Ibuot 15

“Anie [Odot] Ndikûbọde N̄wed Emi?”

1. Nso itịbe idahaemi ke n̄kukụt John?

 UBỌN̄ UBỌN̄! ENYENE-UTEN̄E! Inem inem n̄kukụt ebekpo Jehovah emi odude ke ndutịm esie ke ufọt mme utuenikan̄ eke ikan̄, mme cherub, mbiowo 24, ye inyan̄ a-glass etie ntre. Edi John, nso ke afo afiak okụt? John owụk ntịn̄enyịn ke ata ufọt ufọt itie n̄kpọntịbe eke heaven emi, asiande nnyịn ete: “Ndien n̄kụt n̄wed ke ubọk nnasia Anditie ke ebekpo, emi ẹwetde n̄kpọ ke esịt-esịt ye ke edem-edem; ẹma ẹnyụn̄ ẹda ufịk-n̄kpọ itiaba ẹsọn̄ọ ẹdian enye. Ndien n̄kụt ọkpọsọn̄ angel nte ọkwọrọde ke ọkpọsọn̄ uyo, ete, Anie omodot ndikûbọde n̄wed emi, ndinyụn̄ ndianade mme ufịk-n̄kpọ esie? Ndien baba owo kiet ke heaven, ye ke isọn̄, ye ke idak isọn̄, ikemeke ndikûbọde n̄wed oro nnyụn̄ nse ke esịt. Ndien ntua eyet eti-eti, koro mmen̄kwe baba owo kiet eke odotde ndikûbọde n̄wed nnyụn̄ nse ke esịt.”—Ediyarade 5:1-4.

2, 3. (a) Ntak emi John enyenede ọkpọsọn̄ udọn̄ ete ẹkpekam ẹkụt owo ndikûbọde n̄wed oro, edi nso itie nte idotenyịn odu kaban̄a oro? (b) Nso ke ikọt Abasi oro ẹyetde aran ẹkebet ke eyo nnyịn ye ọkpọsọn̄ udọn̄?

² Jehovah ke idemesie, Ọbọn̄ Andikara kpukpru edibotn̄kpọ, akama n̄wed oro. Anaedi enye ọyọhọ ye akpan ntọt, sia ẹwetde n̄kpọ ke esịt ye ke edem esie. Ẹdemerede udọn̄ nnyịn. Nso idọn̄ọ ke n̄wed oro?  Nnyịn imeti ikot oro Jehovah ọkọnọde John ete: “Dọk di ken, ndien nyewụt fi se idisude ke ini emi edidide.” (Ediyarade 4:1) Ye idotenyịn oro asan̄ade ye nduaidem, nnyịn imodori enyịn ndifiọk mme n̄kpọ oro. Edi, mbọm, ẹda ufịkn̄kpọ itiaba ẹsọn̄ọ ẹdian n̄wed emi!

³ Nte ọkpọsọn̄ angel emi eyekụt owo eke odotde ndikûbọde n̄wed emi? Nte ekemde ye Kingdom Interlinear, n̄wed emi “esịne ke ubọk nnasia” Jehovah. Emi ọnọ ekikere nte ke enye akama n̄wed emi ke ekaubọk esie. Edi etie nte idụhe owo ndomokiet ke heaven m̀mê ke isọn̄ oro odotde ndibọ nnyụn̄ n̄kûbọde n̄wed oro. Idem ke idak isọn̄, ke otu mme anam-akpanikọ ikọt Abasi oro ẹma ẹkekpan̄a, idụhe owo ekededi eke odotde ndibọ n̄kokon̄ ukpono emi. Eyịghe idụhe kemi John mîkopke inemesịt! Ekeme ndidi enye idifiọkke “se idisude ke ini emi edidide.” Ke eyo nnyịn, n̄ko, ikọt Abasi oro ẹyetde aran, ye ọkpọsọn̄ ekikere, ẹma ẹbet Jehovah ndinọ un̄wana ye akpanikọ esie kaban̄a Ediyarade. Enye eyenam emi sụn̄sụn̄ ke ini oro ẹkemekde ẹnịm ẹnọ prọfesi emi ndisu, man enye akpada ikọt esie asan̄a ke usụn̄ ‘akwa edinyan̄a.’—Psalm 43:3, 5.

Owo Emi Odotde

4. (a) Anie ke ẹkụt nte odotde ndikûbọde n̄wed oro ye mme ufịkn̄kpọ esie? (b) Nso utịp ye ifet ke otu John ye mme nsan̄a mmọ ẹbuana idahaemi?

