Igor: Nnyịn ikesịne ke ekpri otu Mme Ntiense Jehovah emi okodude ke Tkvarcheli ke Abkhazia, ẹkenyụn̄ ẹbat otu nnyịn ẹdian ẹnọ esop emi okodude n̄kpọ nte itiat 50 ke obio Jvari. Mma nsika Jvari kpukpru ọfiọn̄ n̄kọbọ mme n̄wed ikọ Abasi nsọk otu nnyịn. Esisịt ini ke ẹma ẹkesuan ukara Soviet Union ke 1992, mbon Abkhazia ẹma ẹyom ndidian̄ade n̄kpọn̄ Georgia. Mmọ ẹma ẹn̄wana ekọn̄ ye ukara; emi ama anam n̄kpọ ọsọn̄ etieti.

Gizo: N̄kana baptism ini n̄kedide isua 21. Ekọn̄ oro akasiaha ke isua kiet ama ekebe tọn̄ọ n̄kana baptism. Idem ama enyek nditọete, nnyịn ikonyụn̄ idiọn̄ọke se iditịbede. Igor ekedi ata eti ebiowo, enye ama ọsọn̄ọ nnyịn idem nte esisụk anamde, onyụn̄ ọdọhọ ete: “Mme owo ẹyom ikọ ndọn̄esịt etieti idahaemi. Ukwọrọikọ edin̄wam nnyịn isọn̄ọ  ida ye Abasi.” Ikọ oro akan̄wam nnyịn ika iso ida Ikọ Abasi idọn̄ mme owo esịt ke obio nnyịn.

Igor: Nnyịn ikesisan̄ake aba usụn̄ emi ikesisan̄ade ika ikọbọ n̄wed ke Jvari ke ntak ekọn̄ oro. Sia n̄kokponde ke Tkvarcheli, mma ndikụt ke ọyọfọn isisan̄a in̄wan̄ tea ye n̄kan̄ emi etiede obot obot ibe ika Jvari. Edi mfịna en̄wen ekedi ke imekeme ndikodụk ubọk mbonekọn̄ mîdịghe idue ikefịk bọmb emi ẹbụkde ke isọn̄. Mma nsisan̄a ikpọn̄ n̄ka Jvari ini kiet ke ọfiọn̄ sia n̄koyomke n̄kpọ anam Ntiense ndomokiet. Jehovah ama esin̄wam mi n̄ka ke nnennen ini n̄kọbọ mme n̄wed Ikọ Abasi emi akan̄wamde nnyịn ikûkpọn̄ Abasi.

Owo ikan̄wanake ekọn̄ oro ke Tkvarcheli, edi ẹma ẹsịri usụn̄. N̄kpọ ama ọsọn̄ etieti. Udia nnyịn ama ọtọn̄ọ ndikụre ke ini snow ye ini etuep ekekperede; ima ikere m̀mê idinam didie. Esịt ama enen̄ede enem nnyịn ke ini ikokopde ke nditọete ke Jvari ke ẹnọ n̄kpọ ẹsọk nnyịn.

Gizo: Usen kiet, Igor ama obụp mi ye ubon mi m̀mê ikpama ẹmen n̄kpọ udia oro nditọete ẹnọde ẹdi Tkvarcheli ẹdinịm ke ufọk nnyịn ẹdeme ẹnọ nditọete. Enye okoyom ndika n̄kọbọ mme n̄kpọ oro ke Jvari ndi. Ima ikere ke n̄kpọ ekeme ndinam enye ke usụn̄ sia enye eyebe ke nsio nsio itie emi mbonekọn̄ emi ẹkemede ndinam enye n̄kpọ ẹdade, ke enye onyụn̄ ekeme ndiwat n̄kodụk inọ ubọk.​—⁠John 15:⁠13.

Edi ke usen ifan̄ ama ekebe enye ama ọnyọn̄ edi, n̄kpọ inamke enye. Esịt ama enem nnyịn tutu! Udia emi enye ekemende ọnyọn̄ edi ama awak tutu ekem kpukpru nnyịn ke ofụri ini etuep ye snow isua oro. Ima ikụt ke mme ata Christian isitreke ndima kiet eken idem ke ini afanikọn̄.​—⁠1 Cor. 13:⁠8.