Mbon oro ẹnen̄erede ẹdiọn̄ọ usem oro ẹkedade ẹwet Bible ẹnyịme ke enyịn̄ Abasi emi ẹsiwetde ntem יהוה ke usem Hebrew odu n̄kpọ nte itie 7,000 ke ata akpa N̄wed Abasi Usem Hebrew. Edi ediwak owo ẹkere ke enyịn̄ emi ikodụhe ke ata akpa N̄wed Abasi Usem Greek. Ntak edi oro ediwak mme akabade Bible Ikọmbakara mfịn mîdọn̄ke Jehovah ke se ẹkotde Obufa Testament. Idem ke ini mmọ ẹkabarede mme itien̄wed emi ẹdade ẹto N̄wed Abasi Usem Hebrew, emi ẹsịnde enyịn̄ Abasi ke usem Hebrew, mmọ ẹsụk ẹwet “Ọbọn̄” utu ke ata enyịn̄ Abasi.

Owo inamke utọ n̄kpọ oro ke Edisana N̄wed Abasi—Edikabade Eke Obufa Ererimbot. Ke Bible enye emi, ẹdọn̄ enyịn̄ Abasi ke itie 237 ke N̄wed Abasi Usem Greek. Se akpan n̄kpọ iba emi akanamde mme akabade Bible emi ẹbiere ndinam emi: (1) Mme ikpan̄wed Abasi usem Greek oro ẹdude mfịn idịghe ata akpa N̄wed Abasi usem Greek oro ẹkewetde. Ẹkewet ata ediwak oro ẹdude mfịn n̄kpọ nte isua ikie iba ama ekebe tọn̄ọ ẹkewet ata akpa N̄wed Abasi usem Greek. (2) Mbon oro ẹkesion̄ode se idude ke ata akpa N̄wed Abasi usem Greek ẹwet ke ikpan̄wed en̄wen ẹma ẹsion̄o enyịn̄ Abasi ke usem Hebrew ẹfep, ẹkabade ẹwet Kyʹri·os, emi ọwọrọde “Ọbọn̄” ke usem Greek; mîdịghe edi ke mmọ ẹkekama mme ikpan̄wed oro ẹma ẹkesosion̄o enyịn̄ Abasi ẹdọn̄ “Ọbọn̄,” ẹnam utom mmọ.

Kọmiti Emi Ẹkabarede Bible Obufa Ererimbot ẹdọhọ ke mme n̄kpọ ẹdu emi ẹwụtde ke enyịn̄ Abasi ama ọdọn̄ọ ke ata akpa N̄wed Abasi usem Greek. Se mme n̄kpọ oro mi:

• Enyịn̄ Abasi ọkọdọdọn̄ọ ọyọhọ N̄wed Abasi Usem Hebrew emi Jesus ye mme apostle esie ẹkesikotde. Ndusụk owo ẹma ẹsifan̄a n̄kpọ emi ke akpa. Edi ke ẹma ẹkekụt N̄wed Abasi Usem Hebrew emi edide n̄kpọ nte isua 2,000 ke mbọhọ Qumran, owo ifan̄ake aba.

• Enyịn̄ Abasi ama ọdọn̄ọ n̄ko ke N̄wed Abasi Usem Hebrew emi ẹkekabarede ẹsịn ke usem Greek ke eyo Jesus. Ke ata eset ko, mbon oro ẹnen̄erede ẹfiọk usem emi ẹkedade ẹwet Bible ẹkekere ke enyịn̄ Abasi ikodụhe ke ata akpa N̄wed Abasi Usem Hebrew emi ẹkekabarede ẹsịn ke usem Greek. Edi ke n̄kpọ nte isua 60 emi ẹkebede, ẹma ẹtan̄ ata n̄kani mbai N̄wed Abasi  Usem Hebrew emi ẹkesikamade ke eyo Jesus, emi ẹkekabarede ẹsịn ke usem Greek ẹkewụt mbon oro ẹnen̄erede ẹdiọn̄ọ usem emi ẹkedade ẹwet Bible. Ẹwet enyịn̄ Abasi ke usem Hebrew ke esịt. Ọwọrọ ke eyo Jesus, enyịn̄ Abasi ama ọdọn̄ọ ke N̄wed Abasi Usem Greek. Edi ke n̄kpọ nte isua ikie iba ama ekebe tọn̄ọ mme apostle ẹkekpan̄a, ẹma ẹsion̄o enyịn̄ Abasi ẹfep toto ke Genesis esịm Malachi ke ata ediwak N̄wed Abasi usem Hebrew emi ẹkekabarede ẹsịn ke usem Greek, utọ nte Vaticanus ye Sinaiticus. Ntre, ikpaha nnyịn idem edieke enyịn̄ Abasi mîdọn̄ọke ke se ẹkotde Obufa Testament, m̀mê N̄wed Abasi Usem Greek tọn̄ọ ke eyo oro ka iso.

