Ibuot 9

‘Christ Edi Odudu Abasi’

1-3. (a) Nso enyene-ndịk idaha ke mme mbet ẹkesobo ke Inyan̄ Galilee, ndien nso ke Jesus akanam? (b) Ntak emi enende ndikot Jesus, ‘Christ odudu Abasi’?

 NDỊK ama anam mme mbet. Mmọ ẹkewat ubom ẹbe Inyan̄ Galilee ke ini oyobio eketịbede ke mbuari. Eyịghe idụhe nte ke mmọ ẹma ẹsisobo oyobio ke isuo emi—kamse, ndusụk mmọ ẹkedi mme ọkọiyak oro ẹkenyenede mbufiọk. a (Matthew 4:18, 19) Edi emi ekedi “akwa oyobio,” ndien enye ama ọsọsọp anam akpa adaha. Mme owo emi ẹma ẹtịme ndinen̄ede ubom nnịm, edi oyobio oro ama ọsọn̄ odudu akan mmọ. Mbufụt onyụn̄ adaha “odụk ke esịt ubom,” mmọn̄ onyụn̄ ọtọn̄ọ ndiyọhọ ubom. Kpa ye editịm emi, Jesus ke ekede ọkpọsọn̄ idap ke etak ubom, ke ntak ọkpọsọn̄ mmemidem ke ama ekekpep otuowo n̄kpọ ama ke usen oro. Ke ẹkopde ndịk ẹban̄a uwem mmọ, mme mbet ẹma ẹdemede enye ke idap, ẹkpe enye ubọk ẹte: “Ọbọn̄, nyan̄a nnyịn; imọn̄ itak”!—Mark 4:35-38; Matthew 8:23-25.

² Jesus ikokopke ndịk. Ye ọkpọsọn̄ uko, enye ama asua ọnọ ofụm ye inyan̄ ete: “Dobo, na sụn̄”! Ke ndondo oro, ofụm ye inyan̄ ẹkop uyo esie—mbufụt oro etre, oyobio oro onyụn̄ odobo, ndien “mmọn̄ onyụn̄ ana sụn̄-n̄.” Akamba ndịk ama anam mme mbet esie. Mmọ ẹnyụn̄ ẹneme ye kiet eken ẹte: “Anie nan̄a edi emi?” Mmọn̄ọ, nso orụk owo ekeme ndisua nnọ ofụm ye inyan̄ nte n̄kpọ eke enye aduatde eyenọwọn̄ nsọn̄ibuot?—Mark 4:39-41; Matthew 8:26, 27.

³ Edi Jesus ikedịghe ikpîkpu owo. Jehovah akada odudu esie anam utom ke idem Jesus onyụn̄ ada enye owụt odudu esie ke  n̄wọrọnda usụn̄. Nte odotde, apostle Paul oro ẹkenọde odudu spirit ọkọdọhọ ete ke “Christ emi edi odudu Abasi.” (1 Corinth 1:24) Ke nso usụn̄ ke odudu Abasi okowụt idem ke Jesus? Ndien didie ke usụn̄ nte Jesus adade odudu esie anam n̄kpọ ekeme nditụk uwem nnyịn?

Odudu Ikpọn̄-Ikpọn̄ Edibon Eyen Abasi

4, 5. (a) Nso odudu ke Jehovah akayak ọnọ ikpọn̄-ikpọn̄ edibon Eyen esie? (b) Didie ke ẹketịm Eyen emi idem ndinam uduak Ete esie aban̄ade edibotn̄kpọ?

⁴ Kere ban̄a odudu oro Jesus ekenyenede mbemiso edide owo. Jehovah ama owụt “nsinsi odudu” esie ke ini enye okobotde ikpọn̄-ikpọn̄ edibon Eyen esie, emi ẹkedide ẹdidiọn̄ọ nte Jesus Christ. (Rome 1:20; Colossae 1:15) Ke oro ebede, Jehovah ama ayak akwa odudu ọnọ Eyen emi, ọnọde enye utom edinam uduak Esie aban̄ade edibotn̄kpọ. Kaban̄a Eyen emi, Bible ọdọhọ ete: “Oto ke Enye ẹkenam kpukpru n̄kpọ; ndien mîtoho ke Enye, inamke n̄kpọ baba kiet eke ẹkenamde.”—John 1:3.

