Edinen Ido Asiaha ke Zion
Ibuot Edịp Ye iba
Edinen Ido Asiaha ke Zion
1, 2. Nso ukpụhọde oyom ndisịm Israel, ndien anie edida emi idi?
ẸYAK ẹtan̄a ubọhọ-ufụn! Jehovah ebiere ndinam ikọt esie ẹbọhọ ufụn nnyụn̄ mfiak ntan̄ mmọ mbok ke isọn̄ mme ete mmọ. Ukem nte n̄kpasịp oro asiahade ke ekpri edịm ama ekedep, utuakibuot akpanikọ ayafiak asiaha. Usen oro ama edisịm, itoro idatesịt ayada itie unana idotenyịn, ndien ibuot oro ke mbemiso ọkọyọhọde ye ntọn̄ mfụhọ eyenyene unyịme Abasi.
2 Anie edida utịbe utịbe ukpụhọde emi idi? Jehovah kpọt ekeme ndinam utọ n̄kpọ emi. (Psalm 9:19, 20; Isaiah 40:25) Prọfet Zephaniah ama owụk ke ntịn̄nnịm ikọ ete: “O adiaha Zion, kwọ; mbufo Israel ẹsio n̄kpo idara; O adiaha Jerusalem, dara nyụn̄ bre ke ofụri esịt. Jehovah ọmọbọ fi ufen efep, amakabade usua fo efep: edidem Israel, Jehovah, odu ke otu mbufo: afo udukwe aba idiọk.” (Zephaniah 3:14, 15) Nso ini idatesịt ke oro edidi ntem! Ke ini Jehovah atan̄de nsụhọ oro ẹtode Babylon ẹfiak ẹnyọn̄ọ ẹdi obok ke 537 M.E.N., editie nte ndap osu.—Psalm 126:1.
3. Mme edisu ewe ke mme ntịn̄nnịm ikọ eke Isaiah ibuot 61 ẹnyene?
3 Ẹbem iso ẹtịn̄ ẹban̄a edifiak n̄wụk emi ke Isaiah ibuot 61. Nte ededi, ke adan̄aemi ntịn̄nnịm ikọ emi nte an̄wan̄ade okosude ke 537 M.E.N., enye osu ata ọyọhọ ọyọhọ ke ukperedem ini. Ata ọyọhọ edisu abuana Jesus ye mme anditiene enye eke akpa isua ikie ye ikọt Jehovah eke eyomfịn. Do, mme ikọ emi ẹnyene se ẹwọrọde didie ntem!
“Isua Mfọnido”
4. Anie ke ẹkedọn̄ ẹte obụk eti mbụk ke akpa edisu Isaiah 61:1, ndien anie ke ẹkedọn̄ ke udiana edisu?
4 Isaiah ewet ete: “Spirit Ọbọn̄ Jehovah odoro mi: koro, Jehovah emeyet mi aran enịm, man mbụk eti mbụk nnọ mbon nsụk-esịt; ọmọdọn̄ mi, ete mbọp mmọ eke esịt mmọ obụn̄ọde, n̄kwọrọ uwọrọ-ufụn nnọ mbuot ekọn̄, n̄kwọrọ nsana nyak nnọ mmọ eke ẹkọbide.” (Isaiah 61:1) Anie ke ẹdọn̄ ẹte obụk eti mbụk? Eyedi ekedi Isaiah ke akpa ini, emi Abasi ọkọnọde odudu spirit ndiwet eti mbụk nnọ mbon ntan̄mfep ke Babylon. Nte ededi, Jesus akanyan ubọk owụt edisu emi edide akpan n̄kpọ akan ke ini akadade mme ikọ Isaiah etịn̄ aban̄a idemesie. (Luke 4:16-21) Ih, ẹkedọn̄ Jesus ẹte obụk eti mbụk ọnọ mbon nsụkesịt, ndien ke ntak emi ẹma ẹyet enye aran ke edisana spirit ke ini baptism esie.—Matthew 3:16, 17.
