‘Enye Ekebem Iso Ama Nnyịn’
Ibuot 23
‘Enye Ekebem Iso Ama Nnyịn’
1-3. Nso idi ndusụk n̄kpọ oro ẹkenamde n̄kpa Jesus okpụhọde ye n̄kpa owo efen ekededi ke mbụk?
USEN kiet ke ini utọ ke n̄kpọ nte isua 2,000 emi ẹkebede, ẹma ẹkpe ikpe ẹnọ eren kiet oro mîkeduehe isop, ẹbiom enye ikpe ke n̄kpọ oro enye mîkanamke, ndien ekem ẹtụhọde enye ẹwot. Oro ikedịghe akpa ibak ibak ye ukwan̄ uwotowo ke mbụk; ndien ke mfụhọ, oro ikedịghe akpatre. Edi, n̄kpa enye oro ama okpụhọde ye mme n̄kpa eken.
2 Nte eren emi okokopde ndutụhọ ye ọkpọsọn̄ ubiak ke ekperede n̄kpa esie, ikpaenyọn̄ ke idemesie ama owụt nte ke emi ekedi akpan n̄kpọntịbe. Okposụkedi ekedide ufọt uwemeyo, ekịm ama ofụk isọn̄ ke mbuari. Nte ewetmbụk kiet ọdọhọde, ‘un̄wana utịn ama enịme.’ (Luke 23:44, 45) Ekem, idem mbemiso eren emi ọkọduọkde akpatre ibifịk, enye ama etịn̄ ikọ oro owo mîkemeke ndifre ete: “Okụre”! Ke akpanikọ, ebede ke ndiyak uwem esie nnọ, enye ama okụre utịbe utịbe utom. Uwa esie ekedi n̄kponn̄kan ediwụt ima oro akanam owo ekededi owụtde.—John 15:13; 19:30.
3 Nte ededi, eren oro ekedi Jesus Christ. Ẹtịm ẹmehe ye mbụk aban̄ade ndutụhọ ye n̄kpa esie ke mfụhọ mfụhọ usen oro ke Nisan 14, 33 E.N. Nte ededi, odu akpan n̄kpọ kiet oro ẹsiwakde ndifụmi. Okposụkedi Jesus ọkọbọde ọkpọsọn̄ ndutụhọ, odu owo efen oro akakam okopde ndutụhọ akan. Ke akpanikọ, owo efen ama anam uwa oro akakam okponde akan ke usen oro—n̄kponn̄kan ediwụt ima oro akanam owo ekededi ke ekondo owụtde. Ewe ikedi oro? Ibọrọ mbụme emi ọnọ ntọn̄ọikọ oro odotde ke ata akpan ibuot nneme emi: Ima Jehovah.
Akakan Edinam Ima
4. Owoekọn̄ Rome kiet akasan̄a didie ọfiọk nte ke Jesus idịghe ikpîkpu owo, ndien nso ubiere ke owoekọn̄ oro ekesịm?
4 Etubom ekọn̄ Rome oro ekesede aban̄a ediwot Jesus ama okop n̄kpaidem aban̄a ekịm oro ekebemde n̄kpa Jesus iso ye ọkpọsọn̄ unyekisọn̄ oro eketienede. Enye ama ọdọhọ ete: “Ke akpanikọ emi ekedi Eyen Abasi.” (Matthew 27:54) Nte an̄wan̄ade, Jesus ikedịghe ikpîkpu owo. Owoekọn̄ oro ama an̄wam ke ediwot oro ẹkewotde ikpọn̄-ikpọn̄ edibon Eyen Abasi Andikon̄ N̄kan! Edi Eyen emi ọkọsọn̄ urua adan̄a didie ọnọ Ete esie?