⁵ Nnyịn ikemeke nditịm mfiọk nte utom oro okokponde. Kere ban̄a odudu oro ẹkeyomde man ẹbot ediwak miliọn n̄kpọsọn̄ angel, ekondo oro ẹkụtde ke enyịn ye ediwak miliọn otu ntantaọfiọn̄ esie, ye isọn̄ ye akpakịp orụk uwem oro ẹdude. Man anam utom emi, ikpọn̄-ikpọn̄ edibon Eyen emi ama enyene akakan odudu ke ekondo—kpa edisana spirit Abasi. Eyen emi ama enyene akwa idatesịt ke ndidi Etubom Anamutom, emi Jehovah akadade ndibot kpukpru n̄kpọ eken.—Mme N̄ke 8:22-31.

6. Nso odudu ke ẹkenọ Jesus ke enye ama akakpa onyụn̄ eset ke n̄kpa?

⁶ Nte ikpọn̄-ikpọn̄ edibon Eyen ama ọbọ odudu oro akam okponde akan oro? Ke Jesus ama akakpa onyụn̄ eset ke n̄kpa, enye ama ọdọhọ ete: “Ẹnọ Mi ofụri odudu ke heaven ye ke isọn̄.” (Matthew 28:18) Ih, ẹma ẹnọ Jesus ukeme ye unen ndida odudu nnam n̄kpọ ke ofụri ekondo. Nte “Edidem ndidem ye Ọbọn̄ mbọn̄,” ẹma ẹnọ enye odudu “[ndisobo] kpukpru edikara ye kpukpru nsọn̄-uyo ye odudu”—se ẹkụtde ye se owo mîkwe—oro ẹbiọn̄ọde Ete esie. (Ediyarade 19:16; 1 Corinth 15:24-26) Abasi “isụkke baba n̄kpọ kiet eke mînịmke . . . ke idak” Jesus —oro edi, ke ẹsiode Jehovah ke idemesie ẹfep.—Mme Hebrew 2:8; 1 Corinth 15:27.

7. Ntak emi nnyịn ikemede ndinịm ke akpanikọ nte ke Jesus ididaha odudu oro Jehovah ọnọde enye inam n̄kpọ ke ukwan̄ usụn̄?

⁷ Nte oyom nnyịn itịmede esịt ke Jesus ekeme ndida odudu esie nnam n̄kpọ ke ukwan̄ usụn̄? Baba-o! Jesus enen̄ede ama Ete esie idinyụn̄ inamke n̄kpọ ndomokiet ndiyat enye esịt. (John 8:29; 14:31) Jesus etịm ọfiọk ete ke akananam Jehovah idaha ata ọkpọsọn̄ odudu esie inam n̄kpọ ke ukwan̄ usụn̄. Jesus okụt ke idemesie nte ke Jehovah oyom mme ifet ‘ndisọn̄ọ mmụm mmọ eke ofụri esịt mmọ ẹdude ye enye n̄kama.’ (2 Chronicles 16:9) Ke akpanikọ, Jesus ama ubonowo nte Ete esie, ntre nnyịn imekeme ndinyene mbuọtidem nte ke Jesus ayaka iso ada odudu esie anam n̄kpọ ke eti usụn̄. (John 13:1) Jesus ọwọrọ eti etop ke afan̄ emi. Ẹyak nnyịn ikere iban̄a odudu oro enye ekenyenede ke adan̄aemi enye okodude ke isọn̄ ye se ikonụkde enye ndida odudu emi nnam n̄kpọ.

