Obufa Enyọn̄ ye Obufa Isọn̄
Ibuot 42
Obufa Enyọn̄ ye Obufa Isọn̄
1. Nso ke John etịn̄ aban̄a ke ini angel oro adade enye afiak aka ntọn̄ọ ntọn̄ọ Ukara Tọsịn Isua?
UBỌN̄ UBỌN̄ n̄kukụt emi akaiso ndiyarade nte angel oro adade John afiak aka ntọn̄ọ ntọn̄ọ Ukara Tọsịn Isua. Enye etịn̄ aban̄a nso? “Ekem n̄kụt obufa enyọn̄ ye obufa isọn̄; koro akpa enyọn̄ ye akpa isọn̄ ẹma ẹbe ẹfep, inyan̄ ibom inyụn̄ idụhe aba.” (Ediyarade 21:1) N̄kpọntịbe oro omụmde udọn̄ ọwọrọ owụt idem!
2. (a) Didie ke prọfesi Isaiah oro aban̄ade mbufa enyọn̄ ye obufa isọn̄ okosu ke idem mme Jew oro ẹkefiakde ẹwụk ke 537 M.E.N.? (b) Nnyịn isan̄a didie ifiọk ite ke edisu en̄wen eyedu ke prọfesi Isaiah, ndien didie ke un̄wọn̄ọ emi osu?
2 Ediwak isua ke mme itie ikie mbemiso eyo John, Jehovah ama ọdọhọ Isaiah ete: “Koro, sese, mmọn̄ mbot mbufa enyọn̄ ye obufa isọn̄, ndien owo iditịghi aba akpa oro, idinyụn̄ idụkke owo ke esịt.” (Isaiah 65:17; 66:22) Prọfesi emi ama ebemiso osu ke ini mme Jew anam-akpanikọ ẹkefiakde ẹnyọn̄ Jerusalem ke 537 M.E.N. ke isua 70 oro mmọ ẹkekade ntan̄mfep ke Babylon ama okokụre. Ke edifiak n̄wụk oro, mmọ ẹma ẹtọn̄ọ n̄kaowo oro ẹkenamde asana, kpa “obufa isọn̄,” ke idak obufa ndutịm ukara, “mbufa enyọn̄.” Nte ededi, apostle Peter ama anyan ubọk owụt edisu en̄wen ke prọfesi emi, ọdọhọde ete: “Edi nnyịn itie ibet obufa enyọn̄ ye obufa isọn̄, nte un̄wọn̄ọ Esie edide; ndien edi do ke edinen ido edidụn̄.” (2 Peter 3:13) Idahaemi John owụt ete ke un̄wọn̄ọ emi omosu ke usen Ọbọn̄. “Akpa enyọn̄ ye akpa isọn̄,” kpa editịm n̄kpọ Satan ye ndutịm ukara esie ẹmi Satan ye mme demon esie ẹnyenede odudu, ẹyebe ẹfep. Ndutịme ndutịme “inyan̄ibom” emi edide idiọk ọsọn̄ibuot ubonowo eyetre ndidu. “Obufa enyọn̄ ye obufa isọn̄”—obufa n̄kaowo eke isọn̄ ke idak obufa ukara, kpa Obio Ubọn̄ Abasi, eyeda itie esie.—Men Ediyarade 20:11 domo.
3. (a) John etịn̄ aban̄a nso, ndien nso idi Obufa Jerusalem? (b) Didie ke Obufa Jerusalem ‘osụhọde ke heaven edi’?
