Ke ini ikpọ owo ufọkabasi ẹkekopde ke ukara ẹfiak ẹnyịme Mme Ntiense Jehovah ẹdu ke Indonesia, mmọ ẹma ẹyat esịt etieti. Mme etubom ye ikpọ owo nsio nsio ufọkabasi itiaba ẹma ẹnịm mbono ke Jakarta man ẹnam ukara ẹkpụhọ ekikere. Mmọ ẹma ẹwak ẹbe owo 700. Edi ukara ikọbọrọke mmọ ikọ.

Ke ini mme owo ẹkekopde ke ukara inyeneke mfịna aba ye nnyịn, mmọ ẹma ẹwet ẹdọhọ ọfis nnyịn ẹnọ n̄wed ẹsọk mmimọ mîdịghe ẹdọhọ owo edikpep mmimọ Bible. Ke 2003, mbon emi ẹkedụkde Editi ẹma ẹbe 42,000; mmọ ẹma ẹwak utịm ikaba ẹkan kpukpru Mme Ntiense ke idụt oro. N̄kpọ nte owo 10,000 ẹma ẹdụk mbono ke Jakarta. Akwaowo Itieutom Emi Esede Aban̄a Ido Ukpono ama etiene odụk. Idem ama akpa enye ndikụt nte ikpọ owo ye nditọwọn̄ ẹtienede ẹkụbọde Bible. Enye ama ọdọhọ nditọete ke iyanam se ikekeme man inam mme owo ẹfiọk ke idịghe kpukpru se mmọ ẹsikopde ẹban̄a Mme Ntiense Jehovah edi akpanikọ.

Ẹma ẹyak mme isụn̄utom ẹfiak ẹdi Indonesia. Mbon emi ẹkebemde iso ẹdi ẹkedi Josef ye Herawati Neuhardt * (emi ẹketode Solomon Islands ẹdi), Esa ye Wilhelmina Tarhonen (emi ẹketode Taiwan ẹdi), Rainer ye Felomena Teichmann (emi ẹketode Taiwan ẹdi), ye Bill ye Nena Perrie (emi ẹketode Japan ẹdi). Ekem ẹma ẹnọ mbufa isụn̄utom ẹto Gilead ẹka North Sumatra, Kalimantan, North Sulawesi, ye mme obio eken.

 Ke 2005, ọfis nnyịn ẹma ẹtọn̄ọ ndinịm ufọkn̄wed esop Abasi iba. Julianus Benig emi eketienede ekpep mme owo n̄kpọ ke Ufọkn̄wed Unọ Mme Asan̄autom Ukpep (emi ẹkotde Ufọkn̄wed Mme Ọkwọrọ Obio Ubọn̄ idahaemi) ọkọdọhọ ete: “Ama enem mi tutu ndin̄wam nditọ ufọkn̄wed emi ẹnen̄ede ẹdiọn̄ọ ndikpep mme owo n̄kpọ nnyụn̄ nnọ utịn̄ikọ, nnyụn̄ n̄n̄wam esop Abasi.” Ediwak nditọ ufọkn̄wed oro ẹdi mme akpan asiakusụn̄ ye mme esenyịn circuit idahaemi. Ufọkn̄wed en̄wen emi ẹkenịmde ekedi Ufọkn̄wed Mme Esenyịn Oro Ẹsan̄ade-San̄a. * Mbon emi ẹkewakde ẹkan ke ufọkn̄wed oro ẹkedi mbon emi ẹma ẹkekpekpep mmọ nte ẹkpesede ẹban̄a esop Abasi ke ini ukara ẹketrede utom nnyịn. Edi obufa ufọkn̄wed enye emi ama enen̄ede an̄wam mmọ ẹnam utom mmọ ke ukara ẹma ẹkenyịme ifiak itọn̄ọ utom nnyịn. Owo kiet ke otu akpa nditọ ufọkn̄wed oro, emi ekekerede Ponco  Pracoyo, ọkọdọhọ ete: “Ufọkn̄wed oro ama ekpep mi ndinam utom esenyịn circuit ọfọn onyụn̄ ekpep mi ndinen̄ede ntua mme owo mbọm. Ufọkn̄wed oro ama enem onyụn̄ ọsọn̄ọ mi idem!”

