Usen Ikpe Abasi—Idara Idara Utịp Esie!
Ibuot 41
Usen Ikpe Abasi—Idara Idara Utịp Esie!
N̄kukụt 15—Ediyarade 20:11–21:8
Ibuotikọ: Ediset ke n̄kpa ofụri owo, Usen Ikpe, ye mme edidiọn̄ eke mbufa enyọn̄ ye obufa isọn̄
Ini edisu: Ukara Tọsịn Isua
1. (a) Nso ke ubonowo akataba ke ini Adam ye Eve ẹkenamde idiọkn̄kpọ? (b) Ewe uduak Abasi mîkpụhọkede, ndien nnyịn isan̄a didie ifiọk?
NTE mme owo, ẹkebot nnyịn ndidu uwem ke nsinsi. Edieke Adam ye Eve ẹkpekenịmde mme ewụhọ Abasi, mmọ tutu amama ikpakpaha. (Genesis 1:28; 2:8, 16, 17; Ecclesiastes 3:10, 11) Edi ke ini mmọ ẹkenamde idiọkn̄kpọ, mmọ ẹma ẹduọk mfọnmma ye uwem mmọ ye eke nditọ mmọ, ndien n̄kpa ama edida ubọn̄ ke idem ubonowo nte asua oro mîtekke ke ifịk. (Rome 5:12, 14; 1 Corinth 15:26) Nte ededi, uduak oro Abasi akaduakde ndinam mme mfọnmma owo ẹdu uwem ke nsinsi ke paradise isọn̄ ikokpụhọkede. Ke ntak akwa ima oro enye enyenede ọnọ ubonowo, enye ama ọdọn̄ ikpọn̄îkpọn̄ edibon Eyen esie, Jesus, edi isọn̄, emi ọkọnọde mfọnmma uwem esie eke owo nte ufak ndifak “ediwak” nditọ Adam. (Matthew 20:28; John 3:16) Idahaemi Jesus ekeme ndida ufọn uwa esie emi ekemde ye ibet mi mfiak nnọ mbon oro ẹnịmde ke akpanikọ uwem ke mfọnmma idaha ke paradise isọn̄. (1 Peter 3:18; 1 John 2:2) Nso akwa ntak ke ubonowo enyene ntem ‘ndidara nnyụn̄ nyọhọ ye idatesịt’!—Isaiah 25:8, 9.
2. Nso ke John obụk aban̄a ke Ediyarade 20:11, ndien nso idi “akamba afia ebekpo” oro?
2 Ke ẹma ẹkekọbi Satan ẹsịn ke editụn̄ọ ukpe, ubọn̄ ubọn̄ Ukara Tọsịn Isua eke Jesus ọtọn̄ọ. Idahaemi edi “usen” eke Abasi “edikpede ikpe ọnọ ererimbot ke edinen ido, ke ubọk Owo emi Enye ekemekde.” (Utom 17:31; 2 Peter 3:8) John ọdọhọ ete: “Ekem n̄kụt akamba afia ebekpo, ye Enye emi etiede ke esịt, emi isọn̄ ye ikpa-enyọn̄ ẹfen̄ede ẹkpọn̄ iso Esie, inyụn̄ ikwe ufan̄ inọ mmọ aba.” (Ediyarade 20:11) Nso idi “akamba afia ebekpo” emi? Enye idịghe n̄kpọ efen ikan itie ikpe “Abasi, Ebiereikpe ofụri ekondo.” (Mme Hebrew 12:23) Idahaemi enye eyekpe ikpe ọnọ ubonowo, ndibiere m̀mê anie edibọ ufọn oto uwa ufak Jesus.—Mark 10:45.
3. (a) Akpanikọ oro nte ke ẹdọhọ ke ebekpo Abasi edi “akamba” ye “afia” owụt nso? (b) Anie edikpe ikpe ke Usen Ikpe, ndien edikọn̄ọ ke nso?