5. Didie ke ẹkeme ndinam an̄wan̄a udomo anyan ini oro Jehovah ye Eyen esie ẹkedude ọtọkiet ke heaven?
5 Bible okot Jesus “akpan ke otu kpukpru edibotn̄kpọ.” (Colossae 1:15, NW) Kam kere—Eyen Jehovah emi ama ododu mbemiso ekondo. Ete ye Eyen emi ẹkedu ọtọkiet ẹbịghi adan̄a didie? Ndusụk ntaifiọk ẹdọhọ ẹte ke ekondo ebịghi esịm isua biliọn 13. Nte afo emekeme ndikam n̄kekere utọ anyan ini oro? Man an̄wam mme owo ndifiọk udomo ini oro ntaifiọk ẹdọhọde nte ekondo ebighịde, n̄wed ubatini kiet oro ẹdiande ke ibibene owụt udịm oro ẹdụride ọniọn̄ esịm mita 110. Nte isenowo ẹsan̄ade ẹtiene udịm oro, ikpat kiet kiet oro mmọ ẹsiode ada ọnọ miliọn isua 75 ke otu isua oro ekondo ebịghide. Ke esịmde utịt udịm oro, ẹdụri udịm kiet kpọt oro ekpride nte ukot idet kiet ke ibuot owo ndida nnọ ofụri ini mbụk uwem owo! Edi, idem edieke ubatini emi edide nnennen, ofụri udịm ubatini oro idiniọn̄ke nte uniọn̄ ini uwem Eyen Jehovah! Nso ke enye akanam ke utọ ofụri anyan ini oro?
6. (a) Nso utom ke Eyen Jehovah akanam mbemiso edide owo? (b) Nso utọ mbọbọ idu ke ufọt Jehovah ye Eyen esie?
6 Eyen emi akanam utom ke idatesịt nte ‘etubom anamutom’ Ete esie. (Mme N̄ke 8:30, NW) Bible ọdọhọ ete: “Ndien mîtoho ke [Eyen], inamke n̄kpọ baba kiet eke ẹkenamde.” (John 1:3) Ntre Jehovah ye Eyen esie ẹkediana kiet ẹnam kpukpru n̄kpọ eken. Nso akama-nduaidem, inem inem ini ke mmọ ẹkenyene ntem! Ke emi, ediwak owo ẹyenyịme nte ke ima oro odude ke ufọt ete ye eyen esikpon etieti. Ndien ima edi “se ibọpde uwem adiana inam ọfọn ama.” (Colossae 3:14) Anie ke otu nnyịn, ekeme ndifiọk udomo mbọbọ ima oro okodude ke utọ anyan ini oro? Nte an̄wan̄ade, Jehovah Abasi ye Eyen esie ẹdiana kiet ke ata ọkpọsọn̄ mbọbọ ima oro akanam odude.
7. Ke ini Jesus akanade baptism, didie ke Jehovah okowụt nte eketiede imọ ke idem aban̄a Eyen imọ?
7 Kpa ye oro, Ete ama ọnọ Eyen esie edi isọn̄ man enye edimana nte nsekeyen. Ndinam ntre ọkọwọrọ ke Jehovah ekenyene nditaba n̄kpet n̄kpet itie ebuana ye edima Eyen esie ke heaven ke ndusụk isua. Enye ama etie ke heaven ese ye ọkpọsọn̄ udọn̄ nte Jesus ọkọkọride okpon akabade mfọnmma owo. Ke esịmde n̄kpọ nte isua 30, Jesus ama ana baptism. Idịghe se ẹkpetịn̄de-tịn̄ nte eketiede Jehovah ke idem. Ete esie ama etie ke heaven etịn̄ ete: “Emi edi edima Eyen Mi, emi esịt enemde Mi eti-eti ye Enye.” (Matthew 3:17) Ke okụtde ete ke Jesus ama ọsọn̄ọ ada anam kpukpru se ẹketịn̄de ke ntịn̄nnịm ikọ, kpukpru se ẹkeyomde enye anam, anaedi Ete esie ama enen̄ede okop idatesịt!—John 5:36; 17:4.
8, 9. (a) Nso iketịbe inọ Jesus ke Nisan 14, 33 E.N., ndien didie ke emi okotụk Ete esie eke heaven? (b) Ntak emi Jehovah akayakde Eyen esie okụt ndutụhọ onyụn̄ akpa?