‘Enyene Odudu ke Ikọ-Inua’

8. Ke ẹma ẹkeyet enye aran, ẹkenọ Jesus odudu ndinam nso, ndien didie ke enye akada odudu esie anam n̄kpọ?

⁸ Nte an̄wan̄ade, Jesus ikanamke utịben̄kpọ ndomokiet ke ini enye ekedide eyenọwọn̄ ke Nazareth. Edi n̄kpọ ama okpụhọde ke enye ama akana baptism ke isua 29 E.N., ke esịmde n̄kpọ nte isua 30 ke emana. (Luke 3:21-23) Bible etịn̄ ọnọ nnyịn ete: “Abasi ekenịm Jesus eyen Nazareth ke Edisana Spirit ye odudu, man Enye asan̄a ke ebiet ke ebiet anam ufọn ọnọ owo, onyụn̄ anam kpukpru mmọ emi Satan otụhọrede ẹkop nsọn̄idem.” (Utom 10:38) “Anam ufọn ọnọ owo”—nte oro iwụtke ke Jesus akada odudu esie anam n̄kpọ ke eti usụn̄? Ke ẹma ẹkeyet enye aran, enye ama akabade edi “prophet eke enyenede odudu ke ubọkutom ye ke ikọ-inua.”—Luke 24:19.

9-11. (a) M̀mọ̀n̄ ke Jesus ọkọnọ ekese ukpep esie, ndien nso n̄kpọ-ata ke enye okosobo? (b) Ntak emi idem akakpade otuowo aban̄a ukpepn̄kpọ Jesus?

⁹ Didie ke Jesus ekenyene odudu ke ikọinua? Enye ekesiwak  ndikpep owo n̄kpọ ke eferife—ke mbeninyan̄ ye mben obot ọkọrọ ye ke mme efak ye an̄waurua. (Mark 6:53-56; Luke 5:1-3; 13:26) Mme andikpan̄ utọn̄ nnọ enye ẹkpekekeme ndidaha n̄kpọn̄ enye edieke mme ikọ esie mîkedemekede mmọ udọn̄. Ke ini oro mme n̄wed oro ẹmịn̄de-mịn̄ mîkodụhe, mme andikpan̄ utọn̄ oro ẹwụtde esịtekọm ẹkenyene ndisịn ikọ oro enye eketịn̄de ke esịt ye ekikere mmọ. Ntre ukpepn̄kpọ Jesus ekenyene ndinen̄ede ndemede udọn̄, ntịm n̄n̄wan̄a, nnyụn̄ ndi se ẹsọpde ẹti. Edi n̄kpọ-ata emi ikedịghe mfịna inọ Jesus. Ke uwụtn̄kpọ, kere ban̄a Ukwọrọikọ esie oro ke Obot.

¹⁰ Usenubọk kiet ke ntọn̄ọ ntọn̄ọ isua 31 E.N., otuowo ẹma ẹboho ke enyọn̄ obot oro ekperede Inyan̄ Galilee. Ndusụk owo ẹketo Judea ye Jerusalem, oro oyomde usụn̄ ke n̄kpọ nte kilomita 100 esịm 110. Mbon eken ẹketo mbeninyan̄ Tyre ye Sidon ke n̄kan̄ edem edere. Ediwak mbon udọn̄ọ ẹma ẹsịk ẹkpere Jesus man ẹtụk enye, ndien enye ama anam udọn̄ọ okụre kpukpru mmọ. Ke ini owo ndomokiet oro enen̄erede ọdọn̄ọ mîkodụhe aba ke otu mmọ, enye ama ọtọn̄ọ ndikpep mmọ n̄kpọ. (Luke 6:17-19) Ke ukperedem, ke ini enye eketịn̄de ikọ ama, idem ama akpa mmọ ke se mmọ ẹkekopde. Ntak-a?