⁴ Ih, odu owo emi ekemede ndikûbọde n̄wed oro! John obụk ete: “Edi kiet ke otu mbiowo ọdọhọ mi ete, Kûtua; sese, Lion emi otode ke esien Judah, kpa Orụn̄ David, amakan, adan̄a nte enyenede ukeme ndikûbọde n̄wed oro nnyụn̄ ndianade mme ufịk-n̄kpọ itiaba.” (Ediyarade 5:5) Ntre John, ọkwọhọde mmọn̄eyet oro! Otu John ye mme anam-akpanikọ nsan̄a mmọ mfịn ẹma ẹyọ n̄kpọsọn̄ idomo n̄ko ke ediwak isua ke adan̄aemi ẹbetde ye ime ndikụt nte ẹnamde n̄kpọ an̄wan̄a. Nso utịp ndọn̄esịt ke nnyịn inyene ntem idahaemi ke ndifiọk n̄kukụt oro, ndien nso ifet ke edi ntem ndibuana ke edisu esie ebe ke nditan̄a etop esie nnọ mbon en̄wen!

5. (a) Ewe prọfesi ke ẹketịn̄ ẹban̄a Judah, ndien m̀mọ̀n̄ ke mme andito ubon Judah ẹkekara? (b) Anie edi Shiloh?

⁵ Ah, “Lion emi otode ke esien Judah”! John otịm emehe ye prọfesi oro Jacob, kpa eteete ekpụk mme Jew, eketịn̄de aban̄a ọyọhọ eyeneren esie inan̄, Judah ete: “Judah edi abak eyen lion; eyen mi! afo ọmọdọk ọkpọn̄ se akawaide; enye onụhọ, ọkûbọ nte lion, ye uman lion; anie edibụmede enye? Mmọnyọ idikpọn̄ke Judah, eto ọbọn̄ idinyụn̄ ikpọn̄ke n̄kpatian̄-ukot esie, tutu Shiloh edi; mme idụt ẹyenyụn̄ ẹkop ẹnọ enye.” (Genesis 49:9, 10) Udịm ubon ubọn̄ ikọt Abasi okoto Judah. Ọtọn̄ọde ke David, kpukpru ndidem oro ẹkekarade ke Jerusalem tutu ini oro mbon Babylon ẹkesobode obio oro ẹkedi mme andito ubon Judah. Edi owo mmọ baba kiet ikedịghe Shiloh oro Jacob  eketịn̄de prọfesi aban̄a. Shiloh ọwọrọ “Owo eke [Unen] Emi Enyenede.” Ke ntịn̄nnịm ikọ, enyịn̄ emi akanyan ubọk owụt Jesus, kpa owo emi Obio Ubọn̄ David enyenede idahaemi tak-tak.—Ezekiel 21:25-27; Luke 1:32, 33; Ediyarade 19:16.

6. Ke nso usụn̄ ke Jesus ekedi “n̄kọk” Jesse ye “Orụn̄ David” n̄ko?

⁶ John ọsọsọp ọdiọn̄ọ “Orụn̄ David” oro ẹtịn̄de ẹban̄a. Ke ntịn̄nnịm ikọ, ẹkot Messiah oro ẹken̄wọn̄ọde “nsehe kiet . . . ke etak eto Jesse [ete Edidem David], n̄kọk,” ye “orụn̄ Jesse emi adade nte banner [“idiọn̄ọ,” NW] mme idụt.” (Isaiah 11:1, 10) Jesus ekedi nsehe Jesse, sia ẹkemande enye ẹsịn ke udịm ubon ubọn̄ David, eyen Jesse. Akande oro, nte orụn̄ Jesse, enye ekedi Enyeemi akanamde itie-ubọn̄ David ọtọn̄ọ ntak esehe, ọnọde uwem onyụn̄ ọbọkde enye ke nsinsi.—2 Samuel 7:16.

7. Nso inam Jesus odot ndibọ n̄wed oro ke ubọk Anditie ke ebekpo?

⁷ Nte mfọnmma owo, Jesus ke n̄wọrọnda usụn̄ edi enyeemi akanamde n̄kpọ Jehovah ke nsọn̄ọnda ye ke idak n̄kpọsọn̄ idomo. Enye ama ọnọ ọyọhọ ọyọhọ ibọrọ ke ata oro Satan akamiade. (Mme N̄ke 27:11) Ntem, enye ama ekeme nditịn̄ se enye eketịn̄de ke okoneyo oro mbemiso n̄kpa uwa esie ete, “Ami n̄kakan ererimbot.” (John 16:33) Ke ntak emi, Jehovah ama ayak “ofụri odudu ke heaven ye ke isọn̄” ọnọ Jesus emi ẹkenamde eset. Ke otu kpukpru asan̄autom Abasi, enye ikpọn̄ odot ndibọ n̄wed oro, man anam ẹdiọn̄ọ akpan etop esie.—Matthew 28:18.

