Ibuot 29

Ndikwọ Obufa Ikwọ Edikan

 N̄kukụt 9—Ediyarade 14:1-20

Ibuotikọ: Owo 144,000 ẹdu ye Eyenerọn̄ ke Obot Zion; ẹnọ mme ntọt eke angel ke ofụri isọn̄; ẹkpen̄e mbun̄wụm

Ini edisu: 1914 tutu osịm akwa ukụt

1. Nso ke nnyịn ikekpep iban̄a Ediyarade ibuot 7, 12, ye 13, ndien nso ke nnyịn idikpep idahaemi?

 EDEMEREDE ukpọn̄ didie ntem ndiwọn̄ọde mbịne udiana n̄kukụt John! Ke okpụhọrede ye mme etikwo etikwo esop dragon oro ẹbietde unam, nnyịn idahaemi imokụt mme anam-akpanikọ asan̄autom Jehovah ye mme utom mmọ ke usen Ọbọn̄. (Ediyarade 1:10) Ke mbemiso, Ediyarade 7:1, 3 ama ayayarade ọnọ nnyịn nte ke ẹmụm akama-nsobo ofụm mbinan̄ ẹkama kan̄a tutu ẹdifịk kpukpru ifịn 144,000 oro ẹyetde aran idiọn̄ọ. Ediyarade 12:17 amanam nnyịn ifiọk nte ke “nditọ [an̄wan] ẹmi ẹsụhọde” ẹkabade ẹdi akpan iso en̄wan ẹnọ Satan, kpa dragon, ke ini oro. Ndien Ediyarade ibuot 13 ke in̄wan̄în̄wan̄ usụn̄ omowụt mme esop ukaraidem oro Satan emenerede owụk ke isọn̄ man akpanam ọkpọsọn̄ mfịghe ye ibak ibak ukọbọ ẹsịm mme anam-akpanikọ asan̄autom Jehovah. Edi akwa asua oro ikemeke ndibiat uduak Abasi! Nnyịn idahaemi iyefiọk ite kpa ye afai afai edinam Satan, ẹmetan̄ kpukpru owo 144,000 ẹbok ye edikan.

2. Nso ntabi-nse n̄kpọ aban̄ade inem inem utịt ke John ọnọ nnyịn ke Ediyarade 14:1, ndien anie edi Eyenerọn̄ oro?

² Ẹnọ John, ye otu John oro odude ye enye mfịn, ntabi-nse n̄kpọ aban̄ade inem inem utịp oro: “Ekem n̄kụt, ndien sese, Eyen-erọn̄ ke adada ke Obot Zion, thousand owo ikie ye aba ye inan̄ ẹnyụn̄ ẹda ye Enye, kpa mmọemi ẹkewetde enyịn̄ Esie ye enyịn̄ Ete Esie ke ọkpọ-iso mmọ.” (Ediyarade 14:1) Nte nnyịn ima ikokụt, Eyenerọn̄ emi edi kpasụk Michael emi akanamde mme heaven ẹsana ke ndisio Devil ye mme demon esie nduọn̄ọ. Enye edi Michael emi Daniel etịn̄de aban̄a nte “adade aban̄a nditọ [Abasi]” nte enye eben̄ede idem ‘ndidaha nda’ ke ndikpe ndinen ikpe Jehovah. (Daniel 12:1, Ediyarade 12:7, 9) Ọtọn̄ọde ke 1914, awa-idem Eyenerọn̄ Abasi emi ke adada ke Obot Zion nte Edidem Messiah.

