N̄kpọ eke Ẹnyenede Ndisu ke Ekpri Ibio Ini
Ibuot 3
N̄kpọ eke Ẹnyenede Ndisu ke Ekpri Ibio Ini
1. Didie ke afo ekeme ndibọhọ ubiereikpe nsobo oro Abasi ọnọde ererimbot emi?
AKPANA afo ekere ntotụn̄ọ ntotụn̄ọ aban̄a mme n̄kpọntịbe ererimbot mfịn. Ntak edide ntre-e? Koro ererimbot emi ikemeke-keme ndibọhọ ubiomikpe nsobo Abasi. Edi afo emekeme ndibọhọ. Afo emekeme ndinam emi ke afo ‘mûdịghe ubak ererimbot’ oro enyenede ubiomikpe nsobo. Emi iwọrọke ndidu uwem efam eke mme oku ederi. Enye ọwọrọ nte ke adan̄aemi odude eti uwem emi enyenede uduak, afo eyebahade idemfo osio ke mbiara ukaraidem, ke idiọkitọn̄ unyamurua, ye ke ido ukpono oro mînọhọ Abasi ukpono, ọkọrọ ye ke afai afai, oburobụt ido uwem. Ke ukem ini oro, ana afo etiene mme n̄kokon̄ idaha ido uwem oro Abasi onịmde onyụn̄ oyom ndinam uduak esie. (John 17:14-16; Zephaniah 2:2, 3; Ediyarade 21:8) N̄wed Ediyarade eke Bible owụt nte edide akpan n̄kpọ ọnọ fi ndinam mme n̄kpọ ẹmi, anamde mme ukpụhọde nte odotde ke usụn̄uwem fo.
2. Didie ke apostle John ọtọn̄ọ ubọn̄ ubọn̄ prọfesi eke Ediyarade, ndien anie ke Abasi ọkọnọ ndodobi etop emi?
2 Apostle John ọtọn̄ọ ubọn̄ ubọn̄ prọfesi emi ye ikọ ẹmi: “Ikọ ediyarade Jesus Christ, emi Abasi ọkọnọde Enye, ete owụt ikọt Esie, kpa n̄kpọ eke ẹnyenede ndisu ke ekpri ibio ini.” (Ediyarade 1:1a) Ntre ekedi Jesus Christ oro ẹkenamde eset ọkọbọ ndodobi etop emi oto Abasi. Utu ke ndidi ubak nsunsu Abasi-Ita-ke-Kiet, ẹwụt Jesus mi nte odude ke idak Ete esie. Ke ukem usụn̄ oro, ‘ifịn’ ẹmi ẹnamde esop Christian ẹdu ke idak Jesus Christ, tutu eyedi se mmọ ‘ẹtienede enye ẹka ọtọ nte Enye akaka.’ (Ediyarade 14:4; Ephesus 5:24) Edi mmanie mfịn ẹnen̄ede ẹdi ‘ifịn’ Abasi, ndien didie ke Ediyarade enyene ufọn ọnọ mmọ?
3. (a) Mmanie ẹdi ‘ifịn’ oro ẹdude ke idak Jesus Christ? (b) Nso utom ke ‘ifịn’ ẹmi ẹnam ke ndausụn̄ angel?
3 Apostle John, emi ekewetde Ediyarade, etịn̄ aban̄a idemesie nte idide utọ ofụn oro. Enye ekedi akpatre apostle oro okosụk odude uwem ye kiet ke otu ndimek ‘ifụn’ oro ẹyetde aran ke spirit ẹmi ẹnyenede uwem unana n̄kpa ke heaven. Mfịn, mbon oro ẹsụhọde ke otu mmọemi ke isọn̄ ẹdi tọsịn ifan̄ kpọt. Abasi enyene mme asan̄autom efen n̄ko, ẹmi ẹdide akwa otuowo, iren, iban, ye nditọwọn̄, ẹmi ibat mmọ idahaemi osịmde ediwak miliọn. Ke idak ndausụn̄ mme angel, mmọemi ke ẹbuana ye ‘ifụn’ oro ẹyetde aran mi ke ndikwọrọ nsinsi eti mbụk nnọ ofụri ubonowo. Oh, didie ke kpukpru ‘ifịn’ ẹmi ẹnam utom ọkpọsọn̄ ntem man ẹkpen̄wam mbon nsụkidem ke isọn̄ ndikụt edinyan̄a! (Matthew 24:14; Ediyarade 7:9, 14; 14:6) Ediyarade owụt se anade afo anam man ọbọ ufọn oto inem inem eti mbụk emi.
