Ibuot 1

Ediyarade—Inem Inem Ata-Utịt Esie!

1. Nnyịn isan̄a didie ifiọk ite ke Abasi oyom nnyịn ikop inemesịt?

 EDIYARADE ẸNỌDE JOHN—nduaidem nduaidem n̄wed Bible emi amada n̄wetnnịm n̄kpọ Abasi emi osịm inem inem ata-utịt. Ntak emi nnyịn idọhọde “inem inem”? Ọfọn, ẹtịn̄ ẹban̄a Anditịm Bible nte edide “Abasi inemesịt,” emi ayakde ‘ubọn̄ ubọn̄ gospel’ ọnọ mbon oro ẹmade enye. Enye oyom nnyịn ikop inemesịt n̄ko. Ntem, ntọn̄ọ ntọn̄ọ Ediyarade ọsọn̄ọ ọnọ nnyịn ete: “Ọfọfọn ọnọ andikot . . . ikọ prọfesi emi.” Ẹsian nnyịn ke akpatre ibuot esie ẹte: “Ọfọfọn ọnọ owo eke onịmde ikọ prọfesi n̄wed emi.”—1 Timothy 1:11, NW; Ediyarade 1:3; 22:7.

2. Nso ke ana nnyịn inam man ikụt inemesịt ebe ke n̄wed Ediyarade?

² Nnyịn isan̄a didie ikụt inemesịt ebe ke n̄wed Ediyarade? Nnyịn inam ntre ke ndidụn̄ọde mfiọk se mme in̄wan̄în̄wan̄ idiọn̄ọ, m̀mê mme ndamban̄a n̄kpọ ke esịt esie ẹwọrọde, nnyụn̄ nnam n̄kpọ ke n̄kemuyo ye mmọ. Ibịghike ntịme ntịme mbụk ubonowo eyesịm ata-utịt nsobo, nte Abasi ye Jesus Christ ẹbierede ikpe ẹnọ idiọk editịm n̄kpọ eke mfịn emi, ẹnamde “obufa enyọn̄ ye obufa isọn̄” ẹda itie esie, emi idem ‘n̄kpa mîdinyụn̄ idụhe aba.’ (Ediyarade 21:1, 4) Nte kpukpru nnyịn iyomke ndidụn̄ ke utọ obufa ererimbot oro, ke ata emem ye ifụre? Nnyịn imekeme ndidụn̄ edieke inamde mbuọtidem nnyịn ọkọri ke ndikpep Ikọ Abasi, esịnede edemede-udọn̄ prọfesi Ediyarade.

Apocalypse—Enye Edi Nso?

3. Ediwak owo ẹkere ke Apocalypse ye Armageddon ẹwọrọ nso?

³ Nte owo ikotke Ediyarade n̄ko Apocalypse? Oro edi ntre, “ediyarade” edi edikabade oro Ikọ Efịk akabarede a·po·kaʹly·psis ke uwetn̄kpọ Greek. Ediwak owo ẹda Apocalypse ẹbuan ye nsobo ererimbot otode ekọn̄ nuclear. Ke obio Texas, U.S.A., emi ẹkebotde ekese ikpọ enyịmikan̄ nuclear, mme aka-ufọkederi ẹkesidọhọ ẹte, “Nnyịn ididi akpa mbon oro ẹbede ẹfep.” Ẹkedọhọ ẹte ke mme ọkwọrọ ederi ke obio oro “ẹkenịm ke akpanikọ ẹte ke Armageddon idịghe se ẹdọhọde ke iditreke-tre ndidi kpọt, edi ke enye n̄ko omotịm ekpere, ye nte ke akpatre en̄wan oro ẹdin̄wanade ke ufọt udịmekọn̄ eti ye idiọk, eke Abasi ye eke Satan, edida itie nte nsobo nuclear.” a

4. Ikọ oro “apocalypse” enen̄ede ọwọrọ nso, ndien ntak emi odotde ẹkot akpatre n̄wed Bible “Ediyarade”?

⁴ Edi apocalypse enen̄ede edi nso? Okposụkedi mme n̄wed ukabade ikọ ẹkabarede enye ke ndida utọ usem nte “n̄kpet n̄kpet nsobo ofụri ekondo,” a·po·kaʹly·psis eke Greek enen̄ede ọwọrọ “edifụhọde” m̀mê “edikûbọde.” Mmọdo, nte odotde, ẹkot akpatre n̄wed Bible, “Ediyarade.” Mi, nnyịn ikwe ikpîkpu etop n̄kpan̄a otode nsobo ererimbot, edi ikụt ediyarade oro ẹyararede mme akpanikọ Abasi oro akpanamde nyayama idotenyịn ye mbuọtidem eke mîsehekede ẹkọri ke esịt nnyịn.

