Ẹma ẹkabade vidio emi, Ntak Emi Ekpekpepde Bible?, ke usem itiaita man ẹda ẹn̄wam mme owo ke mme ebiet emi ọfis nnyịn ke Canada ẹsede ẹban̄a. Ke October 2014, ẹma ẹsio usen duop ẹda ẹka ukwọrọikọ ke obio 14 ke Nunavik Arctic. Ufọk ifan̄ kpọt ke owo mîkowụtke mme owo vidio oro ke usem Inuktitut. Mme owo ẹbe 12,000 ke mme obio oro.

Ke September 2014, ẹma ẹnịm akamba mbono ofụri ererimbot ke Seoul ke South Korea. Ẹkenịm ke akamba  an̄wambre Sangam. Mme owo ẹma ẹbe 56,000, ndien mbono oro ama enem mmọ etieti. Owo emi esisede aban̄a an̄wambre oro ama etịn̄ ke imama nte Mme Ntiense ẹkenamde n̄kpọ ẹnyụn̄ ẹdianade kiet. Enye ọkọdọhọ ete: “Kpukpru owo ẹma ẹfọn uwem. Ama eye mi ndikụt nte mmọ ẹnamde an̄wambre oro asana akan nte mbonutom nnyịn ẹsinamde. Ubaha nte mbonutom nnyịn ẹkpesinamde utom ntre. Edieke iyomde ndinen̄ede nnam n̄kpọ Abasi, ọfọn itie nte Mme Ntiense Jehovah.”

Ke May 2012, Mme Ntiense Jehovah ẹma ẹdọhọ ukara Sweden ẹte ẹnam n̄kpọ ye mmimọ nte mmọ ẹsinamde ye mme ufọkabasi eken, edi mmọ ikenyịmeke. Ntre  Otu Emi Ẹsede Ẹban̄a Utom Mme Ntiense Jehovah ẹma ẹdọhọ yak ẹda n̄kpọ oro ẹka ata akamba esop ke idụt oro.

Esop ẹma ẹdọhọ ke ikpama ndikop nto mmọ mbemiso ibierede n̄kpọ ndomokiet. Nditọete ẹma ẹto nsio nsio idụt ẹdisop idem ke Ufọkmbono Obio Ubọn̄ ke Stockholm ẹkọk ibuot ẹban̄a nte idibọrọde se ẹdibụpde mmimọ.

Nte mmọ ẹsụk ẹnemede n̄kpọ emi, mmọ ẹma ẹkop ẹkọn̄de usụn̄. Ke ini owo mmọ kiet ekebererede usụn̄, enye ama okụt n̄kpri nditọ iban iba—kiet ekedi isua 13 enye eken edi 14. Nditọ oro ẹma ẹdọhọ ke iyom ndibụp enye ndusụk n̄kpọ mban̄a Mme Ntiense Jehovah. Eyenete oro ọkọdọhọ ete: “Mma nyom ndidọhọ mmọ ẹka ẹfiak ẹdi usen efen, sia nnyịn ikenyeneke ini ikonyụn̄ ikereke ke edi se inemede utọ n̄kpọ ntre idahaoro.”

Edi eyenete oro ama osụk ọbọrọ mbụme mmọ. Nditọ oro ẹma ẹbụp enye ediwak mbụme, ndien ndusụk mbụme mmọ akaban̄a mme n̄kpọ emi ẹsinamde ke obio ye edisịn n̄wed nnọ owo. Ke eyenete oro ama ọkọbọrọ mmọ ama, enye ama odụk ebịne nditọete eken eketịn̄ se nditọ oro ẹkebụpde enye ye se enye ọkọbọrọde mmọ.

Idem ama akpa mmọ edem usen oro sia ediwak se ẹkebụpde mmọ ke esop ekedi ata ukem se nditọ oro ẹkebụpde. Eyenete emi akadade ke ibuot esop Abasi ọdọhọ ete: “Akpakana idem enyek mi sia n̄kadade ke iso ata ikpọ mme ekpeibet ke idụt oro, edi idem ikenyekke mi. Mma n̄kụt ke Jehovah ama ada nditọ oro eteme nnyịn se iditịn̄de mbemiso ikade esop onyụn̄ owụt ke imọ do ye nnyịn.”