3 Ebekpo Abasi edi “akamba,” ọsọn̄ọde owụt ubom Jehovah nte Ọbọn̄ Andikara, ebekpo emi onyụn̄ edi “afia,” odụride ntịn̄enyịn owụt anana-ndo edinen ido esie. Enye edi n̄kponn̄kan Ebiereikpe ubonowo. (Psalm 19:7-11; Isaiah 33:22; 51:5, 8) Nte ededi, enye ama ayak utom ubiereikpe ọnọ Jesus Christ: “Ete inyụn̄ ikpehe ikpe baba owo kiet, edi akayak kpukpru edibiere ikpe esịn Eyen ke ubọk.” (John 5:22) Jesus odu ye mme nsan̄a esie owo 144,000, ẹmi ẹkeyakde “ubiere-ikpe ẹsịn mmọ ke ubọk . . . ke thousand isua.” (Ediyarade 20:4) Kpa ye oro, edi mme edumbet Jehovah ẹbiere se iditịbede inọ owo kiet kiet ke Usen Ikpe.
4. ‘Isọn̄ ye ikpaenyọn̄ ndifen̄e n̄kpọn̄ iso Esie’ ọwọrọ nso?
4 Didie ke edi nte ke “isọn̄ ye ikpaenyọn̄ [ẹma ẹfen̄e] ẹkpọn̄ iso Esie”? Emi edi kpasụk ikpaenyọn̄ oro ẹkefụtde nte ikpan̄wed ke ini ẹdianarede ọyọhọ ufịkn̄kpọ itiokiet—kpa mme odudu ukara owo oro ‘ẹkemụmde ẹnịm ẹnọ ikan̄; ẹkpeme ẹnịm ẹnọ usen eke ẹdikpede ikpe ẹdinyụn̄ ẹsobode mbon oro mîbakke Abasi.’ (Ediyarade 6:14; 2 Peter 3:7) Isọn̄ oro edi editịm n̄kpọ emi odude ke idak ukara emi. (Ediyarade 8:7) Nsobo unam emi ye ndidem isọn̄ ye udịmekọn̄ mmọ, ọkọrọ ye mmọemi ẹbọde idiọn̄ọ unam oro ye mbon oro ẹtuakde ibuot ẹnọ mbiet esie, omonịm idiọn̄ọ edifehe oro isọn̄ ye ikpaenyọn̄ ẹfen̄ede ẹkpọn̄ iso esie. (Ediyarade 19:19-21) Ke ẹma ẹkebiere ikpe ẹnọ isọn̄ ye ikpaenyọn̄ Satan, Akwa Ebiereikpe onịm Usen Ikpe en̄wen.
Usen Ikpe eke Tọsịn Isua
5. Ke akpa isọn̄ ye akpa enyọn̄ ẹma ẹkefen̄e ẹkpọn̄ iso Esie, mbon oro ẹsụhọde man ẹkpe ikpe mmọ ẹdi mmanie?
5 Mmanie ẹsụhọ oro ẹdikpede ikpe mmọ ke akpa isọn̄ ye akpa ikpaenyọn̄ ẹma ẹkebe ẹfep? Idịghe nsụhọ eke owo 144,000 ẹmi ẹyetde aran, koro ẹma ẹkpekpe ikpe mmọemi ẹnyụn̄ ẹfịk mmọ idiọn̄ọ. Edieke owo ekededi ke otu mbon oro ẹyetde aran osụk odude uwem ke isọn̄ ke Armageddon ama okokụre, ana mmọ ẹkpan̄a esisịt ini ke oro ebede ẹnyụn̄ ẹbọ utịp mmọ ke heaven oto ediset ke n̄kpa. (1 Peter 4:17; Ediyarade 7:2-4) Nte ededi, ediwak miliọn akwa otuowo oro idahaemi ẹwọrọde ke akwa ukụt ẹda an̄wan̄wa “ke iso ebekpo” oro. Ẹma ẹbabat mmọemi ke edinen ndinyene ubọhọ ke ntak mbuọtidem mmọ ke iyịp oro Jesus ọkọduọkde, edi ana ikpe mmọ akaiso ke ofụri tọsịn isua oro nte Jesus akade iso ndida mmọ usụn̄ n̄ka “idịm-mmọn̄ uwem.” Adan̄aoro, ke ẹma ẹkefiak ẹwụk mmọ ke mfọnmma idaha eke owo ẹnyụn̄ ẹdomo mmọ ke oro ebede, ẹyebat mmọ ke edinen ke ọyọhọ ọyọhọ usụn̄. (Ediyarade 7:9, 10, 14, 17) Ke tọsịn isua oro, ukem ntre oyoyom ẹkpe ikpe nditọ oro ẹbọhọde akwa ukụt ye nditọ ekededi oro ẹmanade ẹdụk akwa otuowo ke ini Ukara Tọsịn Isua.—Men Genesis 1:28; 9:7; 1 Corinth 7:14 domo.