5. (a) Mmanie ke ẹdisobo ke Armageddon, ndien mmanie ẹdibọhọ? (b) Nso ubọn̄ ubọn̄ ini iso ina ibet mme andibọhọ Armageddon?

⁵ Edi akpanikọ, ẹtịn̄ ẹban̄a Armageddon ke akpatre n̄wed Bible nte “ekọn̄ akwa usen Abasi, Andikara kpukpru n̄kpọ.” (Ediyarade 16:14, 16) Edi enye edidi ata isio isio ye nsobo nuclear! Utọ nsobo oro ọkpọwọrọ kpukpru uwem ke isọn̄ nditak. Utu ke oro, Ikọ Abasi ọnọ inem inem nsọn̄ọ nte ke ndiọi owo ẹmi ẹbiọn̄ọde uduak Abasi kpọt ke ẹdisobo—ke ubọk udịmekọn̄ oro Abasi akarade. (Psalm 37:9, 10; 145:20) Akwa otu ubonowo, ẹmi ẹtode kpukpru idụt, ẹyebọhọ ata-akpatre ubiomikpe  Abasi oro ke Armageddon. Adan̄aoro Christ Jesus eyekpeme onyụn̄ ada mmọemi osịm nsinsi uwem ke paradise isọn̄. Nte afo uyomke ndidi kiet ke otu mmọ? Nte enemde, Ediyarade owụt ete ke afo emekeme ndidi kiet!—Ediyarade 7:9, 14, 17.

Ndidụn̄ọde mme Ndịben̄kpọ Abasi

6. Ke ofụri isua oro ẹkebede, mme n̄wed ewe ke Mme Ntiense Jehovah ẹkemịn̄ ndisịn un̄wana ke Ediyarade?

⁶ Ko ke edem edem nte 1917, Watch Tower Society ama emịn̄ n̄wed oro The Finished Mystery. Emi ekedi n̄wed-utatikọ eke ufan̄ikọ kiet kiet ke n̄wed Ezekiel ye Ediyarade eke Bible. Ekem, nte mme n̄kpọntịbe ererimbot ẹkekade iso ndiwụt idem ke ndisu prọfesi Bible, ẹma ẹtịm ekemini n̄wed eboho-iba oro ẹkekotde Light, emi ẹkesiode ke 1930. Emi ama anam ukpepn̄kpọ ke n̄wed Ediyarade akabade obufa. Un̄wana ama akaiso ‘ayama ọnọ ndinen owo,’ tutu ke 1963 Mme Ntiense Jehovah ẹma ẹmịn̄ n̄wed oro “Babylon the Great Has Fallen!” God’s Kingdom Rules! emi ekenyenede page 704. Emi ama ọnọ ọyọhọ mbụk aban̄a edidaha nda ye iduọ Akwa Babylon, kpa ukara ererimbot eke nsunsu ido ukpono, ndien enye ama ada osịm ata-utịt ye edineme akpatre ibuot usụkkiet eke n̄wed Ediyarade. Nte ‘usụn̄ nti owo akakade iso ayama akan,’ akpan akpan ke se iban̄ade utom esop, ke 1969 enyene page 384 n̄wed oro, “Then Is Finished the Mystery of God” ama adiana, emi ekenemede akpa ibuot 13 eke n̄wed Ediyarade.—Psalm 97:11; Mme N̄ke 4:18.

7. (a) Ntak emi Mme Ntiense Jehovah ẹkesiode n̄wed emi ọkọn̄ọde ke Ediyarade? (b) Mme un̄wam ukpepn̄kpọ ewe ke ẹnọ ke n̄wed emi ke ufọn mme andikot?

