Ibuot 5

John Okụt Jesus Oro Ẹnọde Ubọn̄

N̄kukụt 1—Ediyarade 1:10–3:22

Ibuotikọ: Jesus odụn̄ọde Israel eke spirit ke isọn̄ onyụn̄ ọnọ ufiop ufiop nsịnudọn̄

Ini edisu: N̄kpọntịbe emi adade itie ke usen Ọbọn̄ mi ọtọn̄ọ ke 1914 tutu akpatre owo ke otu mme anam-akpanikọ mbon oro ẹyetde aran akpade ẹnyụn̄ ẹnamde enye eset

1. Didie ke ẹnọ akpa n̄kukụt, ndien didie ke John okowụt ini oro enye osude akpan akpan?

 AKPA n̄kukụt ke n̄wed Ediyarade ọtọn̄ọ ke ibuot 1, ufan̄ikọ 10. Ukem nte mmọ eken ke Ediyarade, ẹtọn̄ọ n̄kukụt emi ye ikọ oro John okopde m̀mê okụtde n̄kpọ oro edide ata n̄wọrọnda. (Ediyarade 1:10, 12; 4:1; 6:1) Ẹwụt akpa n̄kukụt emi ẹtiene ndutịm eke akpa isua ikie emi ẹnọde mme etop ẹsọk esop itiaba oro ẹkedude ke iduọk ini kiet ye John. Edi John owụt ini emi n̄kukụt emi enen̄erede osu ke ini enye ọdọhọde ete: “N̄kodu ke spirit ke usen Ọbọn̄.” (Ediyarade 1:10a) “Usen” emi edi ini ewe? Nte ikpọ n̄kpọntịbe eke oyobio oyobio eyo emi ẹnyene ebuana ekededi ye enye? Ke edide ntre, akpana nnyịn ikpan̄ utọn̄ inọ prọfesi emi, nte enye otụkde uwem nnyịn—idem ubọhọ nnyịn.—1 Thessalonica 5:20, 21.

Ke Usen Ọbọn̄

2. Usen Ọbọn̄ ọtọn̄ọ ini ewe, enye onyụn̄ etre ini ewe?

² Emi owụt ete ke edisu eke Ediyarade ada itie ke ewe iduọk ini? Ọfọn, usen Ọbọn̄ edi nso? Apostle Paul etịn̄ aban̄a emi nte ini ikpe ye ini oro mme un̄wọn̄ọ Abasi ẹsude. (1 Corinth 1:8; 2 Corinth 1:14; Philippi 1:6, 10; 2:16) Ye emi “usen” oro edide edisịm, mme ubọn̄ ubọn̄ uduak Jehovah ẹsan̄a uforo uforo ye edikan ẹsịm ata-utịt mmọ. “Usen” oro ọtọn̄ọ ye ediyari Jesus anyanya nte Edidem eke heaven. Idem ke Jesus ama ekebiere ikpe ọnọ ererimbot Satan, usen Ọbọn̄ osụk akakaiso, ye edifiak n̄wụk Paradise nnyụn̄ nda ubonowo nsịm mfọnmma, tutu ini oro Jesus ke akpatre “ediyakde itieubọn̄ Esie ọnọ Abasi, kpa Ete Esie.”—1 Corinth 15:24-26; Ediyarade 6:1, 2.

3. (a) Didie ke prọfesi Daniel oro aban̄ade “ini itiaba” an̄wam nnyịn ndikụt ini emi usen Ọbọn̄ ọtọn̄ọde? (b) Mme n̄kpọntịbe ewe ke isọn̄ isọn̄ọ isua 1914 nte ini emi usen Ọbọn̄ ọkọtọn̄ọde?