4. (a) Sia ebede isua 1,900 tọn̄ọ nte John ekewet Ediyarade, enye akpasan̄a didie etịn̄ aban̄a “n̄kpọ eke ẹnyenede ndisu ke ekpri ibio ini”? (b) Nso ke uyarade owụt idahaemi aban̄a mme n̄kpọ oro ẹkebemde iso ẹtịn̄ ẹnịm?
4 Nte ededi, John akpasan̄a didie ọdọhọ ete ke ẹyewụt ‘ifịn’ ẹmi “n̄kpọ eke ẹnyenede ndisu ke ekpri ibio ini”? Nte owo iketịn̄ke ikọ oro ke se ibede isua 1,900 oro ẹkebede? Ke ekikere Jehovah, emi tọsịn isua etiede enye ke enyịn “nte n̄kpọn̄,” isua 1,900 edi ibio ibio ini ke ẹmende ẹdomo ye anana-ibat ini oro enye akabiatde ke ndibot nnyụn̄ ntịm isọn̄ emi nnọ owo ndidụn̄. (Psalm 90:4) Apostle Paul ama ewet aban̄a “mbuọtidem ye idotenyịn” esiemmọ, koro nte eyịghe mîdụhe, eketie nte ini ama ekem enye ndibọ utịp esie. (Philippi 1:20) Mfịn, nte ededi, n̄kpọ ntiense ọyọyọhọ nte ke kpukpru n̄kpọ ẹmi ẹkebemde iso ẹtịn̄ ẹnịm ẹnyene ndida itie ke edikem ini. Akananam ke mbụk, ubọhọ ubonowo idụhe ke itiendịk nte odude idahaemi. Abasi ikpọn̄ enyene usọbọ!—Isaiah 45:21.
Usụn̄ Unọ Ntọt
5. Ẹkesan̄a didie ẹnọ apostle John Ediyarade ndien ekem ẹnọ mme esop?
5 Ediyarade 1:1b, 2 akaiso ete: “Ndien Enye [Jesus] ọkọdọn̄ angel Esie okowụt n̄kpọ emi [Ediyarade] [“ke idiọn̄ọ,” NW] ọnọ owo Esie John; emi eketiede ntiense aban̄a ikọ Abasi, ye ikọ ntiense eke Jesus Christ ọnọde, kpa kpukpru n̄kpọ eke enye okokụtde.” Ntem, John ọkọbọ n̄wetnnịm n̄kpọ eke odudu spirit ebe ke angel emi edide isụn̄utom. John ama ewet enye ke ikpan̄wed, ọnọ enye ẹsọk mme esop ẹkedude ke eyo esie. Ke edide n̄kpọ inemesịt ọnọ nnyịn, Abasi ama otịm enye onịm man edi n̄kpọ nsịnudọn̄ ọnọ esop ikọt esie oro ẹkperede ndisịm 100,000 oro ẹdianade kiet ke isọn̄ mfịn.
