Ndima Nditọete Nnyịn:

Ẹketọn̄ọ ndimịn̄ ndinem ibuotikọ emi ẹkotde, “Kpebe Mbuọtidem Mmọ,” ke nsiondi Enyọn̄-Ukpeme ofụri owo eke January 1, 2008. Toto ke ini oro, ẹsimịn̄ ibuotikọ emi kpukpru ọfiọn̄ ita, ndien esinem nnyịn ndikot mmọ.

Ndi mme owo ẹma ibuotikọ emi? Ke n̄wan kiet ama okokot enye oro akaban̄ade Martha, enye ama ewet ete: “Mma nsak ke ini n̄kokotde ibuotikọ oro sia nsinyụn̄ nnam n̄kpọ nte Martha. Mmesinen̄ede mma ndikama owo esen, nnam emi nnam oko, ndien ndusụk ini mmesifre ke akpana nsụhọde ntie ye isenowo mi.” N̄kaiferi kiet ama ewet inem inem n̄kpọ aban̄a mbụk Esther ete: “Mmekeme ndidọhọ ke nsịne ke otu mbon emi ẹsinen̄ede ẹma ọfọn̄ ye mbufa n̄kpọ. Oyom isịne n̄kpọ ọfọn, edi iyomke inam ibe ubọk.” Enye ama adian do ete: “Jehovah ese esịt.” Ibuotikọ kiet emi eketịn̄de n̄kpọ aban̄a apostle Peter ama anam eyenete an̄wan kiet ewet ete: “Mbụk oro ama enen̄ede enem mi tutu n̄kemeke ndiyak nnịm. Eketie nte ndu do! Enye ama enen̄ede otụk mi onyụn̄ an̄wan̄a mi!”

Mbon oro isiakde mi—ye ata ediwak mbon eken emi ẹsiwetde leta ekọm ẹban̄a ibuotikọ emi—ẹsọn̄ọ ikọ emi apostle Paul ekewetde ke eset ete: “Kpukpru n̄kpọ oro ẹkewetde ke ini edem, ẹkewet mmọ ndida nteme nnyịn.” (Rome 15:4) Jehovah akanam ẹwet mme mbụk oro ẹsịn ke Bible man ẹkpeda ẹkpep nnyịn n̄kpọ. Inamke n̄kpọ m̀mê idu ke esop Abasi ebịghi adan̄a didie, kpukpru nnyịn imekeme ndikpep n̄kpọ nto mmọ.

Imenen̄ede isịn udọn̄ inọ fi ite okûbiat ini ndikot n̄wed emi. Kpep enye ke ini Utuakibuot Ubon mbufo—nditọ fo ẹyema enye! Kûfiak mbono esop ke ini ẹdikpepde enye ke Ukpepn̄kpọ Bible Esop! Kûkot enye itọk itọk; da ini kot. Domo ndida enyịn ikike n̄kụt se ẹnemede; yak se ẹnemede an̄wan̄a fi. Yak etie fi ke idem nte eketiede mmọ; domo ndikụt se mmọ ẹkekụtde. Tie kere nte mmọ ẹkenamde n̄kpọ nyụn̄ kere nte afo akpakanamde edieke okpokodude do!

Enen̄ede enem nnyịn ndisio n̄wed emi man afo etiene okot. Enye akpakam enyene ufọn ọnọ fi ye ubon mbufo. Imama fi, imonyụn̄ iyom n̄kpọ ọfọn ye afo,

Otu Ukara eke Mme Ntiense Jehovah