8 Eketie Jehovah ndien didie ke idem ke Nisan 14, 33 E.N.? Eketie enye didie ke idem nte ẹketapde Jesus ẹnọ ndien ekem otu mbon ntịme ẹmụm enye ke okoneyo oro? Nte mme ufan Jesus ẹkefen̄ede ẹkpọn̄ enye ye nte ẹkebiomde enye ikpe ke ukwan̄ usụn̄? Nte ẹkesakde enye nsahi, ẹtọde enye etap, ẹnyụn̄ ẹsiakde enye ufia? Nte ẹkemiade enye tutu ẹwai edem esie? Ke ini ẹkekọn̄de enye ubọk ye ukot ẹdian ke eto ẹnyụn̄ ẹyakde enye ọkọn̄ọ do ke adan̄aemi mme owo ẹsụn̄ide enye? Eketie Ete didie ke idem nte edima Eyen esie okofioride n̄kpo eyet ọnọ enye ke ntak ọkpọsọn̄ ubiak? Eketie Jehovah didie ke idem ke ini Jesus ọkọduọkde akpatre ibifịk, enye okonyụn̄ atabade edima Eyen Esie ke ata akpa ini tọn̄ọ nte ẹkebot mme n̄kpọ?—Matthew 26:14-16, 46, 47, 56, 59, 67; 27:38-44, 46; John 19:1.
9 Usem akak inua. Sia edide Jehovah enyene ntụk, nnyịn inyeneke ikọ ndida ntịn̄ orụk ubiak oro enye okokopde aban̄a n̄kpa Eyen esie. Se ikemede nditịn̄ edi ntak emi Jehovah akayakde oro etịbe. Ntak emi Ete ekenyịmede ndibọ utọ ubiak oro? Jehovah ayarade utịbe utịbe n̄kpọ kiet ọnọ nnyịn ke John 3:16—kpa ufan̄ikọ Bible oro edide ata akpan n̄kpọ tutu ẹdikot enye ekpri Gospel. Enye ọdọhọ ete: “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” Ntre, ntak oro Jehovah ekenyịmede edi emi: ima. Enọ oro Jehovah ọkọnọde—ndisio Eyen esie ndọn̄ man edikụt ndutụhọ onyụn̄ akpa ọnọ nnyịn—ekedi n̄kponn̄kan edinam ima oro akanam ẹwụtde.
Se Ima Abasi Ọwọrọde
10. Nso ke mme owo ẹyom, ndien nso itịbe inọ se ikọ oro “ima” ọwọrọde?
10 Nso ke ikọ emi “ima” ọwọrọ? Ẹdọhọ ke ima edi n̄kpọ oro owo oyomde akan. Tọn̄ọde ke emana tutu esịm n̄kpa, mme owo ẹyom ima, ẹkọri ẹto ufiop oro enye akamade, unana ima esikam ada udọn̄ọ ye n̄kpa edi. Kpa ye oro, edi n̄kpọ n̄kpaidem ndikụt nte ọsọn̄de nditịn̄ se enye edide. Nte ededi, mme owo ẹtịn̄ ekese ẹban̄a ima. Ata ediwak n̄wed, ikwọ, ye mme uto ẹdu oro ẹban̄ade ima. Edi mmọ isiwakke ndinam an̄wan̄a se ima ọwọrọde. Ke nditịm ntịn̄, ẹtịn̄ n̄kpọ ẹban̄a enye ẹkaha tutu owo idiọn̄ọke aba ata ata n̄kpọ emi enye ọwọrọde.
11, 12. (a) M̀mọ̀n̄ ke nnyịn ikeme ndikpep ekese mban̄a ima, ndien ntak edide do? (b) Mme orụk ima ewe ke ẹtịn̄ ẹban̄a ke usem Greek eset, ndien ewe ikọ oro adade aban̄a “ima” ke ẹwak ndida ntịn̄ ikọ ke N̄wed Abasi Christian Usem Greek? (Se n̄ko ikọ idakisọn̄.) (c) Nso idi a·gaʹpe?
