Ke ini Olivia, ke Australia, ọkọtọn̄ọde-tọn̄ọ ufọkn̄wed, enye ama okot titia mmọ Editi n̄kpa Christ. Ke ofụri isua itiaita, enye ama esikot titia oro kpukpru isua ete edi Editi n̄kpa Christ. Ke 2016 titia oro ama okot ọdọhọ ke iyedi isan̄ enye emi. Enye ama ọdọhọ ke enem imọ nte Olivia ekesikotde imọ kpukpru isua. Enye akasan̄a  ye ebe esie edi Editi oro. Ebe esie ama eti ini ẹkebọpde Ufọkmbono Obio Ubọn̄ oro sia ini oro enye ekesinam utom ye ikpọ owo obio oro. Enye ama ọdọhọ nditọete ke ama esinem imọ tutu ndikụt kpukpru n̄kpọ asan̄ade ke nde ke nde ini ẹkebọpde ufọkmbono oro. Editi oro ama enem mma titia oro ye ebe esie etieti, mmọ ẹma ẹnyụn̄ ẹbet tutu kpukpru owo ẹkpere ndinyọn̄ọ mma mbemiso mmọ ẹnyọn̄.

Jacintu ye n̄wan esie ẹdụn̄ ke Timor-Leste. Sia mmọ ẹkedide ata mbon Catholic, ama afịna mmọ etieti ini eyen eyeneka Jacintu akakabarede edi Ntiense Jehovah, onyụn̄ etrede nditiene n̄ka ufọkabasi. Jacintu ama ọdọhọ ke imọn̄ iwụt eyen eyeneka imọ oro ke enye odụk idiọk afan̄. Ntre enye ama ọbọ n̄wed Nso ke Bible Enen̄ede Ekpep? ọtọn̄ọ ndikot nyom itie emi nsu odude. Ke ama okokot ama, enye ama ọdọhọ n̄wan esie ete: “Mmokot n̄wed oro mma, edi n̄kwe nsu ndomokiet.”

N̄wan esie ama ọdọhọ enye ete: “Etie nte ukukotke ọfọn. Fiak kot, edi isan̄ emi kot sụn̄sụn̄.”

Enye ama afiak okot onyụn̄ ọdọhọ n̄wan esie ete: “Nsu ndomokiet idụhe.” Enye ama ọdọhọ n̄ko ete: “Kpukpru n̄kpọ ke n̄wed oro oto Bible. Se ẹtịn̄de do ẹban̄a ndikpono mme akpan̄kpa esịne ke Bible n̄ko.”

N̄wan esie ama ọdọhọ ete: “Fiak kot ini kiet en̄wen, edi isan̄ enye emi dụri udịm ke ikpehe kiet kiet. Nen̄ede tịn̄ enyịn̄ kpep n̄wed oro. Mmenịm ke nsu do ke n̄wed oro.”

 Jacintu ama enen̄ede ekpep n̄wed oro onyụn̄ odụri udịm ke ikpehe kiet kiet. Ke enye ama eketịn̄ enyịn okot ọyọhọ ikata ama, enye ama ọdọhọ ete: “N̄kwe se idiọkde ke n̄wed oro! Eyen eyeneka mi idụkke idiọk afan̄.” Jacintu ke ekpep Bible ye Mme Ntiense Jehovah idahaemi.

Sista kiet emi edide asiakusụn̄ ke Guam ama owụt mma emi otode Pohnpei vidio emi, Ntak Emi Ekpekpepde Bible? onyụn̄ ọdọhọ enye ke iyafiak idi. Enye ama afiak aka ikafan̄ ikwe mma oro, edi usen kiet enye ama okokụt eyen esie an̄wan. Sista oro ama owụt eyen oro vidio kiet​—⁠ekedi vidio Di Ufan Jehovah. Eyen oro ama ama vidio oro etieti. Ke ini sista oro akafiakde aka, mma oro ama odu ke ufọk, onyụn̄ enen̄ede akpan̄ utọn̄ okop ukwọrọikọ. Mbemiso sista oro akafiakde aka, eyen oro ama ọdọhọ eka esie yak mmimọ isika ufọkabasi mme sista  oro okowụtde imọ vidio do. Etie nte emi akanam mma oro enen̄ede akpan̄ utọn̄. Ẹma ẹwut enye nte ẹsikpepde mme owo Bible ẹnyụn̄ ẹdiomi ini emi ẹdisidide idikpep enye n̄ko.

