Iwakke se isibiak nnyịn nte ndikụt ẹsiode owo nnyịn m̀mê akpan ufan nnyịn ẹfep ke esop ke ntak emi enye mîmaha ndikabade esịt. Bible etịn̄ nte ikpanamde n̄kpọ ye owo emi ẹsiode ke esop. Se inamde ediwụt adan̄a nte imade Abasi inyụn̄ inyịmede nditiene ndutịm esie. * Yak ibọrọ ndusụk mbụme mme owo ẹsibụpde.

Didie ke ikpanam n̄kpọ ye owo oro ẹsiode ẹfep ke esop? Bible ọdọhọ ete: “Ẹtre ndidụk ndụk ye owo ekededi emi ẹkotde enye eyenete, emi edide owo use m̀mê owo idiọkitọn̄ m̀mê okpono ndem m̀mê osụn̄i isụn̄i m̀mê akpammịn m̀mê owo n̄kanubọk, ẹkûkam ẹdia n̄kpọ ye utọ owo oro.” (1 Corinth 5:11) Bible etịn̄ se ikpanamde ye owo ekededi eke “[mîtieneke] ukpepn̄kpọ Christ.” Enye ọdọhọ ẹte: “Ẹkûdedei ẹda enye ẹsịn ke ufọk mbufo ẹkûnyụn̄ ẹkọm enye. Koro owo eke ọkọmde enye etiene abuana ke mme idiọk utom esie.” (2 John 9-11) Nnyịn ikpenyeneke nneme n̄kpọ Abasi ye mbon emi ẹsiode ẹfep ke esop, ikponyụn̄ inamke n̄kpọ ekededi ye mmọ. Enyọn̄-Ukpeme February 1, 1982, ọdọhọ ke page 25 ete ke ekpri n̄kpọ nte ekọm ekeme ndida nneme ndi, ebe ke nneme okodụk ufan. Ndi imoyom nditọn̄ọ n̄kpọ emi edinamde ikadiana ye owo oro ẹma ẹkesio ẹfep?

Ndi ana idian̄ade nsan̄a ye enye ofụri ofụri? Ih, ye ediwak ntak. Akpa, emi ediwụt ke ida ye Abasi, ke imanam se Ikọ esie ekpepde. Nnyịn isikopke uyo Jehovah ke ini ememde utom kpọt, imesikop n̄ko ke ini ọsọn̄de. Ima oro imade Abasi anam inịm kpukpru ewụhọ esie, sia imọdiọn̄ọ ke enye edi edinen ye edima Abasi, ke mme ewụhọ esie ẹnen̄ede ẹdi ke ufọn nnyịn. (Isaiah 48:17; 1 John 5:3) Ọyọhọ ntak iba oro anamde ikûdian idem ye anamidiọk oro mîkabakede esịt edi ke nnyịn iyomke enye abiat nnyịn, adian̄ade nnyịn ọkpọn̄ Abasi, inyụn̄ iyomke mme owo ẹtịn̄ ikọ ẹbiat esop Abasi. (1 Corinth 5:​6, 7) Ọyọhọ ntak ita edi  ke edieke inamde se Bible ọdọhọde, emi ekeme ndikam mfọn ye owo oro ẹkesiode ẹfep. Ima ida ye se kọmiti ukpeikpe ẹkebierede, emi ekeme nditụk anamidiọk oro mîkenyịmeke mbiowo ẹn̄wam enye. Iman ye mme ufan esie ndidian̄ade nsan̄a ye enye ekeme ndinam ‘enyịn an̄wan̄a enye,’ anam enye okụt ke se ikanamde ama enen̄ede ọdiọk, onyụn̄ anam enye anam n̄kpọ man afiak ebịne Jehovah.​—Luke 15:17.

Nso ke ikpanam edieke ẹsiode owo ubon nnyịn ke esop? Ekeme ndisọn̄ nnyịn ndinam se Jehovah ọdọhọde sia inen̄erede ikpere owo oro. Didie ke ikpanam n̄kpọ ye owo ubon nnyịn oro ẹsiode ẹfep? Nnyịn idikemeke ndineme kpukpru mi, edi yak ineme iba.

Akpa, ekeme ndidi owo ubon nnyịn oro ẹsiode ẹfep osụk ododụn̄ ye nnyịn. Ndisio enye ke esop iwọrọke ke enye idịghe aba owo ubon nnyịn, ntre imekeme ndiyak enye etiene anam nsio nsio n̄kpọ oro ikesinamde ye enye. Edi enye ndisịn ndikabade esịt owụt ke enye iyomke aba ndidiana ye mbon eken ke ubon nnam n̄kpọ Jehovah. Ntre, mbon emi ẹsọn̄ọde ẹda ye Jehovah ke ubon oro idiyakke enye esịn uyo ke ini mmọ ẹbonode ke ubon mmọ ẹkpono Abasi. Ke uwụtn̄kpọ, edieke enye odude ke ini ubon ẹkpepde Bible, ẹkeme ndiyak enye etiene etie edi enye idisịnke uyo. Edi edieke enye edide ekpri eyen, osụk edi utom ete ye eka esie ndika iso n̄kpep enye n̄kpọ nnyụn̄ ntụnọ enye. Ntre edima ete ye eka esie ẹkeme ndinam ndutịm man mmọ ẹka iso ẹkpep eyen oro Bible. *​—Mme N̄ke 6:​20-22; 29:17.

Ọyọhọ iba, ekeme ndidi owo ubon nnyịn oro ẹsiode ẹfep idụn̄ke ye nnyịn. Ndusụk ini ekeme ndinyene ata akpan n̄kpọ ke ubon emi anade eneme ye enye, edi akpana inyene adan̄a, ikpanaha edi ke ubọk ke ubọk, ikponyụn̄ inaha ibiat ini ye enye ikaha. Mbon emi ẹsọn̄ọde ẹda ye Abasi ke ubon isiyomke ntak ndidian idem m̀mê ndinyene nneme ye owo mmọ oro ẹsiode ẹfep ke esop, oro mîdụn̄ke ye mmọ. Utu ke oro, mmọ ẹsinam se N̄wed Abasi ọdọhọde ẹnam ye mbon oro ẹsiode ke esop ke ntak  emi mmọ ẹsọn̄ọde ẹda ye Jehovah ye esop esie. Mmọ ndisọn̄ọ nda ye Jehovah ọyọfọn ye anamidiọk oro nte ini akade, onyụn̄ ekeme ndinam enye ọbọ ufọn ntụnọ oro ẹkenọde enye. *​—Mme Hebrew 12:11.