11 Nte ededi, Bible ọnọ ukpep oro an̄wan̄ade aban̄a ima. Expository Dictionary of New Testament Words eke Vine ọdọhọ ete: “Ẹkeme ndida mme edinam esie mfiọk ima.” Uwetn̄kpọ Bible oro aban̄ade mme edinam Jehovah ekpep nnyịn ekese aban̄a ima esie—kpa ima ima ntatubọk oro enye owụtde mme edibotn̄kpọ esie. Ke uwụtn̄kpọ, nso ikpekeme nditịm nyarade edu emi n̄kan akakan edinam ima Jehovah oro ẹketịn̄de ẹban̄a ke mbemiso? Ke mme ibuotikọ oro ẹtienede, nnyịn iyokụt ediwak uwụtn̄kpọ edinam ima Jehovah. Ke adianade do, nnyịn imekeme ndinyene ifiọk nto mme akpasarade ikọ Bible oro ẹdade ẹnọ “ima.” Ke usem Greek eset, ikọ inan̄ ẹkedu oro ẹdade ẹnọ “ima.” a Ke otu emi, enye oro ẹkesiwakde ndida ntịn̄ ikọ ke N̄wed Abasi Christian Usem Greek edi a·gaʹpe. N̄wed ukabadeikọ Bible kiet okot enye “ata okopodudu ikọ oro adade ọnọ ima.” Ntak-a?
12 A·gaʹpe ada ọnọ ima oro edumbet akarade. Ntre enye idịghe sụk ntụk oro owo enyenede aban̄a owo enye eken. Enye esịne ediwak n̄kpọ, enen̄ede owụt edikere mban̄a onyụn̄ etie sụn̄sụn̄. Ke akande kpukpru, a·gaʹpe isan̄ake ye ibụk ke usụn̄ ndomokiet. Ke uwụtn̄kpọ, fiak se John 3:16. Nso idi “ererimbot” oro Abasi akamade tutu enye osio ikpọn̄-ikpọn̄ edibon Eyen esie ọnọ? Enye edi ubonowo oro ẹkemede ndinyan̄a. Emi abuana ediwak owo oro ẹdude idiọk uwem. Nte Jehovah ama owo kiet kiet nte san̄asan̄a ufan esie, nte enye akamade Abraham? (James 2:23) Baba, edi Jehovah ke ima owụt kpukpru owo mfọnido, idem ke ini oro atakde enye ekese n̄kpọ. Enye oyom kpukpru owo ẹkabade esịt ẹnyụn̄ ẹkpụhọde usụn̄ uwem mmọ. (2 Peter 3:9) Ediwak owo ẹnanam ntre. Mbon emi ke enye adara nte mme ufan esie.
13, 14. Nso iwụt nte ke a·gaʹpe esiwak ndisịne ufiop ufiop ima iman?
13 Nte ededi, ndusụk owo ẹnyene ukwan̄ ekikere ẹban̄a a·gaʹpe. Mmọ ẹkere ke enye edi orụk ima oro mînyeneke ntụk, ima oro ẹkerede-kere kpọt. Se idude edi nte ke a·gaʹpe esiwak ndibuana ufiop ufiop ima oro ẹnyenede ẹnọ owo ọkpọkpọ. Ke uwụtn̄kpọ, ke ini John ekewetde ete, “Ete amama Eyen,” enye akada orụk ikọ oro a·gaʹpe. (John 3:35) Nte utọ ima oro etie ndebe ndebe? Baba. Tịm fiọk ete ke John 5:20 Jesus ọkọdọhọ ete, “Ete amama Eyen,” adade orụk ikọ oro phi·leʹo. Ima Jehovah esiwak ndisịne ufiop ufiop ima iman. Nte ededi, akananam ikpîkpu ntụk ikarake ima esie. Ọniọn̄ ye ndinen edumbet esie ẹsikara enye kpukpru ini.
14 Nte nnyịn ima ikokụt, kpukpru edu Jehovah ẹnen̄ede ẹkon̄, ẹfọn ẹma, ẹnyụn̄ ẹdemede owo udọn̄. Edi edu oro edemerede owo udọn̄ akan edi ima. Idụhe n̄kpọ efen oro okopde odudu ndidụri nnyịn n̄kpere Jehovah nte ima. Nte enemde, ima onyụn̄ edi n̄wọrọnda edu esie. Nnyịn isan̄a didie ifiọk oro?