5. Mmanie ẹkwọrọ eti mbụk ke n̄kpọ nte isua 2,000?
5 Akan oro, Jesus ọkọnọ mme anditiene enye ukpep man ẹdi mme ọkwọrọ eti mbụk. Ke Pentecost 33 E.N., ẹma ẹyet n̄kpọ nte owo 120 aran ke edisana spirit ndien mmọ ẹkabade nditọ Abasi eke spirit. (Utom 2:1-4, 14-42; Rome 8:14-16) Ẹma ẹdọn̄ mmọ n̄ko ẹkebụk eti mbụk ẹnọ mbon nsụkesịt ye mbon oro esịt obụn̄ọde. Owo 120 oro ẹkedi akpa ke otu owo 144,000 oro ẹkeyetde aran ke usụn̄ emi. Akpatre ke otu emi ke ẹsụk ẹnam utom ifịk ifịk ke isọn̄ mfịn. Ntem, ke n̄kpọ nte isua 2,000, mme anditiene Jesus oro ẹyetde aran ẹmekwọrọ ẹte “ẹkabade esịt ẹtiene Abasi, ẹnyụn̄ ẹbuọt idem ye Ọbọn̄ nnyịn Jesus Christ.”—Utom 20:21.
6. Mmanie ẹkenyene ubọhọ ẹto edikop eti mbụk ẹkekwọrọde ke eset, ndien nso kaban̄a mfịn?
6 Etop Isaiah eke odudu spirit ama ada ifụre ọsọk mme Jew oro ẹkekabarede esịt ke Babylon. Ke eyo Jesus ye mme mbet esie, etop emi ama ada ifụre ọsọk mme Jew oro esịt okobụn̄ọde ke ntak idiọkido ke Israel, oro ẹkenyụn̄ ẹdude ke mfụhọ ke itie-ufụn mme nsunsu ido edinam Ido Ukpono Mme Jew eke akpa isua ikie. (Matthew 15:3-6) Mfịn ediwak miliọn owo oro afia ido edinam ukpono ndem Christendom ye mme ido edinam oro ẹsuenede Abasi ẹmụmde ke ‘ẹseme ẹnyụn̄ ẹtuan̄a’ ẹban̄a mbubiam n̄kpọ oro ẹnamde ke ndutịm ido ukpono oro. (Ezekiel 9:4) Ẹnam mbon oro ẹnamde n̄kpọ ẹban̄a eti mbụk ẹbọhọ mfụhọ mfụhọ idaha oro. (Matthew 9:35-38) Enyịn ikike mmọ ẹnen̄ede ẹn̄wan̄a ke ini mmọ ẹkpepde ndituak ibuot nnọ Jehovah “ke spirit ye ke akpanikọ.”—John 4:24.
7, 8. (a) Ewe ẹdi “isua mfọnido” iba? (b) Nso idi mme “usen usiene” Jehovah?
7 Ini odu ọnọ edikwọrọ eti mbụk. Ẹma ẹdọn̄ Jesus ye mme anditiene enye ẹte: “[Ẹkwọrọ] isua mfọnido Jehovah, ye usen usiene Abasi nnyịn; [ẹdọn̄] kpukpru mme atua-eyet esịt.” (Isaiah 61:2) Isua edi anyan ini, edi enye enyene ntọn̄ọ ye utịt. “Isua mfọnido” Jehovah edi ini emi enye ọnọde mbon nsụkidem ifet ndinam n̄kpọ mban̄a ntọt ubọhọ-ufụn esie.
8 Ke akpa isua ikie, isua mfọnido idụt mme Jew ọkọtọn̄ọ ke 29 E.N. ke ini Jesus ọkọtọn̄ọde utom ukwọrọikọ esie eke isọn̄. Enye ọkọdọhọ mme Jew ete: “Ẹkabade esịt; koro Ubọn̄ Heaven ke ekpere.” (Matthew 4:17) Isua mfọnido oro ama odu tutu esịm “usen usiene” Jehovah, emi ekesịmde utịt ke 70 E.N., ke ini Jehovah akayakde udịmekọn̄ Rome osobo Jerusalem ye temple esie. (Matthew 24:3-22) Mfịn nnyịn idu uwem ke isua mfọnido efen, enye oro ọkọtọn̄ọde ye ediwụk Obio Ubọn̄ Abasi ke heaven ke 1914. Isua mfọnido emi editre ke usen usiene efen oro atarade akan, emi Jehovah edidade nsobo ofụri editịm n̄kpọ ererimbot emi edi ke “akwa ukụt.”—Matthew 24:21.
