KE 2014 ẹma ẹtọn̄ọ Edinam TV Mme Ntiense Jehovah emi odude ke Intanet. Enye an̄wam ata ediwak owo ke ofụri ererimbot onyụn̄ ọsọn̄ọ mmọ idem etieti. Usem emi ẹsisiode enye idahaemi ebe 90. Enye odu idahaemi n̄ko ke Ewe, Ga, ye Twi (nte ikụtde ke ndise enyọn̄ emi). N̄kpọ emi enen̄ede enem Mme Ntiense 130,000 emi ẹsemde mme usem emi ke Benin, Côte d’Ivoire, Ghana, ye Togo. *

N̄wan esenyịn circuit kiet ke Ghana, emi ekerede Agatha ọdọhọ ete: “Ke ini n̄kopde ikọ mbon Otu Emi Ẹsede Ẹban̄a  Utom Mme Ntiense Jehovah ye mbon emi ẹsin̄wamde mmọ, esitie mi nte Jehovah etịn̄ ikọ ye ami iso ye iso ke ubet mi. Mîkpedịghe edinam emi, ndiọn̄ọke nte utọ owo nte ami n̄kpanamde n̄kop uyo mmọ ke utọ anyan usụn̄ emi. N̄kpọ emi anam ikpere nditọete nnyịn ke ofụri ererimbot.”

Mbon Zambia ẹma ẹwet ẹte: “Kpa ye oro nditọete ke ediwak esop mînyeneke okụk, mmọ ẹsinam se mmọ ẹkekeme man ẹse Edinam TV Mme Ntiense Jehovah. Uwụtn̄kpọ kiet edi eke esop Misako, ke obio in̄wan̄ emi ọyọhọde ye idịm emi ẹsisọpde ukot etieti ke ini ukwọedịm. To do sịm ekpri obio en̄wen emi ekperede mmọ edi n̄kpọ nte itiat 20.” Simon, asan̄autom unamutom emi akade akan̄wam esop oro, ọdọhọ ete: “Kpukpru ọfiọn̄, eyenete kiet esisan̄a hour iba esịm ọkpọusụn̄ okodụk moto aka ekpri obio emi nditọete ẹsikemede ndision̄o edinam emi ke Intanet. Enyene ete kiet emi edide isua 70 onyụn̄ enyenede nditọ irenowo iba; enye ye nditọ oro ikodụkke mbono esop Mme Ntiense Jehovah akanam. Edi ini ete oro okokopde ke ẹyesio vidio ke utọ obio esịt ikọt oro, ama ọdọn̄ enye ndidi ndise. Enye ọkọdọhọ ete, ‘Nnennen usụn̄ ndikpep n̄kpọ mban̄a Abasi edi emi.’ ”

Leta ekọm emi ẹkenọde ke Russia edi ọdọhọ ete: “Ebe isua kiet idahaemi ikọtọn̄ọ ndise Edinam TV Mme Ntiense Jehovah, onyụn̄ enem nnyịn etieti. Akpa ini ikesede edinam emi, eketie nte idu kiet ye kpukpru nditọete nnyịn ke ofụri ererimbot! Ama enem nnyịn tutu! Imokụt ke ito ubon kiet! Ama enen̄ede enem nnyịn ndikụt mbon Otu Emi Ẹsede Ẹban̄a Utom Mme Ntiense Jehovah. Mmọ ẹsida ofụri esịt ẹkpep nnyịn ikọ Abasi ke nnennen ini, imonyụn̄ ikeme ndikụt mmọ kpukpru ini. Isitetie ibet edinam emi kpukpru ọfiọn̄. Idahaemi imada enyịn̄ emi, Mme Ntiense Jehovah, inam asian ikan akpa. Ndima nditọete, ẹsọsọn̄ọ etieti! Imọkọm  Jehovah ye Christ ke kpukpru se mmọ ẹdade mbufo ẹnam. Emi esisọn̄ọ nnyịn idem onyụn̄ anam esịt enem nnyịn!”

Horst ye Helga n̄wan esie ẹdụn̄ ke Germany. Mmọ ẹkpon owo, idem inyụn̄ isọn̄ke mmọ. Mmọ ẹkewet ẹte: “Edinam TV Mme Ntiense Jehovah inyeneke mbiet. Enye esisọn̄ọ nnyịn idem tutu, akpan akpan mbụk nditọete nnyịn emi ẹbiomode ndo. Mbụk mmọ esinam isịn ofụri ukeme nnyịn inam n̄kpọ Abasi kpa ye nsio nsio udọn̄ọ nnyịn. Mbụk eyenete emi edide ebiowo kpa ye oro edide mbụn̄ọ, ama ekpep nnyịn ke kpukpru owo ẹnyene se mmọ ẹsụk ẹkemede ndinam nnọ Abasi. Ke ini ikụtde se utọ nditọete emi ẹnamde, imesikọm Jehovah inyụn̄ iben̄e enye ite enen̄ede ọdiọn̄ mmọ.”

Kodi ke England ọdọhọ ete: “Ẹsọsọn̄ọ ke ofụri ini ye ukeme emi mbufo ẹdade ẹnam jw.org, Edinam TV Mme Ntiense Jehovah, ye mme vidio Kokoete ye Nene. Mbufo ẹmenam Bible ọsọp an̄wan̄a owo, ẹsọsọn̄ọ etieti. N̄kana baptism ini ndide isua itiaita. Mma mfiak n̄kpon, nyesitiene n̄n̄wam ẹbọp Ufọkmbono Obio Ubọn̄! Nyonyụn̄ mma ndinam utom ke Bethel. Ndi isua usụkkiet idahaemi, isua ifan̄ kpọt osụhọ ami ndikpon n̄kem.”

Eyen isua itiaita emi ekerede Arabella ke England ekewet ete: ‘Esọsọn̄ọ ke nsio nsio vidio Kokoete ye Nene ye ikpehe emi ẹkotde “Se Akpanamde,” emi asan̄ade ye mmọ. Mmọ ẹnam nnen̄ede ndiọn̄ọ Jehovah. “Se Akpanamde,” emi odude ke jw.org, esinam enenem mi ndikpep n̄kpọ mban̄a Jehovah. Ikwọ mbufo ẹsinem tutu, esinyụn̄ emem utom nditi mmọ. Vidio Kokoete ye Nene esin̄wam etieti. Ẹsọsọn̄ọ ke ofụri utom mbufo.’