Ke July 9, 1964, Itieutom Emi Ẹsede Ẹban̄a Ikpe ke Indonesia ẹma ẹsịn N̄ka Nditọ Ukpepn̄kpọ Bible enyịn̄ ke n̄wed. N̄ka emi ẹkeda ke ibuot Mme Ntiense Jehovah. Edi akana Itieutom Emi Esede Aban̄a Ido Ukpono ẹtiene ẹsịn enyịn̄ n̄ka emi ke n̄wed mbemiso ẹyak Mme Ntiense ẹnam n̄kpọ Abasi mmọ. Itieutom oro ẹkesinam se Itieutom Emi Ẹsede Ẹban̄a Utom Mme Christian ẹdọhọde, ndien mbon Protestant emi ẹkesuade Mme Ntiense Jehovah etieti ẹkenam utom do.

Usen kiet, Ntiense kiet ama okụt akamba owo ukara emi esinamde utom ye ata akwaowo emi esede n̄kpọ aban̄a ido ukpono. Ke ini mmọ ẹkediọn̄ọde ke ito obio kiet, mmọ ẹma ẹkpụhọ nneme ẹsịn ke usem obio mmọ. Ntiense oro ama etịn̄ se Itieutom Emi Ẹsede Ẹban̄a Utom Mme Christian ẹnamde mmimọ, ndien ete  oro ama anam nditọete ita ẹkekụt ata akwaowo Itieutom Emi Esede Aban̄a Ido Ukpono, owo Muslim emi ẹkesifọnde ido. Ke May 11, 1968, ata akwaowo oro ama ọdọhọ ke ukara ẹnyịme Mme Ntiense Jehovah ẹdu ke Indonesia ẹnyụn̄ ẹnam n̄kpọ Abasi mmọ.

Akamba owo ukara oro okotode obio kiet ye eyenete nnyịn oro ama an̄wam mme isụn̄utom ẹbọ n̄wedisan̄ man ẹkeme ndidụk Indonesia, idaha ibet Itieutom Emi Ẹsede Ẹban̄a Utom Mme Christian ẹnọ unyịme. Ke ufan̄ isua ifan̄, enye ama anam mme isụn̄utom 64 ẹkeme ndidụk Indonesia. Ete oro ama ọfọn uwem tutu.

Ke 1968, n̄kpọ nte isụn̄utom 300 ye mme akpan asiakusụn̄, ẹma ẹtiene mme asuanetop 1,200 ẹkwọrọ ikọ ke ofụri Indonesia. Mme isụn̄utom oro ẹma ẹkpep nditọete nte ẹkpenamde n̄kpọ ke esop Abasi. Emi ama anam nditọete oro ẹnen̄ede ẹsọn̄ idem ke esop. Se mmọ ẹkenamde oro ama ọfọn etieti sia ikebịghike ọkpọsọn̄ ukọbọ ama ọtọn̄ọ.

Ke 1974, Itieutom Emi Ẹsede Ẹban̄a Utom Mme Christian ẹma ẹfiak ẹtọn̄ọ ndisịn nsọk man ẹtre utom Mme Ntiense Jehovah. Akwaowo mmọ ama osu nsu ke leta ọnọ nsio nsio ọfis Itieutom Emi Esede Aban̄a Ido Ukpono ete ke ukara inyịmeke Mme Ntiense ẹdu ke Indonesia. Enye ama ọdọhọ mmọ ẹnam se mmọ ẹkụtde ke ọfọn edieke Mme Ntiense mîyakke mmọ “ẹbọ emem.” Enye akada n̄kari anam ẹkọbọ Mme Ntiense. Ediwak mbon ukara ikọbọrọke enye. Edi ndusụk mmọ ẹma ẹda oro ẹtre Mme Ntiense ndinịm mbono esop mmọ nnyụn̄ n̄kwọrọ ikọ ke ufọk ke ufọk.

Ini oro n̄ko ke Esop Ufọkabasi Ofụri Ererimbot ẹkeyom ndinịm mbono ke Jakarta. N̄kpọ oro ama ayat  mbon Muslim etieti. Sia mbono oro okoyomde ndida ikọ ndi, owo ikenịmke enye aba. Ndusụk owo ẹma ẹkabade Christian, ndien emi ama ada mfịna edi onyụn̄ anam mbon ukara ndịk. Ikpọ owo ufọkabasi ẹma ẹnam se ẹsisụk ẹnamde; mmọ ẹkedọhọ ke ukwọrọikọ Mme Ntiense Jehovah ada mfịna oro edi. Emi ama anam ediwak ikpọ owo ukara ẹsua Mme Ntiense.

Ke December 1975, ke ini mfịna oro ekenen̄erede ọsọn̄ ubọk, Indonesia ẹma ẹda ekọn̄ ẹdụk East Timor (emi ẹkotde Timor-Leste idahaemi) emi mbon Portugal ẹkesikarade. Ọfiọn̄ itiaba ke oro ebede, mmọ ẹma ẹbọ ukara ke East Timor. Mme owo ke Indonesia ẹma ẹben̄e idem ndinam se ededi oro idụt mmọ ẹkedọhọde. Edi Mme Ntiense iketieneke isịn idem ke kpukpru emi, ikenyịmeke ndika ekọn̄, ikonyụn̄ imaha ndikọm ọfọn̄ etakubom (flag). N̄kpọ oro ama ayat ikpọ owo ekọn̄ n̄kpa n̄kpa. (Matt. 4:10; John 18:36) Ikpọ owo ufọkabasi ẹma ẹda ufan̄ oro ẹdọhọ ukara ẹtre utom Mme Ntiense Jehovah. Ke akpatre ndien, ukara ẹma ẹtọt ke ufọt ufọt December 1976 ẹte ke ẹtre utom Mme Ntiense Jehovah ke Indonesia. Emi eketie ikpọ owo ufọkabasi nte ẹnọ mmọ “enọ Christmas.”