9. Mmanie mfịn ẹbọ ufọn ẹto isua mfọnido Jehovah?
9 Mmanie mfịn ẹbọ ufọn ẹto isua mfọnido Abasi? Mbon oro ẹnyịmede etop emi, ẹnyenede sụn̄sụn̄ ido, ẹnyụn̄ ẹnọde editan̄a Obio Ubọn̄ Abasi ke “kpukpru mme idụt” ifịk ifịk ibetedem. (Mark 13:10) Utọ mbon oro ẹkụt nte eti mbụk ọnọde ata ndọn̄esịt. Nte ededi, ibịghike mbon oro ẹsịnde etop emi, ẹsịnde ndida isua mfọnido Jehovah nnam n̄kpọ ke eti usụn̄, ẹyekụt ata usen usiene esie ke mîbịghike.—2 Thessalonica 1:6-9.
Mbun̄wụm eke Spirit Oro Ọnọde Abasi Ubọn̄
10. Didie ke akwa edinam Jehovah ke ibuot mme Jew otụk mbon oro ẹtode Babylon ẹfiak ẹnyọn̄ọ?
10 Mme Jew oro ẹtode Babylon ẹfiak ẹnyọn̄ọ ẹfiọk ẹte ke Jehovah ama anam akwa utom ke ibuot mmimọ. Mfụhọ mmọ nte mbon ntan̄mfep akabade edi itoro koro mmọ ẹbọhọde ke akpatre. Ntem, Isaiah anam utom oro ẹkenọde enye ke ntịn̄nnịm ikọ, oro edi, “nnọ nditọ Zion eke ẹtuade, nnọ mmọ anyanya ke ibuot ntọn̄, aran idatesịt ke ibuot ntuan̄a, ọfọn̄-idem itoro ke ibuot n̄kpa-esịt; ndien mmọ ẹyekere ẹte, Ofriyo eti ido emi Jehovah ọkọtọde, man ada ukpono ke esịt.”—Isaiah 61:3.
11. Mmanie ẹkenyene eti ntak nditoro Jehovah kaban̄a akwa edinam esie ke akpa isua ikie?
11 Ke akpa isua ikie, mme Jew oro ẹkenyịmede ubọhọ-ufụn ẹma ẹtoro Abasi n̄ko kaban̄a akwa edinam esie ke ibuot mmọ. “Ọfọn̄-idem itoro” ama ada itie iduọesịt mmọ ke ini ẹkenyan̄ade mmọ ẹsion̄o ke idụt oro akakpade ke n̄kan̄ eke spirit. Mbet Jesus ẹkebem iso ẹkụt utọ ukpụhọde oro ke ini mfụhọ mmọ kaban̄a n̄kpa esie akakabarede edi idatesịt ke ini Ọbọn̄ mmọ oro ẹkenamde eset ekeyetde mmọ aran ke edisana spirit. Ibịghike ke oro ebede, mbon nsụkidem 3,000 oro ẹkenamde n̄kpọ ẹban̄a ukwọrọikọ mme Christian oro ẹkeyetde aran obufa ẹnyụn̄ ẹnade baptism ke Pentecost 33 E.N. ẹma ẹkụt ukem ukpụhọde oro. (Utom 2:41) Ọkọfọn didie ntem ndinyene uko ke edidiọn̄ Jehovah! Utu ke ‘nditua mban̄a Zion’ mmọ ẹma ẹbọ edisana spirit ẹnyụn̄ ẹfiak ẹkop nsọn̄idem ebe ke “aran idatesịt,” emi adade aban̄a idatesịt mbon oro Jehovah ọdiọn̄de uwak uwak.—Mme Hebrew 1:9.
12, 13. (a) Mmanie ẹkedi “ofriyo eti ido” ke otu mme Jew oro ẹkenyọn̄ọde ẹdi ke 537 M.E.N.? (b) Mmanie ẹdi “ofriyo eti ido” toto ke Pentecost 33 E.N.?