8. (a) Kaban̄a Obio Ubọn̄, nso iwụt ite ke Jesus odot? (b) Ntak odotde nte kiet ke otu mbiowo 24 oro ayarade owo emi odotde ndikûbọde n̄wed oro nnọ John?

⁸ Ke akpanikọ, otịm odot nte ke Jesus ekpenyene ndikûbọde n̄wed oro. Toto ke 1914 ẹma ẹdori enye ke ebekpo nte Edidem Obio Ubọn̄ Messiah Abasi, ndien n̄wed oro amayarade ata ekese n̄kpọ aban̄ade Obio Ubọn̄ oro ye se enye edinamde. Jesus ke edinam akpanikọ ama etie ntiense aban̄a akpanikọ Obio Ubọn̄ oro ke ini enye okodude mi ke isọn̄. (John 18:36, 37) Enye ama ekpep mme anditiene enye ndibọn̄ akam mban̄a Obio Ubọn̄ oro ndidi. (Matthew 6:9, 10) Enye ekebem iso ọtọn̄ọ ndikwọrọ eti mbụk Obio Ubọn̄ oro ke ntọn̄ọ ntọn̄ọ eyo Christian onyụn̄ etịn̄ prọfesi aban̄a edida utom ukwọrọikọ oro nsịm utịt ke akpatre ini. (Matthew 4:23; Mark 13:10) Odot nte kiet ke otu mbiowo 24 oro akayararede ọnọ John ete ke Jesus edi enyeemi enyenede ndidianade mme ufịkn̄kpọ oro. Ntak-a? Sia mbiowo ẹmi ẹtiede ke mme ebekpo, ẹnyụn̄ ẹyarade anyanya, ẹdide nsan̄a mme adia-akpa ye Christ ke Obio Ubọn̄ esie.—Rome 8:17; Ediyarade 4:4.

‘Eyenerọn̄ Oro Ẹkewotde’

9. Utu ke lion, nso ke John okụt nte adade “ke ufọt ebekpo,” ndien didie ke John eketịn̄ aban̄a enye?

⁹ John emenede enyịn ndise “Lion emi otode ke esien Judah” mi. Nso n̄kpọ n̄kpaidem ke emi edi ntem! Ata isio isio ndamban̄a n̄kpọ ọbiọn̄ọde: “Ndien n̄kụt ke ufọt ebekpo, ye ke ufọt n̄kpọ-uwem inan̄, ye ke ufọt mbiowo, Eyenerọn̄ adade do, nte n̄kpọ eke ẹkewotde Enye; Enye onyụn̄ enyene nnụk itiaba ye enyịn itiaba, ẹmi ẹdide mme Spirit Abasi itiaba, ẹmi ẹsiode ẹdọn̄ ke ofụri isọn̄.”—Ediyarade 5:6.

10. Anie edi “Eyen-erọn̄” oro John okokụtde, ndien ntak enyịn̄ emi odotde?

¹⁰ Eyenerọn̄ odu ke ufọt ufọt, ke n̄kan̄ ebekpo oro, ke esịt ekara oro n̄kpọ-uwem inan̄ ye mbiowo 24 ẹtiede ẹkanade ẹkụk! Nte eyịghe mîdụhe, John ọsọsọp ọdiọn̄ọ ete ke eyenerọn̄ emi edi “Lion emi otode ke esien Judah” ye “Orụn̄ David.” Enye ọfiọk ete, ke edem edem ko ke se iwakde ikan isua 60, John Andinịm owo baptism ama emen Jesus owụt mme Jew oro ẹkedade ẹse, nte “Eyenerọn̄ Abasi emi emende mme idiọkn̄kpọ ererimbot efep.” (John 1:29) Ke ofụri ini uwem esie ke isọn̄, Jesus ama akaiso anana ntọi ke ererimbot—ukem nte eyenerọn̄ oro ananade ndo—man enye akpayak uwem esie oro ananade ndo ọnọ ubonowo nte uwa.—1 Corinth 5:7; Mme Hebrew 7:26.

11. Ntak mîdịghe n̄kpọ oro ẹsụhọrede enye uku ke nditịn̄ mban̄a Jesus oro ẹnọde ubọn̄ nte “Eyen-erọn̄ adade do, nte n̄kpọ eke ẹkewotde enye”?