“Abasi Edi Ima”
15. Nso ke Bible etịn̄ aban̄a ima Jehovah, ndien ke nso usụn̄ ke ikọ emi edi n̄wọrọnda? (Se n̄ko ikọ idakisọn̄.)
15 Enyene n̄kpọ oro Bible etịn̄de aban̄a ima emi enye mîtịn̄ke iban̄a mme akpan edu Jehovah eken. N̄wed Abasi idọhọke ite ke Abasi edi odudu m̀mê ke Abasi edi unenikpe m̀mê idem ndidọhọ ke Abasi edi ọniọn̄. Enye enyenyene mme edu emi, enye edi akpan ebiet emi mme edu emi ẹtode, ndien owo ikemeke ndimen enye ndomo ye edu mbita emi. Nte ededi, amaedi ọyọhọ edu esie inan̄, odu ata akpan n̄kpọ oro ẹtịn̄de ẹban̄a enye: “Abasi edi ima.” b (1 John 4:8) Nso ke oro ọwọrọ?
16-18. (a) Ntak emi Bible ọdọhọde ete ke “Abasi edi ima”? (b) Ke otu ofụri edibotn̄kpọ oro ẹdude ke isọn̄, ntak emi owo odotde ndida nnọ ima Jehovah?
16 Ndidọhọ ke “Abasi edi ima” idịghe ikpîkpu edimen n̄kpọ ndomo, nte emi ẹkpedọhọde, “Abasi edi ukem ye ima.” Inenke nnyịn ndiwọn̄ọde ikọ oro ndọhọ ke “ima edi Abasi.” Jehovah enen̄ede okpon akan edu. Enye edi owo oro enyenede nsio nsio ntụk ye edu ke adianade ye ima. Kpa ye oro, ima akara edu Jehovah. N̄wed ndụn̄ọde kiet etịn̄ ntem aban̄a ufan̄ikọ emi: “Ata edu Abasi edi ima.” Ke ofụri ofụri, nnyịn imekeme ndikere mban̄a enye ke usụn̄ emi: Odudu Jehovah anam enye anam n̄kpọ. Unenikpe ye ọniọn̄ esie ẹnọ ndausụn̄ ke usụn̄ oro enye anamde n̄kpọ. Edi ima Jehovah onụk enye ndinam n̄kpọ. Ndien ẹkụt ima esie kpukpru ini ke usụn̄ oro enye adade mme edu eken anam n̄kpọ.
17 Ẹsiwak ndidọhọ nte ke Jehovah edi ata uwụtn̄kpọ ima. Ntem, edieke nnyịn iyomde ndidiọn̄ọ ima edumbet, ana nnyịn ikpep iban̄a Jehovah. Nte ededi, nnyịn imekeme ndikụt eti edu emi ke idem mme owo n̄ko. Edi ntak emi mme owo ẹnyenede enye? Ke ini ẹkebotde mme n̄kpọ, Jehovah ama etịn̄ in̄wan̄-in̄wan̄ ye Eyen esie ete: “Ẹyak nnyịn inam owo isịn ke mbiet nnyịn, etie nte nnyịn.” (Genesis 1:26) Ke kpukpru edibotn̄kpọ oro ẹdude ke isọn̄, mme owo kpọt ẹkeme ndimek ndiwụt ima, ke ntem ẹkpebede Ete mmọ eke heaven. Ti ete ke Jehovah akada nsio nsio edibotn̄kpọ ndida nnọ mme n̄wọrọnda edu esie. Edi, Jehovah emek ndida n̄kon̄n̄kan edibotn̄kpọ esie eke isọn̄, oro edi owo, ndida nnọ n̄wọrọnda edu Esie, kpa ima.—Ezekiel 1:10.
18 Ke ini nnyịn iwụtde ima edumbet, oro mîsan̄ake ye ibụk, nnyịn iwụt n̄wọrọnda edu Jehovah. Edi ukem ukem nte apostle John ekewetde ete: “Nnyịn ima ima, koro Enye ekebemde iso ama nnyịn.” (1 John 4:19) Edi ke mme usụn̄ ewe ke Jehovah ekebem iso ama nnyịn?