12 Jehovah ada “ofriyo eti ido” ọdiọn̄ ikọt esie. Mmanie ẹdi ofriyo emi? Ke mme isua oro ẹketienede 537 M.E.N., mme owo ẹma ẹdu oro ẹkekpepde ẹnyụn̄ ẹtiede ẹkere Ikọ Abasi ẹnyụn̄ ẹkọride ndinen idaha Jehovah. (Psalm 1:1-3; Isaiah 44:2-4; Jeremiah 17:7, 8) Mme utọ owo nte Ezra, Haggai, Zechariah, ye Akwa Oku Joshua ẹma ẹwụt ke idi n̄wọrọnda “ofriyo”—ẹsọn̄ọde ẹda ẹnọ akpanikọ ẹnyụn̄ ẹbiọn̄ọde edisabade idụt oro ke n̄kan̄ eke spirit.
13 Ọtọn̄ọde ke Pentecost 33 E.N. ka iso, Abasi ama ọtọ mme ukem “ofriyo eti ido” oro—mme enyene-uko Christian oro ẹyetde aran—ke isọn̄ eke spirit obufa idụt esie, kpa “Israel Abasi.” (Galatia 6:16) Ke mme isua ikie emi ẹbede, mme “ofriyo” emi ẹsịm 144,000 ke ibat, ẹsion̄ode mbun̄wụm eti ido ndikpono, m̀mê ndida itoro nsọk Jehovah Abasi. (Ediyarade 14:3) Mme akpatre ke otu ndiye “ofriyo” emi ẹnyene uforo ke ediwak isua toto ke 1919, emi Jehovah akafiakde ọnọ nsụhọ Israel Abasi odudu ke idaha unana edinam oro mmọ ẹkedude ke ekpri ibio ini. Ebede ke ndinọ mmọ akpakịp mmọn̄ eke spirit, Jehovah osion̄o se ibietde akai eti ido, mme eto oro ẹn̄wụmde mfri.—Isaiah 27:6.
14, 15. Nso utom ke mme andituak ibuot nnọ Jehovah oro ẹkesanade ẹyak ẹkenam ọtọn̄ọde ke (a) 537 M.E.N.? (b) 33 E.N.? (c) 1919?
14 Ke osiode utom mme “ofriyo” emi owụt, Isaiah aka iso ete: “Ndien mmọ ẹyebọp n̄wụre ebiet eset, ẹnen̄ede akani nsobo, ẹyenyụn̄ ẹdiọn̄ mme obio eke ẹbiarade, mme nsobo ediwak emana.” (Isaiah 61:4) Ke ewụhọ Edidem Cyrus eke Persia, mme anam-akpanikọ Jew oro ẹkenyọn̄ọde ke Babylon ẹma ẹfiak ẹbọp Jerusalem ye temple esie, emi akanade ndon ke anyan ini. Utom edifiak n̄wụk emi n̄ko ke ẹkenyene ndida mfiọk mme isua oro ẹtienede 33 E.N. ye 1919.
15 Ke 33 E.N., mbet Jesus ẹma ẹfụhọ idiọk idiọk ẹban̄a edimụm, ikpe, ye n̄kpa esie. (Matthew 26:31) Nte ededi, idaha ekikere mmọ ama okpụhọde ke ini enye okowụtde mmọ idem ke enye ama ekeset ke n̄kpa. Ndien ke ndondo oro ẹken̄wan̄ade edisana spirit ẹduọk mmọ, mmọ ẹma ẹsịn idem ke utom edikwọrọ eti mbụk, “ke ofụri Judæa ye Samaria, tutu esịm utịt ererimbot.” (Utom 1:8) Ntem mmọ ẹma ẹtọn̄ọ ndifiak n̄wụk edisana utuakibuot. Ke ukem usụn̄ oro, ọtọn̄ọde ke 1919 ka iso Jesus Christ ama anam nsụhọ nditọete esie oro ẹyetde aran ẹfiak ẹbọp “mme nsobo ediwak emana.” Ke ediwak isua ikie, mme ọkwọrọ ederi Christendom ẹma ẹkpu ndikpep mme owo ifiọk Jehovah, ẹkpepde item owo ye mme ukpepn̄kpọ emi mîkemke ye N̄wed Abasi. Mme Christian oro ẹyetde aran ẹma ẹnam mme esop mmọ ẹsana ẹbọhọ mme edinam oro nsunsu ido ukpono ẹkesabarede man edifiak n̄wụk utuakibuot akpanikọ akpaka iso. Ndien mmọ ẹma ẹtọn̄ọ n̄kponn̄kan ubịnikọt edinọ ikọ ntiense oro akanam ẹnamde ke ererimbot.—Mark 13:10.
