Akpatre Ikpehe
“Ẹdi mme andikpebe mbon oro otode ke mbuọtidem ye ime mmọ ẹbọ mme un̄wọn̄ọ ẹnyene.”—MME HEBREW 6:12.
1, 2. Ntak emi oyomde inyene mbuọtidem mfịn-e? Nọ uwụtn̄kpọ.
MBUỌTIDEM edi edu emi ẹmade etieti. Edi ke ini ẹtịn̄de ẹban̄a mbuọtidem, oyom iti n̄ko ke enye edi edu oro anade ‘isọsọp’ inyene edieke nnyịn mînyeneke. Edieke edide imenyenyene, oyom isọsọp inam n̄kpọ man ikpeme inyụn̄ ibọk mbuọtidem nnyịn. Ntak-a?
2 Da nte ke asan̄a ke ata akamba desat. Ndien etie nte nsatitọn̄ ọmọn̄ owot fi. Edieke okụtde ekpri mmọn̄, ana okoi se ididade fi tutu esịm ebiet oro akade. Ndien ana ekpekpeme mbak eyo edinam se okoide oro asat. Nnyịn idụn̄ ke ererimbot emi etiede nte desat, ererimbot emi ata mbuọtidem ananade ukem nte mmọn̄ ananade ke desat—ererimbot emi mbuọtidem owo esisọpde emem edieke owo mîkpemeke mînyụn̄ ibọkke enye. Imenen̄ede iyom mbuọtidem. Ukem nte nnyịn mîkemeke ndika iso ndu uwem ye unana edin̄wọn̄ mmọn̄, nnyịn ikemeke ndika iso nnam n̄kpọ Abasi edieke nnyịn mînyeneke mbuọtidem.—Rome 1:17.
3. Nso ke Jehovah anam man an̄wam nnyịn inam mbuọtidem nnyịn etetịm ọsọn̄, ndien ewe n̄kpọ iba ke ana isiti?
3 Jehovah ọfiọk ke oyom isọsọp inyene mbuọtidem, onyụn̄ ọfiọk ke imemke ndika iso nnyene mbuọtidem mfịn. Oro anam enye ọnọ nnyịn mme uwụtn̄kpọ emi ikpekpebede. Jehovah akanam apostle Paul ewet ete: “Ẹdi mme andikpebe mbon oro otode ke mbuọtidem ye ime mmọ ẹbọ mme un̄wọn̄ọ ẹnyene.” (Heb. 6:12) Ntak edi oro esop Jehovah esịnde udọn̄ ọnọ nnyịn ete inen̄ede ikpebe mbuọtidem mme anam-akpanikọ iren ye iban utọ nte mbon oro ẹnemede ke n̄wed emi. Nso ke ikpanam? Ẹyak isiti n̄kpọ iba emi: (1) Ana ika iso inam mbuọtidem nnyịn etetịm ọsọn̄; (2) Inaha ifre idotenyịn nnyịn.
4. Nso ke Satan anam ndiwụt ke imọ iyomke mme owo ẹnyene mbuọtidem, edi ntak emi idem mîkpenyekke nnyịn?
4 Ka iso nam mbuotidem fo etetịm ọsọn̄. Satan iyomke nnyịn inyene mbuọtidem. Enye anam mbuọtidem anana ke ererimbot nte mmọn̄ anana ke desat. Odudu esie idịghe se ẹmende ẹdomo ye eke nnyịn. Edi, ndi emi ọwọrọ ke ana inyek idem ikere ke nnyịn idikemeke ndinyene mbuọtidem? Iwọrọke ntre! Jehovah edi ata Ufan mbon oro ẹdomode ndinyene ata mbuọtidem. Enye ọdọhọ ke sia Imọ idade ye nnyịn, ke nnyịn imekeme ndibiọn̄ọ Devil nnyụn̄ nnam enye efehe ọkpọn̄ nnyịn! (Jas. 4:7) Nnyịn idibiọn̄ọ enye ke ini isiode ini ke usen kiet kiet ida inam mbuọtidem nnyịn etetịm ọsọn̄. Nso ke ikeme ndida nnam oro?