  Jesus ọkọdọhọ ete: “Ami ndi ke enyịn̄ Ete mi.” Enye ama onyụn̄ ọdọhọ ke ida “enyịn̄ Ete” imọ inam kpukpru se inamde

• N̄wed Abasi Usem Greek owụt ke Jesus ama esiwak ndisiak enyịn̄ Abasi nnyụn̄ nnam mme owo ẹfiọk enyịn̄ emi. (John 17:6, 11, 12, 26) Jesus ọkọdọhọ ete: “Ami ndi ke enyịn̄ Ete mi.” Enye ama onyụn̄ ọdọhọ ke inam kpukpru se inamde ke “enyịn̄ Ete” imọ.—John 5:43; 10:25.

• Sia edide Abasi akanam ẹwet N̄wed Abasi Usem Greek ẹdian ye N̄wed Abasi Usem Hebrew, idụhe nte enye ọkpọdọhọde ẹwet enyịn̄ imọ ke kiet, ẹkûwet ke enye eken. Ke n̄kpọ nte isua 1,960 emi ẹkebede, James mbet Jesus ama ọdọhọ mbiowo ke Jerusalem ete: “Symeon omobụk ọyọhọ ọyọhọ nte Abasi ke akpa ini ọkọwọn̄ọrede ntịn̄enyịn esie ọnọ mme idụt ndisio mme owo ke otu mmọ nnọ enyịn̄ esie.” (Utom 15:14) James ikpeketịn̄ke utọ ikọ emi edieke owo ndomokiet ke eyo esie mîkesikotke enyịn̄ Abasi m̀mê ndikam mfọfiọk enyịn̄ emi.

• Ẹwet enyịn̄ Abasi ibio ibio ke N̄wed Abasi Usem Greek. Ke Ediyarade 19:1, 3, 4, 6, enyịn̄ Abasi esịne ke ikọ emi “Hallelujah.” Hallelujah edi ikọ Hebrew emi ọwọrọde “Ẹtoro Jah,” ndien “Jah” edi ibio ibio usụn̄ emi ẹwetde Jehovah. Ediwak enyịn̄ mme owo ke N̄wed Abasi Usem Greek ẹsịne enyịn̄ Abasi. Mme n̄wed ndụn̄ọde ẹdọhọ ke Jesus ọwọrọ “Jehovah edi Andinyan̄a.”

• N̄wed mme Jew ke eset owụt ke mme Jew emi ẹkedide mme Christian ẹma ẹsiwet enyịn̄ Abasi ke mme n̄wed mmọ. N̄wed ibet mme Jew emi ẹkotde Tosefta, emi ẹkewetde ẹkụre ke n̄kpọ nte isua 200 ke mme apostle ẹma ẹkekpan̄a, etịn̄ n̄kpọ aban̄a n̄wed mme Christian emi ẹkesifọpde ke usen Sabbath. N̄wed  emi ọdọhọ ete: “Ẹma ẹsifọp n̄wed mme andiwet Gospel ye n̄wed mme minim [mme Jew emi ẹkedọhọde ke ẹdi Christian]. Se nte mmọ ẹfọpde n̄wed emi enyịn̄ Abasi esịnede.” N̄wed emi etịn̄ n̄ko se Rabbi emi ekekerede Yosé eketịn̄de. Enye ekedi eyen Galilee emi okodude uwem ke akpatre apostle ama akakpa. N̄wed oro ete ke Yosé ọkọdọhọ ke ‘mbemiso ẹfọpde mmọ [oro edi, n̄wed mme Christian] ke ikan̄, ke ẹma ẹsisịbe enyịn̄ Abasi ẹsion̄o.’