3. Nso idi “Obot Zion” emi Eyenerọn̄ ye owo 144,000 ‘ẹdade’?

³ Emi edi kpasụk nte Jehovah ekebemde iso etịn̄ ete: “Ami mmonịm edidem mi ke enyọn̄ Zion edisana obot mi.” (Psalm 2:6; 110:2) Emi itịn̄ke aba iban̄a Obot Zion eke isọn̄, ebiet emi Jerusalem eke isọn̄ okodude, kpa obio emi ndidem ke ubon David ẹkekarade. (1 Chronicles 11:4-7; 2 Chronicles 5:2) Baba, koro Jesus, ke n̄kpa ye ediset ke n̄kpa esie ebede ke 33 E.N., ekedi se ẹmenerede ẹdori nte itiat-inụk idakisọn̄ ke Obot Zion eke heaven, kpa n̄kan̄ enyọn̄ emi Jehovah ekebierede ndinịm “Obio Abasi uwem, kpa Jerusalem enyọn̄.” Ntem, “Obot Zion” mi ada aban̄a n̄kokon̄ idaha Jesus ye mme adia-akpa nsan̄a esie, ẹmi ẹnamde Jerusalem enyọn̄, emi edide Obio Ubọn̄ oro. (Mme Hebrew 12:22, 28; Ephesus 3:6) Enye edi ata ubọn̄ ubọn̄ itie emi Jehovah emenerede mmọ odori ke usen Ọbọn̄. Ke ediwak isua ikie ẹmi ẹkebede, mme Christian oro ẹyetde aran, nte “mme odu-uwem itiat,” ke ẹkedori enyịn ye esịt akpanikọ ndida ke Obot Zion eke heaven oro, ẹdianade ye Ọbọn̄ Jesus Christ oro ẹnọde ubọn̄ ke uku uku Obio Ubọn̄ esie.—1 Peter 2:4-6; Luke 22:28-30; John 14:2, 3.

4. Didie ke edi nte ke kpukpru owo 144,000 ke ẹda ke Obot Zion?

⁴ Idịghe Jesus ikpọn̄ ke John okụt, edi okụt ọyọhọ otu 144,000 ẹdide ekemmọ mme adia-akpa Obio Ubọn̄ eke heaven nte ẹdade ke Obot Zion. Kaban̄a ini emi n̄kukụt oro akanyande ubọk owụt, ediwak owo ke otu 144,000 ẹma ẹdodu ke heaven, edi idịghe kpukpru mmọ. Edikem kpasụk ke n̄kukụt oro, John edifiọk ete ke ndusụk ndisana ikọt Abasi ẹmi ẹsụk ẹnyenyene ndiyọ nnyụn̄ n̄kpa ke edinam akpanikọ. (Ediyarade 14:12, 13) Nte an̄wan̄ade, ndien, ndusụk owo 144,000 ẹsụk ẹdodu ke isọn̄. Ntre John asan̄a didie okụt kpukpru mmọ nte ẹdade ye Jesus ke Obot Zion? a Koro, nte mme andibuana ke esop mme Christian oro ẹyetde aran, mmọemi idahaemi ẹsan̄a “ẹkpere Obot Zion, ye Obio Abasi uwem, kpa Jerusalem enyọn̄.” (Mme Hebrew 12:22) Ukem nte Paul ke ini enye okosụk odude ke isọn̄—ke ekikere eke spirit—ẹma ẹnanam mmọ ẹset ẹkediana ye Jesus ke mme ebietidụn̄ eke heaven. (Ephesus 2:5, 6) Adianade do, ke 1919 mmọ ẹma ẹyere ikot oro, “Ẹdọk ẹdi ken,” ndien ke ndamban̄a usụn̄ ẹma “ẹsan̄a ke obubịt enyọn̄ ẹdọk ẹdụk ke heaven.” (Ediyarade 11:12) Ke ikerede iban̄a mme itien̄wed Abasi ẹmi, nnyịn imekeme ndikụt nte ke kpukpru owo 144,000—nditịn̄ ke n̄kan̄ eke spirit—ẹdu ke Obot Zion ye Jesus Christ.

