Ediyarade ye Afo
Ibuot 44
Ediyarade ye Afo
1. (a) Nso edifiak nsọn̄ọ ke angel oro ọnọ John aban̄a kpukpru utịbe utịbe un̄wọn̄ọ oro ke Ediyarade? (b) Anie edi enyeemi ọdọhọde ete, ‘Ami ke ndi iwiwa,’ ndien ‘edidi’ emi edi ini ewe?
KE NDIKOT inem inem ikọ oro ẹtịn̄de ẹban̄a nte Obufa Jerusalem etiede, ekeme ndinụk fi ndibụp: ‘Nte n̄kpọ edide utịbe utịbe ntre ekeme ndida itie ke akpanikọ?’ John ọbọrọ mbụme oro ke nditịn̄ mme udiana ikọ angel oro: “Angel oro onyụn̄ ọdọhọ mi ete, Ikọ ẹmi ẹdi akpanikọ eke owo okponịmde. Ndien Ọbọn̄ [“Jehovah,” NW], emi edide Abasi spirit mme prophet, ọkọdọn̄ angel ediwụt ikọt [“ifịn,” NW] Esie se iditịbede ke ekpri ibio ini. Sese, mmọn̄ ndedi idaha emi [“iwiwa,” NW]. Ọfọfọn ọnọ owo eke onịmde ikọ prophecy n̄wed emi.” (Ediyarade 22:6, 7) Kpukpru utịbe utịbe un̄wọn̄ọ eke Ediyarade ẹyenen̄ede ẹsu! Ke etịn̄de ikọ ke enyịn̄ Jesus, angel oro ọdọhọ ete ke Jesus ke edi usọp usọp, “iwiwa.” Ana emi edi edidi oro Jesus edide “nte inọ” ndisobo mme asua Jehovah nnyụn̄ nda ubọn̄ ubọn̄ ye inem inem ata-utịt Ediyarade ndi. (Ediyarade 16:15, 16) Ke ntre, nnyịn ikpenyene ndinam uwem nnyịn asan̄a ekekem ye mme ikọ “n̄wed emi,” Ediyarade, man ke ini oro ẹkpedọhọ ẹte ke ọfọfọn ọnọ nnyịn.
2. (a) John anam n̄kpọ didie aban̄a ekese n̄kpọ ẹdude ke ediyarade, ndien nso ke angel oro asian enye? (b) Nso ke nnyịn ikpep ito ikọ angel oro, “Kpeme idem!” ye, “Tuak ibuot nọ Abasi”?
2 Ke utọ ekese ediyarade oro ama okokụre, otịm an̄wan̄a nte ke John ama odu ke n̄kpaidem: “Ọfọn, ami John n̄kedi andikop ye andikụt mme n̄kpọ ẹmi. Ndien ke ini n̄kopde nnyụn̄ n̄kụtde, ami mma nduọ ke isọn̄ nte ntuak ibuot ke ukot angel emi okowụtde mi n̄kpọ ẹmi. Edi enye ọdọhọ mi ete: ‘Kpeme idem! Kûnam n̄kpọ oro! Ami n̄kukụre ndi ekemmọ ofụn fo ye nditọete fo ẹmi ẹdide mme prọfet ye mbon oro ẹnịmde mme ikọ n̄wed emi. Tuak ibuot nọ Abasi.’” (Ediyarade 22:8, 9, NW; men Ediyarade 19:10 domo.) Ntọt emi ẹtọtde utịm ikaba mi ẹte ẹkûtuak ibuot ẹnọ mme angel ekedi ekemini ntọt ke eyo John, emi ndusụk owo nte an̄wan̄ade ẹkebịnede utọ utuakibuot oro m̀mê ẹkedọhọde ke imenyene mme san̄asan̄a ediyarade ito mme angel. (1 Corinth 13:1; Galatia 1:8; Colossae 2:18) Mfịn, emi osio akpanikọ oro owụt nte ke ana nnyịn ituak ibuot inọ Abasi ikpọn̄îkpọn̄. (Matthew 4:10) Nnyịn ikpenyeneke ndida utuakibuot nnọ owo m̀mê n̄kpọ ekededi nsabade edisana utuakibuot.—Isaiah 42:5, 8.
