IDEM eketie mme owo urua urua ke May 7 ye 8, 2016, ke itie emi ẹsidarade isenowo ke ibuot itieutom nnyịn ke 25 Columbia Heights, ke Brooklyn, ke New York. Ke utịturua owo isiberekede itie emi ye mme itie eken emi mme owo ẹsidide ẹdise, edi ke utịturua oro, ẹma ẹdọhọ mbon oro ẹdụn̄de ke mbọhọ Bethel ẹte ẹdi ẹdise itie emi isibonde nsio nsio ndiye Bible.

Ndikot mme owo ke mbọhọ Bethel ẹdise n̄kpọ ke Bethel ama anam ediwak owo ke mbọhọ oro ẹnen̄ede ẹdiọn̄ọ n̄kpọ ẹban̄a utom nnyịn, ama onyụn̄ ọsọn̄ọ nditọete oro ẹkemende mmọ ẹwụt mme n̄kpọ idem etieti. Se ikenemde  ikan ekedi nti n̄kpọ emi mbon oro ẹbịghide ke mbọhọ oro ẹketịn̄de ẹban̄a nnyịn.

Ete kiet ọkọdọhọ ete: “Mmodụn̄ ke nsio nsio ufọk ke mbọhọ emi [mbọhọ Bethel] tọn̄ọde ke 1960, edi n̄kwe kan̄a mbọhọidụn̄ emi etiede nte mbufo. Itọn̄ mbufo ọyọdọn̄ nnyịn; etie nte mbufo ikpọwọrọke mi.”

N̄wan kiet ọkọdọhọ ete: “Mîkpedịghe mbufo, mbọhọ emi ikpeyehe nte eyede idahaemi. Esịt enem nnyịn etieti mbufo ndidu mi ke ediwak isua emi.”

Ama enem ediwak mme asiakusụn̄ emi ẹsikwọrọde ikọ ke mbọhọ oro nte mme owo do ẹkemade ikot oro. Ete kiet emi ẹkekotde ama ọdọhọ ke imama se Mme Ntiense Jehovah ẹnamde onyụn̄ ọdọhọ ke abiak imọ nte imọ mîdidụhe utịturua oro.

Ediwak owo ẹma ẹdi. Ke Saturday ye Sunday oro, owo 48 emi mîdịghe Mme Ntiense Jehovah ẹma ẹdi ẹdise ndiye nsio nsio Bible oro. Ediwak mbon Bethel ẹma ẹdara mbọhọidụn̄ mmọ emi ẹkedide, ẹnyụn̄ ẹneme nneme ye mmọ.

N̄wan kiet emi ekerede Sally, onyụn̄ edide n̄kpọ nte isua 30 ama ada n̄kpọ nte minit 30 ese nsio nsio Bible oro. Ini enye edide, enye ama edikụt mme asiakusụn̄ emi ẹkekotde enye nte ẹdade ke itie udara isenowo. Sally ama ọdọhọ mmọ ke imọ ikọdiọn̄ọke ke nnyịn imenyene utọ n̄kpọ ntre. Mme asiakusụn̄ oro ẹma ẹdọhọ enye ke enem mmimọ ndikụt nte ọdiọn̄ọ n̄wed owo nte enye amade Bible. Sally ama ọbọrọ ete: “Bible idịghe n̄wed emi ẹkpedade ẹnam mbubru. Enye edi n̄kukụre usụn̄ emi ikemede ndidiọn̄ọ etop Abasi. Enye edi nnennen n̄wed emi ekpetemede nnyịn nte ikpodude uwem.”

 Sally ama ọdọhọ ke imama Bible etieti, ke oro akanam imọ ikpep Latin ye Greek, onyụn̄ ọdọhọ ke imama ukabade n̄wed etieti. Enye ọdọhọ ke ọfọn ẹkabade Bible ata nnennen nnennen utu ke owo ndikabade nte onyụn̄ enemde enye. Idem ama akpa enye ini mme asiakusụn̄ oro ẹdọhọde enye ke ẹdọn̄ n̄kpọ Ikọ Abasi ke ikpehe Intanet nnyịn ke usem 800, ama onyụn̄ enem enye tutu. Ke ini nditọete oro ẹketịn̄de se mme akabade n̄wed ẹnamde ye enyịn̄ Abasi, enye ama edịghe onyụn̄ obụp ete, “Ntak emi ẹsiode enyịn̄ Jehovah ẹfep ke Bible?” Enye ama ọdọhọ ini oyomde ndinyọn̄ ete: “Toto ke emana ke ndụn̄ mi, akanam n̄kwe mbọhọidụn̄ emi ẹtiede nte mbufo.”

Ke Monday oro eketienede, oku ufọkabasi kiet ama edineme nneme ye owo Bethel emi ekerede John, emi ọkọdọn̄de n̄wed ke ukpatn̄kpọ ọkwọrọ ikọ ke ebiet emi mme owo ẹwakde ke mbọhọ Bethel. Enye ama ọdọhọ John ke ama enem imọ etieti ndidi ndise n̄kpọ ke Bethel, onyụn̄ ọdọhọ ke imama nte nnyịn isọn̄ọde iyịre ke se Bible etịn̄de. Nte mmọ ẹkesụk ẹnemede nneme, ete oro ama ọdọhọ inikiet inikiet ete: “Esịt ayat mi etieti ye mbufo!” Ikan̄wan̄ake John se inam enye etịn̄ ikọ ntre, ntre John ama obụp ntak emi enye etịn̄de ikọ ntre. Enye ama ọdọhọ ete: “Sia mbufo ẹyom ndiwọrọ mi! ẸKÛWỌRỌ! M̀mê ẹyom ndidep ikpọ ufọk mi, ẹdep; mîdịghe ẹbọp se ẹyoyom, edi ẹkûwọrọ mi. Mbufo ẹnam emem odu ke mbọhọ emi. Ayat mi etieti nte mbufo ẹyomde ndiwọrọ mi!”

Nnyịn ndikot mbọhọidụn̄ nnyịn ẹdise ndiye nsio nsio Bible oro ke Bethel ama anam mmọ ẹnen̄ede n̄kpọ ẹban̄a ẹdiọn̄ọ utom nnyịn, onyụn̄ anam mmọ ẹkụt ke enyịn̄ Abasi edi ata akpan n̄kpọ.