6. (a) Ewe udịmowo ke John okụt, ndien ikọ ẹmi “ikpọ ye n̄kpri” ẹwụt nso? (b) Didie ke ẹdinam anana-ibat miliọn owo oro Abasi enyenede mmọ ke ekikere ẹset ẹdi, nte eyịghe mîdụhe?
6 John, nte ededi, okụt udịmowo oro enen̄erede awak akan akwa otuowo oro ẹbọhọde. Emi eyedọk osịm ediwak tọsịn miliọn! “Ndien n̄kụt mme akpa-n̄kpa, ikpọ ye n̄kpri, nte ẹdade ke iso ebekpo. Ndien ẹkûbọde mme n̄wed.” (Ediyarade 20:12a) “Ikpọ ye n̄kpri” ẹmi ẹsịne mme ọwọrọiso owo ọkọrọ ye mme usụhọde owo oro ẹkedude uwem ẹnyụn̄ ẹkpan̄a ke isọn̄ emi ke isua 6,000 ẹmi ẹkebede. Ke Gospel oro apostle John ekewetde esisịt ini ke ama okokụre Ediyarade, Jesus ama etịn̄ aban̄a Ete esie ete: “Enye omonyụn̄ ọnọ Eyen [Jesus] odudu ndidi ebiereikpe, koro Enye edide Eyen Owo. Ẹkûyịk n̄kpọ emi, koro ini ke edi eke kpukpru mme andidu ke udi ẹdikopde Enye uyo ẹwọn̄ọ ẹdi.” (John 5:27-29) Nso utịbe utịbe utom—edisio n̄kpa ye ubụkokpo mfep ke ofụri mbụk! Nte eyịghe mîdụhe, ẹyenam anana-ibat miliọn owo oro Abasi enyenede mmọ ke ekikere ẹset ẹdi sụn̄sụn̄ man akwa otuowo—oro ẹdide ibat ibat ke ẹmende ẹdomo—ẹkpekeme ndikọk mme mfịna oro ẹkemede ndidemede sia mbon oro ẹnamde ẹset mi ke akpa ifet ẹkemede nditiene n̄kani usụn̄uwem mmọ, ye mmemme ye edu obụkidem esie.
Mmanie ke Ẹnam Ẹset Ẹnyụn̄ Ẹkpe Ikpe Mmọ?
7, 8. (a) Nso n̄wed ke ẹkûbọde, nso inyụn̄ ida itie ke oro ebede? (b) Mmanie ke ediset ke n̄kpa mîdidụhe inọ?