3 John akaiso ete: “Ndien n̄kụt edisana obio, Obufa Jerusalem, nte otode ke Abasi osụhọde ke heaven edi, ẹma ẹnyụn̄ ẹtịm enye idem nte n̄wan-ndọ emi ẹbanade ẹben̄e ebe.” (Ediyarade 21:2) Obufa Jerusalem emi edi n̄wanndọ Christ, emi mme Christian oro ẹyetde aran ẹnamde, oro ẹsọn̄ọde ẹda ẹnam akpanikọ tutu osịm n̄kpa, ẹmi ẹnyụn̄ ẹnamde ẹset ke n̄kpa man ẹkpekabade ẹdi ndidem ye mme oku ye Jesus oro ẹnọde ubọn̄. (Ediyarade 3:12; 20:6) Kpa nte Jerusalem eke isọn̄ akakabarede edi ifụm ukara ke Israel eset, ntre ediye Obufa Jerusalem ye Ebendọ esie ẹnam ukara obufa editịm n̄kpọ emi. Emi edi obufa enyọn̄ oro. ‘N̄wan-ndọ oro osụhọrede ke heaven edi,’ idịghe ke ata ata usụn̄, edi edi ke usụn̄ifiọk ediwọn̄ọde ntịn̄enyịn n̄wụt isọn̄. N̄wanndọ Eyenerọn̄ enyene ndidi anam-akpanikọ nsan̄a esie ke ndikama edinen ukara oro edikarade ofụri ubonowo. Emi edi edidiọn̄ ke akpanikọ ọnọ obufa isọn̄!
4. Nso un̄wọn̄ọ ke Abasi akanam oro ebietde enyeoro enye akanamde ọnọ idụt Israel oro ẹketọn̄ọde obufa?
4 John akaiso asian nnyịn ete: “Ndien n̄kop ọkpọsọn̄ uyo nte otode ke ebekpo ọwọrọ ete, Sese, ebiet idụn̄ Abasi omodu ye owo. Enye eyenyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie eyenyụn̄ odu ye mmọ, onyụn̄ edi Abasi mmọ.” (Ediyarade 21:3) Ke Jehovah ama ọkọbọp Ibet ediomi oro ye idụt Israel oro ekedide obufa adan̄aoro, enye ama ọn̄wọn̄ọ ete: “Ami nyenyụn̄ nnịm ebiet-idụn̄ mi ke otu mbufo: esịt mi idinyụn̄ isuaha mbufo. Nyenyụn̄ nsan̄a ke otu mbufo, nnyụn̄ ndi Abasi mbufo, mbufo ẹyenyụn̄ ẹdi ikọt mi.” (Leviticus 26:11, 12) Idahaemi Jehovah ke anam mbiet un̄wọn̄ọ oro ọnọ mbon ẹmi ẹnamde akpanikọ. Ke Usen Ikpe eke tọsịn isua, mmọ ẹyekabade ẹdi mme ata san̄asan̄a owo ẹnọ enye.
5. (a) Didie ke Abasi edidụn̄ ye ubonowo ke ini Ukara Tọsịn Isua? (b) Didie ke Abasi edidụn̄ ke otu ubonowo ke Ukara Tọsịn Isua ama ekebe?
5 Ke ini Ukara Tọsịn Isua oro, Jehovah ‘eyedụn̄’ ke otu ubonowo ke ndutịm ibio ini, emi ubọn̄ ubọn̄ Eyen esie, Jesus Christ, edidade ke ibuot esie. Ke utịt Ukara Tọsịn Isua, nte ededi, ke ini Jesus ayakde Obio Ubọn̄ oro ọnọ Ete esie, owo idiyomke aba ubọn̄ ubọn̄ andida ke ibuot m̀mê anam-n̄kpeubọk. Jehovah ke usụn̄ eke spirit eyedụn̄ ye “ikọt Esie” tak-tak ke nnennen usụn̄. (Men John 4:23, 24 domo.) Nso n̄kokon̄ ifet ke edidi ntem ọnọ ubonowo oro ẹfiakde ẹwụk!
6, 7. (a) Mme akwa un̄wọn̄ọ ewe ke John ayarade, ndien mmanie ẹdinyene mme edidiọn̄ ẹmi? (b) Didie ke Isaiah etịn̄ aban̄a paradise oro edide eke spirit ye enyeoro ẹkụtde ke enyịn?
