Ebemiso Ikọ

Edima Andikot:

Ndi afo emekere ke imọ imekpere Abasi? Ediwak owo ẹkere ke oro ikam ikemeke nditịbe. Ndusụk owo ẹkop ndịk nte ke Abasi oyom usụn̄ akaha; mbon efen ẹkere ke mmimọ idotke ndisan̄a n̄kpere enye tutu amama. Nte ededi, Bible ke ima esịn udọn̄ ọnọ nnyịn ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Enye akam ọnọ mme andituak ibuot nnọ enye nsọn̄ọ ete: “Koro ami Jehovah Abasi fo mmụmde fi ubọk nnasia, emi ndọhọde fi, nte, Kûfehe; ami n̄n̄wam fi.”—Isaiah 41:13.

Didie ke nnyịn ikeme ndinyene utọ n̄kpet n̄kpet itie ebuana oro ye Abasi? Ke itie ufan ekededi oro nnyịn idụkde, se ibọpde enye inam adiana kiet edi ndidiọn̄ọ owo oro, ndima nnyụn̄ nda mme n̄wọrọnda edu esie ke akpan n̄kpọ. Ntre mme edu ye usụn̄ Abasi, oro ẹwụtde ke Bible, ẹdi akpan n̄kpọ oro ẹnyenede ndikpep ndiọn̄ọ. Nditie n̄kere usụn̄ oro Jehovah owụtde mme edu esie kiet kiet, ndikụt nte Jesus Christ okowụtde mmọ ke mfọnmma usụn̄, ndinyụn̄ mfiọk nte nnyịn n̄ko ikemede ndikọri mmọ ẹyenam nnyịn itịm isan̄a ikpere Abasi. Nnyịn iyokụt nte ke Jehovah edi nnennen ye mfọnn̄kan Andikara ekondo. Akan oro, enye edi Ete oro kpukpru nnyịn iyomde. Enye okop odudu, enen, enyene ọniọn̄, onyụn̄ enyene ima, ndien akananam enye ikpọn̄ke mme anam-akpanikọ nditọ esie.

N̄wed emi akpakam an̄wam fi nditịm nsan̄a n̄kpere Jehovah Abasi, ndinyene nsinsi itie ebuana ye enye, man afo ekeme ndidu uwem ntoro enye ke nsinsi.

Mme Andisio