Usen kiet ke Philippines, eyenan̄wan emi esiwetde kad ufọkibọk ọnọ owo ama okụt nte Jonathan esịnede ọfọn̄ ediye ediye onyụn̄ obụp enye m̀mê enye edi owo insurance. Eyenan̄wan oro ekekere Laila. Jonathan ama ọdọhọ ke idi Ntiense Jehovah, ke isan̄a ye eyenete nnyịn kiet emi idem mîsọn̄ke idi ndikụt dọkta. N̄kpọ oro ama  enem Laila, ntre enye ama ọdọhọ Jonathan ke ete imọ emi akpade ndondo emi ama esikot kpukpru mbufa Enyọn̄-Ukpeme nnyịn. Jonathan ama eneme se idude ke John 5:​28, 29 ye enye, onyụn̄ ọnọ enye tract Nso Idotenyịn Idu Inọ Mbonima Ẹmi Ẹkpade?

Ini ekededi emi Jonathan akakade ufọkibọk oro, enye ama esimen nsio nsio n̄wed ọsọk Laila. Ekem enye ama anam eyenete an̄wan kiet esikpep Laila Bible. Ikebịghike,  ebe Laila, udun̄wan eka Laila, ye eka Laila emi ẹkedụn̄de ye mmọ ẹma ẹtiene ẹkpep Bible.

Mbọhọidụn̄ Laila emi ekerede Rose ama obụp enye m̀mê nso inam mme owo ẹsiwak ndidi ufọk esie. Laila ama ọdọhọ enye ke Mme Ntiense Jehovah ẹsidi ẹdikpep imọ Bible. Rose ama etiene ọtọn̄ọ ndikpep Bible. Ini Rose akakade ndise Abigail udun̄wan eka esie ke obio mmọ, enye ama etịn̄ se enye esikpepde ọnọ Abigail. Abigail ama ọdọhọ ẹtiene ẹkpep imọ Bible sia se Rose eketịn̄de ama enem enye. Eka Rose n̄ko ama ọdọhọ ẹtiene ẹkpep imọ Bible.

Laila ama ana baptism ke akamba mbono kiet ndondo emi. Eka esie ana baptism n̄ko. Rose mbọhọidụn̄ esie ye Abigail eyeneka Rose ẹma ẹna baptism isua oko. Eka Rose esidụk mbono esop ke ubọk ke ubọk idahaemi. Ndusụk iman Laila ke ẹkpep Bible. Omokụt do ke ndikwọrọ ikọ nnọ owo kiet ke ufọkibọk anam ediwak owo ẹkop Ikọ Abasi ẹnyụn̄ ẹdụk esop.

Ke ẹnam ediwak inan ke Sri Lanka ẹkop Ikọ Abasi. Ke 2015, mme inan emi Mme Ntiense Jehovah ẹkesikpepde Bible ẹkedi n̄kpọ nte owo 80, nditọete ẹkesiwet adres mmọ ke n̄kpri pepa. Edi ẹma ẹdisiak akpa esop usem idiọn̄ọ Sri Lanka. Ẹnyene n̄ko ndutịm kọmputa emi ẹdọn̄de enyịn̄ inan 420, adres mmọ, ye n̄kpọ emi owụtde nte ẹkemede ndisan̄a nsịm ufọk mmọ. Nditọete ẹkwọrọ ikọ ẹnọ ata ediwak mmọ. Ndusụk ẹkaka ufọk mmọ, ndusụk ẹda Intanet ẹneme nneme ye mmọ iso ye iso mîdịghe ẹnọ mmọ etop. Ebe ye n̄wan emi ẹdide isụn̄utom do ẹdọhọ ẹte: “Idahaemi imekeme nditeme mme asuanetop emi ẹdide inan ebiet emi mmọ ẹdikade ikọkwọrọ ikọ. Ini akpa, mmọ ẹkesika ẹbịne mme inan emi mmọ ẹdiọn̄ọde kpọt.”

Nditọete ke Mongolia ẹsibon n̄wed ẹkwọrọ ikọ ke ebiet emi mme owo ẹwakde, idem ke ini ebịtde n̄kpa n̄kpa (-30°C). Akwaowo ukara kiet ama aka do okosio ndusụk n̄wed okokot, ekem ewet leta ekọm ọnọ ẹsọk nditọete oro. Enye ọkọdọhọ ntem ke leta esie: “Ndi owo Buddha. Edi mmesima ndidụn̄ọde se ufọkabasi eken ẹkpepde, sia nnịm ke ifọnke owo ọkọn̄ eyịre ke se ẹkpepde enye kpọt, ke ọfọn idụn̄ọde se mbon en̄wen ẹkpepde n̄ko. Ke mma n̄kokot ndusụk n̄wed mbufo, mma ndọhọ yak n̄wet mbufo ntịn̄ se n̄kerede. Mmokụt ke mbufo ẹmesida ini ẹnam ndụn̄ọde man se mbufo ẹwetde an̄wam mme owo onyụn̄ ekpep mmọ n̄kpọ. N̄kpọ kiet emi n̄kụtde ke n̄wed mbufo edi ke ana owo okot Bible. Akpanikọ esịne ke Bible. Bible kpọt ekeme ndinen̄ede nteme nnyịn nte ikpodude uwem. Ẹmenam etieti nte ẹkabarede mme n̄wed mbufo ẹsịn ke usem Mongolian. Mmọkọm n̄ko kpukpru mbon mbufo emi ẹsinọde mme owo n̄wed emi. Mmọ ẹsinam emi okpofiop nte ofofiop, ekpebịt nte ebebịt.”

Ke Hong Kong, asiakusụn̄ kiet emi ekerede Brett ama ọnọ akparawa kiet tract oro Nso Ikeme Ndinam Ubon Ẹkop Inemesịt? Akparawa oro ama atua ke ini enye okokụtde tract oro onyụn̄ ọdọhọ ke ete ye eka imọ ẹma ẹkpep imọ akpanikọ toto ke nsek, edi ke ima ifehe ikpọn̄ ufọk ke ini ikedide isua 16. Enye okodụn̄ ke efak ofụri isua ition, onyụn̄ esida n̄kpọsọn̄ ibọk tutu n̄ka emi ẹsin̄wamde mme ubuene ẹdin̄wam enye.

Enye ama ọdọhọ Brett ke mbemiso imọ ikụtde enye usenubọk oro, ke ima ibọn̄ akam idọhọ Abasi ite, “Edieke ido ukpono emi n̄kesikade ini eyenọwọn̄ edide nnennen  ido ukpono, mbọk wụt mi idiọn̄ọ mfịn emi.” Enye akada se iketịbede usenubọk oro nte ibọrọ akam esie. Mmọ ẹma ẹka itie un̄wọn̄ kọfi emi ekekperede ẹketie ẹneme n̄kpọ ke ekpri n̄wed Fiak Tiene Jehovah. Akana enye afiak ọnyọn̄ France mbubreyo oro, ntre enye ama ọnọ eyenete oro adres ye nọmba esie, eyenete oro onyụn̄ ọnọ enye eke esie. Nte ini akade, enye ama ewet Brett ọdọhọ ete: “Edima eyenete mi, Jehovah ọbọrọ akam mi. Sunday emi nyaka Ufọkmbono Obio Ubọn̄ emi ekperede nnyịn.” Enye ama okoyom Mme Ntiense Jehovah ke France okụt, ọtọn̄ọ ndikpep Bible, onyụn̄ esidụk mbono esop.