¹¹ Nte emi ke ndusụk udomo edi edisụhọde  enye idaha m̀mê uku ke ndiwụt Jesus oro ẹnọde ubọn̄ nte “Eyen-erọn̄ adade do, nte n̄kpọ eke ẹkewotde Enye”? Baba-o! Akpanikọ oro nte ke Jesus ama anam akpanikọ tutu osịm n̄kpa, ekedi akwa edikpu ọnọ Satan ye akwa edikan ọnọ Jehovah Abasi. Ndiwụt Jesus ke usụn̄ emi ototịm owụt edikan oro enye akande ererimbot Satan, onyụn̄ edi n̄kpọ ndida nti ntotụn̄ọ ima oro Jehovah ye Jesus ẹnyenede ẹnọ ubonowo. (John 3:16; 15:13; men Colossae 2:15 domo.) Ntem, ẹnyan ubọk ẹwụt Jesus nte Mfri oro ẹken̄wọn̄ọde, oro odotde ke n̄wọrọnda usụn̄ ndikûbọde n̄wed oro.—Genesis 3:15.

12. Nnụk itiaba eke Eyenerọn̄ oro ẹda ẹban̄a nso?

¹² Nso idi n̄kpọ efen oro anamde nnyịn idiọn̄ọ “Eyen-erọn̄” emi? Enye enyene nnụk itiaba. Ke Bible nnụk awak ndida mban̄a odudu m̀mê ukara, ndien itiaba ediwụt ọyọhọ udomo. (Men 1 Samuel 2:1, 10; Psalm 112:9; 148:14 domo.) Ntem, nnụk itiaba eke Eyenerọn̄ oro ẹda ẹban̄a ọyọhọ udomo odudu oro Jehovah ayakde ọnọ Jesus. Enye “okon̄ akan kpukpru mme andikara ye mme enyene-nsọn̄uyo ye mme enyene-odudu ye mme enyene-ubọn̄, ye kpukpru enyịn̄ eke ẹdisasiak, idịghe ke eyo emi ikpọn̄, edi ke eyo eke edidide n̄ko.” (Ephesus 1:20-23; 1 Peter 3:22) Jesus omowụt odudu san̄asan̄a, kpa odudu ukara, toto ke 1914 ke ini Jehovah okodoride enye ke ebekpo nte Edidem eke heaven.—Psalm 2:6.

13. (a) Enyịn itiaba eke Eyenerọn̄ oro ẹda ẹban̄a nso? (b) Nso ke Eyenerọn̄ oro ọtọn̄ọ ndinam?

¹³ Akande oro, Jesus ọyọhọ mfọn mfọn ye edisana spirit, nte ẹwụtde oto enyịn itiaba eke Eyenerọn̄, emi ẹdide “mme spirit Abasi itiaba.” Jesus edi usụn̄ emi ọyọhọ udomo anamutom odudu Jehovah ọwọrọde osịm ikọt Esie eke isọn̄. (Titus 3:6) Nte an̄wan̄ade, edi kpasụk spirit emi an̄wam enye ndidu ke heaven n̄kụt se ikade iso mi ke isọn̄. Ukem nte Ete esie, Jesus enyene mfọnmma ukeme ufiọkn̄kpọ. N̄kpọ ndomokiet idịbeke enye ke enyịn. (Men Psalm 11:4; Zechariah 4:10 domo.) Nte an̄wan̄ade, Eyen emi—andimụm nsọn̄ọnda n̄kama emi akakande ererimbot; Lion emi otode ke esien Judah; orụn̄ David; enyeemi akayakde uwem esie ọnọ ubonowo; enyeemi enyenede ọyọhọ odudu, ọyọhọ udomo edisana spirit, ye mfọnmma ukeme ufiọkn̄kpọ oto Jehovah Abasi—ih, enyeemi ke n̄wọrọnda usụn̄, odot ndibọ n̄wed oro ke ubọk Jehovah. Nte enye emen̄e ndibọ utom oro ẹdọn̄de enye mi ke n̄kokon̄ esop Jehovah nnam? Baba! Utu ke oro, “Enye edi edibọ n̄wed ke ubọk nnasia Anditie ke ebekpo.” (Ediyarade 5:7) Nso eti uwụtn̄kpọ unyịme unyịme n̄kopuyo!

Mme Ikwọ Itoro

14. (a) N̄kpọ-uwem inan̄ ye mbiowo 24 oro ẹnam n̄kpọ didie ke ini Jesus ọbọde n̄wed oro? (b) Didie ke ntọt oro John ọbọde aban̄a mbiowo 24 ọsọn̄ọ idiọn̄ọ ye idaha mmọ?