5. Iren ye iban emi ẹtịn̄de ẹban̄a ke Bible ẹkesan̄a didie ẹnyene mbuọtidem? Nam an̄wan̄a.
5 Nte ima ikokokụt, iren ye iban emi Bible ọdọhọde ke ẹma ẹnyene mbuọtidem ikadaha-da mbuọtidem imana. Nte mmọ ẹkedude uwem owụt ke spirit Jehovah esinam owo enyene mbuọtidem. (Gal. 5:22, 23) Mmọ ẹma ẹsibọn̄ akam ẹben̄e un̄wam, ndien Jehovah ama anam mbuọtidem mmọ etetịm ọsọn̄. Ẹyak ikpebe mmọ, ikûdedei ifre ke Jehovah esitat ubọk ọnọ mbon emi ẹben̄ede enye spirit esie, ẹnyụn̄ ẹdude uwem ekekem ye eben̄e mmọ. (Luke 11:13) Ndi odu mme n̄kpọ en̄wen oro ikpanamde?
6. Nso ke ikpanam man inen̄ede ibọ ufọn mbụk emi ikotde ke Bible?
6 Ke n̄wed emi, imeneme iban̄a ndusụk mbon oro ẹkenen̄erede ẹnyene mbuọtidem. Edi ata ediwak ke ẹsosụhọ! (Kot Mme Hebrew 11:32.) Enyene se ikemede ndikpep nto mmọ kiet kiet edieke ibọn̄de akam inyụn̄ itiede ikere se ẹbụkde ẹban̄a mmọ. Edieke ikotde mbụk Bible emi aban̄ade mmọ itọk itọk, mbuọtidem nnyịn idinen̄ekede isọn̄. Man ibọ ufọn mbụk emi ikotde ke Bible, ana ida ini ikere kpukpru se ẹtịn̄de ẹban̄a ye se ikanamde n̄kpọ etie ntre. Edieke itide ke ‘n̄kpọ ama esitụk’ mme anana-mfọnmma iren ye iban emi ukem nte esitụkde nnyịn, se ikọwọrọde mmọ eyenen̄ede an̄wan̄a nnyịn. (Jas. 5:17) Ndinịm idem nnyịn ke itie mmọ ayanam ifiọk nte eketiede mmọ ke idem ke ini mmọ ẹkesobode mme mfịna oro ẹtiede nte eke nnyịn.
7-9. (a) Didie ke ekpeketie ndusụk iren ye iban oro ẹkenyenede mbuọtidem ke eyo Bible edieke ẹkpekedọhọde mmọ ẹnam n̄kpọ Jehovah nte nnyịn inamde mfịn? (b) Ntak emi ikpanamde mme n̄kpọ emi ẹdisọn̄ọde mbuọtidem nnyịn?
7 Edinam nnyịn esisọn̄ọ mbuọtidem nnyịn n̄ko. Ndien imọfiọk ke “mbuọtidem eke mîsan̄ake ye utom akpa.” (Jas. 2:26) Kere nte esịt ekpekenemde iren ye iban emi inemede ke n̄wed emi edieke ẹkpekedọhọde mmọ ẹnam se Jehovah ọdọhọde nnyịn inam mfịn.
8 Ke uwụtn̄kpọ, ekpeketie Abraham didie ke idem edieke ẹkpekedọhọde enye ke idịghe ke ebiet emi ẹtan̄de itiat ẹkọk ke enye edituak ibuot ọnọ Jehovah, ke edidi ke ndiye Ufọkmbono Obio Ubọn̄ ye ke ikpọ mbono emi ẹnemede ẹnyụn̄ ẹnamde mme un̄wọn̄ọ oro enye akadade ‘nsannsan okụt,’ an̄wan̄a? (Kot Mme Hebrew 11:13.) Kere n̄ko nte ekpeketiede Elijah ke idem edieke ẹkpekedọhọde enye ke utom esie edidi ndisisan̄a eyen eyen n̄kwọrọ etop idotenyịn ye ndọn̄esit, utu ke ndiwot mme prọfet Baal nnyụn̄ nnam n̄kpọ Jehovah ke ini idiọk edidem akakarade? Ndi ukereke ke mmọ ẹkpekenen̄ede ẹnem esịt ndituak ibuot nnọ Jehovah nte nnyịn inamde mfịn?