3, 4. Nso ke angel oro akaiso ndisian John, ndien didie ke nsụhọ oro ẹyetde aran ẹnam mme ikọ esie?
3 John akaiso ete: “Enye onyụn̄ ọdọhọ mi ete, Kûdian ikọ prophecy n̄wed emi, udịp, umen, unịm; koro ini ke ekpere. Owo eke edide ukwan̄, yak enye osụk amana anam ukwan̄ido; owo eke edehede, yak enye osụk amana edehe; owo eke edide edinen, yak enye osụk amana anam edinen ido; owo eke asanade, yak enye osụk amana asana.”—Ediyarade 22:10, 11.
4 Mfịn nsụhọ oro ẹyetde aran ẹmenam mme ikọ angel emi. Mmọ ifịkke mme ikọ prọfesi emi inịm. Kamse, ata akpa nsiondi Zion’s Watch Tower and Herald of Christ’s Presence (July 1879) ama otịm mme utịn̄ikọ ke ediwak ufan̄ikọ Ediyarade. Nte nnyịn ima ikokụt ke ntọn̄ọ ibuotn̄wed nnyịn, Mme Ntiense Jehovah ke ediwak isua oro ẹkebede ẹma ẹmịn̄ mme n̄wed eken oro ẹsịnde un̄wana ke Ediyarade. Idahaemi nnyịn imọtọn̄ọ ntak idụri ntịn̄enyịn kpukpru mme ama-akpanikọ iwụt mme okopodudu prọfesi Ediyarade ye edisu oro mmọ ẹsude.
5. (a) Nso edieke mme owo ẹyomde ndifụmi mme ntọt ye item ẹdude ke Ediyarade? (b) Mbon oro ẹnyenede sụn̄sụn̄ ido ye edinen ido ẹkpenam n̄kpọ didie?
5 Edieke mme owo ẹyomde ndifụmi mme ntọt ye item oro ẹdude ke Ediyarade, ọfọn, yak mmọ ẹnam ntre! “Owo eke edide ukwan̄, yak enye osụk amana anam ukwan̄ido.” Edieke emi edide se mmọ ẹmekde, mbon oro ẹsịnde idem ke ndek ndek edinam eke eyo nnam-se-mmade emi ẹkeme ndikpan̄a ke ndek ndek edinam oro. Ibịghike, ẹmọn̄ ẹnọ ubiereikpe Jehovah ofụri ofụri, ọtọn̄ọde ye edisobo Akwa Babylon mfep. Yak mbon oro ẹnyenede sụn̄sụn̄ ido ẹsịn ifịk ndinam mme ikọ prọfet emi: “Ẹyom Jehovah . . . ẹyom edinen ido, ẹyom sụn̄sụn̄ ido: m̀mê mbufo ẹyedịbe ke usen iyatesịt Jehovah.” (Zephaniah 2:3) Amaedi mbon oro ẹma ẹkeyayak idemmọ ẹnọ Jehovah, “owo eke edide edinen, yak enye osụk amana anam edinen ido; owo eke asanade, yak enye osụk amana asana.” Owo eti ibuot ọfiọk ete ke ufọn ibio ini ndomokiet oro otode idiọkn̄kpọ idụhe, emi ekpedide se ẹmende ẹdomo ye mme nsinsi edidiọn̄ oro mbon ẹmi ẹbịnede edinen ido ye edisana ido ẹdinyenede. Bible ọdọhọ ete: “Ẹdomo idem mbufo ẹse m̀mê mbufo ẹdu ke mbuọtidem: ẹtịm ẹdomo idem mbufo ẹfiọk.” (2 Corinth 13:5) Ọkọn̄ọde ke usụn̄ oro afo emekde ndidụk onyụn̄ akade iso odu, afo eyebọ utịp fo.—Psalm 19:9-11; 58:10, 11.