16. Mmanie ẹn̄wam mme Christian oro ẹyetde aran ke utom edifiak n̄wụk, ndien nso utom ke ẹnọ mmọ?
16 Emi ekedi akamba utom. Didie ke ibat ibat nsụhọ Israel Abasi ẹkpekeme ndinam utọ utom oro? Jehovah ama ọnọ Isaiah odudu spirit nditan̄a ete: “Isen owo ẹyeda ẹbọk n̄kpri ufene mbufo, nditọ idụt ẹyenyụn̄ ẹkabade ẹdi mme ofụn̄-isọn̄ mbufo ye mme ọdiọn̄-vine mbufo.” (Isaiah 61:5) Ndamban̄a isenowo ye nditọ idụt ẹdi “akwa otuowo,” kpa “mme erọn̄ en̄wen” eke Jesus. a (Ediyarade 7:9; John 10:11, 16) Owo iyetke mmọ aran ke edisana spirit ye ekikere edinyene n̄kpọ akpa eke heaven. Utu ke oro, mmọ ẹnyene idotenyịn nsinsi uwem ke paradise isọn̄. (Ediyarade 21:3, 4) Kpa ye oro, mmọ ẹma Jehovah ndien ẹnọ mmọ utom ubọk ufene, ufụn̄ isọn̄, ye eke udiọn̄ vine. Mme utọ edinam oro idịghe mme usụhọde utom. Ke idak ndausụn̄ nsụhọ Israel Abasi, mme anamutom emi ẹn̄wam ke ndibọk, ndikpeme, ye ndikọ mme owo.—Luke 10:2; Utom 20:28; 1 Peter 5:2; Ediyarade 14:15, 16.
17. (a) Ẹdikot mme andibuana ke Israel Abasi didie? (b) Nso idi n̄kukụre uwa oro ẹyomde kaban̄a edifen mme idiọkn̄kpọ?
17 Nso kaban̄a Israel Abasi? Jehovah ada Isaiah asian mmọ ete: “Mbufo ẹyekere mme oku Jehovah; ẹyenyụn̄ ẹdọhọ ẹban̄a mbufo, ẹte, Mme anam-n̄kpọ Abasi nnyịn: mbufo ẹyedia inyene mme idụt, ẹnyụn̄ ẹbọ mmọ ubọn̄ ẹda ke idem mbufo.” (Isaiah 61:6) Ke Israel eset, Jehovah ama anam itie oku Levi odu ndiwa uwa ke ibuot mme oku ke idemmọ ye nditọ Israel eken. Nte ededi, ke 33 E.N., Jehovah ama etre ndida itie oku Levi nnam n̄kpọ onyụn̄ ọtọn̄ọ mfọnn̄kan ndutịm. Enye ama enyịme mfọnmma uwem Jesus nte uwa kaban̄a mme idiọkn̄kpọ ubonowo. Tọn̄ọde ke ini oro, owo iyomke uwa ndomokiet efen. Uwa Jesus enyene ufọn kpukpru ini.—John 14:6; Colossae 2:13, 14; Mme Hebrew 9:11-14, 24.
18. Nso orụk itie oku ke Israel Abasi ẹnam, ndien nso idi utom mmọ?
18 Didie, ndien, ke mme andibuana ke Israel Abasi ẹdi “mme oku Jehovah”? Ke ewetde n̄wed ọnọ ẹsọk ekemmọ mme Christian oro ẹyetde aran, apostle Peter ọkọdọhọ ete: “Edi mbufo ẹdi ubon eke ẹmekde, ẹdi mme oku edidem, ẹdi edisana obio, ẹdi ikọt eke Abasi enịmde ọnọ Idem Esie, man mbufo ẹka ẹketan̄a mme utịbe edinam Esie, emi okokotde mbufo osio ke ekịm, esịn ke utịbe un̄wana Esie.” (1 Peter 2:9) Ntem, nte otu, mme Christian oro ẹyetde aran ẹnam itie oku ye akpan utom: ndibụk ubọn̄ Jehovah nnọ mme idụt. Mmọ ẹnyene ndidi mme ntiense esie. (Isaiah 43:10-12) Ke ofụri ukperedem ini emi, mme Christian oro ẹyetde aran ẹmenam akpan utom emi ke edinam akpanikọ. Nte utịp, ediwak miliọn owo ẹbuana ye mmọ idahaemi ke utom edinọ ikọ ntiense mban̄a Obio Ubọn̄ Jehovah.