5. Enyịn̄ mmanie ke ẹwet ke ọkpọiso owo 144,000, ndien nso ke enyịn̄ kiet kiet ọwọrọ?

⁵ Owo 144,000 ẹmi isan̄ake n̄kpọ ye mme andituak ibuot nnọ unam oro, ẹmi ẹdade ndamban̄a nọmba 666 ẹnịm mmọ idiọn̄ọ. (Ediyarade 13:15-18) Ke okpụhọrede ye oro, mme anam-akpanikọ ẹmi ẹnam ẹwet enyịn̄ Abasi ye eke Eyenerọn̄ ke ọkpọiso mmọ. Nte eyịghe mîdụhe, John, owo Jew oro, ama  okụt enyịn̄ Abasi ke abc Hebrew oro, יהוה. b Sia ẹwetde enyịn̄ Ete Jesus ke ndamban̄a usụn̄ ke ọkpọiso mmọ, mbon ẹmi ẹfịkde idiọn̄ọ mi ẹnam kpukpru owo ẹfiọk ẹte ke mmimọ idi mme ntiense Jehovah, ifịn Esie. (Ediyarade 3:12) Mmọ ndinam ẹwet enyịn̄ Jesus n̄ko ke ọkpọiso mmọ owụt ete ke mmọ ẹnyịme ẹte ke edi enye enyene mmimọ. Enye edi “ebe” emi ẹkemekde ẹnọ mmọ, mmọ ẹnyụn̄ ẹdi mbon oro ẹdidide “n̄wanndọ” esie, “obufa edibotn̄kpọ” oro ẹnamde n̄kpọ Abasi ye uwem eke heaven ke ekikere. (Ephesus 5:22-24; Ediyarade 21:2, 9; 2 Corinth 5:17, NW) N̄kpet n̄kpet ebuana mmọ ye Jehovah ye Jesus Christ akara kpukpru ekikere ye edinam mmọ.

Ndikwọ Ikwọ Emi Etiede Nte Obufa Ikwọ

6. Nso ikwọ ke John okop, ndien didie ke enye etịn̄ aban̄a ikwọ emi?

⁶ Ke n̄kemuyo ye emi, John obụk ete: “Ndien n̄kop uyo emi otode ke heaven, ebiet uyo ediwak mmọn̄, onyụn̄ ebiet uyo ọkpọsọn̄ obuma; uyo oro n̄kopde onyụn̄ etie nte uyo mme ebre-harp, ẹmi ẹbrede ikwọ ke harp mmọ. Ndien mmọ ẹkwọ ikwọ emi etiede nte obufa ikwọ ke iso ebekpo, ye ke iso n̄kpọ-uwem inan̄ oro ye mbiowo; baba owo kiet inyụn̄ ikemeke ndikpep ikwọ oro, ke mîbọhọke thousand owo ikie ye aba ye inan̄, kpa mmọ oro ẹkefakde ẹsio ẹfep ke isọn̄.” (Ediyarade 14:2, 3) Idịghe n̄kpọ n̄kpaidem nte ke John, ke okopde nte uyo owo 144,000 oro abuahade ke inem inem ikwọ kiet, eti uyom akwa mmọn̄ ye ọkpọsọn̄ uyo obuma. In̄wan̄în̄wan̄ mbre ikwọ oro ebietde eke harp enem didie ntem! (Psalm 81:2) Ewe n̄ka ikwọ ke isọn̄ ikpekpet ndisịm ubọn̄ ubọn̄ eke utịbe utịbe mbon ikwọ oro?

7. (a) Nso idi obufa ikwọ eke Ediyarade 14:3? (b) Didie ke ikwọ eke Psalm 149:1 edi obufa ke eyo nnyịn?