• Ndusụk mbon emi ẹnen̄erede ẹdiọn̄ọ usem emi ẹkedade ẹwet Bible ẹnyịme ke etie nte enyịn̄ Abasi ama odu ke mme itie N̄wed Abasi Usem Greek emi ẹdade ẹto N̄wed Abasi Usem He brew. Ikpehe emi ẹkotde “Enyịn̄ Abasi ke Usem Hebrew ke Obufa Testament” ke The Anchor Bible Dictionary ọdọhọ ntem: “Mme n̄kpọ ẹdu ndiwụt ke akpa ini emi ẹkesion̄ode Obufa Testament ẹwet, ke enyịn̄ Abasi ke usem Hebrew, Yahweh, ata ata Enyịn̄ Abasi, ama odu ke ndusụk m̀mê kpukpru itie N̄wed Abasi Obufa Testament emi ẹdade ẹto Akani Testament.” George Howard emi enen̄erede ọfiọk usem emi ẹkedade ẹwet Bible ọdọhọ ete: “Sia edide ẹma ẹsiwet enyịn̄ Abasi ke Bible emi ẹkekabarede ke usem Hebrew ẹsịn ke usem Greek, oro edi, Bible emi mme Christian eyo mme apostle ẹkesikamade, nnyịn imenịm ke mbon emi ẹkewetde Obufa Testament ikosion̄oke  enyịn̄ Abasi ifep ke ini mmọ ẹkewetde n̄kpọ ẹban̄a mme itie N̄wed Abasi Usem Hebrew emi enyịn̄ emi esịnede.”

• Mme akabade Bible oro ẹnen̄erede ẹkpono ẹdọn̄ enyịn̄ Abasi ke N̄wed Abasi Usem Greek. Ndusụk mme akabade Bible ẹma ẹnanam emi anyan ini mbemiso nnyịn idisio Edikabade Eke Obufa Ererimbot. Se enyịn̄ Bible emi ye mme andikabade mmọ mi: A Literal Translation of the New Testament . . . From the Text of the Vatican Manuscript, eke Herman Heinfetter (1863); The Emphatic Diaglott, eke Benjamin Wilson (1864); The Epistles of Paul in Modern English, eke George Barker Stevens (1898); St. Paul’s Epistle to the Romans, eke W. G. Rutherford (1900); The New Testament Letters, eke J.W.C. Wand, emi ekedide Bishop ke London (1946). Efen edi Bible usem Spain emi Pablo Besson akakabarede n̄kpọ nte isua 100 emi ẹkebede. Enye ama esịn “Jehová” ke Jude 14. N̄kpọ nte ikọ idakisọn̄ 100 ke Bible esie ẹwụt ke etie nte enyịn̄ Abasi okodu ke mme itie oro enye esịnde ikọ idakisọn̄. Anyan ini mbemiso kpukpru emi, ẹma ẹdọn̄ enyịn̄ Abasi ke usem Hebrew, ke N̄wed Abasi Usem Greek emi ẹkekabarede ẹsịn ke usem Hebrew, ke n̄kpọ nte isua 500 emi ẹkebede. N̄kpọ nte nsio nsio Bible usem German 11 ẹsịne “Jehovah” (m̀mê “Yahweh” emi ẹwetde nte mbon Germany  ẹsikotde) ke N̄wed Abasi Usem Greek. Owo inan̄ emi ẹketienede ẹkabade Bible ke usem German ẹkedi ẹma ẹwet “Ọbọn̄,” mmọ ẹwet enyịn̄ Abasi ẹdian do. Bible usem German emi ẹdọn̄de enyịn̄ Abasi ke ikọ idakisọn̄ mîdịghe ke se mmọ ẹwetde ẹdian awak ebe 70.

• Bible emi ẹdọn̄de enyịn̄ Abasi ke N̄wed Abasi Usem Greek awak ebe usem ikie. Ediwak usem ke Africa, America, Asia, Europe, ye Isuo Pacific ẹdọn̄ enyịn̄ Abasi ke ediwak itie ke Bible usem mmọ. (Se page 12 ye 13.) Etie nte nsio nsio ntak emi inọde emi okonyụn̄ anam mbon oro ẹkekabarede Bible ke mme usem emi ẹdọn̄ enyịn̄ Abasi ke Bible mmọ. Ibịghike ẹkekabade ndusụk N̄wed Abasi Usem Greek emi. Ke uwụtn̄kpọ, ẹkekabade enye emi ẹkotde Rotuman Bible ke 1999. Enye ọdọn̄ọ “Jihova” utịm ike-51 ke mme ufan̄ikọ 48. Ẹkekabade enye emi ẹkotde Batak (Toba) ke 1989 ke Indonesia, ndien ẹdọn̄ “Jahowa” ke itie 110.

Kpukpru se inemede emi ẹwụt ke imenyene ntak ndifiak ndọn̄ enyịn̄ Abasi, Jehovah, ke N̄wed Abasi Usem Greek. Se Mme Ntiense Jehovah ẹnamde edi oro. Mmọ ẹkpono enyịn̄ Abasi inyụn̄ iyomke ndisio n̄kpọ ekededi emi okodude ke ata akpa N̄wed Abasi mfep.—Ediyarade 22:18, 19.