¹¹ Ediwak isua ke ukperedem, owo oro okokopde ukwọrọikọ oro ekewet ete: “N̄kpaidem omụm ediwak owo oro aban̄a ukpepn̄kpọ Esie; koro Enye ekpep mmọ n̄kpọ nte owo emi enyenede odudu.” (Matthew 7:28, 29) Jesus eketịn̄ ikọ ye odudu oro okotụkde mmọ. Enye eketịn̄ ikọ ke ibuot Abasi onyụn̄ ada odudu Ikọ Abasi ọsọn̄ọ ukpepn̄kpọ esie. (John 7:16) Mme ikọ Jesus ẹma ẹn̄wan̄a, mme item esie ẹma ẹtụk owo, ndien n̄kọkibuot esie ikedịghe se ẹkemede ndifan̄a. Ikọ esie ẹma ẹtụk mme akpan mfịna ẹnyụn̄ ẹsịm esịt mme andikpan̄ utọn̄ nnọ enye. Enye ama ekpep mmọ nte ẹkpenyenede inemesịt, nte ẹkpebọn̄de akam, nte ẹkpeyomde Obio Ubọn̄ Abasi, ye nte ẹkpenyenede ini iso oro odude ke ifụre. (Matthew 5:3–7:27) Mme ikọ esie ẹma ẹdemede esịt mbon oro ẹkekopde biọn̄ akpanikọ ye edinen ido. Utọ mbon oro ẹma ẹnyịme ‘nditụk’  idemmọ nnyụn̄ n̄kpọnọde kpukpru n̄kpọ nnịm man ẹtiene enye. (Matthew 16:24; Luke 5:10, 11) Nso n̄kpọ ntiense ke emi ekedi ntem aban̄a odudu oro ikọ Jesus ekenyenede!

‘Enyene Odudu ke Ubọk-Utom’

12, 13. Ke nso usụn̄ ke Jesus ‘ekenyene odudu ke ubọk-utom,’ ndien nsio nsio orụk utịben̄kpọ ewe ke enye akanam?

¹² Jesus n̄ko ama “[enyene] odudu ke ubọk-utom.” (Luke 24:19) Mme Gospel ẹbụk se iwakde ibe akpan utịben̄kpọ 30 oro enye akanamde—kpukpru ke “odudu Jehovah.” b (Luke 5:17) Mme utịben̄kpọ Jesus ẹma ẹtụk uwem ediwak tọsịn owo. Utịben̄kpọ iba kpọt—edibọk owo 5,000 ndien ekem owo 4,000 “isịnke iban ye nditọwọn̄”—ẹma ẹbuana otuowo oro ẹkewakde ẹsịm n̄kpọ nte owo 20,000!—Matthew 14:13-21; 15:32-38.

¹³ Mme utịben̄kpọ Jesus ẹma ẹnen̄ede ẹwak orụk. Enye ama enyene odudu akan mme demon, ebịnde mmọ efep mmemmem mmemmem. (Luke 9:37-43) Enye ama enyene odudu ke idem mme n̄kpọ obot, anamde mmọn̄ akabade edi wine. (John 2:1-11) N̄kpaidem ama omụm mme mbet esie ke ini enye akasan̄ade ke enyọn̄ Inyan̄ Galilee. (John 6:18, 19) Enye ama enyene odudu ndikan udọn̄ọ, ọkọkde mme udọn̄ọ ndido idem, udọn̄ọ ọfiọn̄, ye udọn̄ọ oro ẹsịnde uwem ke itiendịk. (Mark 3:1-5; John 4:46-54) Enye ọkọkọk mme utọ udọn̄ọ oro ke nsio nsio usụn̄. Jesus ama ada ke anyan usụn̄ ọkọk ndusụk owo udọn̄ọ, ke adan̄aemi enye ke idemesie okotụkde-tụk mbon eken. (Matthew 8:2, 3, 5-13) Udọn̄ọ ndusụk owo okokụre ke ebe oro, eke mbon eken okokụre sụn̄sụn̄.—Mark 8:22-25; Luke 8:43, 44.

14. Ke mme idaha ewe ke Jesus okowụt ke imọ imenyene odudu ndikan n̄kpa?

¹⁴ Ke edide n̄wọrọnda, Jesus ama enyene odudu ndikan n̄kpa. Enye ama anam mme owo ẹset ke n̄kpa, ke idaha ita oro ẹwetde-wet ẹnịm, anamde ete ye eka ẹfiak ẹnyene eyenan̄wan  isua 12 mmọ, anamde ebeakpa afiak enyene ikpọn̄-ikpọn̄ eyen esie, onyụn̄ anamde nditọeka iban ẹfiak ẹnyene edima eyeneka mmọ eren. (Luke 7:11-16a; 8:49-56; John 11:38-44) Idaha ndomokiet ikọsọn̄ke ikan enye. Enye ama anam eyenan̄wan isua 12 eset ke n̄kpa esisịt ini ke eyenan̄wan emi ama akakpa. Enye ama anam eyeneren ebeakpa eset ke ubiomokpo, nte eyịghe mîdụhe kpa ke usen oro eyeneren oro akakpade. Enye ama onyụn̄ anam Lazarus eset ke udi ke usen inan̄ ẹma ẹkebe tọn̄ọ nte enye akakpa.