6 John akaiso ọdọhọ ete: “Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.” (Ediyarade 21:4) Inikiet efen, ẹfiak ẹti nnyịn mme un̄wọn̄ọ eset eke odudu spirit. Isaiah n̄ko ama asak iso ese ini emi n̄kpa ye ntuan̄a mîdidụhe aba, emi idara edinyụn̄ adade itie mfụhọ. (Isaiah 25:8; 35:10; 51:11; 65:19) Idahaemi John ọsọn̄ọ ete ke mme un̄wọn̄ọ ẹmi ẹnyene utịbe utịbe edisu ke Usen Ikpe eke tọsịn isua. Akpa kan̄a, akwa otuowo ẹyedara mme edidiọn̄ ẹmi. “Eyenerọn̄ emi etiede ke ufọt ebekpo,” akade iso ndikpeme mmọ, “eyenyụn̄ ada mmọ aka ke idịm-mmọn̄ uwem: ndien Abasi eyekwọhọde kpukpru mmọn̄eyet ke enyịn mmọ efep.” (Ediyarade 7:9, 17) Edi ke akpatre kpukpru mbon oro ẹnamde ẹset ke n̄kpa, oro ẹnyụn̄ ẹbuọtde idem ke mme enọ Jehovah ẹyedu do ye mmọ, ẹdarade paradise oro edide eke spirit ye enyeoro ẹkụtde ke enyịn.
7 Isaiah ọdọhọ ete, “ndien [“ke ini oro,” NW] enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan.” Ih, “ndien [“ke ini oro,” NW] mbụn̄ọ eyenek nte edop, edeme imụm eyenyụn̄ ọkwọ.” (Isaiah 35:5, 6) Ke ini oro, n̄ko, “mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄ vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia: koro usen ikọt mi ebietde usen eto, ndien ndimek ikọt mi ẹyedia se ubọk mmọ ẹnamde.” (Isaiah 65:21, 22) Ntre owo idiwụhọkede mmọ ifep ke isọn̄.
8. Nso ke Jehovah ke idemesie etịn̄ ke nte mme akwa un̄wọn̄ọ ẹmi ẹdide akpanikọ?
8 Nso ndiye ntabi-nse n̄kpọ iyọhọ ekikere nnyịn ntem nte nnyịn itiede ikere mme un̄wọn̄ọ ẹmi! Mme utịbe utịbe enọ ke ẹna ẹbet anam-akpanikọ ubonowo ke idak ima ima ukara eke heaven. Nte mme utọ un̄wọn̄ọ oro ẹfọn ẹkaha ndidi akpanikọ? Nte mmọ ẹdi ikpîkpu ndap akanieren oro okodude ke ntan̄mfep ke isuo Patmos? Jehovah ke idemesie ọbọrọ ete: “Anditie ke ebekpo onyụn̄ ọdọhọ ete, Sese, mmanam kpukpru n̄kpọ ẹdi mbufa. Enye onyụn̄ ọdọhọ ete, Wet: koro mme ikọ ẹmi ẹdi akpanikọ ye se owo okponịmde. Enye ọdọhọ mi n̄ko ete, Kpukpru n̄kpọ ẹma ẹsu ẹma. Ami ndi Alpha ye Omega, ntọn̄ọ ye utịt.”—Ediyarade 21:5, 6a.
9. Ntak emi ẹkemede ndise mme edidiọn̄ ini iso ẹmi nte ẹnen̄erede ẹnyene iwụk ndisu?
9 Enye etie nte n̄kpọ eke Jehovah ke idemesie esịnde ubọk ke n̄wed utie-ubiọn̄, m̀mê n̄wed ediomi ọnọ anam-akpanikọ ubonowo, kaban̄a mme edidiọn̄ ini iso ẹmi. Anie ekpededei eneni ye utọ Etie-ubiọn̄ oro? Kamse, mme un̄wọn̄ọ Jehovah ẹmi ẹtịm ẹdi akpanikọ tutu eyedi se enye etịn̄de nte n̄kpọ eke edide mmọ ẹma ẹsosu: “Kpukpru n̄kpọ ẹma ẹsu ẹma.” Nte Jehovah idịghe “Alpha ye Omega . . . , emi odude-du, okonyụn̄ odude-du, edinyụn̄ edide, Andikara kpukpru n̄kpọ”? (Ediyarade 1:8) Ke akpanikọ enye edi! Enye ke idemesie ọdọhọ ete: “Ami ndi mbemiso, ami nnyụn̄ ndi akpatre; ndien baba owo kiet idụhe ke mîbọhọke ami.” (Isaiah 44:6) Ke ntre, enye ekeme nditịn̄ mme prọfesi onyụn̄ anam mmọ ẹsu ata ọyọhọ ọyọhọ. Didie ke emi ọsọn̄ọ mbuọtidem ntem! Ntre enye ọn̄wọn̄ọ ete: “Sese, mmanam kpukpru n̄kpọ ẹdi mbufa”! Utu ke ndineni m̀mê mme utịben̄kpọ ẹmi ẹyenen̄ede ẹda itie, ke akpanikọ nnyịn ikpenyene ndibụp: ‘Nso ke ami ke idemmi nnyene ndinam man nda mme utọ edidiọn̄ oro nnyene?’