6. Didie ke Jesus akanam ẹdiọn̄ọ usụn̄ oro enye edidade ọnọ ‘ifụn’ esie udia eke spirit mfịn?
6 Abasi ama enyene usụn̄ oro akadade ọnọ ntọt Ediyarade ke eyo John, ndien John ekedi ubak eke n̄kan̄ isọn̄ ke usụn̄ unọ ntọt oro. Kpasụk ntre, Abasi enyene usụn̄ oro adade ọnọ ‘ifụn’ esie ọnọ-nsọn̄idem udia eke spirit mfịn. Ke akwa prọfesi esie oro aban̄ade akpatre ini eyo emi, Jesus ama anam ẹdiọn̄ọ ubak eke n̄kan̄ isọn̄ ke usụn̄ unọ ntọt emi nte “asan̄autom emi anamde akpanikọ, onyụn̄ enyenede ọniọn̄, emi ete[ufọk] esie okonịmde ete, akara mbonufọk imọ, onyụn̄ ọnọ mmọ udia ke edikem ini.” (Matthew 24:3, 45-47) Enye ada otu John emi ke ndiyarade se prọfesi oro ọwọrọde.
7. (a) Didie ke mme idiọn̄ọ oro ẹkụtde ke Ediyarade ẹkpetụk nnyịn? (b) Ebịghi didie tọn̄ọ nte ndusụk owo ke otu John ẹkebuana ke ndinam mme n̄kukụt eke Ediyarade ẹsu?
7 Apostle John ewet ete ke Jesus akada ‘mme idiọn̄ọ’ m̀mê mme ndamban̄a n̄kpọ ọnọ Ediyarade. Mmọemi ẹdi in̄wan̄în̄wan̄ ye n̄kpọ nduaidem ndidụn̄ọde. Mmọ ẹwụt utom odudu, ndien ke ntre akpana mmọ ẹdemede nnyịn udọn̄ ndisịn ifịk ifịk ukeme nnam mbon en̄wen ẹfiọk prọfesi emi ye se enye ọwọrọde. Ediyarade owụt nnyịn ediwak n̄kukụt ẹmi ẹkamade nduaidem, emi John akabuanade mfọn mfọn ke mmọ kiet kiet mîdịghe okodude nte andida-da nse. Mmọemi ẹdide eke otu John, ẹmi ndusụk mmọ ẹma ẹkebuana ke edinam mme n̄kukụt ẹmi ẹsu ke ata ediwak isua, ẹkop inemesịt nte spirit Abasi ayararede se n̄kpọ ẹmi ẹwọrọde man mmọ ẹkpekeme ndinam n̄kpọ ẹmi an̄wan̄a mbon eken.
8. (a) Nso idi ata isio isio n̄kpọ iban̄a mme n̄kukụt eke Ediyarade ẹmi kiet kiet? (b) Didie ke prọfesi Daniel an̄wam nnyịn ndifiọk se mme unam eke Ediyarade ẹdide?
8 Owo iwụtke mme n̄kukụt ẹmi ke Ediyarade itiene ndutịm ubatini. Kiet kiet enyene iduọk ini esiemmọ ndisu. Ediwak n̄kukụt ẹmi ẹfiak ẹtịn̄ mme ikọ prọfesi eset oro ẹnọde ekikere ẹban̄a se mmọ ẹwọrọde. Ke uwụtn̄kpọ, prọfesi Daniel ama etịn̄ aban̄a enyene-ndịk unam inan̄, anamde an̄wan̄a ete ke mmọemi ẹda ẹban̄a mme odudu ukara ke isọn̄. Ntem, ẹn̄wam nnyịn ndifiọk nte ke mme unam eke Ediyarade ẹda ẹban̄a mme ukara ukaraidem, esịnede mmọ oro ẹdude idahaemi.—Daniel 7:1-8, 17; Ediyarade 13:2, 11-13; 17:3.
9. (a) Ukem nte John, nso edu ke otu John ẹwụt? (b) Didie ke John owụt nnyịn usụn̄ ndikop inemesịt?