Edikama Odudu ke Unana Ibụk, nte Owụtde Ifiọk, ye Edikere Mban̄a

15, 16. Nso uyarade idu nte ke Jesus ikadaha odudu esie inam n̄kpọ ke ibụk?

¹⁵ Ndi emekeme ndikere nte ẹkpekedade odudu ẹnam n̄kpọ ke ukwan̄ usụn̄ edieke ẹkpekeyakde odudu oro Jesus enyenede ẹnọ mme anana-mfọnmma andikara? Edi Jesus ikanamke baba idiọkn̄kpọ kiet. (1 Peter 2:22) Enye ikayakde ibụk, udọn̄ ikpọ n̄kpọ, ye idiọkitọn̄ oro onụkde mme anana-mfọnmma owo ndida odudu mmọ nnọ mbon en̄wen unan ẹbiat enye.

¹⁶ Jesus ikadaha odudu esie inam n̄kpọ ke ibụk, akananam idaha enye inam n̄kpọ ke ufọn idemesie. Ke ini enye okokopde biọn̄, enye ama esịn ndinam itiat akabade edi uyo man enye ata. (Matthew 4:1-4) Enye ndikenyene esisịt n̄kpọ ekedi uyarade nte ke enye ikadaha odudu esie ifori idemesie ke n̄kan̄ eke obụk. (Matthew 8:20) Uyarade efen efen ẹdu ndiwụt nte ke mme utom odudu esie ikasan̄ake ye ibụk. Ke ini enye akanamde mme utịben̄kpọ, ndusụk n̄kpọ ẹma ẹtak enye. Ke ini enye akanamde mbon udọn̄ọ ẹkop nsọn̄idem, odudu ama ọwọrọ enye ke idem. Enye ama okop ini emi odudu oro ọkọwọrọde, idem ke ini owo kiet kpọt okotụkde enye man okop nsọn̄idem. (Mark 5:25-34) Kpa ye oro, enye ama ayak otuowo ẹtụk enye, ndien udọn̄ọ mmọ ama okụre. (Luke 6:19) Nso edu n̄waidem ke emi ekedi ntem!

17. Didie ke Jesus okowụt ete ke imọ ikada odudu imọ inam n̄kpọ nte owụtde ifiọk?

¹⁷ Jesus akada odudu esie anam n̄kpọ nte owụtde ifiọk.  Akananam enye ikanamke utom odudu nte ikpîkpu n̄kpọ ndise m̀mê anana-uduak n̄kpọ ndyọ. (Matthew 4:5-7) Enye ama esịn ndinam mme idiọn̄ọ n̄kukụre man oyụhọ idiọk udọn̄ Herod. (Luke 23:8, 9) Utu ke ndisuan etop mban̄a odudu esie, Jesus ama esiwak ndidọhọ mbon oro enye akanamde ẹkop nsọn̄idem ete ẹkûtịn̄ ẹnọ owo ndomokiet. (Mark 5:43; 7:36) Enye ikoyomke mme owo ẹda mbụk oro aduaide owo idem ẹsịm ubiere ẹban̄a imọ.—Matthew 12:15-19.

18-20. (a) Nso ikakara usụn̄ oro Jesus akadade odudu esie anam n̄kpọ? (b) Didie ke afo ekere aban̄a usụn̄ oro Jesus akadade anam inan kiet okop ikọ?

