NTE ibat owo ọkọtọn̄ọde ndikọri ke isọn̄, ekese mmọ ẹma ẹnam idiọkn̄kpọ nte Cain. Edi eren kiet ama ọkpuhọde. Enye edi eren emi ẹkotde Eʹnoch. Eʹnoch ekedi eren uko. Mme owo ẹkande enye ẹkuk ẹkenam mme ata idiọkn̄kpọ, edi Eʹnoch akaiso anam n̄kpọ ọnọ Abasi.

Nte ọmọfiọk ntak mme owo ke ini oro ẹkenamde ekese idiọkn̄kpọ? Ọfọn, kere, anie akanam Adam ye Eve ẹsọn̄ ibuot ye Abasi ẹnyụn̄ ẹdia mfri oro Abasi ọkọdọhọde mmọ ẹkudia? Ih, ekedi idiọk angel. Bible okot enye Satan. Ndien enye ke odomo ndinam ofụri owo ẹdiọk.

Usen kiet Jehovah Abasi ama anam Eʹnoch asian mme owo se mmọ mikoyomke ndikop. Ekedi ntem: ‘Usen kiet Abasi eyesobo kpukpru mme idiọk owo.’ Ekeme ndidi esịt ama otịm ayat mme owo ndikop oro. Ndusụk, mmọ ẹma ẹdomo ndiwot Eʹnoch. Ntre okoyom Eʹnoch otịm enyene uko man ekeme ndisian mme owo se Abasi okoyomde ndinam.

Abasi ikayakke Eʹnoch odu uwem ebịghi ye mme idiọk owo oro. Eʹnoch okodu uwem isua 365 kpọt. Ntak nnyin idọhọde “isua 365 kpọt”? Koro mme owo ini oro ẹma ẹsọn̄ idem ẹkan idahaemi ẹnyụn̄ ẹdu uwem ẹbịghi ẹkan. Kam se, Me·thuʹse·lah, eyen Eʹnoch ama odu uwem osịm isua 969!

Nte ededi, ke Eʹnoch ama akakpa, mme owo ẹma ẹtịm ẹdiọk ẹkan. Bible ọdọhọ ete ‘ofụri ekikere mmọ ẹkedi idiọk kpukpru ini’ ndien n̄ko ‘isọn̄ akabade ọyọhọ ye afai.’

Nte afo ọmọfiọk ntak kiet ntịme ọkọyọhọde ntre ke isọn̄ ke mme usen oro? Edi koro Satan ama enyene obufa usụn̄ ndinam mme owo ẹnam idiọkn̄kpọ. Nnyịn imọn̄ ikpep iban̄a emi.