¹⁴ Didie ke mbon eken oro ẹdude ke iso ebekpo Jehovah ẹnam n̄kpọ? “Ekem ke adan̄aemi Enye ọkọbọde n̄wed, n̄kpọ-uwem inan̄, ye mbiowo edịp ye inan̄ oro ẹduọn̄ọ ke iso Eyen-erọn̄; mmọ kiet kiet ẹnyene harp ye eso o-gold, ẹmi ẹyọhọde ye incense, ẹmi ẹdide mme akam nti ikọt Abasi.” (Ediyarade 5:8) Ukem nte n̄kpọ-uwem inan̄ ẹmi ẹdide mme cherub oro ẹdude ke iso ebekpo Abasi, mbiowo 24 ẹmi ẹduọn̄ọ ke iso Jesus ke ndinyịme odudu esie. Edi mbiowo ẹmi ikpọn̄ ẹnyene mme harp ye mme eso incense. a Mmọ ikpọn̄ ẹnyụn̄ ẹkwọ obufa ikwọ idahaemi. (Ediyarade 5:9) Ntem mmọ ẹbiet owo 144,000 eke edisana “Israel Abasi,” oro n̄ko ẹkamade harp ẹnyụn̄ ẹkwọde obufa ikwọ. (Galatia 6:16; Colossae 1:12; Ediyarade 7:3-8; 14:1-4) Akande oro, ẹwụt mbiowo 24 ẹmi nte ẹnamde utom oku eke heaven, adade aban̄a mme oku ke Israel eset oro ẹkesifọpde incense ẹnọ Jehovah ke ataya—kpa utom oro eketrede ke isọn̄ ke ini Abasi ekemende Ibet Moses efep, ọkọn̄de enye adian ke eto ndutụhọ Jesus. (Colossae 2:14) Nso ke nnyịn ibiere ito kpukpru ẹmi? Nte ke ẹkụt mme andikan oro ẹyetde aran mi nte ẹdude ke ọyọhọ itieutom mmọ nte ‘mme oku Abasi ye Christ, ẹdade ubọn̄ ye Enye ke tọsịn isua.’—Ediyarade 20:6.

15. (a) Ke Israel, anie ikpọn̄îkpọn̄ ikenyene ifet ndidụk esịt Ata Edisana Ebiet ke ataya oro? (b) Ntak ekedide n̄kpọ n̄kpa ye uwem ọnọ akwa oku ndifọp incense mbemiso odụkde Ata Edisana Ebiet?

 ¹⁵ Ke Israel eset, edidụk Ata Edisana Ebiet n̄kada ke iso itie oro Jehovah okodude ke ndamban̄a usụn̄ ekenyene akwa oku ikpọn̄îkpọn̄. Ke n̄kan̄ esie, ndikama incense ekedi n̄kpọ n̄kpa ye uwem. Ibet Jehovah ọkọdọhọ ete: “[Ana Aaron] ọwọhọde eboho ikan̄ ke itieuwa ke iso Jehovah, esịn ke n̄kpọ ufọp incense ọyọhọ, ndien owobi edifuọn̄ incense eke ẹnuakde emem ọyọhọ ubọk, ada odụk ke edem ukara. Ndien enye odori incense ke ikan̄ ke iso Jehovah, ndien nsụn̄ikan̄ incense oro eyefụk itie usio-isop emi odorode ke enyọn̄ n̄kpọ ntiense, man enye okûkpa n̄kpa.” (Leviticus 16:12, 13) Akwa oku ikekemeke-keme ndidụk Ata Edisana Ebiet oro uforo uforo ibọhọke ke enye ama ọkọfọp incense.

16. (a) Ke editịm n̄kpọ eke Christian, mmanie ẹdụk ndamban̄a Ata Edisana Ebiet oro? (b) Ntak emi mme Christian oro ẹyetde aran ẹnyenede ‘ndifọp incense’?

¹⁶ Ke editịm n̄kpọ eke Christian, idịghe ndamban̄a Akwa Oku oro, Jesus Christ ikpọn̄îkpọn̄, edi owo kiet kiet n̄ko ke otu udiana oku 144,000 oro ke akpatre ẹdụk ndamban̄a Ata Edisana Ebiet oro, kpa ebiet oro Jehovah odude ke heaven. (Mme Hebrew 10:19-23) Mme oku ẹmi ikemeke-keme ndidụk Ata Edisana Ebiet emi, nte ẹwụtde mi ebe ke mbiowo 24 ẹmi, ibọhọke mmọ ‘ẹfọp incense,’ oro edi, ẹbọn̄ akam ẹnyụn̄ ẹnam n̄kpeubọk kpukpru ini ẹnọ Jehovah.—Mme Hebrew 5:7; Jude 20, 21; men Psalm 141:2 domo.

Obufa Ikwọ

17. (a) Nso obufa ikwọ ke mbiowo 24 oro ẹkwọ? (b) Didie ke ẹsiwak ndida ikọ oro, “obufa ikwọ” ke Bible?

