Ndima Nditọete:

Jehovah ama anam prọfet Ezekiel okụt utịbe utịbe n̄kukụt ke n̄kpọ nte isua 2700 emi ekebede. Ezekiel ama okụt Jehovah awatde ata akamba chariot ke heaven. Se inen̄erede ikpa owo idem edi ke chariot emi ọsọp etieti nte emịnen̄mịnen̄. N̄ko ke ini enye oyomde ndika ebiet ekededi, enye isitehekede ubọk uwat m̀mê ndiwọn̄ọde iso, edi esisụk ọsọp nte emịnen̄mịnen̄ aka ebiet ekededi emi enye oyomde ndika!​—⁠Ezek. 1:​4, 9, 12, 14, 16-27.

N̄kukụt emi owụt ke ikpehe esop Jehovah eke heaven ituakke-tuak ida. Edi nso kaban̄a ikpehe esop Jehovah eke isọn̄? Se ikanamde isua oko owụt ke ikpehe esop Jehovah eke isọn̄ ituakke ida n̄ko, Jehovah ke anam ikọt esie mi ke isọn̄ ẹsan̄a ikpat kiet ye chariot esie ke heaven.

Mi ke United States, mbon Bethel ẹma ẹwọrọ ke Brooklyn ẹka obufa ibuot itieutom nnyịn ke Warwick, kpa ke New York emi. Ẹma ẹnyụn̄ ẹnọ ndusụk mmọ ẹka mme ọfis nnyịn eken, ẹnọ ndusụk ẹka ẹkedu ke nsio nsio ebiet ẹkwọrọ ikọ. Nso kaban̄a mbon Bethel eken ke ofụri ererimbot? Nditọete nnyịn do iwan̄ke-wan̄ ubọk itie, edi ke ẹsịn ibuot ẹsịn itọn̄ ẹbọp mbufa Bethel, mîdịghe ẹdiọn̄ n̄kani oro mmọ ẹnyenede, mbon eken ẹmen Bethel mmọ ẹtọ ẹdian ye Bethel idụt en̄wen, ndusụk ẹwọwọrọ ẹka mme ebiet en̄wen. Afo ndien-e? Ekpededi  ukûwọrọke ke ebiet emi okodụn̄de uka ebiet en̄wen, oro iwọrọke ke akawawan̄ ubọk etie. Imenịm ke ama etiene esịn idem anam se esop Abasi ẹdọhọde ẹnam ndiwụt ke afo asan̄a ikpat kiet ye enye.

Otu Emi Ẹsede Ẹban̄a Utom Mme Ntiense Jehovah ẹnem esịt etieti ndikụt nte ikọt Abasi ke ofụri ererimbot ẹsịnde idem idahaemi ke n̄kpọ Abasi, ẹnyụn̄ ẹnamde se ededi oro esop Abasi ẹdọhọde ndiwụt ke isan̄a ikpat kiet ye enye. Ediwak nditọete ẹwọrọ ẹkedụn̄ ke mme ebiet emi ẹyomde-yom mme ọkwọrọ ikọ. Ndusụk ẹkpep usem en̄wen ẹnyụn̄ ẹwọrọ ẹka ẹkekwọrọ ikọ ẹnọ mbon oro ẹsemde usem oro. Mbon en̄wen ẹtiene ẹkpep mbufa usụn̄ emi idade ikwọrọ ikọ idahaemi. Mmọ eken ẹsịn idem ẹnam nsio nsio n̄kpọ ẹnọ Abasi. Kpukpru ikọt  Jehovah, edide n̄kani owo, m̀mê mbon emi idem mîtịmke isọn̄, ke ẹsịn idem ẹnam n̄kpọ Jehovah ẹnyụn̄ ẹwụt ke Satan edi osu nsu! Mmọ idaha mbre isịn ke mbuba uwem emi kpukpru nnyịn ifehede mi.​​—⁠1 Cor. 9:⁠24.