⁷ Ndien nso idi “obufa ikwọ” emi? Nte nnyịn ima ikọfọfiọk ke ndineme Ediyarade 5:9, 10, ikwọ emi enyene n̄kpọ ndinam ye mme uduak Obio Ubọn̄ Jehovah ye utịbe utịbe enọ esie, ebe ke Jesus Christ, ke ndinam Israel eke spirit ẹdi “Obio Ubọn̄ ye mme oku ẹnọ Abasi [nnyịn].” Emi edi ikwọ itoro ẹkwọde ẹnọ Jehovah, oro atan̄ade mbufa n̄kpọ oro enye anamde ebe ke Israel Abasi ye ke ibuot esie. (Galatia 6:16) Mme andibuana ke Israel eke spirit emi ẹyere ikot andiwet psalm emi: “Mbufo ẹtoro Jehovah. Ẹkwọ obufa ikwọ ẹnọ Jehovah, ẹkwọ itoro esie ke otu esop mbonima esie. Yak Israel adat esịt aban̄a andibot enye: yak nditọ Zion ẹbre ẹban̄a edidem mmọ.” (Psalm 149:1, 2) Edi akpanikọ, ẹkewet ikọ ẹmi ke isua ikie duop oro ẹkebede, edi ke eyo nnyịn, ẹma ẹkwọ mmọ ye obufa ifiọk. Ke 1914 Obio Ubọn̄ Messiah ama amana. (Ediyarade 12:10) Ke 1919 ikọt Jehovah ke isọn̄ ẹma ẹtọn̄ọ nditan̄a “ikọ Obio Ubọn̄” ye obufa ifịk. (Matthew 13:19) Sia ibuotikọ isua 1919 ekedemerede mmọ (Isaiah 54:17), ẹkenyụn̄ ẹkopde nsịnudọn̄ oto edifiak n̄wụk mmọ ke paradise eke spirit, ke isua oro mmọ ẹma ẹtọn̄ọ ‘ndikwọ ikwọ nnọ Jehovah ke esịt mmọ.’—Ephesus 5:19.

8. Ntak edide nte ke owo 144,000 kpọt ẹkeme ndikwọ obufa ikwọ eke Ediyarade 14:3?

⁸ Nte ededi, ntak edide nte ke owo 144,000 kpọt ẹkeme ndikpep ikwọ oro ẹtịn̄de ẹban̄a ke Ediyarade 14:3? Koro enye enyenede n̄kpọ ndinam ye mme ifiọk n̄kpọntịbe mmọ nte ndimek adia-akpa Obio Ubọn̄ Abasi. Mmọ kpọt ke ẹda ẹsịn nte nditọ Abasi ẹmi ẹnyụn̄ ẹyetde aran ke edisana spirit. Mmọ kpọt ke ẹdep ẹsio ke isọn̄ ndikabade ndi ubak Obio Ubọn̄ eke heaven oro, ndien mmọ kpọt ‘ẹdidi mme oku, mmọ ẹyenyụn̄ ẹda ubọn̄’ ye Jesus Christ ke tọsịn isua ndida ubonowo nsịm mfọnmma idaha. Mmọ ikpọn̄ ke ẹkụt nte ‘ẹkwọde ikwọ emi etiede nte obufa ikwọ’ ke ata iso Jehovah. c Mme anana-mbiet ifiọk n̄kpọntịbe ye idotenyịn  ẹmi ẹnọ mmọ esen esen ifiọk aban̄ade Obio Ubọn̄ ẹnyụn̄ ẹn̄wam mmọ ndikwọ mban̄a enye ke usụn̄ emi baba owo kiet mîkemeke ndikwọ.—Ediyarade 20:6; Colossae 1:13; 1 Thessalonica 2:11, 12.

9. Didie ke akwa otuowo ẹnam n̄kpọ ẹban̄a ikwọ emi mbon oro ẹyetde aran ẹkwọde, ndien nso item ke mmọ ẹkesu ke ntre?

⁹ Edi, mbon efen ẹkpan̄ utọn̄ ẹnyụn̄ ẹnam n̄kpọ ẹban̄a ikwọ oro mmọ ẹkwọde. Toto ke 1935 akwa otuowo eke mme erọn̄ en̄wen oro ẹkọride-kọri ke ibat ẹmekop ikwọ edikan mmọ, ẹmenyụn̄ ẹkụt nte onụkde mmimọ ndidiana ye mmọ ke nditan̄a Obio Ubọn̄ Abasi. (John 10:16; Ediyarade 7:9) Edi akpanikọ, mbufa owo ẹmi ikemeke ndikpep ndikwọ ukem obufa ikwọ emi ata ukem ukem nte mme andikara eke Obio Ubọn̄ Abasi ke ini iso ẹkwọde. Edi mmọ n̄ko ẹkwọ inem inem ikwọ itoro ẹnọ Jehovah, emi edide ikwọ oro otorode Jehovah ke mbufa n̄kpọ emi enye anamde. Mmọ ke ntem ẹsu item andiwet psalm oro: “Mbufo ẹkwọ obufa ikwọ ẹnọ Jehovah: mbufo, ofụri ekondo, ẹkwọ ẹnọ Jehovah. Ẹkwọ ẹnọ Jehovah, ẹtoro enyịn̄ esie; ẹtan̄a edinyan̄a esie kpukpru usen. Ẹtịn̄ ubọn̄ esie ke otu mme idụt, ye mme utịbe n̄kpọ esie ke ofụri ererimbot. Mbufo mme orụk ererimbot, ẹnọ Jehovah, ẹnọ Jehovah ubọn̄ ye odudu. Mbufo ẹdọhọ ke otu mme idụt, ẹte, ke Jehovah edi edidem.”—Psalm 96:1-3, 7, 10; 98:1-9.

