MME ọwọrọetop usen nduọkodudu ido ukpono ye eke ererimbot emi ẹnịmde mfịn ke ediwak ikpehe isọn̄ ikọtọn̄ọke ito Bible. M̀mọ̀n̄, ndien, ke mme utọ usọrọ emi ẹketọn̄ọ ẹto? Edieke afo ekemede ndika itie ubon n̄wed, afo ayama ndikot se mme n̄wed ndụn̄ọde ẹtịn̄de ẹban̄a mme ọwọrọetop usen nduọkodudu ke ebiet emi afo odụn̄de. Kere ban̄a uwụtn̄kpọ ifan̄.

 Easter. “The Encyclopædia Britannica ọdọhọ ete: “N̄kpọ ndomokiet idụhe ke Obufa Testament ndiwụt ke ẹma ẹsinịm usọrọ Easter.” Didie ke Easter ọkọtọn̄ọ? Enye ọkọtọn̄ọ oto utuakibuot mme okpono ndem. Ke adan̄aemi ẹdọhọde ke usen nduọkodudu emi edi nditi ediset ke n̄kpa Jesus, mme ido edinam ini Easter idịghe ido mme Christian. Ke uwụtn̄kpọ, kaban̄a ọwọrọetop “oyot Easter,” The Catholic Encyclopedia ọdọhọ ete: “Oyot edi idiọn̄ọ ukpono ndem ndien enye kpukpru ini esida aban̄a eduek.”

Usọrọ Obufa Isua. Usenọfiọn̄ ye ido edinam Usọrọ Obufa Isua ẹkpụhọde to ke idụt kiet sịm efen. Kaban̄a ntọn̄ọ usọrọ emi, The World Book Encyclopedia ọdọhọ ete: “Julius Caesar andikara Rome ekenịm January 1 nte Usen Obufa Isua ke isua 46 E.N. Mbon Rome ẹkeyak usen emi ẹnọ Janus, abasi inuaotop, enyịnusụn̄, ye editọn̄ọ. Ẹkekot January ẹdian Janus, emi ekenyenede iso iba—kiet ese iso, enye eken ese edem.” Mmọdo usọrọ Obufa Isua ẹnyene ntọn̄ọ oto mme ido ukpono ndem.

Usọrọ Halloween. The Encyclopedia Americana ọdọhọ ete: “Mme ido edinam usọrọ Halloween ẹketọn̄ọ ẹto usọrọ mme oku Ido Ukpono Mbon Celt eset oro ẹkesinịmde mbemiso eyo mme Christian. Mbon eset oro ẹkekotde Celt ẹma ẹsinịm usọrọ ẹnọ akpan abasi iba—abasi utịn ye abasi mme akpan̄kpa . . . , emi ẹkesinịmde usọrọ esie ke November 1, kpa ntọn̄ọ Obufa Isua Mbon Celt. Ẹma ẹda usọrọ mme akpan̄kpa sụn̄sụn̄ ẹdibuak ke mme ido edinam mme Christian.”

Mme Usen Nduọkodudu Eken. Owo ikemeke ndineme mban̄a kpukpru usọrọ oro ẹsidiade ke ofụri ererimbot. Nte ededi, Jehovah inyịmeke mme usen nduọkodudu oro ẹdade itoro ẹsọk mme owo m̀mê mme esop ubọkowo. (Jeremiah 17:5-7; Utom 10:25, 26) N̄ko, fiọk ete ke nte mme usọrọ ido ukpono ẹketọn̄ọde ẹnyene n̄kpọ ndinam ke edidiọn̄ọ m̀mê mmọ ẹnem Abasi esịt m̀mê inemke. (Isaiah 52:11; Ediyarade 18:4) Mme edumbet Bible oro ẹsiakde ke Ibuot 16 ke n̄wed emi ẹyen̄wam fi ndibiere nte Abasi esede owo ndibuana ke mme usọrọ usen nduọkodudu ererimbot.