Nditọete nnyịn ẹma ẹka iso ndidụk mbono esop, ikonyụn̄ ikopke ndịk ndinam n̄kpọ Abasi. Mbiowo ẹma ẹkpeme nditọete ke esop adan̄a nte mmọ ẹkekeme. Brọda André Carbonneau, ekpeibet emi otode Canada, emi ekesitienede etịn̄ ikọ ke ibuot nditọete nnyịn ke esop, ọkọdọhọ ete: “Ẹma ẹsinam eyenete etie ke an̄wa ekpeme ke ini ẹnịmde mbono esop. Ke ini eyenete emi okụtde mbon ntịme ẹdide, enye esisọsọp ada fon okot mbiowo ọdọhọ ke mbon ntịme ke ẹdi.”

Nditọete iba ẹma ẹsito n̄kọk itieutom ẹdidọn̄ nditọete esịt ini ekededi emi ẹsịnde ntịme ye mmọ. André ọdọhọ ete: “Ama esinem nditọete emi ẹketode n̄kọk itieutom ẹdi, ndikụt nte nditọete ẹwọn̄ọde ẹdi ọkwọk-udịm, ẹkama iso imam imam, ẹkop inemesịt, itiehe mfụhọ mfụhọ.”

Nditọete emi mbon ntịme oro ẹkemiade ye mbon emi ẹtọn̄ọde-tọn̄ọ ndikpep Bible ikokopke ndịk. André ọdọhọ ke ini imọ ikenemede nneme ye eyenan̄wan kiet emi okosụk eben̄ede idem ndidi asuanetop emi mînaha baptism,  ke enye ọkọdọhọ ete: “Ke ini nsikụtde nte ẹsịnde ntịme ye nditọete nnyịn ke TV, mmesikụt nte mbon emi ẹkponode ata Abasi ẹkpụhọrede ye mbon emi ẹbian̄ade idem ẹte inam n̄kpọ Abasi. Ami nyom ndikpono ata Abasi.”

Ke ofụri ini afanikọn̄ oro, nditọete ẹma ẹnyene mbuọtidem etieti, ẹnyụn̄ ẹka iso ẹkwọrọ ikọ uko uko. Ndien nditọete emi ẹkesikade esop ẹketịn̄ ikọ ke ibuot nditọete eken ẹma ẹnen̄ede ẹbuọt idem ye Abasi n̄ko.

Ẹma ẹsiwak nditịn̄ ke TV, radio ye n̄wedmbụk n̄kpọntịbe  ke nnyịn isisan̄a isuan ufọk owo, isikaha ufọkibọk, isinyụn̄ in̄wan̄wana ye ukara. Mme ekpeibet emi ẹkesitịn̄de ikọ ke ibuot nditọete nnyịn ke esop ẹma ẹnyene esịt etieti sia se mmọ ẹkenamde emi ama ekeme ndinam ẹbiat mmọ enyịn̄ mîdịghe ẹsio mmọ ke utom.

John Burns, eyenete emi edide ekpeibet ke n̄kọk itieutom Canada, emi okonyụn̄ etienede an̄wam nditọete ke Georgia ọdọhọ ete: “Nditọete emi ẹdide ekpeibet ke idụt oro ẹma ẹwọn̄ọ ẹdin̄wam nditọete eken. Kpa ye emi mmọ ẹkefiọkde ke ẹkeme ndisio mmimọ ke utom, mmọ  ikokopke ndịk nditiene n̄ka esop nnyụn̄ nnam ẹdiọn̄ọ ke mmimọ idi Mme Ntiense Jehovah.” Nditọete emi ẹnyenede uko mi, ẹma ẹtiene ‘ẹn̄wana ẹnyụn̄ ẹda ibet ẹnam eti mbụk ọsọn̄ọ ada.’​—⁠Phil. 1:⁠7.

Ofụri itetịn̄ mi, mbon ntịme oro ẹkesụk ẹkaka iso ndisịn ntịme ye Mme Ntiense Jehovah. Ntem, ke January 8, 2001, Mme Ntiense Jehovah ẹma ẹwet n̄wed ẹnọ ukara ẹte ẹkûyak ẹsịn ntịme ye mmimọ aba, yak mmọ ẹnọ mbon emi ẹsịnde ntịme ye mmimọ ufen oro odotde sia inyeneke se mmimọ iduede. Mmọ ẹma ẹnọ n̄wed emi ẹka kpukpru itie ke idụt oro man mme owo ẹsịn ubọk mbemiso ẹnọde ẹsọk ukara.

Brọda Burns ọdọhọ ete: “Ikanam emi man iwụt ke ata ediwak mbon Georgia imaha kpukpru ntịme oro ẹsịnde  ye nnyịn, ke n̄kpata mbon ufọkabasi ifan̄ emi mîmaha nnyịn ẹsịn kpukpru ntịme oro.”

