ke obio Batumi. Edi mmọ ẹma ẹsinen̄ede ẹyom ndikop ukwọrọikọ nnyịn. Ikebịghike ima itọn̄ọ ndisikpep owo 10 esịm 15 Bible inikiet.

Ke ọfiọn̄ inan̄ kpọt ke ima ikedi Batumi, mbon emi ẹketọn̄ọde ndisidụk mbono esop ẹma ẹbe 40. Ima ikere m̀mê mmanie idin̄wam mbufa owo emi. Ekem ke ini ekọn̄ emi ukara ẹken̄wanade ye mbon n̄kan̄ emi ẹkotde Abkhazia ọkọsọn̄de ubọk, kpukpru nditọete ke akpa esop emi n̄kodude ẹma ẹkpọn̄ do ẹdidu ke Batumi. Ima itọn̄ọ obufa esop, inyụn̄ inyene ediwak mbiowo ye mme asiakusụn̄!