9 John ama anam akpanikọ ke nditie ntiense mban̄a etop oro Abasi ọkọnọde enye ebe ke Jesus Christ. Enye ama obụk ọyọhọ ọyọhọ aban̄a “kpukpru n̄kpọ eke enye okokụtde.” Otu John ke esịt akpanikọ ẹmeyom un̄wam otode Abasi ye Jesus Christ man prọfesi emi akpan̄wan̄a mmọ ọyọhọ ọyọhọ ẹkpenyụn̄ ẹnam ikọt Abasi ẹfiọk nti akpan n̄kpọ esie. Ke ufọn esop oro ẹyetde aran (ye n̄ko ke ufọn akwa otuowo eke ofụri ererimbot oro Abasi edinịmde uwem ebe akwa ukụt), John ewet ete: “Ọfọfọn ọnọ andikot n̄wed, ye mmọemi ẹkopde ikọ prọfesi emi, ẹnyụn̄ ẹnịmde mme n̄kpọ eke ẹwetde ke esịt: koro ini [“ini ẹkemekde ẹnịm,” NW] ke ekpere.”—Ediyarade 1:3.
10. Nso ke ana nnyịn inam ke se iban̄ade Ediyarade man inyene inemesịt?
10 Afo eyebọ ufọn akamba akamba ke ndikot Ediyarade ndien idem akande oro ke ndinịm mme n̄kpọ oro ẹwetde ke enye. John ama anam an̄wan̄a ke n̄wed esie kiet ete: “Ndima Abasi edi emi, ete, nnyịn inịm mbet Esie; ndien mbet Esie ibiakke owo idem. Koro kpukpru owo eke Abasi okobonde ẹkan ererimbot; ndien emi edi edikan eke akakande ererimbot, kpa mbuọtidem nnyịn.” (1 John 5:3, 4) Afo emekeme ndikop inemesịt ata etieti ke ndikọri utọ mbuọtidem oro!
11. (a) Ntak edide usọp usọp n̄kpọ ndinịm mme ikọ prọfesi ẹmi-e? (b) Nso ini isan̄a ikpere idahaemi ata idiọk idiọk?
11 Nnyịn ndinịm mme ikọ prọfesi emi edi usọp usọp n̄kpọ, “koro ini [ẹkemekde ẹnịm] ke ekpere.” Ini ẹkemekde ẹnịm ẹnọ nso? Ini edisu mme prọfesi eke Ediyarade, esịnede mme ubiereikpe Abasi. Ini ekpere Abasi ye Jesus Christ ndibiere akpatre ikpe nsobo nnọ ndutịm ererimbot Satan. Ke ini Jesus okodude mi ke isọn̄, enye ama ọdọhọ ete ke Ete imọ ikpọn̄îkpọn̄ ọfiọk “usen oro m̀mê hour oro.” Ke adade okụt ekese afanikọn̄ oro ẹyọhọde isọn̄ ke eyo nnyịn, Jesus ama ọdọhọ n̄ko ete: “Emana emi idibehe ifep tutu kpukpru n̄kpọ ẹmi ẹwọrọ ẹsu.” Ntre anaedi ini oro ẹkemekde ẹnịm ndinọ ubiereikpe Abasi emekpere ata idiọk idiọk. (Mark 13:8, 30-32) Nte Habakkuk 2:3 ọdọhọde ete: “Koro n̄kukụt anade kan̄a ọnọ ini emi ẹnịmde; ndien enye eyesioro uyo ke utịt, idinyụn̄ isụhọ nsu: enye ama ebịghi, bet enye; koro enye mîditreke ndidi, mîdinyụn̄ ibehe ini.” Nnyịn ndibọhọ akwa ukụt oro ọkọn̄ọ ke nnyịn ndinịm Ikọ prọfesi Abasi.—Matthew 24:20-22.
[Mme Mbụme Ukpepn̄kpọ]
[Ekebe ke page 15]
Man n̄wed Ediyarade an̄wan̄a nnyịn, oyom nnyịn
● Ibọ un̄wam otode spirit Jehovah
● Ifiọk ini emi usen Ọbọn̄ ọkọtọn̄ọde
● Idiọn̄ọ asan̄autom emi anamde akpanikọ, onyụn̄ enyenede ọniọn̄ mfịn