Ediwak esop ẹkesinịm mbono esop ke ufọk owo ke ofụri isua 25 emi ẹketrede utom nnyịn. Esop ifan̄ kpọt ẹkenyene Ufọkmbono Obio Ubọn̄, ndien ukara ikesisọpke inyịme ẹbọp obufa Ufọkmbono Obio Ubọn̄. Edi sia mbufa esop ẹkenen̄erede ẹwak, ọfis nnyịn ẹma ẹsiak Itieutom Ubọp Ufọkmbono Obio Ubọn̄ (mmọ ke ẹsikot idahaemi Itieutom Emi Ẹsede Ẹban̄a Ubọpn̄kpọ ke Idụt Mmọ).

Akpa itie emi mmọ ẹkebọpde Ufọkmbono Obio Ubọn̄ ekedi ke Nias Island ke North Sumatra. Haogo’aro Gea emi odude ke esop Gunungsitoli ke ata ediwak isua, ọdọhọ ete: “Esịt ama enem nnyịn etieti ke ini ẹkedọhọde ke ẹmọn̄ ẹdibọp Ufọkmbono Obio Ubọn̄ ẹnọ nnyịn. Ọfis ẹma ẹnọ owo itiaba ẹdise ẹban̄a utom oro. Ẹma ẹbọp enye ẹma ke 2001.” Owo kọmiti emi ẹkesede ẹban̄a utom ubọp ufọkmbono, emi ekerede Faonasökhi Laoli, ọdọhọ ete: “Sia ikesinịmde mbono esop ke ufọk owo, mme owo ke obio ikesidaha Mme Ntiense Jehovah ke n̄kpọ . Edi ke ẹma ẹkebọp Ufọkmbono Obio Ubọn̄, nnyịn ikesidịghe aba owo 20 ke mbono esop edi ikesidi owo 40. Ndien ke ufan̄ isua kiet kpọt ima iwak utịm ikotion ikan oro. Ufọkmbono oro eye akan mme ufọk eken, ndien mme owo ke obio ẹkpokpono Mme Ntiense Jehovah idahaemi.”

Ke 2006, nditọete ẹma ẹtọn̄ọ ndiyom isọn̄ man ẹda ẹbọp ata akpa Ufọkmbono Obio Ubọn̄ ke Bandung ke West Java. Ebiowo emi ekerede Singap Panjaitan, emi okodude ke kọmiti emi ẹkesede ẹban̄a utom oro ọdọhọ ete: “Akada nnyịn ofụri isua kiet ndikụt eti itie. Edi akana  owo 60 emi mîdịghe Mme Ntiense Jehovah, emi ẹkedụn̄de ẹkpere itie oro, ẹsịn ubọk ke n̄wed mbemiso ukara ẹyak ibọp ufọkmbono oro. Owo 76 ẹma ẹsịn ubọk. Ata ọwọrọetop mma kiet emi ekesisuade Mme Ntiense ama etiene esịn ubọk. Ke ima ikọbọp Ufọkmbono Obio Ubọn̄ oro ima, ima ikot mbon emi ẹkedụn̄de ẹkpere ufọk oro ye ọbọn̄ obio Bandung ite ẹdise. Ọbọn̄ oro ama ọdọhọ ete: ‘Nte mme ufọkabasi eken ẹkpesitiede edi emi. Akpana mmọ ẹsisana ẹnyụn̄ ẹye ntem.’” Ufọkmbono oro ekedi ufọkenyọn̄, ndien ẹkeyak enye ẹnọ Abasi ke 2010.

Ufọkmbono Obio Ubọn̄ emi ẹbọpde ke Indonesia tọn̄ọ 2001 ẹbe 100, edi oro isụk ikemke.