³ Edisu oro mme prọfesi eken ke Bible ẹsude an̄wam nnyịn ndikụt ini emi usen Ọbọn̄ ọtọn̄ọde. Ke uwụtn̄kpọ, Daniel etịn̄ aban̄a edisịbe oro ẹsịbede ukara ẹduọk ke udịm ubon Edidem David; ke “isua itiaba” [“ini itiaba,” NW] ẹbede, ẹyefiọk “ẹte ke Ata Edikon̄ akara ke ubọn̄ ererimbot, onyụn̄ ada enye ọnọ owo ekededi eke enye amade.” (Daniel 4:23, 24, 31, 32) Prọfesi emi ndisu ke akamba udomo ọkọtọn̄ọ ye edisobo oro ẹkesobode obio ubọn̄ Judah, emi uyarade Bible owụtde ete ke akada itie ọyọhọ ọyọhọ ke October 607 M.E.N. Ediyarade 12:6, 14 owụt ete ke ini 3 1/2 ẹwọrọ usen 1,260; ntre, ana ini itiaba (nọmba oro utịm ikaba) ẹdi usen 2,520. Ke ndibat “usen ke ibuot isua,” nnyịn imenyene isua 2,520 nte uniọn̄ “ini itiaba” oro. (Ezekiel 4:6) Ntre, Christ Jesus ọkọtọn̄ọ ukara esie eke heaven ke utịt utịt isua 1914. Akpa ekọn̄  ererimbot oro akasiahade ke isua oro okonịm idiọn̄ọ “ntọn̄ọ ubiak-uman” oro akade iso ndinọmọ ubonowo. Toto ke 1914, mme n̄wọrọnda n̄kpọntịbe ke ererimbot oro ọyọhọde ye iyịp mi ẹsọn̄ọ isua oro didie ntem nte edide ntọn̄ọ “usen” edidu Jesus!—Matthew 24:3-14. a

4. (a) Nso ke mme ikọ eke Ediyarade ẹwụt kaban̄a ini emi akpa n̄kukụt osude? (b) Edisu eke akpa n̄kukụt oro etre ini ewe?

⁴ Ntre, akpa n̄kukụt emi ye item oro ọdọn̄ọde ke enye ẹnyene usen Ọbọn̄, ọtọn̄ọde ke 1914 akaiso. Ubatini emi enyene ibetedem oto akpanikọ oro nte, ke ukperedem ke Ediyarade, mbụk emi etịn̄ aban̄a mme ubiereikpe Abasi oro ẹdide akpanikọ ye edinen—kpa mme n̄kpọntịbe oro Ọbọn̄ Jesus enyenede ata n̄wọrọnda udeme. (Ediyarade 11:18; 16:15; 17:1; 19:2, 11) Edieke akpa n̄kukụt emi ọkọtọn̄ọde ndisu ke 1914, enye etre ini ewe? Nte mme etop ẹmi ke idemmọ ẹwụtde, esop emi ẹtịn̄de ikọ emi ẹnọ edi esop Abasi eke mbon ẹmi ẹyetde aran ke isọn̄. Edisu eke akpa n̄kukụt emi etre, ndien, ke ini akpatre anam-akpanikọ andibuana ke otu esop oro ẹyetde aran akpade ẹnyụn̄ ẹnamde enye eset ekenyene uwem eke heaven. Nte ededi, Usen Ọbọn̄, emi adade mme edidiọn̄ ọsọk mme erọn̄ en̄wen eke isọn̄, akaiso tutu osịm utịt Ukara Tọsịn Isua eke Jesus Christ.—John 10:16; Ediyarade 20:4, 5.

5. (a) Uyo ọdọhọ John anam nso? (b) Ntak emi itie oro “mme ufọk Abasi itiaba oro” ẹkedude ọkọfọnde se ẹnọde ikpan̄wed ẹsọk mmọ?