7 John adian do ete: “Ẹnyụn̄ ẹkûbọde n̄wed en̄wen, emi edide n̄wed uwem; ẹnyụn̄ ẹda se ẹwetde ẹsịn ke n̄wed oro ẹkpe ikpe mme akpa-n̄kpa, nte ekemde ye se mmọ ẹkenamde. Ndien inyan̄ ibom asana mme akpa-n̄kpa ẹmi ẹdude ke esịt ayak; n̄kpa ye obio ekpo [“n̄kpa ye Hades,” NW] ẹnyụn̄ ẹsana mme akpa-n̄kpa mmọ ẹyak: ndien ẹkpe ikpe kpukpru owo nte ekemde ye se mmọ ẹkenamde.” (Ediyarade 20:12b, 13) Kpa n̄kpọ ndise kiet oro akpade owo idem ke akpanikọ! ‘Inyan̄ibom, n̄kpa, ye Hades, kiet kiet enyene udeme, edi tịmfiọk ete ke mme enyịn̄ ẹmi inyeneke isio isio ebuana. a Jonah, ke ini okodude ke idịbi iyak, ndien ke ntre okodude ke ufọt inyan̄ibom, ama etịn̄ aban̄a idemesie nte idude ke Sheol, m̀mê Hades. (Jonah 2:2, NW) Edieke n̄kpa oro otode Adam omụmde owo akama, do etie nte enye n̄ko odu ke Hades. Mme ikọ prọfesi ẹmi ẹnọ ata nsọn̄ọ nte ke idụhe owo ndomokiet oro ẹdifrede enyịn.
8 Ke akpanikọ, odu mbon oro owo mîdinamke ẹset, ẹmi owo mîdiọn̄ọke ibat mmọ. Mme scribe ye mme Pharisee ẹmi mîkakabakede esịt, oro ẹkesịnde Jesus ye mme apostle, “owo eke edide ata abiat-ibet” eke ido ukpono, ye mme Christian oro ẹma ẹkeyet aran edi “ekem mmọ ẹdifiak edem” ẹdu ke otu mbon ẹmi. (2 Thessalonica 2:3; Mme Hebrew 6:4-6; Matthew 23:29-33) Jesus n̄ko ama etịn̄ aban̄a mbon mbietebot oro ẹdude ke ini utịt ererimbot emi, oro ẹkade ẹkedụk “nsinsi ikan̄, emi ẹkenịmde ẹnọ Satan ye mme angel esie,” oro edi, ‘nsinsi edisịbe mfep.’ (Matthew 25:41, 46) Ediset ke n̄kpa idụhe inọ mmọemi!
9. Didie ke apostle Paul owụt ete ke ẹyewụt ndusụk owo san̄asan̄a mfọnido ke ediset ke n̄kpa, ndien mmanie ẹbuana ke otu ẹmi?
9 Ke n̄kan̄ eken, ke ediset ke n̄kpa oro ẹyewụt ndusụk owo san̄asan̄a mfọnido. Apostle Paul ama owụt emi ke ini enye ọkọdọhọde ete: “Mmonyụn̄ ndori enyịn ke Abasi . . . nte, nti owo ye mme idiọk owo ẹyeset ke n̄kpa.” (Utom 24:15) Kaban̄a ediset ke n̄kpa eke isọn̄, “nti owo” oro ẹyesịne mme anam-akpanikọ iren ye iban eke eset—Abraham, Rahab, ye ediwak mbon eken—oro ẹkebatde mmọ ke edinen ndinyene itie-ufan ye Abasi. (James 2:21, 23, 25) Ndinen erọn̄ en̄wen oro ẹkekpan̄ade nte mme anam-akpanikọ nnọ Jehovah ke eyomfịn ẹyesịne ke otu emi. Anaedi ẹyenam kpukpru utọ mbon nsọn̄ọnda oro ẹbak ẹset ke n̄kpa ke ini Ukara Tọsịn Isua eke Jesus. (Job 14:13-15; 27:5; Daniel 12:13; Mme Hebrew 11:35, 39, 40) Nte eyịghe mîdụhe, ediwak ke otu ndinen owo oro ẹsetde ke n̄kpa mi ẹyedi se ẹnọde san̄asan̄a ifetutom ndise mban̄a akwa utom edifiak n̄wụk ke Paradise.—Psalm 45:16; men Isaiah 32:1, 16-18; 61:5; 65:21-23 domo.