Jehovah Ekebem Iso Ama Ima
19. Ntak emi ẹkemede ndidọhọ ke ima ekenen̄ede onụk Jehovah ndibot mme n̄kpọ?
19 Ima idịghe obufa. Idem n̄kpọ, nso ikonụk Jehovah nditọn̄ọ ndibot n̄kpọ? Ikotoho ke enye ndikop ndobo nnyụn̄ nyom nsan̄a. Jehovah edi ọyọhọ owo ke idemesie, onyụn̄ ada ke idem, inanake n̄kpọ ndomokiet oro okpoyomde owo en̄wen ọnọ enye. Edi ima esie, kpa edu oro asan̄ade ye edinam, okonụk enye ke ndammana usụn̄ ndiyom ndibuana idatesịt edidu uwem ye mme enyene-ifiọk edibotn̄kpọ oro ẹkemede ndiwụt esịtekọm mban̄a utọ enọ oro. Ikpọn̄-ikpọn̄ edibon Eyen esie ekedi “ebe-iso ke kpukpru se Abasi obotde.” (Ediyarade 3:14) Ekem Jehovah ama ada Etubom Anamutom emi ndibot kpukpru n̄kpọ eken, ọtọn̄ọde ye mme angel. (Job 38:4, 7; Colossae 1:16) Sia ẹma ẹkenọ mmọ ifụre, ọniọn̄, ye mme ntụk, mme okopodudu spirit emi ẹma ẹnyene ifet ndidiana kiet ke ima—ye kiet eken ndien, ke akande kpukpru, ye Jehovah Abasi. (2 Corinth 3:17) Ntem, mmọ ẹma ima koro ẹkebemde iso ẹma mmọ.
20, 21. Nso uyarade ke Adam ye Eve ẹkenyene nte ke Jehovah ama mmimọ, edi didie ke mmọ ẹkenam n̄kpọ?
20 Ntre ke ekedi ye ubonowo. Tọn̄ọde ke editọn̄ọ, ima ọkọyọyọhọ Adam ye Eve idem. Kpukpru ebiet oro mmọ ẹkesede ke Paradise ebietidụn̄ mmọ ke Eden, mmọ ẹma ẹkeme ndikụt uyarade ima oro Ete mmọ akamade mmọ. Tịm fiọk se Bible ọdọhọde: “Jehovah Abasi onyụn̄ ọtọ in̄wan̄ ke Eden ke edem usiaha-utịn; onyụn̄ emen owo emi enye okobotde enịm do.” (Genesis 2:8) Nte akanam afo omodu ke ata ediye in̄wan̄esa m̀mê itie unọ idem nduọkodudu? Nso ke afo akama akan? Un̄wana oro asiahade ọtọ mme ikọn̄ oro ẹdude ke ndedịbe ebiet? Udịm udịm uduot ndiye flawa? Sụn̄sụn̄ inem inem uyom n̄kpri idịm, mme inuen emi ẹkwọde ikwọ, ye uyom n̄kpri unam? Nso kaban̄a ufuọn̄ mme eto, mme mfri, ye mme flawa? Nte ededi, idụhe itie unọ idem nduọkodudu ndomokiet mfịn oro ẹkemede ndimen ndomo ye enye oro okodude ke Eden. Ntak-a?
21 Jehovah ke idemesie ọkọtọ in̄wan̄ emi! Anaedi enye ama eye ke usụn̄ oro inua mîkemeke nditịn̄. Kpukpru eto oro ẹyede ndise m̀mê ẹnemde ndidia ẹma ẹdu do. Mmọn̄ ama odu akanade in̄wan̄ oro, in̄wan̄ oro ama okpon ekem, onyụn̄ ọyọhọ ye nsio nsio unam oro enyenede ndyọ. Adam ye Eve ẹma ẹnyene kpukpru n̄kpọ ndinam uwem mmọ etịm enem, ọkọrọ ye utom oro akakamade uyụhọ ye mfọnn̄kan nsan̄a. Jehovah ekebem iso ama mmọ, ndien mmọ ẹma ẹnyene eti ntak ndima enye n̄ko. Edi mmọ ẹma ẹkpu ndinam oro. Utu ke ndisụk ibuot nnọ Ete mmọ eke heaven ke ima, ibụk ama anam mmọ ẹsọn̄ ibuot ye enye.—Genesis, ibuot 2.