⁵ Ke akpa n̄kukụt emi, mbemiso John okụtde n̄kpọ ekededi, enye okop n̄kpọ: “Ndien n̄kop ọkpọsọn̄ uyo ke edem mi, emi ebietde uyo ukotowo, nte ọdọhọde ete, Wet se afo okụtde sịn ke n̄wed, nyụn̄ nọ ẹsọk mme ufọk Abasi itiaba oro; nọ ẹsọk Ephesus, ye Smyrna, ye Pergamum, ye Thyatira, ye Sardis, ye Philadelphia, ye Laodicea.” (Ediyarade 1:10b, 11) Ke ọwọrọde odudu odudu ye ewụhọ nte uyo ukotowo, uyo ọdọhọ John ete ewet n̄wed ọnọ ẹsọk “mme ufọk Abasi itiaba oro.” John enyene ndibọ udịm udịm etop nnyụn̄ n̄wet mme n̄kpọ ẹmi enye edikụtde onyụn̄ okopde. Tịmfiọk ete ke mme esop oro ẹsiakde mi ẹma ẹnen̄ede ẹdu ke eyo John. Kpukpru mmọ ẹkedu ke Asia Minor, ke ube-inyan̄ oro ke ẹtode Patmos ẹdụk. Ekedi mmemmem isan̄ ndito ke esop kiet nsịm eken ke ntak nti usụn̄ mbon Rome oro ẹkedude ke n̄kan̄ oro. Isụn̄utom ikenyeneke mfịna ndida ikpan̄wed emi nto esop kiet nsịm eken. Esop itiaba ẹmi ẹkpebiet ikpehe kiet ke circuit eke Mme Ntiense Jehovah mfịn.

6. (a) “Se idude kemi” ọwọrọ nso? (b) Ntak emi nnyịn ikemede ndinịm nte ke nte n̄kpọ ẹtiede ke esop mme Christian oro ẹyetde aran mfịn ana ebiet eke mme esop oro ke eyo John?

⁶ Ekese prọfesi ke Ediyarade ẹkenyene ndisu ke eyo John ama ekebe. Mmọ ẹtịn̄ ẹban̄a “se idisude ke ini iso.” Edi item ẹkenọde ẹsọk esop itiaba oro anam n̄kpọ aban̄a “se idude kemi,” kpa mme n̄kpọntịbe oro ẹkenen̄erede ẹdu ke esop itiaba ẹmi ke ini oro. Mme etop oro ẹkedi ọsọn̄urua n̄kpọ un̄wam ẹnọ mme anam-akpanikọ mbiowo oro ẹkemekde ke esop itiaba oro, ọkọrọ ye kpukpru esop eken eke mme Christian oro ẹyetde aran ke ini oro. b Sia n̄kukụt emi osude akamba akamba ke usen Ọbọn̄, se Jesus etịn̄de ọnọ ntọt nte ke ẹyekụt mme mbiet n̄kpọntịbe oro ke esop mme Christian oro ẹyetde aran ke eyo nnyịn.—Ediyarade 1:10, 19.

7. Anie ke John okụt ke akpa n̄kukụt emi, ndien ntak edide akpan n̄kpọ ntre ye n̄kpọ nduaidem ọnọ nnyịn mfịn?

⁷ Ke akpa n̄kukụt emi, John okụt Ọbọn̄ Jesus Christ nte ayamade ke ubọn̄ Esie eke heaven. Nso n̄kpọ ikpotịm idot ndidu ntem ke n̄wed mme prọfesi oro ẹnyenede ebuana ye akwa usen Ọbọn̄ emi heaven osiode ọdọn̄ utom? Ndien nso n̄kpọ ikpotịm idi akpan n̄kpọ inọ nnyịn, ẹmi idude idahaemi ke iduọk ini oro, inyụn̄ itịmde inọ n̄kpan̄utọn̄ ke kpukpru ewụhọ esie? Adianade do, edi n̄kpọ nduaidem didie ntem ọnọ mme andin̄wam itie edikara Jehovah ke ndidi se ẹsọn̄ọde ẹnọ mmọ nte ke Mfri Messiah oro, ke ama ọkọyọ  ofụri idomo ye ukọbọ oro Satan akadade etiene enye, ama okonyụn̄ osobo ubiak ubiak n̄kpa ke ini ẹkenuakde Enye “nditịn̄-ikpat” ke se ikperede ndisịm isua 2,000 oro ẹkebede, odu uwem idahaemi ke heaven, ẹnọde enye odudu ndida ubọn̄ ubọn̄ uduak Abasi nsịm idara idara utịt!—Genesis 3:15.