19. Nso utom ke mme Christian oro ẹyetde aran ẹdinyene ifet ndinam?
19 Ke adianade do, mme andibuana ke Israel Abasi ẹmenyene idotenyịn ndinam n̄kpọ nte mme oku ke usụn̄ efen. Ke mmọ ẹma ẹkekpan̄a, ẹnam mmọ ẹset ẹkedụk uwem eke spirit oro mîkemeke ndikpa ke heaven. Do mmọ inamke n̄kpọ nte mme andikara kpọt ye Jesus ke Obio Ubọn̄ esie edi n̄ko nte mme oku Abasi. (Ediyarade 5:10; 20:6) Ke ntre, mmọ ẹyenyene ifet ndida mme ufọn uwa ufak Jesus nnọ mme anam-akpanikọ ubonowo ke isọn̄. Ke n̄kukụt apostle John oro ẹwetde ke Ediyarade ibuot 22, ẹfiak ẹtịn̄ ẹban̄a mmọ nte “eto.” Ẹkụt kpukpru “eto” 144,000 emi ke heaven, “[on̄wụmde] orụk mfri duopeba, on̄wụm mfri esie ke ọfiọn̄ ke ọfiọn̄; ẹnyụn̄ ẹda ikọn̄ eto oro ẹkọk mme idụt udọn̄ọ.” (Ediyarade 22:1, 2) Nso utịbe utịbe utom itie oku ke oro edi ntem!
Bụt ye Esuene, Ekem Idatesịt
20. Kpa ye ubiọn̄ọ, nso edidiọn̄ ina ibet itie oku edidem?
20 Toto ke 1914 emi isua mfọnido Jehovah ọkọtọn̄ọde, itie oku edidem omosobo ubiọn̄ọ otode mme ọkwọrọ ederi Christendom kpukpru ini. (Ediyarade 12:17) Kpa ye oro, kpukpru ukeme oro ẹsịnde nditre edikwọrọ eti mbụk ẹnen̄ede ẹkpu. Ntịn̄nnịm ikọ Isaiah ama ebem iso etịn̄ aban̄a emi, ọdọhọde ete: “Ke ibuot bụt mbufo ẹyekụt ikaba; ndien ke ibuot esuene mmọ ẹyedara ke udeme mmọ: mmọdo ke isọn̄ mmọ ke mmọ ẹdida ikaba ẹnyene: nsinsi idatesịt eyenyene mmọ.”—Isaiah 61:7.
21. Mme Christian oro ẹyetde aran ẹkesan̄a didie ẹbọ adianaiba edidiọn̄?
21 Ke Ekọn̄ Ererimbot I, nsụhọ oro ẹyetde aran ẹma ẹkụt bụt ye esuene ke ubọk Christendom mbon ufreidụt. Mme andibuana ke otu ọkwọrọ ederi ẹma ẹsịne ke otu oro ẹkedoride mme anam-akpanikọ nditọete itiaita ke ibuot itieutom Brooklyn ikọ ke nsu ẹte ke ẹsọn̄ ibuot ye ukara. Ẹma ẹkọbi nditọete emi ke ukwan̄ usụn̄ ke ọfiọn̄ usụkkiet. Ke akpatre, ke ini utọ eke 1919, ẹma ẹsana mmọ ẹyak, ndien ẹma ẹbiat kpukpru ikọ oro ẹkedoride mmọ ẹfep. Ntem odu nditre utom ukwọrọikọ ikedịghe nte ẹkekerede. Utu ke ndiyak mme andituak ibuot nnọ enye ẹdia nsinsi o-bụt, Jehovah ama ọnọ mmọ ifụre onyụn̄ afiak atan̄ mmọ obok ke idaha eke spirit mmọ, “isọn̄ mmọ.” Do mmọ ẹma ẹbọ adianaiba edidiọn̄. Ndinyene edidiọn̄ Jehovah ama ada itie kpukpru ufen oro mmọ ẹkebọde. Ke akpanikọ, mmọ ẹma ẹnyene ntak ndidara!
22, 23. Didie ke mme Christian oro ẹyetde aran ẹkpebe Jehovah, ndien didie ke enye ọnọ mmọ utịp?