6. Nso ke Jehovah ọdọhọ nte enye etịn̄de ikọ ọnọ mme andikot Ediyarade nte akpatre ini ke prọfesi emi?
6 Jehovah, kpa nsinsi Edidem, idahaemi etịn̄ ikọ ọnọ mme andikot Ediyarade nte akpatre ini ke prọfesi emi, ọdọhọde ete: “Sese, mmọn̄ ndedi idaha emi [“iwiwa,” NW]; nnyụn̄ nsan̄a ye utịp Mi, ndinọ kpukpru owo nte ekemde ye ubọk-utom esie. Ami ndi Alpha ye Omega, mbemiso ye akpatre, ntọn̄ọ ye utịt. Ọfọfọn ọnọ mmọ eke ẹyetde ọfọn̄idem mmọ asana, man mmọ ẹkpenyene unen ndisịm eto uwem, ẹkpenyụn̄ ẹbe ke inua-otop ẹdụk ke esịt obio. Mme ebua ẹdu ke edem obio, ye mme abia idiọn̄, ye mbon use, ye mme owot owo, ye mme okpono ndem, ye kpukpru owo eke ẹmade nsu, ẹnyụn̄ ẹsude nsu.”—Ediyarade 22:12-15.
7. (a) Kaban̄a nso ke Jehovah ‘edi iwiwa’? (b) Ntak emi mme ọkwọrọ ederi Christendom mîdinyeneke udeme ndomokiet ke Obufa Jerusalem?
7 Inikiet efen, Jehovah Abasi ọsọn̄ọ etịn̄ aban̄a nsinsi itie edikara esie ye akpanikọ oro nte ke se imọ ke akpa ikaduakde imọ ke akpatre imọn̄ inam. Enye ke ‘edi iwiwa’ ndinọ ubiereikpe, eyenyụn̄ ọnọ mbon oro ẹyomde enye ke ofụri esịt utịp. (Mme Hebrew 11:6) Mme edumbet esie ẹbiere m̀mê anie ke ẹdinọ utịp n̄ko m̀mê anie ke ẹdisịn. Mme ọkwọrọ ederi Christendom ẹmenam n̄kpọ nte “[mme] ebua imụm,” ẹbọpde enyịn ẹsio iso ẹfep ke ndiọi edinam oro Jehovah etịn̄de aban̄a mi. (Isaiah 56:10-12; se n̄ko Deuteronomy 23:18, New World Translation Reference Bible, ikọ idakisọn̄.) Ke akpanikọ, mmọ ‘ẹma ẹnyụn̄ ẹkaiso ẹkpep’ mme nsunsu ukpepn̄kpọ ye mme ekikere, ẹmenyụn̄ ẹfụmi item oro Jesus ọkọnọde ẹsọk esop itiaba oro, ofụri ofụri. Ntem, mmọ inyeneke udeme ndomokiet ke Obufa Jerusalem.
8. (a) Mmanie kpọt ẹnam isan̄ ‘ẹsịm eto uwem,’ ndien emi ọwọrọ nso? (b) Didie ke akwa otuowo ‘ẹkeyet ọfọn̄idem mmọ,’ ndien didie ke mmọ ẹkaiso ẹnyene edisana idaha?