Ke Papua New Guinea, esenyịn circuit kiet emi ekerede Terence ye Stella n̄wan esie ẹma ẹka ẹkekwọrọ ikọ ke Inakor, emi owo mîdemeke inọ esop ndomokiet. Terence ọdọhọ ete: “Akpa usen ikaduakde nditọn̄ọ ukwọrọikọ, mme owo ẹma ẹdi tụhi-tụhi usenubọk ẹdikọn̄ usụn̄ ini isụk idede idap. Ediwak owo ẹma ẹdida ke an̄wa ẹbet nnyịn, ima inyụn̄ ikwọrọ ikọ inọ mmọ tọn̄ọ n̄kanika  itiokiet usenubọk tutu ufọt uwemeyo. Ekem, itre do idọhọ yak ikeyere mmọn̄. Udịm owo emi ikedide idikụt ke ima ikeyere mmọn̄ ima ama akan akpa. Ima ikwọrọ ikọ inọ mmọ tọn̄ọ n̄kanika iba uwemeyo tutu ufọt okoneyo.” Terence ye n̄wan esie ẹma ẹbabak ẹwọrọ edem usen ẹka ukwọrọikọ ke itie en̄wen. Mme owo ẹma ẹwọrọ ọkwọk-udịm ẹka ufọk mmọ ẹkeyom mmọ, edi ikwe. Terence ọdọhọ ete: “Ke ini mmọ ẹkekopde itie emi ikade, mmọ ẹma ẹyom nnyịn ẹdikụt. Ima ifiak ikwọrọ ikọ tutu uwemeyo. Ini ikọnyọn̄de isịm ufọk, ima ikokụt udịm owo en̄wen nte ẹtiede ẹbet nnyịn. Se ikesitịbede edi oro kpukpru usen. Mme owo do ẹketie ‘nte erọn̄ eke mînyeneke andikpeme.’ ”​—⁠Matt. 9:⁠36.

Agnès edi asiakusụn̄, onyụn̄ odụn̄ ke New Caledonia. Enye ama aka ebịne abiausọbọ ke ntak ubiak ubọk. Nte abiausọbọ oro okosụk esede enye ubọk, enye ama ọdọhọ Agnès ke ibat owo emi imọ ikụtde nte ẹbọde ufen anam imọ ikere ke etie nte enenem Abasi ndiyak mme owo ẹbọ ufen. Agnès ama ọkọm Jehovah ke esịt esie nte enye anamde imọ inyene ifet ndinam mma oro ọdiọn̄ọ ke idịghe enye Jehovah anam mme owo ẹbọ ufen. Agnès ama owụt enye tract emi, Ndi Ufen Eyetre Tutu Amama? onyụn̄ okot Ediyarade 21:​3, 4 ọnọ enye.

Abiausọbọ oro ama ọdọhọ ete: “N̄kereke ke itie osụk okotde do odu ke Bible mi; okịm enyene Gospel kpọt.” Ke ini enye ọkọdiọn̄ọde ke Agnès edi Ntiense Jehovah, enye ama ọdọhọ ke Mme Ntiense Jehovah ẹma ẹkwọrọ ikọ ẹnọ imọ ke Chile emi imọ itode.

Agnès ama eti ke ẹma ẹtịn̄ n̄kpọ ẹban̄a Chile ke Edinam  TV Mme Ntiense Jehovah. Ke ini enye akafiakde edikụt abiausọbọ oro, enye ama owụt abiausọbọ oro vidio oro ke tablet esie. Ama enem abiausọbọ oro etieti ndikụt Bethel ye Itiembono ke Chile. Ekem Agnès ama ọdọhọ enye ete: “Mmenyene n̄kpọ efen emi nyomde ndinọ fi, enye edi ofụri Bible, man ekeme ndikot Ediyarade 21:​3, 4, emi n̄kokotde nnọ fi urua oko!” Abiausọbọ oro ama adaha ada ke n̄kpọitie inikiet inikiet afat enye, ọdọhọ ete: “Amanam etieti ke n̄kpọ iba emi!”

Ke ini Agnès akafiakde okokụt abiausọbọ oro, enye ama ada n̄wed Nso ke Bible Enen̄ede Ekpep? anam enen̄ede an̄wan̄a abiausọbọ oro ntak emi ufen ọyọhọde ererimbot. Abiausọbọ oro ama ọdọhọ ke iyaka nduọkodudu ke Chile, ke iyemen n̄wed oro ikokot ima do.