“Mmọn̄” Odude Ọnọ Mbon Nsatitọn̄
10. Nso “mmọn̄” ke Jehovah ọnọ, ndien enye ada aban̄a nso?
10 Edi Jehovah ke idemesie ọdọhọ ete: “Owo eke okopde nsat-itọn̄, Ami nyekoi mmọn̄ ke idịm mmọn̄ uwem nnọ enye ọn̄wọn̄ ke ikpîkpu.” (Ediyarade 21:6b) Man ebịt nsatitọn̄ oro, ana owo enyene udọn̄ aban̄a n̄kpọ eke spirit esie onyụn̄ onyịme ndibọ “mmọn̄” oro Jehovah ọnọde. (Isaiah 55:1; Matthew 5:3, NW) Nso “mmọn̄”? Jesus ke idemesie ama ọbọrọ mbụme oro ke ini ọkọnọde n̄wan kiet ikọ ntiense ke mben obube mmọn̄ ke Samaria. Enye ọkọdọhọ n̄wan oro ete: “Owo ekededi eke ọn̄wọn̄de mmọn̄ emi Ami ndinọde enye idikopke nsat-itọn̄ aba: edi mmọn̄ oro ndinọde enye eyekabade edi idịm mmọn̄ ke esịt esie eke otopde akabade ọwọrọ edi nsinsi uwem.” “Mmọn̄ ke idịm mmọn̄ uwem” oro ọfiọrọ oto Abasi ebe ke Christ nte enọ esie ndida mfiak n̄wụk ubonowo nnọ mfọnmma uwem. Ukem nte n̄wan Samaria oro, nnyịn ikpenyene ọkpọsọn̄ udọn̄ didie ntem ndin̄wọn̄ ntotụn̄ọ ntotụn̄ọ nto idịm mmọn̄ oro! Ndien ukem nte n̄wan oro, nnyịn ikpodu ke mben̄eidem didie ntem ndiyak mme udọn̄ n̄kpọ ererimbot nnịm ke ntak editịn̄ eti mbụk nnọ mbon en̄wen!—John 4:14, 15, 28, 29.
Mbon Oro Ẹkande
11. Nso un̄wọn̄ọ ke Jehovah anam, ndien ikọ oro ekebem iso abuana mmanie?
11 Ana mbon ẹmi ẹn̄wọn̄de “mmọn̄” oro edemerede ukpọn̄ mi n̄ko ẹkan, nte Jehovah akade iso ndidọhọ ete: “Owo eke akande eyeda n̄kpọ ẹmi enyene; ndien nyedi Abasi esie, enye eyenyụn̄ edi eyen Mi.” (Ediyarade 21:7) Un̄wọn̄ọ emi ebiet mme un̄wọn̄ọ oro ẹkụtde ke mme etop oro ẹkenọde ẹsọk esop itiaba oro; ke ntre, ana ikọ ẹmi ke akpa ifet ẹnyene mme mbet oro ẹyetde aran. (Ediyarade 2:7, 11, 17, 26-28; 3:5, 12, 21) Nditọete Christ eke spirit ke ofụri emana ẹmi ẹma ẹdori enyịn ye ọkpọsọn̄ udọn̄ ke ifet edidi ubak Obufa Jerusalem. Edieke mmọ ẹkande, nte Jesus akakande, idotenyịn mmọ ẹyesu.—John 16:33.