8 Sụk mme Christian oro ẹyetde aran, ẹmi ke akpanikọ “ẹyetde ọfọn̄idem mmọ asana” man ẹkpedi edisana ke enyịn Jehovah ke ẹnọ ifet “ndisịm eto uwem” oro. Oro edi, mmọ ẹbọ unen ye odudu ndinyene uwem unana n̄kpa ke itie mmọ eke heaven. (Men Genesis 3:22-24; Ediyarade 2:7; 3:4, 5 domo.) Ke mmọ ẹma ẹkekpan̄a nte owo, mmọ ẹbe ẹdụk Obufa Jerusalem ebe ke ediset ke n̄kpa. Angel 12 oro ẹyak mmọ ẹdụk, ke adan̄aemi mîyakke owo ekededi oro osude nsu m̀mê anamde ndek ndek ido odụk kpa ye oro ọdọhọde ke imenyene idotenyịn eke heaven. Akwa otuowo oro ẹdude ke isọn̄ n̄ko ẹma “[ẹyet] ọfọn̄idem mmọ ẹnam afia ke iyịp Eyen-erọn̄” onyụn̄ oyom mmọ ẹkaiso ẹmụm edisana idaha mmọ ẹkama. Mmọ ẹkeme ndinam emi ke ndifep idem ke ndiọi edinam oro Jehovah odụride owo utọn̄ aban̄a mi, ọkọrọ ye edida item Jesus oro odude ke etop itiaba esie ẹmi ẹkenọde ẹsọk mme esop oro nsịn ke esịt.—Ediyarade 7:14; ibuot 2 ye 3.
9. Mme ikọ ewe ke Jesus etịn̄, ndien ẹkebem iso ẹnọ etop esie ye ofụri Ediyarade ẹsọk mmanie?
9 Ke Jehovah ama okokụre, Jesus etịn̄ ikọ. Enye etịn̄ ikọ nsịnudọn̄ ọnọ mbon eti esịt oro ẹkotde Ediyarade, ọdọhọde ete: “Ami Jesus n̄kọdọn̄ angel Mi edisian fi ikọ ẹmi, man ada ọnọ mme ufọk Abasi. Ami ndi Orụn̄ ye Eyen David, ediyama ntantaọfiọn̄ usenubọk.” (Ediyarade 22:16) Ih, mme ikọ ẹmi ke akpa ẹkenyene “mme ufọk Abasi.” Emi edi etop oro, akpa kan̄a, enyenede esop mme Christian oro ẹyetde aran ke isọn̄. Ẹketịn̄ kpukpru n̄kpọ oro ẹdude ke Ediyarade ke akpa ẹnọ mme Christian oro ẹyetde aran, ẹmi ẹdidade Obufa Jerusalem ẹnyene. Ebede ke esop oro, ẹnọ akwa otuowo n̄ko ifet ndinyene ifiọk mban̄a mme ọsọn̄urua akpanikọ prọfesi ẹmi.—John 17:18-21.
10. Ntak emi Jesus okotde idemesie (a) “Orụn̄ ye Eyen David”? (b) “ediyama ntantaọfiọn̄ usenubọk”?
10 Jesus Christ ke ẹkenọ ifet ediyak Ediyarade nnọ John ndien ama ebe ke enye osịm esop oro. Jesus edi “Orụn̄ ye Eyen David.” Enye okoto ubon David nte asan̄ade ekekem ye ebuana eke obụk ndien ke ntem odot ndidi Edidem Obio Ubọn̄ Jehovah. Enye n̄ko eyekabade edi “Nsinsi Ete” David, ndien ke ntem edi “Orụn̄” David. (Isaiah 9:6; 11:1, 10) Enye edi nsinsi, Edidem oro mîkemeke ndikpa ke ubon David, osude ediomi oro Jehovah akanamde ye David, ye “ediyama ntantaọfiọn̄ usenubọk” oro ẹkebemde iso ẹtịn̄ ẹban̄a ke eyo Moses. (Numbers 24:17; Psalm 89:34-37) Enye edi “ntantaọfiọn̄ usen” oro asiahade, anamde eyo esiere. (2 Peter 1:19, NW) Kpukpru n̄kari eke akwa asua oro, kpa Akwa Babylon ikekemeke ndikpan ubọn̄ ubọn̄ uyama emi.