8. Nso utom ke Jesus eben̄e idem idahaemi ọnọ?

⁸ Uyarade odu nte ke Jesus eben̄e idem idahaemi nditọn̄ọ utom nte Edidem oro ẹdoride ke ebekpo. Ẹma ẹmek enye nte Etubom Andisobo eke Jehovah ke ndibiere akpatre ikpe Jehovah nnọ akani idiọk editịm n̄kpọ emi ye ubi ubi abasi esie, kpa Satan. Enye n̄ko odu ke idaha edikpe ikpe mbon oro ẹdude ke esop esie oro ẹyetde aran ye akwa otuowo ẹdide nsan̄a mmọ, ndinyụn̄ mbiere ikpe nnọ ererimbot.—Ediyarade 7:4, 9; Utom 17:31.

9. (a) Didie ke John etịn̄ aban̄a Jesus Christ emi ẹnọde ubọn̄ nte odude ke ufọt mme udiọk-utuenikan̄ o-gold? (b) Ndutịm oro ebietde temple ye ọfọn̄ oro Jesus esịnede ẹwụt nso? (c) Mbọbọ o-gold esie ada aban̄a nso?

⁹ John ọwọn̄ọde iso ebịne ọkpọsọn̄ uyo oro, ndien se enye okụtde edi emi: “Ndien n̄wọn̄ọde idem ndise uyo emi etịn̄de ye ami. Ndien ke ini n̄wọn̄ọrede n̄kụt udiọk-utuenikan̄ o-gold itiaba.” (Ediyarade 1:12) Ke ukperedem, John ọdiọn̄ọ se udiọk-utuenikan̄ itiaba ẹmi ẹdade ẹban̄a. Edi edi owo oro odude ke ufọt udiọk-utuenikan̄ ẹmi ke enyịn esie owụhọ. Enye okụt “ke ufọt udiọk-utuenikan̄ oro Kiet, emi ebietde eyen owo, emi esịnede ọfọn̄idem emi ọduọde osịm ukot, onyụn̄ ọbọbọde mbọbọ o-gold ke ikpanesịt.” (Ediyarade 1:13) Jesus, kpa “eyen owo,” owụt idemesie mi nte ubọn̄ ubọn̄, nyayama owo, ke iso ntiense oro, John, emi ndịk omụmde. Enye ọbiọn̄ọde ke nsem nsem ubọn̄ ke ufọt udiọk-utuenikan̄ o-gold ẹmi ikan̄ asakde. Ndutịm ebietde eke temple mi anam John ọfiọk akpanikọ oro nte ke Jesus odu ke idaha utom nte akamba Akwa Oku Jehovah, ye odudu ubiereikpe. (Mme Hebrew 4:14; 7:21-25) Nduọ nduọ ọfọn̄idem esie asan̄a ekekem ye itieutom esie nte oku. Ukem nte akwa oku mme Jew eset, enye ọbọbọ mbọbọ—mbọbọ o-gold ke ikpanesịt esie emi ofụkde enye esịt. Emi owụt ete ke enye ke ofụri esịt eyesu ewụhọ Abasi oro enye ọkọbọde oto Jehovah Abasi.—Exodus 28:8, 30; Mme Hebrew 8:1, 2.

10. (a) Idet Jesus oro afiade nte snow ye enyịn esie ẹmi ẹsakde nte edemeikan̄ ẹwụt nso? (b) Ukot Jesus ndisem nte okpoho ada aban̄a nso?