⁷ Ntak emi ẹkesiode ẹnyụn̄ ẹfiak ẹmịn̄ n̄wed efen oro aban̄ade Ediyarade ke ini emi-e? Ekese ntọt oro ẹma ẹkewewet ẹdi ata ọyọhọ ọyọhọ, ndien ikedịghe se ẹkemede ndikabade nnyụn̄ mmịn̄ enye ke ofụri ererimbot ke ediwak usem. Ntre, ẹma ẹkụt ẹte ke odot ẹsio eboho n̄wed kiet oro aban̄ade Ediyarade ye ke uduot oro ẹkemede ndisọp n̄kabade ke ediwak usem. Akande oro, ẹmenyene ufan̄ ke eboho n̄wed enyeemi ndinọ mme un̄wam ukpepn̄kpọ, ẹsịnede mme ndise, mme chart, ye mbio ikọ ndụn̄ọde, oro akpan̄wamde mme andikot ndifiọk in̄wan̄în̄wan̄ mban̄a inem inem akpan n̄kpọ ke utịbe utịbe prọfesi emi.

8. Nso idi akakan ntak oro akam anamde ẹwet n̄wed emi?

⁸ Ufọn edisan̄a ikpat kiet ye akpanikọ oro ẹnyenede idahaemi akam edi akakan ntak oro ẹdimịn̄de n̄wed emi. Jehovah ke akakaiso ndisịn un̄wana eke ayamade akan ke se Ikọ esie ọwọrọde, ndien nnyịn imekeme ndidori enyịn nte ke ẹyenam ifiọk oro nnyịn inyenede iban̄a n̄wed Ediyarade ye mme prọfesi eken ototịm ọkọri nte nnyịn inen̄erede isan̄a ikpere akwa ukụt. (Matthew 24:21; Ediyarade 7:14) Edi akpan n̄kpọ nte nnyịn idi se ẹtịmde ẹsian. Nte apostle Peter ekewetde aban̄a prọfesi Abasi ete: “Mbufo ẹyetịm ẹnam, edieke mbufo ẹdibiọn̄de utọn̄ ke ikọ oro, nte owo esese utuenikan̄ eke ayamade ke n̄kịmn̄kịm ebiet, tutu eyo esiere, utịn onyụn̄ asiaha ke esịt mbufo.”—2 Peter 1:19.

9. (a) Adianade ye mme prọfesi eken, n̄wed Ediyarade owụt ke Abasi edibot nso? (b) Nso idi obufa ererimbot, ndien didie ke afo ekeme ndibọhọ ndụk enye?

⁹ Ediyarade ada n̄kpọ ntiense esie ọsọn̄ọ ediwak prọfesi eken ke Bible, owụtde ete ke Jehovah Abasi amaduak ndibot “mbufa enyọn̄ ye obufa isọn̄.” (Isaiah 65:17; 66:22; 2 Peter 3:13; Ediyarade 12:1-5) Ke akpa itie, ẹnọ etop esie ẹsọk mme Christian oro ẹyetde aran, ẹmi Jesus ekedepde ke iyịp esie ndikabade ndi mme andikara ye enye ke obufa enyọn̄. (Ediyarade 5:9, 10) Nte ededi, eti mbụk emi n̄ko eyesọn̄ọ mbuọtidem ediwak miliọn mmọemi ẹdoride enyịn ndinyene nsinsi uwem ke idak Obio Ubọn̄ Christ. Nte afo edi kiet ke otu mmọemi? Do Ediyarade eyesọn̄ọ idotenyịn fo ndidu ke Paradise, nte ubak obufa isọn̄, ye edinyene ediwak emem, eti nsọn̄idem, ye uwak enọ Abasi oro mîdinyeneke utịt. (Psalm 37:11, 29, 34; 72:1, 7, 8, 16) Edieke afo oyomde ndibọhọ ndụk obufa ererimbot oro, edi usọp usọp n̄kpọ, ih, ana afo ọnọ ntịn̄enyịn ke ediye usụn̄ emi n̄wed Ediyarade etịn̄de n̄kpọ aban̄a onịm-mbụk utịt oro ekperede idahaemi.—Zephaniah 2:3; John 13:17.

[Ikọ idakisọn̄]

[Mme Mbụme Ukpepn̄kpọ]

 [Ndise ke page 7]