10. Didie ke owo 144,000 oro ẹkeme ndikwọ ikwọ “ke iso” ndamban̄a mbiowo 24 oro?

¹⁰ Owo 144,000 oro ẹkeme didie ndikwọ ikwọ “ke iso” mbiowo oro, sia mbiowo 24 ẹmi ẹdide owo 144,000 oro ẹdude ke ubọn̄ ubọn̄ itie mmọ eke heaven? Ke ntọn̄ọ ntọn̄ọ usen Ọbọn̄, ẹma ẹnam “mmọ emi ẹkpan̄ade ke Christ” ẹset nte mme edibotn̄kpọ eke spirit. Ntem, mme anam-akpanikọ Christian oro ẹyetde aran, ẹmi ẹnyenede edikan ẹdu idahaemi ke heaven, ke ndamban̄a usụn̄ ẹnamde mme utom ẹmi ẹbietde eke mbiowo ẹdide mme oku ke ikpehe 24. Ẹbuan mmọ ke n̄kukụt esop Jehovah eke heaven. (1 Thessalonica 4:15, 16; 1 Chronicles 24:1-18; Ediyarade 4:4; 6:11) Mme nsụhọ eke 144,000 oro ẹsụk ẹdude ke isọn̄ ke ntre ke ẹkwọ obufa ikwọ emi ke iso, m̀mê ke enyịn nditọete mmọ oro ẹkenamde ẹset ke heaven.

11. Ntak ẹtịn̄de ẹban̄a mme andikan oro ẹyetde aran nte ẹdide mbiowo 24 ọkọrọ ye owo 144,000?

¹¹ Ke ọtọ emi nnyịn imekeme n̄ko ndibụp nte: Ntak ẹtịn̄de ẹban̄a mme andikan oro ẹyetde aran mi nte ẹdide ndamban̄a mbiowo 24 ye owo 144,000 nde? Edi koro Ediyarade ese otu kiet emi ke nsio nsio usụn̄ iba. Kpukpru ini ẹsiwụt mbiowo 24 ẹmi ke ọyọhọ ọyọhọ itie mmọ nte ẹdade ẹkanade ebekpo Jehovah, ẹdoride ke ebekpo nte ndidem ye mme oku ke mme heaven. Mmọ ẹda ẹban̄a ofụri otu 144,000 ke itie mmọ eke heaven, okposụkedi idahaemi ekpri nsụhọ ke otu mmọemi ẹsụk ẹdude ke isọn̄. (Ediyarade 4:4, 10; 5:5-14; 7:11-13; 11:16-18) Ediyarade ibuot 7, nte ededi, owụk ntịn̄enyịn ke owo 144,000 nte ẹsiode ẹto otu ubonowo, enye onyụn̄ ọsọn̄ọ etịn̄ akwa uduak oro Jehovah aduakde ndifịk n̄kemn̄kem ibat nditọ Israel eke spirit idiọn̄ọ ndinyụn̄ nnọ anana-ibat akwa otuowo edinyan̄a. Ediyarade ibuot 14 ọnọ ndise oro ọsọn̄ọde nte ke ẹyetan̄ n̄kemn̄kem mme andikan eke otu Obio Ubọn̄ ẹdide owo 144,000, ẹbok ọtọkiet ye Eyenerọn̄ ke Obot Zion. Ẹnam n̄ko ẹdiọn̄ọ mme n̄kpọ oro ẹyomde man owo odot ndidi se ẹdade ẹsịn ke ibat 144,000, nte nnyịn idahaemi idikụtde. d

Mme Anditiene Eyenerọn̄

12. (a) Didie ke John akaiso ke editịn̄ oro enye etịn̄de aban̄a owo 144,000? (b) Ke nso usụn̄ ke ẹtịn̄ ẹban̄a owo 144,000 nte ẹdide mmọ emi mîdọhọ ndọ?