Ke urua iba kpọt ebede, owo 133,375 ke Georgia ẹma ẹsịn ubọk ke n̄wed oro. Ediwak mmọ ẹkedi mbon Orthodox. Kpa ye oro ẹkemende n̄wed emi ẹsọk Shevardnadze, adaibuot ukara idụt oro, ẹkesụk ẹkaka iso ndisịn ntịme ye nnyịn.

Edi Jehovah ama aka iso ọdiọn̄ ikọt esie. Ke ini mbon ntịme oro ẹsụk ẹkade iso ndinam ikọt Abasi ibak, Jehovah ama aka iso ndin̄wam mbon emi ẹnyenede eti esịt ẹwọrọ ke nsunsu ido ukpono.

Ke isua 2000 ke Babilina Kharatishvili ekedi isua 75. Ini emi ke enye ekebiere ndidi Ntiense Jehovah. Babilina Kharatishvili ekesika Ufọkabasi Orthodox toto ke ini enye ekedide ekpri. Ke ini enye ekedide isua 30, enye ama esika nsio nsio obio ekekpep mme owo n̄kpọ aban̄a ndisana owo.

Edi Babilina ama oyom ndinen̄ede ndiọn̄ọ Abasi. Ntem enye ama aka ufọkn̄wed emi Ufọkabasi Orthodox ẹsikpepde mme oku n̄kpọ. Usen kiet, ọkwọrọ ederi kiet ama owụt mmọ n̄wed Ifiọk Oro Adade Osịm Nsinsi Uwem, onyụn̄ ọdọhọ mmọ ẹbọ Mme Ntiense Jehovah n̄wed oro ẹkot. Enye ama ọdọhọ mmọ ete, “N̄wed emi ekeme ndinam mbufo ẹnen̄ede ẹfiọk Bible.”

Babilina ikesimaha ndikpan̄ utọn̄ nnọ Mme Ntiense Jehovah. Ntem, idem ama akpa enye ndikop ọkwọrọ ederi oro ọdọhọde mmọ ẹkot n̄wed Mme Ntiense Jehovah. Babilina ama ọdọhọ ke esịt esie ete: ‘Nso ndien ke ntie mi nnam edieke edide Mme Ntiense Jehovah ẹkeme  ndin̄wam mi nnen̄ede mfiọk Abasi?’ Enye ama ọsọsọp aka obio kiet emi ẹkotde Poti, okoyom Mme Ntiense Jehovah onyụn̄ ọtọn̄ọ ndikpep Bible.

Babilina ama enen̄ede okpụhọde ke ini enye ekekpepde Bible. Enye ama ọdọhọ usen kiet ete: “Ke ini n̄kadade enyịn mi n̄kụt ke Bible ọdọhọ yak nnyịn ikûkpono ndisọi mbiet, mma nduọn̄ọ kpukpru n̄kpọ oro. Mmọdiọn̄ọ ke ata nnennen n̄kpọ ke n̄kanam emi.” Babilina ama ekpere ndisịm isua 80 ke ini enye ekebierede ndidi Ntiense Jehovah.

Edi Babilina ama ọdọn̄ọ etieti ke 2001 onyụn̄ akpa mbemiso enye akanade baptism. Izabela eyeyen esie ama ana baptism nte ini akakade, ke onyụn̄ anam n̄kpọ Abasi tutu esịm emi.

Eliso Dzidzishvili ekedi isua 28 ke ini enye ekebierede ke imọ iyom ndidi nun. Edi sia ufọkidụn̄ mme nun mîkodụhe  ke Tkibuli, obio mmọ, enye ama ọwọrọ okodụn̄ ke Tbilisi ke 2001. Ke adan̄aemi enye ebetde ẹkot imọ ididụn̄ ke ufọkidụn̄ mme nun, enye ama esika ufọk mme owo ekekpep nditọwọn̄ n̄wed. Kiet ke otu nditọ emi enye ekesikpepde n̄kpọ ekedi eyen eyenete nnyịn emi ekerede Nunu.

Eliso ọdọhọ ete: “Nnyịn ima isiwak ndineme n̄kpọ ke Bible. Mma nsiyat esịt ke ini ẹtịn̄de n̄kpọ ẹban̄a ufọkabasi nnyịn, edi Nunu ama esinyene ime, owụt mi se enye etịn̄de ke Bible. Usen kiet, enye ama ọdọhọ yak ikot n̄wed Nso ke Abasi Oyom Oto Nnyịn? inọ mi. Nte ikosụk ikotde n̄wed oro ye mme itie N̄wed Abasi ẹsiakde ẹsịn, mma ndikụt ke Abasi iyomke nnyịn ikpono edisọi mbiet.”