¹⁰ Mbụk John akaiso: “Ibuot Esie ye idet Esie ẹsana nte edisana idet erọn̄, ẹbiet snow; enyịn Esie ẹbiet edemeikan̄.” (Ediyarade 1:14) Idet esie oro afiade nte snow owụt ọniọn̄ ke ntak anyan isua uwem. (Men Mme N̄ke 16:31 domo.) Ndien enyịn esie oro ẹbietde edemeikan̄ ẹwụt ẹte ke enye ọsọp idem, odu ke edidemede, nte enye anamde ndụn̄ọde, odomode udomo, m̀mê owụtde iyatesịt. Idem ukot Jesus ẹdodụri ntịn̄enyịn John: “Ukot Esie ẹnyụn̄ ẹbiet nsak nsak okpoho eke ẹtemde asasana ke ikan̄; uyo Esie onyụn̄ ebiet uyom uwak mmọn̄.” (Ediyarade 1:15) Ke n̄kukụt emi, ukot Jesus ẹbiet okpoho, ẹyama ẹnyụn̄ ẹsem—otịm odot ntre ye owo emi asan̄ade ifịk ifịk onyụn̄ enyenede eti idaha ke iso Jehovah Abasi. Adianade do, ke adan̄aemi ke Bible ẹwakde ndida gold n̄wụt mme n̄kpọ Abasi, ntre ndusụk ini ẹsida okpoho ẹwụt mme n̄kpọ eke owo. c Ntre, nsem nsem ukot Jesus ẹmi ẹbietde ediye okpoho emeti nnyịn nte ukot esie ‘ekeyede’ ke ini enye akasan̄ade ke isọn̄ ọkwọrọ eti mbụk.—Isaiah 52:7; Rome 10:15.

11. (a) Nso n̄kpọ ke ubọn̄ ubọn̄ ukot Jesus eti nnyịn? (b) Ndidọhọ ke uyo Jesus “ebiet uyom uwak mmọn̄” owụt nso?

¹¹ Ke akpanikọ, nte mfọnmma owo, Jesus ama enyene ubọn̄ oro ekedide in̄wan̄în̄wan̄ n̄kpọ ọnọ mme angel ye mme owo. (John 1:14) Ubọn̄ ubọn̄ ukot esie n̄ko ẹti nnyịn nte ke enye ke edịghi edisana isọn̄ ke esop Jehovah, emi enye edide Akwa Oku. (Men Exodus 3:5 domo.) Akande oro, uyo esie ọwọrọ ọkpọsọn̄ ọkpọsọn̄ nte uyom akwa mmọn̄ eke odororede ke enyọn̄ ọduọn̄ọ. Emi otụk owo ke esịt, enyene uten̄e, nte odotde ye enyeemi ẹkotde Ikọ Abasi, kpa enyeemi edide ‘ndikpe ikpe nnọ ererimbot ke edinen ido.’—Utom 17:31; John 1:1.

12. “Edisọp ofụt iso-iba” oro ọwọrọ nso?

 ¹² “Ndien Enye akama ntantaọfiọn̄ itiaba ke ubọk nnasia Esie; edisọp ofụt iso-iba onyụn̄ ọwọrọ Enye ke inua; iso Esie onyụn̄ ebiet nte utịn asiahade ke odudu esie. Ndien ke adan̄aemi n̄kụtde Enye, nduọ Enye ke ukot nte akpan̄kpa.” (Ediyarade 1:16, 17a) Ekpri ini ke ukperedem, Jesus ke idemesie anam se ntantaọfiọn̄ itiaba oro ẹwọrọde an̄wan̄a. Edi tịmfiọk se iwọrọde enye ke inua: “edisọp ofụt iso-iba.” Emi odot didie ntem! Koro Jesus edide enyeemi ẹmekde ndibiere akpatre ikpe Jehovah nnọ mme asua Esie. Ikọ ubiereikpe oro ẹwọn̄ọde enye ke inua ẹsụn̄ọ ke edisobo kpukpru ndiọi owo.—Ediyarade 19:13, 15.