9 Ntem, ẹyak ika iso inam mme n̄kpọ emi ẹdinamde mbuọtidem nnyịn etetịm ọsọn̄. Oro oyowụt ke imekpebe uwụtn̄kpọ iren ye iban oro ẹkenyenede mbuọtidem, emi ẹtịn̄de ẹban̄a ke N̄wed Abasi. Nte ima iketetịn̄ ke Ntọn̄ọikọ n̄wed emi, ndinam emi ayanam inen̄ede itie nte mme ufan mmọ. Ndien ke mîbịghike, iyakabade idi ata ufan mmọ.
10. Nso idinen̄ede inem nnyịn ke Paradise?
10 Kûfre idotenyịn fo. Un̄wọn̄ọ Abasi esisọn̄ọ mme anam-akpanikọ iren ye iban idem. Ndi esisọn̄ọ fi n̄ko? Ke uwụtn̄kpọ, kere nte esịt edinemde fi ndikụt mme anam-akpanikọ asan̄autom Abasi eke eset ke ini ẹdinamde ‘ndinen owo ẹset ke n̄kpa.’ (Kot Utom 24:15.) Mme mbụme ewe ke afo edima ndibụp mmọ?
11, 12. Ke obufa ererimbot, ewe mbụme ke edima ndibụp (a) Abel? (b) Noah? (c) Abraham? (d) Ruth? (e) Abigail? (f) Esther?
11 Ke ini afo edisobode ye Abel, ndi ayama ndibụp enye nte Adam ye Eve ẹketiede? Mîdịghe, ndi ayama ndibụp enye: “Ndi ama esinyene nneme ye mme cherub oro ẹkekpemede In̄wan̄ Eden? Ndi mmọ ẹma ẹsibọrọ fi ikọ?” Nso ke edibụp Noah? Ekeme ndidi oyobụp enye: “Ndi mme Nephilim ẹma ẹsinam fi ndịk? Akanam didie ese aban̄a mme unam oro ke ofuri isua kiet oro mbufo ẹkedude ke ubom?” Ekeme ndidi oyobụp Abraham ke ini edikụtde enye, ete: “Ndi ama amana edikụt Shem? Anie ekekpep fi n̄kpọ aban̄a Jehovah? Ndi ama ọsọn̄ fi ndikpọn̄ Ur?”
12 Kere n̄ko mme mbụme emi edimade ndibụp mme anam-akpanikọ iban emi ẹdisetde. “Ruth, nso ikanam fi emek ndinam n̄kpọ Jehovah?” “Abigail, ndi idem ama enyek fi ke ini akasiande Nabal ke ama an̄wam David?” “Esther, ẹkenam fi ye Mordecai didie ke se Bible eketịn̄de oro ama ekebe?”
13. (a) Mme mbụme ewe ke mbon oro ẹdinamde ẹset ẹdima ndibụp fi? (b) Etie fi didie ke idem ndifiọk ke oyokụt mme anam-akpanikọ iren ye iban eke eset?
13 Kûfre ke mme anam-akpanikọ iren ye iban oro ẹyema ndibụp fi ekese n̄kpọ n̄ko. Edinem didie ntem ndisian mmọ nte n̄kpọ eketiede ke mme akpatre usen emi, nnyụn̄ ntịn̄ nte Jehovah akan̄wamde nnyịn ke mme ini afanikọn̄! Mmọ ẹyenen̄ede ẹma ndifiọk nte Jehovah okosude kpukpru un̄wọn̄ọ esie. Ini oro, nnyịn idikereke-kere nte mme anam-akpanikọ asan̄autom Abasi oro ẹtịn̄de ẹban̄a ke Bible ẹketiede sia ididodụn̄ ye mmọ ke Paradise! Ntem, nam se ededi oro ekemede idahaemi man akpakabade edi ufan mmọ. Ka iso kpebe mbuọtidem mmọ. Kop inemesịt nditiene mme ufan fo emi nnam n̄kpọ Jehovah ke nsinsi!