Esop ẹma ẹda ye nnyịn ẹnyụn̄ ẹdọhọ yak ukara ẹfiak ẹse n̄kpọ oro.

Ken emi edide isua itiokiet odụn̄ ke Haiti. Ama enem enye ndikop ke ẹmọn̄ ẹbọp obufa Ufọkmbono Obio Ubọn̄ ẹnọ esop mmimọ, ntre enye ama ọkọn̄ ekpri ekebe emen ekedịp ke ubet esie. Ke ini ete ye eka esie ẹnọde enye okụk ekedep n̄kpọ ata ke ufọkn̄wed, enye eyemen esịn ke ekebe oro utu ke ndimen nta n̄kpọ. Enye ama anam emi tutu esịm ini emi nditọete emi ẹsibọpde Ufọkmbono Obio Ubọn̄ ẹkedide ẹdisịm, onyụn̄ emen ekebe oro ọnọ mmọ. Okụk emi ekesịnede do ama ekem se ẹdade ẹdep akamba ekpat edesi kiet. Edesi Ken oro ke ẹkesidia uwemeyo ke ata ediwak usen.

Isua oko ke ini udọn̄ọ Ebola ke Sierra Leone, akana ẹbọbọ unyịme mbemiso ẹdụkde mme itie emi udọn̄ọ oro okomụmde isọn̄. Akana mme esenyịn circuit ye mbon emi ẹmende n̄wed ye leta nnyịn ẹka mme itie oro ẹbọ kad idiọn̄ọ ye san̄asan̄a n̄wed emi ẹkenọde mme owo man ẹyak mmọ ẹwat ubomisọn̄ ẹdụk utọ mme itie oro. Akana Kọmiti Unọ Un̄wam ke Ini Afanikọn̄ ẹda udia, ibọk uyet ubọk, ye n̄kpọ emi ẹsikamade ẹda nsan nsan ẹdomo nte idem owo ofiopde eketre, ẹka do n̄ko. Owo ikesitreke ndinọ nnyịn kad ye n̄wed oro.

Se iketịbede isan̄ kiet ama anam ikụt ke Abasi do ye nnyịn. Nditọete ẹma ẹsịn n̄wed ẹyom kad idiọn̄ọ 34 ye san̄asan̄a n̄wed oro idem 11, edi akana mmọ ẹkụt akwa owoekọn̄ kiet mbemiso ẹnọde mmọ. Nditọete iba ẹma ẹto ọfis nnyịn ẹka ndikụt enye ẹnyụn̄ ẹkere ke iyọbọ mme n̄kpọ oro kpa usen oro. Edi owo ikekwe ebiet emi ẹkenịmde n̄wed eben̄e mmọ. Ẹma ẹdọhọ nditọete oro ẹyom ekemmọ ke ebiet oro ẹkebonde eke mbon eken, edi mmọ ikosụk ikwe. Ete oro ama ọdọhọ ewetn̄wed esie  ke imọ imọn̄ inyọn̄, ke owo idinyụn̄ isehe n̄kpọ iban̄a n̄wed eben̄e owo ndomokiet tutu urua iba ẹbe. Nditọete oro ẹma ẹbọn̄ akam ke esịt mmọ ẹdọhọ Jehovah an̄wam mmimọ. Ekem ete oro ama ọwọn̄ọde ese mmọ onyụn̄ obụp m̀mê mmọ ẹyom kad idiọn̄ọ ye san̄asan̄a n̄wed oro idem ifan̄. Ke mmọ ẹma ẹkesiak ibat, ete oro ama adaha ada onyụn̄ ofiori ete: “Awak akaha!”

Nditọete oro ẹma ẹnam utom nnyịn an̄wan̄a enye ẹnyụn̄ ẹnam enye ọdiọn̄ọ se nnyịn inamde man in̄wam mme owo ke ini Ebola oro. Akwa owoekọn̄ oro ama odop ada sụn̄, ekem ọwọn̄ọde ese ewetn̄wed esie onyụn̄ ọdọhọ ete: “Nọ mmọ kpukpru se mmọ ẹyomde.”