Mbọk ẹti ke Jehovah idifreke kpukpru se mbufo ẹnamde ẹnọ enye. (Heb. 6:10) Nte mbufo ẹnamde n̄kpọ Abasi ke ofụri esịt anam iti Abraham ye Sarah. Abraham ekedi isua 75 ke ini enye ekemende ubon esie ọwọrọ ke Ur okodụn̄ ke Canaan emi okoyomde usụn̄ etieti. Enye okodụn̄ do ke tent ke ofụri isua 100. Enye ye edima an̄wan esie ẹma ẹnam n̄kpọ Abasi ke ofụri esịt!​—⁠Gen. 11:31; Utom 7:​2, 3.

Ndi afo emesinam n̄kpọ Abasi ntre? Kpukpru nnyịn emi ikade iso inam n̄kpọ Abasi kpa ye ofụri afanikọn̄ emi ikụtde ke ndiọkeyo emi inam se Jesus ọkọdọhọde. Enye ọkọdọhọ ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit.”​—⁠Matt. 28:⁠19.

Jesus ọkọdọhọ “ẹka,” oro ọwọrọ ke inaha itatuak ida. Esịt enen̄ede enem nnyịn ndikụt kpukpru se mbufo ẹkenamde isua oko. Imokụt ke Jehovah ama odu ye nnyịn onyụn̄ enen̄ede ọdiọn̄ nnyịn nte ikesịnde idem ikwọrọ etop Obio Ubọn̄ esie ke kpukpru idụt.​—⁠Mark 13:⁠10.

Ediwak owo ke ẹkop etop Obio Ubọn̄ emi. Ibat Mme Ntiense Jehovah emi ẹkekwọrọde ikọ ke ofụri ererimbot isua oko ekedi 8,340,847, ndien mmọ ẹkekpep owo 10,115,264 Bible kpukpru ọfiọn̄. Omokụt do ke afo ke asan̄a ikpat kiet ye chariot Jehovah ke heaven. Ka iso da ekpri ini emi osụhọde mi nam n̄kpọ Abasi mbemiso Jehovah eberi usụn̄ edinyan̄a abaha mbon oro mîmaha uwem.

 Ntak edi oro ibuotikọ isua nnyịn eke 2017 edide, “Buọt idem ye Jehovah nyụn̄ nam se ifọnde.” (Ps. 37:⁠3) Ke ini esịnde idem anam se ifọnde, nte itie Bible emi ọdọhọde, afo owụt ke ibuọt idem ye Jehovah. Mbọk kûkere ke odu ikpọn̄. Jesus ọkọdọhọ ete, “Sese! Ami ndodu ye mbufo kpukpru usen tutu esịm akpatre ini editịm n̄kpọ emi.”​—⁠Matt. 28:⁠20.

Jehovah iditreke-tre ndidiọn̄ fi ke se anamde ọnọ enye. Ekpedi esisịt ke ekeme ndinam, m̀mê ekeme ndinam akamba, se Jehovah amade edi owo emi anamde n̄kpọ esie ke ofụri esịt ye ke eti esịt. Emi esinem Jehovah esịt, enye esinyụn̄ ọdiọn̄ mbon oro ẹnamde n̄kpọ esie ntem. (2 Cor. 9:​6, 7) Ntre, ka iso kpere edima Ete fo, Jehovah, ke ndibọn̄ akam kpukpru ini, n̄kpep Bible, ndụk mme mbono esop nnyịn, nnyụn̄ nsịn idem n̄kwọrọ ikọ.

Satan ke anam ofụri se enye ekekeme ndidian̄ade nnyịn n̄kpọn̄ Jehovah ke ekpri “ibio ini” emi osụhọde ọnọ enye mi. (Edi. 12:12) Sọn̄ọ da ye Jehovah, ndien Satan idikemeke ndidian̄ade fi n̄kpọn̄ enye. (Ps. 16:⁠8) Mbọk iyom ndinam mbufo ẹfiọk ke imama mbufo etieti. Imenen̄ede ikop inemesịt nte mbufo ẹn̄wamde nnyịn ẹnam n̄kpọ Ọbọn̄ nnyịn ke mme akpatre usen emi.

Nditọete mbufo,

Otu Emi Ẹsede Ẹban̄a Utom Mme Ntiense Jehovah