13. (a) Nyayama iso Jesus oro esemde-sem mi eti nnyịn aban̄a nso? (b) Nso idi ofụri ekikere oro nnyịn inyenede ito usụn̄ nte John etịn̄de n̄kpọ aban̄a Jesus?

¹³ Nyayama iso Jesus oro esemde-sem mi eti nnyịn nte ke iso Moses ama esem ke enye ama ekenyene nneme ye Jehovah ke Obot Sinai. (Exodus 34:29, 30) Ti n̄ko ete ke ini ẹkekpụhọrede mbiet Jesus ke iso mme apostle esie ita ke se ikperede ndisịm isua 2,000 oro ẹkebede, “iso Esie [ama] asiaha nte utịn, edisịnen̄kpọ Esie onyụn̄ akabade afia nte un̄wana.” (Matthew 17:2) Idahaemi, ke se ẹmende ẹwụt ke n̄kukụt oro aban̄ade Jesus ke usen Ọbọn̄, iso esie ke ukem usụn̄ oro owụt ubọn̄ oro enyenede enyeemi odude ke iso Jehovah. (2 Corinth 3:18) Ke akpanikọ, ofụri ekikere oro n̄kukụt John ọnọde edi eke ata nyayama ubọn̄. Ọtọn̄ọde ke idet oro afiade nte snow, enyịn oro asakde nte edemeikan̄, ye nsem nsem iso tutu osịm uyai uyai ukot oro, emi edi utịbe utịbe n̄kukụt aban̄ade Enyeemi odụn̄de idahaemi “ke un̄wana eke owo mîkemeke ndisan̄a n̄kpere.” (1 Timothy 6:16) Ana ata in̄wan̄în̄wan̄ nte ke n̄kukụt emi edi ata idem-n̄kpọ!  Didie ke John emi ndịk akakande ubọk mi akanam n̄kpọ? Apostle emi asian nnyịn ete: “Ndien ke adan̄aemi n̄kụtde Enye, nduọ Enye ke ukot nte akpan̄kpa.”—Ediyarade 1:17.

14. Okpotụk nnyịn ke idem didie ke ini ikotde n̄kukụt John oro aban̄ade Jesus emi ẹnọde ubọn̄?

¹⁴ Mfịn, inem inem, ọyọhọ mbụk oro anamde n̄kukụt John an̄wan̄a mi amanam ikọt Abasi ẹyọhọ ye ntotụn̄ọ esịtekọm. Nnyịn ima ibebe se iwakde ikan isua 90 ke usen Ọbọn̄, emi n̄kukụt akade iso ndisu inem inem. Ukara Obio Ubọn̄ Jesus edi ata idem-n̄kpọ oro odude-du ọnọ nnyịn idahaemi, idịghe idotenyịn ini iso. Ntem, odot nnyịn mme anam-akpanikọ oro idude ke idak Obio Ubọn̄ emi ndikaiso nsịn enyịn ye ndyọ nse se John etịn̄de ke akpa n̄kukụt emi, ndinyụn̄ n̄kpan̄ utọn̄ ye nsụkibuot nnọ mme ikọ Jesus Christ oro ẹnọde ubọn̄ mi.

[Mme Ikọ idakisọn̄]

[Mme Mbụme Ukpepn̄kpọ]

 [Mme ndise ke page 23]

Mme utak-usụhọ n̄kpọ eset ke obio ẹmi esop itiaba oro ẹkedude ẹmesọn̄ọ n̄wetnnịm n̄kpọ Bible. Edi mi ke mme Christian akpa isua ikie ẹkebọ mme etop nsịnudọn̄ Jesus oro esịnde udọn̄ mfịn ọnọ esop ọyọhọ isua ikie-20 eke ofụri ererimbot

PERGAMUM

SMYRNA

THYATIRA

SARDIS

EPHESUS

PHILADELPHIA

LAODICEA