KE April 14, 1989, ke ini n̄kosụk nnịmde mbono esop ke Maumere ke Flores Island, mbon ukara ẹma ẹdụk ufọk inikiet inikiet ẹdimụm mi ye nditọete ita.

Mme ekpeme ufọk-n̄kpọkọbi ẹma ẹdomo ndinam nnyịn ikọm ọfọn̄ etakubom (flag). Sia nnyịn mîkenyịmeke, mmọ ẹma ẹtịm nnyịn, ẹtigha nnyịn, ẹnyụn̄ ẹnam ida ke nainai eyo usen ition. Tuep ama esinam nnyịn etieti okoneyo sia ikesina ke isọn̄ itiat ke ekpri ufọk emi ẹkesịnde nnyịn. Idem ama emem nnyịn onyụn̄ abiak nnyịn ke ntak unan emi ẹkenọde nnyịn. Owo ikayakke iyere mmọn̄. Owo emi ekesede aban̄a mbon ufọk-n̄kpọkọbi ama esidi edidọhọ ikọm ọfọn̄ etakubom oro, edi ima isidọhọ: “Nnyịn idikọmke, ọkpọkọm ẹyom ndiwowot nnyịn.” Ima inyịme ndibọ ufen “ke ntak edinen ido” ukem nte mme Christian ke eset.—1 Pet. 3:14.