Ekem, Eliso ama aka ufọkabasi okobụp oku mmọ ediwak mbụme ke Bible. Se enye ọkọbọrọde ama anam enye ọdiọn̄ọ ke ufọkabasi mmimọ ikpepke se isịnede ke Bible. (Mark 7:​7, 8) Ke ini Eliso okokụtde ke Nunu etịn̄ akpanikọ  ọnọ imọ, enye ama ọtọn̄ọ ndikpep Bible ye Mme Ntiense Jehovah, onyụn̄ ana baptism nte ini akakade.

Ke 2001 ata ediwak esop ikenyeneke Ufọkmbono Obio Ubọn̄. Ẹdọhọ ke ẹkenyene ndibọp n̄kpọ nte Ufọkmbono Obio Ubọn̄ 70. Ntem, ẹma ẹtọn̄ọ ndutịm ndibọp Ufọkmbono Obio Ubọn̄ ke idụt oro, kpa ye oro ẹkesụk ẹkọbọde Mme Ntiense Jehovah do.​—⁠Ezra 3:⁠3.

Ikebịghike, nditọete ẹma ẹtọn̄ọ ndidiọn̄ ufọk kiet ke Tbilisi, emi ediwak esop ẹkesidade ẹnịm mbono esop. Ekem, ẹma ẹtọn̄ọ ndibọp Ufọkmbono Obio Ubọn̄ iba en̄wen. Kiet ke Tbilisi, enye eken ke Chiatura, ke edem usoputịn Georgia.

Brọda Tamazi Khutsishvili emi eketienede ọbọp Ufọkmbono Obio Ubọn̄ ke Chiatura ọdọhọ ete: “Nnyịn owo 15 ima isinam utom kpukpru usen. Ikebịghike, kpukpru owo ke obio ẹma ẹkop ke nnyịn ke ibọp Ufọkmbono Obio Ubọn̄. Ndusụk ini, ima isikop ẹdọhọde ke mbon ntịme ẹmọn̄ ẹdiwụri se ikọbọpde oro.”

 Ndi nditọete ẹma ẹsụk ẹkeme ndinam utom emi mma ke ini ukọbọ emi? Tamazi ọdọhọ ete: “Nnyịn ima ika iso ibọp Ufọkmbono Obio Ubọn̄ oro ima ke ufan̄ ọfiọn̄ ita. Owo ndomokiet ikedịghe idisịn ntịme ye nnyịn.” *

Ke October 2003, ẹma ẹtọn̄ọ ndibọp Ufọkmbono Obio Ubọn̄ ke Samtredia. Mbon ntịme oro ẹma ẹfiak ẹtọn̄ọ ndidọhọ nditọete nnyịn ke imọn̄ idisịn ntịme iwụri ufọk oro. Ke ẹma ẹkekọk ibibene ufọk oro ẹma ẹnyọn̄ọ, mbon ntịme oro ẹma ẹdiwụri ufọk oro ẹnịm ke isọn̄.

Edi, ke November 2003 n̄kpọ ama etịbe emi akanamde kpukpru ukọbọ oro ẹtre. Ẹma ẹkpụhọ ukara, ndien obufa  ukara emi ama enyịme mme owo ẹkpono Abasi nte mmọ ẹmade. Emi ama anam ẹmụm mbon Ufọkabasi Orthodox oro ẹkesisan̄ade ẹsịn ntịme ye Mme Ntiense Jehovah.

Ke ukọbọ ama eketre, Jehovah ama ọdiọn̄ ikọt esie ke Georgia etieti. Ke mbono district 2004, ẹma ẹsio N̄wed Abasi Christian Usem Greek​—⁠Edikabade eke Obufa Ererimbot ke usem Georgian.

Ekem, ke Mbono District “Edinyan̄a Emekpere!” emi ẹkenịmde ke 2006, n̄kpọ en̄wen emi nnyịn mîdifreke ama  etịbe. Esịt ama enem nditọete ndikop ke Geoffrey Jackson, emi etienede ese aban̄a utom Mme Ntiense Jehovah oyodụk mbono oro onyụn̄ ọnọ utịn̄ikọ. Idem ama enen̄ede akpa nditọete ke ini Brọda Jackson okosiode Edisana N̄wed Abasi​—⁠Edikabade Eke Obufa Ererimbot ke usem Georgian.

Mmọn̄eyet ama ọwọrọ ndusụk nditọete ke enyịn ke ini mmọ ẹkekụtde Bible emi. Eyenete an̄wan kiet ọkọdọhọ ete: “N̄kemeke nditịn̄ nte eketiede mi ke idem ke ini ẹkeyakde Bible emi ẹsịn mi ke ubọk. . . . Nnyịn idifreke usen emi tutu amama.” Owo 17,000 ẹkedụk mbono emi. Ata akwa n̄kpọ ekedi emi ọnọ ikọt Abasi ke Georgia!