22 Udiana n̄kpọ oro Jehovah etịn̄de ọnọ mme Christian eyomfịn ntak efen ndidara: “Koro ami Jehovah mmama [unenikpe, NW], nsasua se ẹdade ke n̄wo; ndien ami nyọnọ mmọ n̄kpọ eyen-utom mmọ ke akpanikọ, nnyụn̄ ndiomi nsinsi ediomi ye mmọ.” (Isaiah 61:8) Ebede ke mmọ ndikpep Bible, nsụhọ oro ẹyetde aran ẹkpep ndima unenikpe nnyụn̄ nsua idiọkido. (Mme N̄ke 6:12-19; 11:20) Mmọ ẹkpep ‘ndida ofụt mmọ ndom n̄kpọ ufụn̄ isọn̄,’ ẹdade san̄asan̄a ke mme ekọn̄ ye mme ntịme ukaraidem. (Isaiah 2:4) Mmọ ẹtre n̄ko mme edinam oro mînọhọ Abasi ukpono, utọ nte edidọk, efịbe, inọ, ye ukpammịn.—Galatia 5:19-21.
23 Ke ntak oro mme Christian emi ẹyetde aran ẹmade unenikpe ukem nte Andibot mmọ, Jehovah ọnọ mmọ “n̄kpọ eyen-utom mmọ ke akpanikọ.” Utọ “n̄kpọ eyen-utom” oro edi nsinsi ediomi—obufa ediomi—emi Jesus akasiande mme anditiene enye ke okoneyo oro ekebemde n̄kpa esie iso. Ke ntak ediomi emi ke mmọ ẹkekabade ẹdi idụt eke spirit, san̄asan̄a ikọt Abasi. (Jeremiah 31:31-34; Luke 22:20) Ke idak ediomi emi, Jehovah ayada kpukpru ufọn uwa ufak Jesus anam n̄kpọ, esịnede edifen mme idiọkn̄kpọ mbon oro ẹyetde aran ye kpukpru mme anam-akpanikọ ubonowo eken.
Ndidat Esịt Mban̄a Mme Edidiọn̄ Jehovah
24. Mmanie ke otu mme idụt ẹdi “nditọ” oro ẹdiọn̄de, ndien didie ke mmọ ẹkabade ẹdi “nditọ”?
24 Ndusụk owo ke otu mme idụt ẹmekụt edidiọn̄ Jehovah ke idem ikọt esie. Ẹma ẹbem iso ẹtịn̄ emi ke un̄wọn̄ọ Jehovah: “Ẹyediọn̄ọ nditọ mmọ ke otu mme idụt, ẹyediọn̄ọ ubon mmọ ke otu mme obio; kpukpru mmọ eke ẹdikụtde mmọ ẹyediọn̄ọ mmọ, ẹte ke mmọ ẹdi nditọ eke Jehovah ọdiọn̄de.” (Isaiah 61:9) Mme andibuana ke Israel Abasi, mme Christian oro ẹyetde aran, ẹmenam utom ifịk ifịk ke otu mme idụt ke isua mfọnido Jehovah emi. Mfịn mbon oro ẹnamde n̄kpọ ẹban̄a utom ukwọrọikọ mmọ ẹwak ẹsịm ediwak miliọn. Ebede ke ndinam utom ọtọkiet ye Israel Abasi, mbon oro ẹtode mme idụt ẹnyene ifet ndikabade ndi “nditọ eke Jehovah ọdiọn̄de.” Ofụri ubonowo ẹkụt idaha inemesịt mmọ.
25, 26. Didie ke kpukpru mme Christian ẹtịn̄ ekikere oro odude ke Isaiah 61:10?
25 Kpukpru mme Christian, mbon oro ẹyetde aran ye mme erọn̄ en̄wen, ẹdori enyịn nditoro Jehovah ke nsinsi. Mmọ ẹnyịme ke ofụri esịt ye prọfet Isaiah, emi ọdọhọde ke ndausụn̄ odudu spirit ete: “Nyadat esịt eti-eti ke Jehovah, ukpọn̄ mi eyebre aban̄a Abasi mi: koro enye emesịne mi edisịne-n̄kpọ edinyan̄a ke idem, amada ekụra edinen ido ofụk mi, kpa nte ọdọ-n̄wan ayarade anyanya esiemmọ, ye nte n̄wan ndọ esịnede n̄kpọ mbana esie ke idem.”—Isaiah 61:10.