¹² Ke ndikaiso ntịn̄ mban̄a owo 144,000 ẹmi “ẹkefakde ẹsio ẹfep ke isọn̄,” John asian nnyịn ete: “Mmọ emi ẹdi owo ẹmi mîkasabakede idem ye iban; koro mmọ mîkọdọhọ ndọ. Ẹmi ẹdi mmọ emi ẹtienede Eyen-erọn̄ ẹka ọtọ nte Enye akaka. Ẹkefak mmọ ẹsio ke otu owo, ẹte mmọ ẹdi akpa  mbun̄wụm ẹnọ Abasi ye Eyenerọn̄. Ndien owo ikwe mmọ abian̄a ke inua; mmọ inyụn̄ inyeneke ndo.” (Ediyarade 14:4, 5) Akpanikọ oro nte ke owo 144,000 ẹmi ‘ikọdọhọ ndọ’ iwọrọke ite ke mme andibuana ke otu emi ikọdọhọ ndọ ke obụkidem. Apostle Paul ama ewet n̄wed ọnọ ẹsọk mme Christian oro ẹkenyenede ikot uka heaven ete, ke adan̄aemi mme ufọn ẹdude ke itie unana ndọ eke Christian, ndọ odot ke ndusụk idaha. (1 Corinth 7:1, 2, 36, 37) Se ẹdade ẹdiọn̄ọ otu emi edi unana edidọ ndọ ke n̄kan̄ eke spirit. Mmọ ẹma ẹfep idem ke efịbe eke spirit ye ukaraidem ererimbot n̄ko ye nsunsu ido ukpono. (James 4:4; Ediyarade 17:5) Nte n̄wanndọ oro ẹkemekde ẹnọ Christ, mmọ ẹma ẹnịm idemmọ asana, “ẹnanade ndo ke ufọt n̄kwakwan̄a ye idiọk emana.”—Philippi 2:15.

13. Ntak emi owo 144,000 ẹdide n̄wanndọ emi odotde ye Jesus Christ, ndien didie ke mmọ ẹkaiso “[ẹtiene] Eyenerọn̄ ẹka ọtọ nte Enye akaka”?

¹³ Adianade do, “owo ikwe mmọ abian̄a ke inua.” Ke emi, mmọ ẹbiet Edidem mmọ, Jesus Christ. Nte mfọnmma owo, “Enye ikanamke idiọkn̄kpọ, akanam inyụn̄ ikwe Enye abian̄a ke inua.” (1 Peter 2:21, 22) Ke ndinana ndo nnyụn̄ nnam akpanikọ ke ukem ini oro, owo 144,000 ẹmi ẹtịm idem ẹnịm nte edisana an̄wanndọ ẹnọ akamba Akwa Oku Jehovah. Ke ini Jesus okodude ke isọn̄, enye ama ọnọ mbon eti esịt ikot ete ẹtiene imọ. (Mark 8:34; 10:21; John 1:43) Mbon ẹmi ẹkeyerede ikot ẹma ẹkpebe usụn̄uwem esie ẹnyụn̄ ẹsụk ibuot ẹnọ mme ukpepn̄kpọ esie. Ntem, ke ini utom mmọ eke isọn̄, mmọ ẹkaiso “[ẹtiene] Eyen-erọn̄ ẹka ọtọ nte Enye akaka” nte enye ekpemede mmọ ebe ererimbot Satan.

14. (a) Didie ke owo 144,000 ẹdi “akpa mbun̄wụm ẹnọ Abasi ye Eyenerọn̄”? (b) Ke nso usụn̄ ke akwa otuowo n̄ko ẹdi akpa mbun̄wụm?