12. Didie ke un̄wọn̄ọ Jehovah ke Ediyarade 21:7 edisu ọnọ akwa otuowo?
12 Akwa otuowo oro ẹtode kpukpru idụt n̄ko ẹsak iso ẹse un̄wọn̄ọ emi. Ana mmọ n̄ko ẹkan, ẹnamde n̄kpọ Abasi ke edinam akpanikọ tutu mmọ ẹto ke akwa ukụt oro ẹwọn̄ọ. Adan̄aoro mmọ ẹyedụk ebietidụn̄ mmọ eke isọn̄, kpa ‘obio ubọn̄ emi ẹketịmde ẹnọ mmọ toto ke editọn̄ọ ererimbot.’ (Matthew 25:34) Mmọemi ye mbon eken ẹdide mme erọn̄ Ọbọn̄ eke isọn̄ oro ẹbede udomo ke utịt tọsịn isua oro ẹdi se ẹkotde “ndisana ikọt Abasi.” (Ediyarade 20:9, NW) Mmọ ẹyedara edisana itie ebuana oro odotde nditọ ye Andibot mmọ, Jehovah Abasi, nte mme andibuana ke esop esie eke ofụri ekondo.—Isaiah 66:22; John 20:31; Rome 8:21.
13, 14. Man ibọ mme akwa un̄wọn̄ọ Abasi inyene, mme edinam ewe ke ana nnyịn ifep idem ofụri ofụri, ndien ntak-a?
13 Ye akwa idotenyịn emi ke ekikere, didie ke edi akpan n̄kpọ ntem nte Mme Ntiense Jehovah idahaemi ẹkaiso ẹdi edisana man ẹkpebọhọ mme ndek ndek n̄kpọ eke ererimbot Satan! Oyom nnyịn isọn̄ idem, inyene iwụk, inyụn̄ ibiere ite ke Devil tutu amama ididụrike nnyịn isụhọde isịn ke otu oro Jehovah ke idemesie etịn̄de aban̄a mi ete: “Edi ama edi mbon esịt ndịk, ye mmọ emi mînịmke ke akpanikọ, ye mmọ emi ẹmade mbubiam ido, ye mme owot owo, ye mbon use, ye mbia idiọn̄, ye mme okpono ndem, ye kpukpru mme osu nsu, udeme mmọ eyedu ke akwa n̄kpọdiọhọ emi asakde ye ikan̄ ye brimstone, emi edide udiana n̄kpa.” (Ediyarade 21:8) Ih, owo oro oyomde ndidi andibọ edidiọn̄ emi enyene nditre mme edinam oro ẹsabarede akani editịm n̄kpọ emi. Enye enyene ndikan ke ndisọn̄ọ nda nnam akpanikọ ke osobode kpukpru mfịghe ye idomo.—Rome 8:35-39.
14 Christendom, kpa ye oro ọdọhọde ke imọ idi n̄wanndọ Christ, edi se mme mbubiam edinam oro John etịn̄de aban̄a mi ẹnịmde enye idiọn̄ọ. Ntre enye osụhọde ke nsinsi nsobo ye mbon eken ke Akwa Babylon. (Ediyarade 18:8, 21) Ukem ntre, owo ekededi ke otu mbon oro ẹyetde aran m̀mê ke otu akwa otuowo oro akade iso ke utọ ndiọi edinam ntre, m̀mê ọtọn̄ọde ndisịn udọn̄ nnọ enye, asak iso ese nsinsi nsobo. Edieke mmọ ẹsọn̄ọde ẹyịre ke mme edinam ẹmi, mmọ idibọhọ mme un̄wọn̄ọ ẹmi inyene. Ndien ke obufa isọn̄ oro, ẹyesobo owo ekededi oro odomode nditọn̄ọ mme utọ edinam oro ẹfep usọp usọp, akpade udiana n̄kpa ye unana idotenyịn ediset ke n̄kpa.—Isaiah 65:20.
15. Mmanie ẹdi n̄wọrọnda nte mme andikan, ndien Ediyarade ada ewe n̄kukụt osịm akwa utịt?
15 Eyenerọn̄, Jesus Christ, ye n̄wanndọ esie ẹdide owo 144,000, kpa Obufa Jerusalem, ẹdi n̄wọrọnda nte mme andikan. Odot didie, ndien, ntem nte ke ẹkpenyene ndida Ediyarade nsịm akwa utịt ebe ke akpatre, anana-mbiet ndise Obufa Jerusalem! Idahaemi John obụk aban̄a n̄kukụt kiet oro edide akpatre.
[Mme Mbụme Ukpepn̄kpọ]
[Mme ndise ke page 302]
Ke obufa n̄kaowo eke isọn̄, idara idara utom ye ebuana otuowo eyedu ọnọ kpukpru owo