¹⁸ Okopodudu owo emi, Jesus, iketiehe nte mme andikara emi ẹdade odudu ẹnam n̄kpọ ye unana edikere mban̄a mme udọn̄ ye ndutụhọ mbon en̄wen. Jesus ama ekere aban̄a mme owo. Enye ndidada n̄kụt mbon ukụt ama enen̄ede otụk enye tutu onụk enye ndinam mmọ ẹbọhọ ndutụhọ mmọ. (Matthew 14:14) Enye ama ekere aban̄a mme ntụk ye udọn̄ mmọ, ndien ima ima edikere mban̄a emi ama akara usụn̄ oro enye akadade odudu esie anam n̄kpọ. Ẹkụt ata uwụtn̄kpọ emi otụkde owo ke idem ke Mark 7:31-37.

¹⁹ Ke idaha enye emi, ata ediwak otu owo ẹma ẹkụt Jesus ẹnyụn̄ ẹda ediwak mbon udọn̄ọ ẹsọk enye, enye onyụn̄ anam udọn̄ọ okụre kpukpru mmọ. (Matthew 15:29, 30) Edi Jesus ama osio owo kiet enịm onyụn̄ ọnọ enye akpan ntịn̄enyịn. Owo oro ekedi inan ikonyụn̄ ikemeke nditịn̄ ikọ. Ekeme ndidi Jesus ama okụt nte eren emi okopde nyekidem m̀mê bụt. Ke owụtde edikere mban̄a, Jesus ama ada owo oro ọwọrọ—esịk ọkpọn̄ otuowo—aka ke ndịbe ebiet. Ekem, Jesus ama anam ndusụk idiọn̄ọ ndiwụt owo oro se enye okoyomde ndinam. Enye ama “esịn enye nnuenubọk ke utọn̄, onyụn̄ ọkọk etap, otụk enye ke edeme.” c (Mark 7:33) Ekem, Jesus ama emenede  enyịn ese heaven onyụn̄ omụm mmụm ke akam. Mme edinam emi ẹyesian owo emi ẹte, ‘Se ami nyomde ndinam nnọ fi oto odudu Abasi.’ Ke akpatre, Jesus ama ọdọhọ ete: “Yak esịrede.” (Mark 7:34) Ekem utọn̄ owo oro ama esịrede, ndien enye ama ekeme nditịn̄ ikọ ọfọn.

²⁰ Otụk owo ke idem didie ntem ndifiọk nte ke kpa ye oro akadade odudu Abasi ọkọk mbon udọn̄ọ, Jesus ke mbọm ama ekere aban̄a mme ntụk mmọ! Nte idịghe n̄kpọ ndọn̄esịt ndifiọk nte ke Jehovah ayak Obio Ubọn̄ Messiah esịn ke ubọk utọ okop mbọm Andikara, oro enyenede edu edikere mban̄a do?

Ndamban̄a N̄kpọ Oro Editịbede ke Ini Iso

21, 22. (a) Nso ke mme utịben̄kpọ Jesus ẹkeda ẹban̄a? (b) Sia Jesus akarade oto-obot odudu, nso ke nnyịn ikeme ndidori enyịn mban̄a ke idak ukara Obio Ubọn̄ esie?

²¹ Mme utom odudu oro Jesus akanamde ke isọn̄ ẹkedi sụk ndamban̄a ikpọ edidiọn̄ oro ẹkam ẹdide ke iso ke idak ukara esie nte edidem. Ke obufa ererimbot Abasi, Jesus ayafiak anam mme utịben̄kpọ—edi ke ofụri ererimbot! Kere ban̄a ndusụk akama nduaidem idotenyịn ẹdide ke iso.

²² Jesus ayanam ebuana ke ufọt mme odu-uwem n̄kpọ ye n̄kann̄kụk afiak odu ke mfọnmma idaha. Ti ete ke enye ama owụt ke imọ imekeme ndikara oto-obot odudu ebe ke ndinam mbufụt inyan̄ odobo. Ke akpanikọ, ke idak ukara Obio Ubọn̄ Christ, ubonowo idinyeneke ntak baba kiet ndikop ndịk mban̄a unọmọ otode ofụm ikọrabak, unyekisọn̄, mme obot nsụn̄ikan̄ nditop mbomo, m̀mê mme oto-obot afanikọn̄ eken. Sia Jesus edide Etubom Anamutom emi Jehovah akadade obot isọn̄ ye kpukpru se idude uwem ke esịt, etịm an̄wan̄a enye nte isọn̄ etiede. Enye ọdiọn̄ọ nte ẹkpedade se idude ke isọn̄ ẹnam n̄kpọ nte enende. Ke idak ukara esie, ofụri isọn̄ emi ayakabade edi Paradise.—Luke 23:43.