¹⁴ Owo 144,000 ẹdi mmọemi “ẹkefakde ẹsio ẹfep ke isọn̄,” “ẹkefak mmọ ẹsio ke otu owo.” Ẹmeda mmọ ẹdisịn nte nditọ Abasi, ndien ke mmọ ẹma ẹkeset ke n̄kpa, mmọ ididịghe aba mme ikpîkpu owo oro ẹnyenede obụk ye iyịp. Nte ẹtịn̄de ẹban̄a ke ufan̄ikọ 4, mmọ ẹkabade ẹdi “akpa mbun̄wụm ẹnọ Abasi ye Eyenerọn̄.” Edi akpanikọ, ko ke edem ke akpa isua ikie, Jesus ekedi “akpa mbun̄wụm ke otu mmọ emi ẹdede idap.” (1 Corinth 15:20, 23) Edi owo 144,000 ẹdi mme “akpa mbun̄wụm” ke otu mme anana mfọnmma ubonowo, ẹkedepde ebe ke uwa Jesus. (James 1:18) Edi, editan̄ mbun̄wụm nto ubonowo ikụreke ke mmọ. N̄wed Ediyarade ama anyanyan ubọk owụt editan̄ anana-ibat akwa otuowo oro ẹfioride ke ọkpọsọn̄ uyo ẹte: “Edinyan̄a enyene Abasi nnyịn emi etiede ke ebekpo, onyụn̄ enyene Eyen-erọn̄.”  Akwa otuowo ẹmi ẹyebọhọ akwa ukụt, ndien nte “idịm mmọn̄ uwem” akade iso ndidemede mmọ ukpọn̄, ẹyemenede mmọ ẹsịm mfọnmma idaha owo ke isọn̄. Ke akwa ukụt ebede, ẹyenam Hades ana ukpọk, ẹyenyụn̄ ẹnam mme anana-ibat miliọn owo eken ẹset ke n̄kpa ẹnyụn̄ ẹnyene ifet ndin̄wọn̄ ukem mmọn̄ uwem oro. Ye emi ke ekikere, ekpenen ndikot akwa otuowo akpa mbun̄wụm ke otu mme erọn̄ en̄wen—mmọ ẹdi akpa ‘ndiyet ọfọn̄idem mmọ nnam afia ke iyịp Eyenerọn̄’ ye idotenyịn edidu uwem nsinsi ke isọn̄.—Ediyarade 7:9, 10, 14, 17; 20:12, 13.

15. Ewe n̄kpọ ẹmi ẹsan̄ade ẹkekem idu ke nsio nsio akpa mbun̄wụm ita oro ye mme usọrọ oro ẹkesinịmde ke idak Ibet Moses?

¹⁵ Mme akpa mbun̄wụm ita ẹmi (Jesus Christ, owo 144,000, ye akwa otuowo) ẹnyene mme inem inem n̄kpọ oro ẹsan̄ade ẹkekem ye mme usọrọ oro ẹkesinịmde nte ekemde ye Ibet Moses eke eset. Ke Nisan 16, ke ini Usọrọ Uyo eke Leaven Mîdụhe, ẹma ẹsinọ Jehovah ebek akpa mbun̄wụm ke idọk barley. (Leviticus 23:6-14) Nisan 16 ekedi usen emi ẹkenamde Jesus eset ke n̄kpa. Ke ọyọhọ usen 50 ọtọn̄ọde ke Nisan 16, ke ọyọhọ ọfiọn̄ ita, nditọ Israel ẹma ẹsinịm usọrọ ukpen̄e akpa mbun̄wụm ibokpot. (Exodus 23:16; Leviticus 23:15, 16) Ẹma ẹdikot usọrọ emi Pentecost (otode ikọ Greek oro ọwọrọde “ọyọhọ aba-ye-duop”), ndien ekedi ke Pentecost eke 33 E.N. ke ẹkeyet mme akpa owo ke otu 144,000 aran ke edisana spirit. Ke akpatre, ke ọyọhọ ọfiọn̄ itiaba ke ini ẹketan̄de ofụri mbun̄wụm in̄wan̄, Mme Usọrọ Ataya ẹma ẹdu, kpa ini ekọm idatesịt emi nditọ Israel ẹkedụn̄de urua kiet ke mme ataya oro ẹkedade ndakeyop ẹbọp, adianade ye mme n̄kpọ eken. (Leviticus 23:33-43) Nte asan̄ade ekekem, akwa otuowo, ẹmi ẹdide ubak akwa otu oro ẹtan̄de ẹbok, ẹnọ ekọm ke iso ebekpo ye “ndakeyop ke ubọk.”—Ediyarade 7:9.