10. Ke otu mbon oro ẹdinamde ẹset ke n̄kpa, mmanie ẹdi “mme idiọk owo”?
10 Mmanie, ndien, ẹdi “mme idiọk owo” oro ẹsiakde ke Utom Mme Apostle 24:15? Mmọemi ẹyesịne akwa udịm ubonowo oro ẹkekpan̄ade ke ofụri eyo ẹmi ẹkebede, akpan akpan mbon oro ẹkedude uwem ke “ini ndisịme.” (Utom 17:30) Mmọemi, ke ntak ebiet emi mmọ ẹkemanade m̀mê ini emi mmọ ẹkedude uwem, ikenyeneke ifet ndikpep n̄kopitem nnọ uduak Jehovah. Adianade do, ekeme ndidi odu ndusụk mmọ oro ẹkekopde etop edinyan̄a edi mîkanamke n̄kpọ ọyọhọ ọyọhọ iban̄a ke ini oro m̀mê oro ẹkekpan̄ade mbemiso mmọ ẹkenamde n̄kọri ẹsịm uyakidem nnọ ye baptism. Ke ediset ke n̄kpa, utọ mbon oro ẹyenyene ndinam mme n̄kaiso ukpụhọde ke ekikere ye ke usụn̄uwem mmọ edieke anade mmọ ẹbọ ufọn ẹto ifet emi man ẹnyene nsinsi uwem.
N̄wed Uwem
11. (a) Nso idi “n̄wed uwem” oro, ndien enyịn̄ mmanie ke ẹwet ke n̄wed emi? (b) Ntak emi ẹdikûbọrede n̄wed uwem ke ini Ukara Tọsịn Isua?
11 John etịn̄ aban̄a “n̄wed uwem.” Emi edi n̄wetnnịm n̄kpọ aban̄ade mbon ẹmi ẹdude ke udịm ndibọ uwem nsinsi nto Jehovah. Ke n̄wed emi ẹma ẹwet enyịn̄ nditọete Jesus oro ẹyetde aran, eke akwa otuowo, ye eke mme anam-akpanikọ eke eset, utọ nte Moses. (Exodus 32:32, 33; Daniel 12:1; Ediyarade 3:5) Mi kan̄a, ke n̄wed uwem emi owo iwetke enyịn̄ owo baba kiet ke otu “mme idiọk owo” oro ẹnamde ẹset ke n̄kpa. Ntre ke Ukara Tọsịn Isua ke ẹdikûbọrede n̄wed uwem emi man ẹkpewet enyịn̄ mbon eken oro ẹdide ẹdidot. Ẹmen mbon oro owo mîwetke enyịn̄ mmọ isịn ke ikpan̄wed, m̀mê n̄wed uwem emi “ẹduọk ẹsịn ke akwa n̄kpọdiọhọ ikan̄.”—Ediyarade 20:15; men Mme Hebrew 3:19 domo.
12. Nso idibiere m̀mê owo anam ẹwet enyịn̄ esie ẹsịn ke n̄wed uwem oro ẹkûbọrede, ndien didie ke Ebiereikpe oro Jehovah ekemekde okonịm uwụtn̄kpọ?
12 Nso, ndien, idibiere m̀mê owo anam ẹwet enyịn̄ esie ẹsịn ke n̄wed uwem oro ẹkûbọrede ke ini oro? Akpan n̄kpọ ndida mbiere edidi ukem nte ekedide ke eyo Adam ye Eve: nsụkibuot nnọ Jehovah. Kpa nte apostle John ekewetde ọnọ ẹsọk ekemmọ ndima Christian ete: “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.” (1 John 2:4-7, 17) Ke n̄kpọ aban̄ade nsụkibuot, Ebiereikpe oro Jehovah ekemekde ama onịm uwụtn̄kpọ: “Okposụkedi nte [Jesus] edide Eyen, Enye [ama] ekpep nsụkibuot ọfiọk oto ke ndutụhọ eke Enye okụtde; ndien ke ẹma ẹkenam Enye ọfọn ama, Enye akabade edi ntak nsinsi edinyan̄a ọnọ kpukpru owo ẹmi ẹkopde uyo Esie.”—Mme Hebrew 5:8, 9.
