Mme owo ke usụk usụk Benin ẹsima ndikpe masịn n̄ka n̄kpọ. Ẹkot utọ masịn emi zem ke n̄kan̄ oro. Asiakusụn̄ unọ un̄wam emi ekerede Désiré ama esịn radio ke masịn esie onyụn̄ ọwọn̄ọde spika iba ke iso owụt edem. Enye esibre mme drama Bible ye mme n̄wed nnyịn emi ẹkotde ẹdọn̄ ke Intanet. Ke ini mme owo ẹdọkde masịn esie, mmọ ẹsisọp  ẹkpan̄ ẹkop se enye ebrede. N̄kpọ emi esinem mmọ tutu edieke ẹsịmde ebiet emi mmọ ẹkade ke ini n̄kpọ oro mîkụreke, ndusụk ẹsibet esisịt ẹfiak ẹkop, ndusụk isimaha ndisụhọde tutu okụre. Désiré ọdọhọ ete: “N̄kpesima mmọ ẹkpe okụk ẹdaha yak n̄koyom owo en̄wen mmen, edi nsida nte ke mmọ ndikop eti mbụk edi akpan n̄kpọ akan okụk. Emi esinam mme owo ẹbọ mi ata ediwak n̄wed nnyịn.”

Enyene ekpri eyenan̄wan isua itiokiet emi ekerede Nolla, emi odude ye ubon mmọ ke Burundi. Usen kiet ke ini mmọ ẹkesụk ẹtemde udia, iren iba emi ẹkenamde utom ẹkpere ufọk mmọ ẹma ẹdiben̄e ukan̄ ẹte ke iyom ndimen n̄kabara ikan̄. Ini oro Nolla ikọtọn̄ọke n̄wed kan̄a, ndien enye eketie ke otụn̄ikan̄. Nolla ama ayak mmọ ẹsio ukan̄. Edi ibịghike ke ini enye akasan̄ade ebe ke itie emi mmọ ẹnamde utom, enye ama okụt ke mmọ ẹkeda ukan̄ oro ẹdomo sika ẹn̄wọn̄. N̄kpọ oro ama abiak Nolla tutu enye ọdọhọ mmọ: “Ekpedi mma ndiọn̄ọ ke ẹyom ndida ukan̄ oro n̄n̄wọn̄ sika, n̄kpọkọnọhọ mbufo.” Enye ama eti ke ima ikụt magazine emi ndise sika odude ke Ufọkmbono Obio Ubọn̄. Ntre enye ama efehe aka do ekemen Enyọn̄-Ukpeme June 1, 2014, emi eketịn̄de n̄kpọ aban̄a un̄wọn̄ sika edinọ mmọ onyụn̄ eyịre mmọ ete ẹkot idaha idahaoro. Ekem ke ini enye akafiakde okụt mmọ, enye ama ọnọ mmọ n̄wedikot ete ẹdi akamba mbono. Se enye akanamde emi ama akpa iren oro idem, onyụn̄ anam mmọ ẹdụk mbono oro usen iba. Nolla ama okot mmọ ke ini udia uwemeyo ete  ẹditiene mmimọ ẹdia n̄kpọ. Se iren iba oro ẹkekopde ẹnyụn̄ ẹkụtde ke mbono oro ama anam mmọ ẹtọn̄ọ ndikpep Bible.

Mbiowo ẹsikwọrọ ikọ ẹnọ mme owo ke nsio nsio ufọk-n̄kpọkọbi ke Liberia. Enyene akpan asiakusụn̄ emi ekerede Yves emi odude ke Monrovia, ibuot obio Liberia. Enye ọdọhọ ete: “Owo ita ke ufọk-n̄kpọkọbi emi ẹkotde Monrovia Central Prison ẹma ẹdi mme asuanetop emi mînaha baptism ke March. Imenyene mme asuanetop itiokiet idahaemi ke ufọk-n̄kpọkọbi oro.” Mmọ ẹsikwọrọ ikọ didie do? Yves ọdọhọ ete: “Mmọ ẹsisop idem ẹka ukwọrọikọ kpukpru Wednesday ye Saturday. Ẹsiyak mmọ ẹsan̄a ke ubet ufọk-n̄kpọkọbi kiet kiet ẹkwọrọ ikọ ẹnọ mbon n̄kpọkọbi eken.” Ediwak mbon n̄kpọkọbi ẹsikpep Bible ẹnyụn̄ ẹdụk ikọ Abasi oro isinịmde do. Owo ama oto ọfis nnyịn edinịm ikọ Abasi ke ufọk-n̄kpọkọbi oro, ndien mbon n̄kpọkọbi 79 ẹkedụk ikọ Abasi oro. Mme owo ke ufọk-n̄kpọkọbi itiokiet en̄wen ẹsitie kiet ẹkpep Bible kpukpru ini, ndien emi anam ediwak mmọ ẹkpụhọde.

Ẹma ẹnam n̄kpọ man ẹn̄wam mbon emi obio mmọ odude ata nsannsan ẹdụk Editi n̄kpa Christ. Ke uwụtn̄kpọ, mbon San (emi ẹsikotde mbon esịt ikọt) ẹdi ata mme amanaisọn̄ usụk usụk Africa. Mmọ isidụn̄ke itie kiet ke ofụri uwem mmọ, ẹsinyụn̄ ẹsan̄a ke ikọt ẹtop unam ẹta ẹnyụn̄ ẹdia se ẹkụtde ke ikọt. Akpan  asiakusụn̄ emi ekerede Glenn onyụn̄ odude ke edere edere Namibia, ama anam ndutịm man ẹnịm Editi isua 2015 ke obio mbon San. To ke Rundu sịm do edi itiat 170. Ọyọhọ ikaba emi ẹnịmde Editi do ekedi oro. Isan̄ akpa ye isan̄ enye emi, ikpọ owo obio oro ẹma ẹnọ Mme Ntiense Jehovah ufọkesop ke mfọn ẹda ẹnịm Editi. Kpa ye ofụri edịm emi ekedepde, owo 232 ẹma ẹdi. Mbon San ke n̄kan̄ emi ẹsem Khwe. N̄kpri n̄kpri uyom awak ke usem emi. Ẹma ẹkabade se ẹketịn̄de ke Ikọmbakara ẹsịn ke Khwe. Ẹkesosio ndise n̄kpọ emi ẹtịn̄de ke Bible utọ nte ke Isaiah 35:5, 6 ẹnọ mmọ sia owo inyeneke Bible ke usem oro. Glenn esikpep ediwak owo do Bible sia mmọ ẹma ikọ Abasi. Enye ọdọhọ ete: “Ke ofụri isua iba emi ebede, nsidi mi inikiet ke ọfiọn̄ ndidu usen ifan̄. Edi usem ye anyan usụn̄ iyakke ẹkeme ndisọp n̄n̄wam mmọ. Imenen̄ede iyom un̄wam. Ini n̄kakade ndikụt ikpọ owo obio man nnam ndutịm mban̄a Editi isua emi, owo mmọ kiet ama obụp m̀mê ikpama ndinyene itie emi nnyịn idisisopde idem ke obio oro. Enye ọkọdọhọ ke mmimọ iyọnọ isọn̄ inyụn̄ ida okụk mmimọ ibọp, ke n̄kukụre se nnyịn idinamde edi ndinọ ‘pastọ’ m̀mê ndikpep owo mmimọ kiet utom pastọ.”