Nditan̄a Nsinsi Eti Mbụk

16, 17. (a) John okụt nte angel efede ke m̀mọ̀n̄, ndien nso ke angel oro atan̄a? (b) Mmanie ẹbuana ke utom ukwọrọikọ Obio Ubọn̄, ndien nso ifiọkutom iwụt emi?

¹⁶ John akaiso ewet ete: “Ekem n̄kụt angel  en̄wen efefe ke ufọt enyọn̄, emi enyenede nsinsi gospel ete ikwọrọ inọ mmọemi ẹdụn̄de ke isọn̄, ye kpukpru idụt ye esien ye usem ye obio; ndien enye ọdọhọ ke ọkpọsọn̄ uyo ete, Mbufo ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie; ẹnyụn̄ ẹtuak ibuot ẹnọ Enye emi okobotde enyọn̄ ye isọn̄ ye inyan̄ ye idịm mmọn̄.” (Ediyarade 14:6, 7) Angel oro efe ke “ufọt enyọn̄,” ke ebiet emi mme inuen ẹfede. (Men Ediyarade 19:17 domo.) Ntem, ẹkeme ndikop uyo esie ke ofụri ererimbot. Editan̄a oro angel emi atan̄ade ke ofụri ererimbot atara didie ntem akan usuanetop eke television ekededi!

¹⁷ Idịghe unam oro ye mbiet esie ke ẹdọhọ kpukpru owo ẹten̄e, edi edi Jehovah, emi  ke usụn̄ oro owo mîkemeke ndimen ndomo, enyenede odudu akan ndamban̄a unam ekededi emi Satan akarade. Kamse, n̄kọm Jehovah okobot enyọn̄ ye isọn̄, ndien idahaemi ini edikem enye ndibiere ikpe nnọ ererimbot! (Men Genesis 1:1; Ediyarade 11:18 domo.) Ke ini okodude ke isọn̄, Jesus ama etịn̄ prọfesi aban̄a eyo nnyịn ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Esop mme Christian oro ẹyetde aran ke ẹsu ewụhọ emi. (1 Corinth 9:16; Ephesus 6:15) Mi Ediyarade ayarade nte ke mme angel ẹmi enyịn mîkwe ẹbuana n̄ko ke utom ukwọrọikọ emi. Ediwak ini ndausụn̄ mme angel esiwụt idem in̄wan̄în̄wan̄ didie ntem ke ndida kiet ke otu Mme Ntiense Jehovah n̄kosịm ufọk emi owo nnanenyịn enyenede ọkpọsọn̄ udọn̄, idem ọbọn̄de akam oyom un̄wam eke spirit!

18. Nte angel emi efede ke ufọt enyọn̄ ọdọhọde, nso ini idisịm, ndien mmanie ẹdinọ mme ntọt en̄wen?

¹⁸ Nte angel emi efede ke ufọt enyọn̄ atan̄ade, ini ubiereikpe edisịm. Nso ubiereikpe ke Abasi edinọ idahaemi? Idahaemi ntọt oro ọyọhọ angel iba, ọyọhọ ita, ọyọhọ inan̄, ye ọyọhọ ition ẹyomde ndinọ eyeduat owo ke utọn̄.—Jeremiah 19:3.

[Mme Ikọ idakisọn̄]

[Mme Mbụme Ukpepn̄kpọ]

[Mme ndise ke page 202, 203]

144,000

Mbiowo 24

Mme nsan̄a adia-akpa eke Eyenerọn̄, Christ Jesus, nte ẹkụtde ke nsio nsio usụn̄ iba