Ndikûbọde Mme N̄wed Eken
13. Didie ke ana mbon oro ẹnamde ẹset ke n̄kpa ẹwụt nsụkibuot mmọ, ndien mme edumbet ewe ke ana mmọ ẹtiene?
13 Didie ke ana mbon oro ẹnamde ẹset mi ẹwụt nsụkibuot mmọ? Jesus ke idemesie ama anyan ubọk owụt ikpọ ewụhọ iba oro, ọdọhọde ete: “Ebeiso edi, Ẹkop O Israel, Jehovah Abasi nnyịn, edi Jehovah kiet. Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo. Udiana akpa edi emi, Ma mbọhọidụn̄ fo nte idemfo.” (Mark 12:29-31) Mme edumbet Jehovah ẹmi ẹma ẹkewụk mfọn mfọn ẹdu n̄ko oro anade mmọ ẹtiene, utọ nte editre uyịp inọ, usu nsu, uwotowo, ye oburobụt ido.—1 Timothy 1:8-11; Ediyarade 21:8.
14. Mme n̄wed en̄wen ewe ke ẹkûbọrede, ndien mmọ ẹdọn̄ọ nso?
14 Nte ededi, idahaemi ke John osụk okụre nditịn̄ mban̄a mme n̄wed eken oro ẹdikûbọrede ke ini Ukara Tọsịn Isua. (Ediyarade 20:12) Mmọemi ẹdidi nso? Ke ndusụk ini, Jehovah esinọ mme akpan item ke mme akpan idaha. Ke uwụtn̄kpọ, ke eyo Moses, enye ama ọnọ ọyọhọ udịm udịm ibet oro ọkọwọrọde uwem ọnọ nditọ Israel edieke mmọ ẹdinịmde mme ibet ẹmi. (Deuteronomy 4:40; 32:45-47) Ke akpa isua ikie, ẹma ẹnọ mbufa item ndin̄wam mme anam-akpanikọ ẹtiene mme edumbet Jehovah ke idak editịm n̄kpọ Christian. (Matthew 28:19, 20; John 13:34; 15:9, 10) Idahaemi John obụk ete ke “ẹda se ẹwetde ẹsịn ke n̄wed oro ẹkpe ikpe mme akpan̄kpa, nte ekemde ye se mmọ ẹkenamde.” Nte an̄wan̄ade, adan̄aoro, edikûbọde mme n̄wed ẹmi eyenọ mme ọyọhọ ọyọhọ n̄kpọ oro Jehovah oyomde oto ubonowo ke ini tọsịn isua oro. Ke ndida mme ibet ye mme ewụhọ ẹdude ke mme n̄wed ẹmi nsịn ke edinam ke uwem mmọ, mbon n̄kopitem ẹkeme ndinam eyouwem mmọ ebịghi, ke akpatre ẹsịmde nsinsi uwem.
15. Nso orụk ubịnikọt unọ ukpep edidi se ẹyomde ke ini ediset ke n̄kpa, ndien etie nte ediset ke n̄kpa oro edikaiso didie?
15 Nso ntatara ubịnikọt unọ ukpep ukara Abasi ke emi ediyom ntem! Ke 2005 Mme Ntiense Jehovah ke ofụri ererimbot ẹma ẹnịm ukpepn̄kpọ Bible ẹwakde ẹbe 6,061,534 ke ẹbaharede ukem ukem ke nsio nsio ebiet. Edi ke ini ediset ke n̄kpa, nte eyịghe mîdụhe, ẹyenịm anana-ibat miliọn ukpepn̄kpọ, ẹkọn̄ọde ke Bible ye mbufa n̄wed! Ẹyom kpukpru ikọt Abasi ẹkabade ẹdi mme andikpep ẹnyụn̄ ẹsịn̄ede idemmọ. Mbon oro ẹnamde ẹset ke n̄kpa, nte mmọ ẹkọride, ye unana eyịghe, ẹyebuana ke akwa ndutịm unọ ukpep emi. Eyedi ediset ke n̄kpa emi edikaiso ke usụn̄ oro mbon ẹmi ẹdude uwem ẹdikemede ndidara nnyụn̄ nteme n̄kani mbonufọk mmọ ye mme ọdiọn̄ọ, ẹmi n̄ko ke n̄kan̄ mmọ, ẹdikemede ndidara nnyụn̄ nteme mbon en̄wen. (Men 1 Corinth 15:19-28, 58 domo.) Mme Ntiense Jehovah oro ẹwakde ẹbe miliọn itiokiet, ẹmi ẹsọn̄de idem ke ndisuan akpanikọ mfịn ke ẹsịn eti itiat idakisọn̄ ẹnọ mme ifetutom oro mmọ ẹdoride enyịn ndinyene ke ini ediset ke n̄kpa.—Isaiah 50:4; 54:13.