Dọhọ Ete: “Di”!
11. Nso an̄wan̄wa ikot ke John ọnọ idahaemi, ndien mmanie ẹkeme ndinam n̄kpọ mban̄a etop emi?
11 Idahaemi edi ini John nditịn̄ ikọ. Ye esịt oro ọyọhọde ye ekọm kaban̄a kpukpru se enye okụtde onyụn̄ okopde, enye ofiori ete: “Spirit ye n̄wan-ndọ ẹdọhọ ẹte, Di. Owo eke onyụn̄ okopde, yak enye ọdọhọ ete, Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Ediyarade 22:17) Mme ufọn uwa ufak Jesus iditreke ye owo 144,000 kpọt, koro emi edi an̄wan̄wa ikot. Okopodudu spirit Jehovah anam utom ebe ke otu an̄wanndọ emi, tutu eyedi se etop emi akade iso ndidi se ẹtan̄ade an̄wan̄a akan: “Edibọ mmọn̄ uwem ke ikpîkpu.” (Se n̄ko Isaiah 55:1; 59:21.) Ẹnọ owo ekededi oro okopde nsatitọn̄ edinen ido ikot ẹte “Di” man edibọ enọ ntatubọk Jehovah. (Matthew 5:3, 6) Kpukpru mbon oro ẹnyenede idotenyịn ndidi otu eke isọn̄ oro ẹyerede ikot emi otode otu John emi ẹyetde aran ẹnyene ifet didie ntem!
12. Akwa otuowo ẹnam n̄kpọ didie ẹban̄a ikot oro ke Ediyarade 22:17?
12 Toto ke ntọn̄ọ ntọn̄ọ iduọk isua 1930, akwa otuowo oro ibat ọkọride-kọri ke ‘ẹkekop’—ẹkpan̄de utọn̄ ẹnọ ikot emi. Ukem nte ekemmọ ifịn oro ẹyetde aran, mmọ ẹmesịm edisana idaha ke iso Jehovah. Ọdọn̄ mmọ ndikụt ini emi Obufa Jerusalem edisụhọrede oto heaven edi ndinam mme edidiọn̄ ẹsịm ubonowo. Ke ẹma ẹkekop etop Ediyarade oro edemerede owo udọn̄, ikụreke ke akwa otuowo ndidọhọ “D”! edi mmọ ifịk ifịk ke ẹtan̄ mbon eken ẹdọn̄ ke esop Jehovah, ẹnọde mmọemi ukpep n̄ko ndidọhọ: “Owo eke itọn̄ asatde, yak enye edi.” Ntre ibat akwa otuowo amakaiso ndikọri, nte se iwakde ikan 6,000,000 ke otu mmọ ke idụt ẹwakde ẹbe 230 ke ofụri isọn̄ ẹbuanade ye otu an̄wanndọ oro ẹyetde aran, emi osụhọrede ke ibat akan 9,000 ke nditat ikot oro man “edibọ mmọn̄ uwem ke ikpîkpu.”
13. Nso ntọt ke Jesus ọnọ?
13 Udiana, edi Jesus afiak etịn̄ ikọ, ọdọhọde ete: “Mmọsọn̄ọ ndọhọ kpukpru owo eke ẹkopde ikọ prophecy n̄wed emi nte, Edieke owo ọkọrọde n̄kpọ kiet ke esịt, Abasi eyekọrọ mme ufen eke ẹwetde ke n̄wed emi ọnọ enye; ndien edieke owo osiode n̄kpọ ke ikọ prophecy emi, Abasi eyesio enye udeme ke eto uwem efep, ye ke edisana obio, kpa n̄kpọ ẹmi ẹwetde ke n̄wed emi.”—Ediyarade 22:18, 19.