¹⁷ Inem inem ikwọ ọtọn̄ọ idahaemi. Mme nsan̄a oku, kpa mbiowo 24, ẹkwọ ikwọ emi ẹnọ Eyenerọn̄: “Ndien mmọ ẹkwọ obufa ikwọ ẹte, Afo omodot ndida n̄wed, ndinyụn̄ ndianade mme ufịkn̄kpọ esie; koro ẹkewotde Fi, Afo ama onyụn̄ ada iyịp Fo osio owo ke kpukpru esien, ye usem, ye obio, ye idụt, afak mmọ ọnọ Abasi.” (Ediyarade 5:9) Ikọ oro, “obufa ikwọ” odu ediwak ini ke Bible ndien esiwak ndida mban̄a editoro Jehovah ke ndusụk n̄kpọsọn̄ edinam edinyan̄a. (Psalm 96:1; 98:1; 144:9) Ntem, ikwọ emi edi obufa sia andikwọ enye ekemede kemi nditan̄a mme utịbe utom Jehovah efen efen nnyụn̄ ndemede esịtekọm oro enye enyenede ọnọ ubọn̄ ubọn̄ enyịn̄ Esie.

18. Kaban̄a nso ke mbiowo 24 oro ẹda obufa ikwọ mmọ ẹtoro Jesus?

¹⁸ Mi, nte ededi, mbiowo 24 ẹmi ẹkwọ obufa ikwọ ke iso Jesus utu ke ndikwọ ke iso Jehovah. Edi edumbet oro edi ukem ukem. Mmọ ẹtoro Jesus ke mbufa n̄kpọ oro enye, nte Eyen Abasi, anamde ke ibuot mmọ. Otode ke iyịp esie, enye ekedi esịne-ufọt obufa ediomi ndien ke ntem anamde ẹkeme ndinyene obufa idụt oro nte akpan inyene Jehovah. (Rome 2:28, 29; 1 Corinth 11:25; Mme Hebrew 7:18-25) Mme andibuana ke obufa idụt eke spirit emi ẹto ediwak idụt eke obụk, edi Jesus ama adian mmọ ọtọkiet ke esop kiet nte idụt kiet.—Isaiah 26:2; 1 Peter 2:9, 10.

19. (a) Nso edidiọn̄ ke Israel eke obụk okokpu ndibọ ke ntak unana edinam akpanikọ mmọ? (b) Nso edidiọn̄ ke obufa idụt Jehovah enyene ndibọ?

¹⁹ Ke ini Jehovah akanamde nditọ Israel ẹdi idụt kiet ke edem ko ke eyo Moses, enye ama odụk ediomi ye mmọ onyụn̄ ọn̄wọn̄ọ ete edieke mmọ ẹdikade iso ẹsọn̄ọ ẹda ke ediomi oro, mmọ ẹyekabade ẹdi obio ubọn̄ mme oku ke iso imọ. (Exodus 19:5, 6) Nditọ Israel ikanamke akpanikọ ndien ikedehedei ikụt nte un̄wọn̄ọ oro osude. Ke n̄kan̄ eken, obufa idụt, emi ẹketọn̄ọde ke ntak obufa ediomi oro Jesus ekedide esịne-ufọt, amakaiso ndinam akpanikọ. Ke ntre mme andibuana ke enye ẹnyene ndikara isọn̄ nte ndidem nnyụn̄ nnam utom nte mme oku n̄ko, ẹn̄wamde mbon eti esịt ke otu ubonowo ndikabade ntie ke emem ye Jehovah. (Colossae 1:20) Edi kpasụk nte obufa ikwọ oro owụtde enye: “Omonyụn̄ anam mmọ ẹdi Obio Ubọn̄ ye mme oku ẹnọ Abasi: mmọ ẹyenyụn̄ ẹda ubọn̄ ke isọn̄.” (Ediyarade 5:10) Nso idatesịt ke mbiowo 24 ẹmi ẹnyene ntem ke ndikwọ obufa ikwọ itoro emi nnọ Jesus oro ẹnọde ubọn̄!

 Ikwọ eke Heaven

20. Nso ikwọ itoro oro ẹkwọde ẹnọ Eyenerọn̄ ke ẹkwọ idahaemi?

²⁰ Didie ke mbon eken ke akwa udịm esop Jehovah eke heaven ẹnam n̄kpọ ẹban̄a obufa ikwọ emi? John okop nduaidem ndikụt n̄kemuyo eke esịt akpanikọ mmọ: “Ndien n̄kụt nnyụn̄ n̄kop uyo ediwak angel, ẹmi ẹkande ebekpo ye n̄kpọ-uwem ye mbiowo ẹkụk; ibat mmọ osịm thousand duop ke itie thousand duop ye mme thousand ke itie thousand; mmọ ẹnyụn̄ ẹdọhọ ke ọkpọsọn̄ uyo, ẹte, Eyenerọn̄ emi ẹkewotde omodot ndibọ odudu, ye inyene, ye ifiọk, ye ukeme, ye ukpono, ye ubọn̄, ye edidiọn̄.” (Ediyarade 5:11, 12) Nso inem inem ikwọ itoro ke emi edi ntem!