16. (a) Enyịn̄ mmanie ke owo mîdiwetke isịn ke ikpan̄wed, m̀mê n̄wed uwem? (b) Ediset ke n̄kpa mmanie edidi eke “uwem”?
16 Kaban̄a ediset ke n̄kpa eke isọn̄, Jesus ọkọdọhọ ete ke “mmọ emi ẹkenamde se ifọnde ẹyewọn̄ọ ẹdụk ke ediset uwem, mmọ emi ẹkenamde se idiọkde ẹyenyụn̄ ẹwọn̄ọ ẹdụk ke ediset ikpe.” Mi “uwem” ye “ikpe” ẹkpụhọde ye kiet eken, owụtde ete ke ẹyebiere ikpe ẹnọ mbon oro ẹnamde ẹset ke n̄kpa, ẹmi “ẹkenamde se idiọkde” ke ẹma ẹketeme mmọ se idude ke N̄wed Abasi ye ke mme ikpan̄wed oro, nte mbon ẹmi mîdotke ndidu uwem. Owo idiwetke enyịn̄ mmọ isịn ke ikpan̄wed m̀mê n̄wed uwem oro. (John 5:29) Emi eyetịbe n̄ko ọnọ owo ekededi oro ke akpa eketienede usụn̄ akpanikọ edi, ke ndusụk ntak, ọwọn̄ọrede ọkpọn̄ ke ini Ukara Tọsịn Isua. Ẹkeme ndisọhi mme enyịn̄ mfep. (Exodus 32:32, 33) Ke n̄kan̄ eken, mbon oro ke nsụkibuot ẹditienede mme n̄kpọ oro ẹwetde ke esịt ikpan̄wed ẹmi ẹyesụk ẹkaiso ẹnyene enyịn̄ mmọ ke n̄wetnnịm n̄kpọ emi, kpa n̄wed uwem, ẹnyụn̄ ẹkaiso ẹdu uwem. Ke n̄kan̄ mmọ, ediset ke n̄kpa eyedi eke “uwem.”
Utịt N̄kpa ye Hades
17. (a) Ewe akama-n̄kpaidem edinam ke John etịn̄ aban̄a? (b) Ini ewe ke ẹnam Hades ana ukpọk? (c) Ini ewe ke ẹdimen n̄kpa oro otode Adam “ẹduọk ẹsịn ke akwa n̄kpọdiọhọ ikan̄”?