14. Didie ke otu John ese “prophecy” eke Ediyarade?
14 Ana mbon eke otu John ẹdụri owo ntịn̄enyịn ẹwụt “prophecy” eke Ediyarade. Inaha mmọ ẹdịp enye m̀mê ndidian n̄kpọ ke enye. Ana ẹkwọrọ etop esie an̄wan̄wa, “ke ọkọm ufọk.” (Matthew 10:27) Ediyarade edi n̄wed eke odudu spirit Abasi. Anie ekpededei okpụhọ ikọ kiet ke se Abasi ke idemesie eketịn̄de onyụn̄ ọnọde ebe ke enyeemi idahaemi edide Edidem oro akarade, Jesus Christ? Ke akpanikọ, utọ owo oro okpodot nditaba ke ediyom oro oyomde uwem onyụn̄ ọbọ mme ufen oro anade ẹsịm Akwa Babylon ye ofụri ererimbot.
15. Nso idi akpan n̄kpọ esịnede ke mme ikọ Jesus oro nte ke imọ idi “Anditịn̄ ikọ ẹmi” ye nte ke imọ ‘imọn̄ idi iwiwa’?
15 Idahaemi Jesus adian akpatre ikọ nsịnudọn̄ ete: “Anditịn̄ ikọ ẹmi ete, Ke akpanikọ, mmọn̄ ndedi iwiwa.” (Ediyarade 22:20a) Jesus edi “ata ntiense akpanikọ.” (Ediyarade 3:14) Edieke enye etiede ntiense aban̄a mme n̄kukụt eke Ediyarade, ana mmọ ẹdi akpanikọ. Enye ye Jehovah Abasi ke idemesie ẹsọn̄ọ ẹtịn̄ akpanikọ oro ndien ndien ẹte ke mmimọ ke idi “iwiwa,” m̀mê usọp usọp, mi Jesus etịn̄ ntre ọyọhọ utịm ikotion. (Ediyarade 2:16, NW; 3:11; 22:7, 12, 20, NW) ‘Edidi’ oro edi ndibiere ikpe nnọ akwa akpara oro, “ndidem” ukaraidem ye kpukpru mbon eken oro ẹbiọn̄ọde “Obio Ubọn̄ Ọbọn̄ [Jehovah] nnyịn ye Christ Esie.”—Ediyarade 11:15; 16:14, 16; 17:1, 12-14.
16. Ke ọfiọkde ete ke Jehovah Abasi ye Jesus ke ẹdi iwiwa, nso ubiere ke akpana afo anam?
16 Afo ndifiọk nte ke Jehovah Abasi ye Jesus ke ẹdi iwiwa ekpenyene ndisịn udọn̄ nnọ fi “ndinyene edidu eke usen Jehovah ke ekikere kpukpru ini.” (2 Peter 3:12, NW) N̄kpọ ekededi oro ekpetiede nte ọsọn̄ọ ada ke editịm n̄kpọ ererimbot Satan edi abian̄a. N̄kpọ ekededi oro ekpetiede nte edikụt unen oro enyọn̄ eke mme andikara ererimbot ke idak Satan ẹkpekụtde edi ke ibio ibio ini. Mme n̄kpọ ẹmi ke ẹbebe ẹfep. (Ediyarade 21:1) Ke Jehovah ke ẹkụt n̄kukụre n̄kpọ oro ebịghide, kpa Obio Ubọn̄ esie ke ubọk Jesus Christ, ye obufa ererimbot oro enye ọn̄wọn̄ọde. Kûdedei ufre enyịn uban̄a oro!—1 John 2:15-17.