21. Nte itoro emi ẹnọde Eyenerọn̄ mi ọbọ Jehovah ukara ye itie esie? Nam an̄wan̄a.

²¹ Nte emi ọwọrọ ete ke idahaemi Jesus ke ndusụk udomo ọmọbọ Jehovah Abasi itie ye nte ke kpukpru edibotn̄kpọ ẹmewọn̄ọde ẹdi nditoro enye utu ke nditoro Ete esie? N̄wan̄ansa-o! Utu ke oro, ikwọ itoro emi odu ke n̄kemuyo ye se apostle Paul ekewetde ete: “Abasi ekemenede [Jesus] onịm ke enyọn̄, onyụn̄ ọnọ Enye enyịn̄ emi okon̄de akan kpukpru enyịn̄; man ke enyịn̄ Jesus kpukpru edọn̄ ẹkpetọn̄ọ ẹnọ Abasi, ye eke mme andidu ke heaven, ye eke mme andidu ke isọn̄, ye eke mme andidu ke idak isọn̄; kpukpru edeme ẹkpenyụn̄ ẹnyịme ẹte Jesus Christ edi Ọbọn̄, ẹnọ Abasi Ete ubọn̄.” (Philippi 2:9-11) Mi ẹtoro Jesus ke ntak udeme oro enye enyenede ke ndibiere akpan eneni ke iso kpukpru edibotn̄kpọ—edinọ unen itie edikara Jehovah ubọn̄. Ke akpanikọ, nso ubọn̄ ke emi ada ntem ọsọk Ete esie!

Akwa Ikwọ Itoro

22. Nso ikwọ itoro ke uyo ẹtode n̄kan̄ isọn̄ ẹdiana ọtọkiet ẹkwọ?

²² Ke n̄kpọntịbe oro John etịn̄de aban̄a mi, mme udịm eke heaven ke ẹkwọ ikwọ itoro ẹnọ Jesus ke ndinyịme edinam akpanikọ ye ukara esie eke heaven. Ke emi, uyo ẹmi ẹtode n̄kan̄ isọn̄ ẹdiana ye mmọ nte mmọemi n̄ko ẹbuanade ke nditoro Ete ye Eyen. Kpa nte mme edinam eke eyeneren owo ekemede ndida akwa itoro nsọk ete ye eka, ntre ke usụn̄ edinam akpanikọ Jesus anam itoro odu ke otu kpukpru edibotn̄kpọ man “ẹnọ Abasi Ete ubọn̄.” Ntre, John akaiso ndibụk ete: “Ndien n̄kop kpukpru n̄kpọ ẹmi ẹkebotde, ẹmi ẹdude ke heaven, ye ke isọn̄, ye ke idak isọn̄, ye ke inyan̄, ye kpukpru n̄kpọ eke ẹdude mmọ ke esịt, nte ẹdọhọde ẹte, Yak edidiọn̄, ye ukpono, ye ubọn̄, ye edikara ofụri ekondo, ẹnyene Enyeemi etiede ke ebekpo, ẹnyụn̄ ẹnyene Eyen-erọn̄ ke nsinsi-nsinsi.”—Ediyarade 5:13.

23, 24. (a) Nso iwụt ini emi ikwọ itoro oro editọn̄ọde ke heaven, ye ini editọn̄ọde ke isọn̄? (b) Didie ke ikwọ itoro emi ọsọn̄ uyo nte mme isua ẹbede?

²³ Ini ewe ke mfọnn̄kan ikwọ itoro emi ọtọn̄ọ? Enye ama abak ọtọn̄ọ ke usen Ọbọn̄. Ke ẹma ẹkesio Satan ye mme demon esie ke heaven ẹduọn̄ọ, “kpukpru n̄kpọ ẹmi ẹkebotde” ẹma ẹkeme ndidiana kiet ke ndikwọ ikwọ itoro emi. Ndien, nte mbụk owụtde, toto ke 1919, akwa otuowo emi akade-kaiso ndikọri ke isọn̄ ẹmedian uyo mmọ ọtọkiet ke nditoro Jehovah, ọtọn̄ọde ke tọsịn owo ifan̄ ọkọri ebe miliọn owo itiokiet ke isua 2005. b Ke ẹma ẹkesobo editịm n̄kpọ Satan eke isọn̄ ẹfep, “kpukpru n̄kpọ ẹmi ẹkebotde . . . ke isọn̄” ẹyekwọ itoro Jehovah ye eke Eyen esie. Ke edikem ini Jehovah, ẹyetọn̄ọ ndinam anana-ibat miliọn owo oro ẹkekpan̄ade ẹset, ndien adan̄aoro “kpukpru n̄kpọ ẹmi ẹkebotde . . . ke idak isọn̄” oro Abasi enyenede mmọ ke ekikere, ẹyenyene ifet ndibuana ke ndikwọ ikwọ itoro emi.