17 Edikem, John obụk aban̄a n̄kpọ oro akamade n̄kpaidem ke akpanikọ! “Ẹnyụn̄ ẹmen n̄kpa ye obio ekpo [“n̄kpa ye Hades,” NW] ẹduọk ke akwa n̄kpọdiọhọ ikan̄. Emi edi udiana n̄kpa, kpa akwa n̄kpọdiọhọ ikan̄. Ndien ẹmen owo ekededi eke mîkewetke enyịn̄ esie isịn ke n̄wed uwem ẹduọk ẹsịn ke akwa n̄kpọdiọhọ ikan̄.” (Ediyarade 20:14, 15) Etisịm utịt Usen Ikpe eke tọsịn isua, ẹma ẹsosio “n̄kpa ye Hades” ẹfep ofụri ofụri. Ntak emi adade tọsịn isua? Ẹyenam Hades, kpa udi ofụri ubonowo, ana ukpọk ke ini ẹnamde akpatre owo oro Abasi enyenede enye ke ekikere eset ke n̄kpa. Edi adan̄aini nte owo ekededi enyenede ntọi ndammana idiọkn̄kpọ, n̄kpa oro otode Adam osụk ododu ye mmọ. Ẹyeyom kpukpru mbon oro ẹnamde ẹset ke isọn̄, ọkọrọ ye akwa otuowo oro ẹbọhọde Armageddon, ẹsụk ibuot ẹnọ se ẹwetde ẹsịn ke ikpan̄wed ẹmi tutu ẹda ufọn ufak Jesus ẹnam n̄kpọ ọyọhọ ọyọhọ ndisio udọn̄ọ, usọn̄, ye mme ndammana ndo eken mfep. Adan̄aoro ẹyemen n̄kpa oro otode Adam, ọkọrọ ye Hades, “ẹduọk ẹsịn ke akwa n̄kpọdiọhọ ikan̄.” Mmọ ẹyebe ẹfep ke nsinsi!
18. (a) Didie ke apostle Paul etịn̄ aban̄a edikụt unen ke ukara oro Jesus akarade nte Edidem? (b) Nso ke Jesus anam ye mfọnmma ubonowo? (c) Mme n̄kpọ en̄wen ewe ida itie ke utịt tọsịn isua?
18 Ntem, ndutịm oro apostle Paul etịn̄de aban̄a ke n̄wed esie oro ọkọnọde ẹsọk mbon Corinth eyesu ofụri ofụri: “Koro [Jesus] enyene ndida ubọn̄ tutu Enye [“Abasi,” NW] onụk kpukpru mme asua Esie ke idak ikpat. Akpatre asua emi Enye edisobode edi n̄kpa [otode Adam].” Nso efen iditịbe? “Ke ini kpukpru n̄kpọ ẹdisụhọde ẹsịne Enye ke idak ikpat, adan̄aoro ndien ke Eyen ke Idem Esie edisụhọ ọnọ Enye emi akadade kpukpru n̄kpọ adak Enye ke ikpat.” Ke nditịn̄ ke usụn̄ en̄wen, Jesus “[ayak] itie-ubọn̄ Esie ọnọ Abasi, kpa Ete Esie.” (1 Corinth 15:24-28) Ih, Jesus, ke ama akakan n̄kpa oro otode Adam ebe ke ufọn uwa ufak esie, eyeyak mfọnmma ubonowo ọnọ Ete esie, Jehovah. Nte an̄wan̄ade, edi ke ọtọ emi, ke utịt tọsịn isua, ke ẹkpọhọde Satan ẹyak man akpatre udomo onyụn̄ ada itie ndibiere m̀mê enyịn̄ mmanie ẹdisụhọ tak-tak nte ẹwetde ke n̄wed uwem. “Ẹsịn̄ede idem mbufo ọkpọsọn̄ ọkpọsọn̄” man enyịn̄ mbufo okpodu ke otu mmọ!—Luke 13:24, NW; Ediyarade 20:5.
[Mme Ikọ idakisọn̄]
a Ndiọi mbio isọn̄ oro ẹketakde ke Ukwọ eke eyo Noah ikpesịneke ke otu mbon oro ẹnamde ẹset ẹto inyan̄ibom; nsobo oro ekedi tak-tak, nte emi ubiereikpe Jehovah edidide ke akwa ukụt.—Matthew 25:41, 46; 2 Peter 3:5-7.
[Mme Mbụme Ukpepn̄kpọ]
[Ndise ke page 298]
“Mme idiọkowo” oro ẹnamde ẹset, ẹmi ẹkopde item n̄wed oro ẹkûbọrede ke ini Ukara Tọsịn Isua ẹkeme ndinam ẹwet enyịn̄ mmọ n̄ko ẹsịn ke n̄wed uwem