17. Afo ndifiọk edisana idaha Jehovah okpotụk fi didie?
17 Afo, ndien, akpakam ayak se afo ọfiọkde oto edikpep oro afo ekpepde Ediyarade akara uwem fo ntotụn̄ọ ntotụn̄ọ. Nte afo ndikotop enyịn ke ebiet oro Jehovah odude ke heaven ikanamke afo okụt nyayama ubọn̄ ye edisana idaha Andibot nnyịn? (Ediyarade 4:1–5:14) Nso ifet ke edi ntem ndinam n̄kpọ nnọ utọ Abasi oro! Afo ndifiọk edisana idaha esie akpakam onụk fi ndida item oro Jesus ọkọnọde ẹsọk esop itiaba oro ke ata akpan n̄kpọ nnyụn̄ mfep idem ke mme utọ n̄kpọ nte uyom inyene obụkidem, ukpono ndem, oburobụt ido, editie ndebe ndebe, usiak isio n̄ka nsọn̄ibuot, m̀mê n̄kpọ efen ekededi oro akpanamde utom fo okûdi se Jehovah onyịmede. (Ediyarade 2:1–3:22) Mme ikọ oro apostle Peter ọkọnọde ẹsọk otu John ke edumbet ẹbuana akwa otuowo n̄ko: “Kpa nte Andikot mbufo edide Edisana, mbufo nde ẹkabade ẹsana ke ofụri edu uwem mbufo.”—1 Peter 1:15, 16.
18. Ke nso ke afo ekpenyene ọyọhọ ọyọhọ ebuana nte ekekeme, ndien ntak utom emi edide usọp usọp mfịn?
18 Adianade do, afo akpakam edi se ẹnụkde man enyene obufa ifịk nte ọkwọrọde “isua mfọnido Jehovah, ye usen usiene Abasi nnyịn.” (Isaiah 35:4; 61:2) Edide afo edi eke ekpri otuerọn̄ m̀mê eke akwa otuowo, afo akpakam enyene ọyọhọ ebuana nte ekekeme ke nditan̄a edin̄wan̄a eso iyatesịt Jehovah itiaba oro nduọk, etịn̄de aban̄a mme ubiereikpe Abasi ke idem ererimbot Satan. Ke ukem ini oro, dian uyo fo ke idara idara editan̄a nsinsi eti mbụk aban̄ade Obio Ubọn̄ Jehovah ye Christ esie oro ẹma ẹkewụk. (Ediyarade 11:15; 14:6, 7) Du ke utom emi usọp usọp. Ndien edidiọn̄ọ nte ke nnyịn idu ke usen Ọbọn̄ akpakam onụk ediwak owo oro mînamke kan̄a n̄kpọ Jehovah ndibuana ke utom editan̄a eti mbụk emi. Mmọemi n̄ko ẹkpekam ẹkọri ẹsịm ediyak uwem mmọ nnọ Abasi ye ekikere edina baptism. Ti ete, “ini ẹkemekde ẹnịm emekpere”!—Ediyarade 1:3, NW.
19. Nso idi akpatre ikọ apostle John oro ọsọn̄de ke emana mi, ndien afo anam n̄kpọ didie aban̄a mmọ?
19 Ntem, ye John, nnyịn ibọn̄ akam ufiop ufiop ite: “Amen. Di, Ọbọn̄ Jesus.” Ndien John, apostle oro ọsọn̄de ke emana, adian do ete: “Mfọn Ọbọn̄ Jesus [Christ] akpakam odu ye kpukpru ikọt Abasi.” (Ediyarade 22:20b, 21) Enye n̄ko akpakam odu ye kpukpru mbufo oro ẹkotde n̄wed emi. Afo akpakam enyene mbuọtidem ete ke ubọn̄ ubọn̄ ata-utịt Ediyarade emekpere, man afo n̄ko ekeme ndibuana ye nnyịn ke ufiop ufiop “Amen”!
[Mme Mbụme Ukpepn̄kpọ]
[Ndise ke page 314]
“Mme ebua ẹdu ke edem obio . . . ”
[Ndise ke page 315]
“Ọfọfọn ọnọ mmọ eke . . . [ẹbede] ke inuaotop ẹdụk ke esịt obio”