26 Ke ẹsịnede “ekụra edinen ido,” mme Christian oro ẹyetde aran ẹbiere ndika iso ndi ediden̄i ye edisana ke enyịn Jehovah. (2 Corinth 11:1, 2) Sia Jehovah abatde mmọ ke edinen kaban̄a idotenyịn uwem eke heaven, tutu amama mmọ idifiakke ika ndon Akwa Babylon, oro ẹkesion̄ode mmọ ke ufụn. (Rome 5:9; 8:30) Edisịnen̄kpọ edinyan̄a edi ọsọn̄urua n̄kpọ ọnọ mmọ. Mme erọn̄ en̄wen emi ẹdide nsan̄a mmọ ẹbiere kpasụk ntre nditiene n̄kokon̄ idaha edisana utuakibuot Jehovah Abasi. Ke ẹma ‘ẹkeyet ọfọn̄idem mmọ ẹnam afia ke iyịp Eyen-erọn̄,’ ẹbat mmọ ke edinen ndien mmọ ẹyebọhọ “akwa ukụt.” (Ediyarade 7:14; James 2:23, 25) Tutu esịm ini oro, mmọ ẹkpebe nsan̄a mmọ oro ẹyetde aran ke ndifep ndek ekededi oro otode Akwa Babylon.
27. (a) Ke Tọsịn Isua Ukara, mme n̄wọrọnda n̄kpọ ewe ‘ẹditịbe’? (b) Didie ke edinen ido etịbe idahaemi ke otu ubonowo?
27 Mfịn mme andituak ibuot nnọ Jehovah ẹdat esịt ndidu ke paradise eke spirit. Ke mîbịghike mmọ ẹyedu ke ata ata Paradise. Nnyịn isak iso ise ini oro ye ofụri esịt nnyịn, emi ẹtịn̄de ẹban̄a in̄wan̄-in̄wan̄a ke mme akpatre ikọ eke Isaiah ibuot 61 ẹte: “Kpa nte isọn̄ osion̄ode n̄kpọ emi ọkọride ke esịt, ye nte in̄wan̄ n̄ko onyụn̄ etịbede se ẹtọde ke esịt: kpa ntre ke Ọbọn̄ Jehovah edinam edinen ido ye itoro ẹtịbe ke iso kpukpru mme idụt.” (Isaiah 61:11) Ke ini Tọsịn Isua Ukara Christ, ‘edinen ido eyetịbe’ ke isọn̄. Mme owo ẹyefiori ke idatesịt, ndien edinen ido ayatara esịm utịt isọn̄. (Isaiah 26:9) Nte ededi, nnyịn inyeneke ndibet tutu esịm ubọn̄ ubọn̄ usen oro mbemiso inọde itoro ke iso kpukpru mme idụt. Edinen ido etetịbe ke otu ediwak miliọn owo oro ẹnọde Abasi heaven ubọn̄ ẹnyụn̄ ẹtan̄ade eti mbụk aban̄ade Obio Ubọn̄ esie. Idem idahaemi mbuọtidem ye idotenyịn nnyịn ẹnọ nnyịn kpukpru ntak ndidat esịt mban̄a mme edidiọn̄ Abasi nnyịn.
[Ikọ idakisọn̄]
a Ekeme ndidi Isaiah 61:5 ama osu ke eset, sia mbon oro mîdịghe mme Jew ẹkesan̄ade ye mme ata Jew ke ini mmọ ẹkefiakde ẹnyọn̄ọ Jerusalem ndien eyedi ẹma ẹn̄wam ndibọp idụt oro. (Ezra 2:43-58) Nte ededi, ọtọn̄ọde ke ufan̄ikọ 6 etie nte ntịn̄nnịm ikọ oro abuana sụk Israel Abasi.
[Mme Mbụme Ukpepn̄kpọ]
[Ndise ke page 323]
Isaiah enyene eti mbụk nditan̄a nnọ mme Jew mbon ntan̄mfep
[Ndise ke page 331]
Ọtọn̄ọde ke 33 E.N., Jehovah ama ọtọ “ofriyo edinen ido” 144,000
[Ndise ke page 334]
Edinen ido eyetịbe ke isọn̄