22. Didie ke nte Jehovah akanamde n̄kpọ aban̄a nsọn̄ibuot oro ke Eden owụt nte ke ima esie edi ima akpanikọ?
22 Enyene ndidi oro akayat Jehovah esịt didie ntem! Edi nte nsọn̄ibuot emi ama abiat ima ima esịt esie? Baba! ‘Ima [m̀mê, “ima akpanikọ,” ikọ idakisọn̄ NW] esie odu ke nsinsi.’ (Psalm 136:1) Ntem, ke ndondo oro enye ama aduak ndinam ima ima ndutịm man afak nditọ Adam ye Eve ekededi oro ẹnyenede eti esịt. Nte nnyịn ima ikokụt, ndutịm emi ama esịne uwa ufak edima Eyen esie, oro akatakde Ete esie akamba n̄kpọ.—1 John 4:10.
23. Nso idi ntak kiet oro Jehovah edide “Abasi inemesịt,” ndien ewe akpan mbụme ke ẹdineme ke ibuot oro etienede?
23 Ih, toto ke ntọn̄ọ, Jehovah ekebem iso owụt ubonowo ima. ‘Enye ama ebem iso ama nnyịn’ ke ata ediwak usụn̄. Ima ada n̄kemuyo ye idatesịt edi, ntre eyịghe idụhe ẹtịn̄de ẹban̄a Jehovah nte “Abasi inemesịt.” (1 Timothy 1:11, NW) Nte ededi, akpan mbụme edemede. Nte Jehovah enen̄ede ama nnyịn nte owo kiet kiet? Ibuot oro etienede eyeneme oro.
[Mme Ikọ idakisọn̄]
a Ẹda ikọedinam oro phi·leʹo, oro ọwọrọde “ndima, ndinyene ima nnọ, (kpa nte owo akpamade n̄kpet n̄kpet ufan m̀mê eyeneka)” ẹtịn̄ ikọ ediwak ini ke N̄wed Abasi Christian Usem Greek. Ẹda mbiet ikọ oro stor·geʹ, m̀mê ima uduot owo, ẹtịn̄ ikọ ke 2 Timothy 3:3 ndiwụt nte ke utọ ima oro eyenen̄ede anana ke ukperedem ini emi. Owo idaha eʹros, m̀mê ima ntụk ke ufọt eren ye n̄wan itịn̄ ikọ ke N̄wed Abasi Christian Usem Greek, okposụkedi ẹtịn̄de ẹban̄a utọ ima oro ke Bible.—Mme N̄ke 5:15-20.
b Odu mme udịmikọ efen ke N̄wed Abasi oro ẹtiede ntre. Ke uwụtn̄kpọ, “Abasi edi un̄wana” ye “Abasi . . . edi ikan̄ eke atade ta.” (1 John 1:5; Mme Hebrew 12:29) Edi ẹnyene ndifiọk nte ke mmọ emi ẹdi mme ikọ oro ẹwụtde nte n̄kpọ kiet edide efen, sia mmọ ẹmende Jehovah ẹdomo ye mme n̄kpọ oro ẹkụtde ke enyịn. Jehovah etie nte un̄wana, koro enye edide edisana ye edinen. “Ekịm” ndomokiet, m̀mê ndek idụhe ke enye. Ndien ẹkeme ndimen enye ndomo ye ikan̄ ke ntak odudu nsobo esie.
Mme Mbụme Nditie N̄kere
Psalm 63:1-11 Nnyịn ikpada ima Jehovah ke akpan n̄kpọ adan̄a didie, ndien nso nsọn̄ọ ke ima oro ekeme ndinọ nnyịn?
Hosea 11:1-4; 14:4-8 Ke mme usụn̄ ewe ke Jehovah okowụt Israel (m̀mê, Ephraim) ima ebietde eke ete, kpa ye nso edu nsọn̄ibuot mmọ?
Matthew 5:43-48 Didie ke Jehovah owụt ubonowo ke ofụri ofụri ima ebietde eke ete?
John 17:15-26 Didie ke akam oro Jesus ọkọbọn̄de ke ibuot mme anditiene enye ọnọ nnyịn nsọn̄ọ aban̄a ima oro Jehovah amade nnyịn?
[Mme Mbụme Ukpepn̄kpọ]
[Ndise ke page 230]
‘Abasi okosio ikpọn̄-ikpọn̄ Eyen emi Enye obonde ọnọ’
