EKA mi ama ayat esịt n̄kpa n̄kpa ke ini ami ye Tsitso an̄wan mi ikedide Mme Ntiense Jehovah. Usen kiet enye ama okot kpukpru iman nnyịn ẹdi ufọk; enye ekekere ke mmọ ẹyekeme ndinam nnyịn itre ndidi Ntiense Jehovah. Mmọ ẹma ẹdọhọ n̄kpọn̄ ufọk edieke mmen̄kpọn̄ke Jehovah.

Mma mbiere ndikpọn̄ ufọk n̄ka obio en̄wen. Sia n̄kesinamde n̄kpọ mban̄a ukwak, mma n̄kere ndiwọrọ n̄ka akwa obio emi ẹkotde Kutaisi ke Georgia, sia ikpọkọsọn̄ke mi ndikụt utom do nnam. Mma ndiọn̄ọ n̄ko ke ẹnen̄ede ẹyom ediwak owo emi ẹdikwọrọde ikọ do; ntre mma ndọhọ Jehovah eteme mi se ndinamde.

Ke ekpri ini ama ekebe, mma n̄kụt owo kiet emi n̄kesikpepde Bible. Enye okodụn̄ ke Jvari. Ini enye okopde ke nyom ndikodụn̄ ke Kutaisi, enye ama ekpe mi ubọk ete ndidu ke obio mmọ, onyụn̄ ọdọhọ ete: “Imenyene ekpri ufọk. Ami ye n̄wan mi ye nditọ mi iyodụn̄ ubet kiet, afo ye n̄wan fo ẹdụn̄ ke enye eken.”

 Mma ndọhọ enye ke edieke ndisọpde n̄kụt ufọk ke Jvari mbọ nnyụn̄ n̄kụt utom nnam, ke nyedi. N̄kọdọhọ enye ntre sia n̄koyom Jehovah eteme mi se ndinamde. Idem ama akpa mi ke ini enye ekemende enyịn̄ nsio nsio itieutom emi ẹyomde-yom owo ediwụt mi mbubreyo usen oro.

Ikebịghike, ami ye ubon mi ima ika ikodụn̄ ke Jvari. Mma nnyene utom akpa usen emi n̄kakade do; ẹkesikpe mi ata ọdiọn̄ọ-idem okụk. Akwa owo itieutom oro ama ọnọ mi akamba ufọk kiet emi kọmpeni oro ekenyenede ete ndụn̄. Ke ekpri ini ama ekebe, nditọete ẹma ẹdọhọ nsitiene n̄n̄wam ẹmịn̄ mme n̄wed ikọ Abasi. Ami ye n̄wan mi ima isio ubet kiet inịm ndida mmịn̄ n̄wed sia ufọk emi ẹkenọde mi ama okpon etieti.

Ke ediwak isua, ẹkesinịm Editi n̄kpa Christ ye mme akpan mboho eken ke ufọk nnyịn sia itie ama okpon ekem. Mbon emi ẹkenade baptism ke ufọk nnyịn ẹma ẹbe 500. Ama enen̄ede enem mi ndifiọk se Jehovah okoyomde mi nnam, ama onyụn̄ enem mi nte n̄kanamde.