KPUKPRU nti n̄kpọ nnyịn inyenede ẹto Abasi. Enye akanam utịn man ọnọ nnyịn un̄wana ke uwemeyo, ye ọfiọn̄ ye ntantaọfiọn̄ man inyene un̄wana ke okoneyo. Ndien Abasi anam isọn̄ man nnyịn idụn̄.

Edi utịn, ọfiọn̄, ntantaọfiọn̄ ye isọn̄ ikedịghe akpa n̄kpọ Abasi okobotde. Nte ọmọfiọk se ikedide akpa? Abasi ekebemiso anam mme owo nte enye. Nnyịn ikemeke ndikụt mme owo emi kpa nte nnyịn mikemeke ndikụt Abasi. Ke Bible ẹkot mme owo emi mme angel. Abasi akanam mme angel ẹdụn̄ ye enye ke heaven.

Akpa angel oro Abasi akanamde ekedi ata isio. Enye ekedi akpa Eyen Abasi, okonyụn̄ anam utom ye Ete esie. Enye akan̄wam Abasi anam kpukpru n̄kpọ eken. Enye akan̄wam Abasi anam utịn, ọfiọn̄, ntantaọfiọn̄ ye isọn̄ nnyịn.

Isọn̄ eketie didie ini oro? Ke ntọn̄ọ, baba owo ikpekemeke ndidụn̄ ke isọn̄. N̄kpọ baba kiet ikodụhe ibọhọke akamba akpa ofụkde isọn̄. Edi Abasi okoyom owo ẹdụn̄ ke isọn̄. Ntre enye ọkọtọn̄ọ nditịm mme n̄kpọ nnọ nnyịn. Enye akanam nso?

Ọfọn, akpa, isọn̄ okoyom un̄wana. Ntre Abasi akanam un̄wana utịn ayama osịm isọn̄. Enye ama anam enye man okoneyo ye uwemeyo ẹdu. Ke oro ebede, Abasi anam isọn̄ ọwọrọ ke enyọn̄ mmọn̄ inyan̄.

Ke akpa, baba n̄kpọ ikodụhe ke isọn̄. Enye ekebiet ndise emi afo okụtde mi. Frawa mme eto mme unam ikoduhe. Idem iyak baba kiet ikodụhe ke mme inyan̄. Abasi ama enyene ekese utom efen ndinam man isọn̄ otịm ọfọn se mme unam ye mme owo ẹdụn̄de.