23. Nte Edidem, didie ke Jesus ediyụhọ udọn̄ ubonowo?

²³ Nso kaban̄a mme udọn̄ ubonowo? Ukeme Jesus ndida sụk n̄kpri n̄kpọ ifan̄ nnọ ediwak tọsịn owo udia barasuene, ọnọ nnyịn nsọn̄ọ nte ke ukara esie eyetre biọn̄. Ke akpanikọ,  akpakịp udia oro ẹdemede ukem ukem ayanam owo ikopke biọn̄ aba ke nsinsi. (Psalm 72:16) Ukeme esie ndikan n̄kpa ye udọn̄ọ owụt nnyịn ete ke mbon udọn̄ọ, mme nnan, inan, mbon n̄kpọnnam, ye mbụn̄ọ ẹyekop nsọn̄idem—ọyọhọ ọyọhọ ye ke nsinsi nsinsi. (Isaiah 33:24; 35:5, 6) Ukeme esie ndinam mme akpan̄kpa eset ọnọ nnyịn nsọn̄ọ nte ke ọkpọsọn̄ odudu esie nte Edidem eke heaven esịne odudu ndinam anana-ibat miliọn owo emi Ete esie amade nditi ẹset.—John 5:28, 29.

24. Nte nnyịn itiede ikere odudu Jesus, nso ke nnyịn ikpenyene nditi, ndien ntak-a?

²⁴ Nte nnyịn itiede ikere odudu Jesus, ẹyak nnyịn iti nte ke Eyen emi ekekpebe Ete esie ke mfọnmma usụn̄. (John 14:9) Nte Jesus adade odudu anam n̄kpọ anam nnyịn ikụt in̄wan̄-in̄wan̄ nte Jehovah adade odudu anam n̄kpọ. Ke uwụtn̄kpọ, kere ban̄a ima ima usụn̄ oro Jesus akadade anam udọn̄ọ okụre owo akpamfia kiet. Ke ntak mbọm, Jesus ama otụk owo oro onyụn̄ ọdọhọ ete: “Mmenyịme, sana.” (Mark 1:40-42) Ebede ke mme utọ uwetn̄kpọ emi, Jehovah, ke nditịm ntịn̄, ọdọhọ ete, ‘Nte ami ndade odudu mi nnam n̄kpọ edi emi!’ Nte inụkke fi nditoro nnyụn̄ n̄kọm Ata Ọkpọsọn̄ Abasi nnyịn ke enye ndida odudu esie nnam n̄kpọ ke utọ ima ima usụn̄ oro?

[Mme Ikọ idakisọn̄]

Mme Mbụme Nditie N̄kere

Isaiah 11:1-5 Didie ke Jesus owụt “spirit . . . odudu,” ndien nso mbuọtidem ke nnyịn ikeme ndinyene ke ukara esie?

Mark 2:1-12 Utịbe utịbe ukọkudọn̄ọ Jesus owụt ke ẹnọ enye nso odudu?

John 6:25-27 Okposụkedi Jesus okoyụhọde udọn̄ ikpọkidem mme owo ke utịbe utịbe usụn̄, nso ikedi akpan uduak utom ukwọrọikọ esie?

John 12:37-43 Ntak emi ndusụk owo emi ẹkekụtde mme utịben̄kpọ Jesus mîkọbuọtke idem ye enye, ndien nso ke nnyịn ikeme ndikpep nto emi?

[Mme Mbụme Ukpepn̄kpọ]

 [Ndise ke page 91]

“Mmọ ẹkụt Jesus nte asan̄ade ke inyan̄”