²⁴ Mi kan̄a, “ke utịt ererimbot . . . inyan̄, ye . . . mme isuo,” ediwak miliọn owo ẹma ẹtọtọn̄ọ ndikwọ obufa ikwọ ke edidianakiet ye esop Jehovah ofụri ererimbot. (Isaiah 42:10; Psalm 150:1-6) Ikwọ idatesịt emi eyesọn̄ uyo akan oro ke utịt Tọsịn Isua, ke ẹma ẹkemenede ubonowo ẹsịm mfọnmma idaha. Ke oro ebede, ẹyesobo akani Urụkikọt oro, kpa akwa andibian̄a, Satan ke idemesie, nte ekemde ye ọyọhọ ọyọhọ edisu eke Genesis 3:15, ndien ke ata akpatre edikan, kpukpru odu-uwem edibotn̄kpọ, spirit ye owo, ẹyekwọ ikwọ ke edidianakiet ẹte: “Yak edidiọn̄, ye ukpono, ye ubọn̄, ye edikara ofụri ekondo, ẹnyene Enye emi etiede ke ebekpo,  ẹnyụn̄ ẹnyene Eyen-erọn̄ ke nsinsi nsinsi.” Ukpụhọde ukpụhọde uyo ndomokiet ididụhe ke ofụri ekondo.

25. (a) Ndikot mbụk John oro aban̄ade ikwọ itoro ofụri ererimbot onụk nnyịn ndinam nso? (b) Nso eti uwụtn̄kpọ ke n̄kpọ-uwem inan̄ oro ye mbiowo 24 ẹnịm ẹnọ nnyịn nte n̄kukụt oro osịmde utịt?

²⁵ Nso idara idara ini ke oro edidi ntem! Ke akpanikọ, se John obụkde mi anam esịt nnyịn ọyọhọ ye idara onyụn̄ onụk nnyịn ndibuana ye mme udịm eke heaven ke ndikwọ itoro ofụri esịt nnọ Jehovah Abasi ye Jesus Christ. Nte nnyịn itịmke-tịm ibiere ikan ndikaiso ke nti utom? Edieke inamde ntre, nnyịn imekeme ndidori enyịn, ye un̄wam Jehovah, nte ke nnyịn owo kiet kiet iyedu do ke inem inem utịt oro, idiande uyo nnyịn ke ikwọ itoro ofụri ererimbot oro. Ke akpanikọ, n̄kpọ-uwem inan̄ oro ẹdide mme cherub ye mme Christian oro ẹyetde aran ẹmi ẹnamde ẹset ẹdu ke ọyọhọ n̄kemuyo, koro n̄kukụt oro osịm utịt ye ikọ ẹmi: “Ndien n̄kpọ-uwem inan̄ oro ẹdọhọ ẹte, Amen. Mbiowo ẹnyụn̄ ẹduọn̄ọ ke isọn̄, ẹtuak ibuot.”—Ediyarade 5:14.

26. Nso ke nnyịn ikpenyene ndikọn̄ mbuọtidem, ndien nso ke Eyenerọn̄ eben̄e idem ndinam?

²⁶ Afo edima owo oro okotde n̄wed emi, akpakam ọkọn̄ mbuọtidem ke uwa Eyenerọn̄ oro—‘enyeemi odotde’—onyụn̄ okụt edidiọn̄ ke nti ukeme oro afo esịnde ndituak ibuot nnyụn̄ nnam n̄kpọ Jehovah—“Enye emi etiede ke ebekpo.” Yak otu John an̄wam fi mfịn nte enye ọnọde udomo ‘udia [eke spirit oro ẹyomde] ke edikem ini.’ (Luke 12:42) Edi sese! Eyenerọn̄ eben̄e idem ndidianade ufịkn̄kpọ itiaba oro. Nso akama-n̄kpaidem ediyarade ẹdu idahaemi ẹbet nnyịn?

[Mme Ikọ idakisọn̄]

[Mme Mbụme Ukpepn̄kpọ]

 [Ndise ke page 86]