EDIEKE owo oro ọniọn̄de nte dek-ọkọm ufọk fo akpasan̄ade ekpere fi, afo ekpekere nso? Owo oro ekpedi ata anyan owo! Ini kiet, ata ikpọ owo ẹma ẹdu ke isọn̄ ke akpanikọ. Bible owụt ete ete mmọ ẹkedi mme angel ẹtode heaven. Edi didie ke oro ekpekeme nditịbe?

Ti, idiọk angel oro Satan ke ekesịn idem ndinam ntịme. Enye okodomo ndinam idem mme angel Abasi ẹdiọk. Ekem, ndusụk angel emi ẹtọn̄ọ ndikop uyo nnọ Satan. Mmọ ẹma ẹtre utom oro Abasi ọkọnọde mmọ ẹnam ke heaven. Ndien mmọ ẹsuhọde ẹdi isọn̄ ẹnyụn̄ ẹnam ikpọkidem owo ẹnọ idem mmọ. Nte ọmọfiọk ntak?

Bible etịn̄ nte koro nditọ Abasi emi ẹma ẹkụt ndiye nditọ iban ke isọn̄ ẹnyụn̄ ẹyom ndidụn̄ ye mmọ. Ntre mmọ ẹdi isọn̄ ẹdidọ nditọ iban oro. Bible ọdọhọ ke oro ikọfọnke, koro Abasi akanam mme angel ete ẹdụn̄ ke heaven.

Ke ini mme angel oro ye iban mmọ ẹkẹnyenede nditọ, nditọ emi ẹma ẹkpuhọde. Ke akpa, ekeme ndidi mmọ ikotịmke itie isio. Edi mmọ ẹma ẹkaiso ẹkọri akamba akamba, ẹnyụn̄ ẹtịm ẹsọn̄ idem, tutu mmọ ẹkabade ata ikpọ owo.

Ikpọ owo emi ẹma ẹdiọk. N̄ko sia mmọ ẹkekponde ntre ẹsọn̄ idem, mmọ ẹkpenọ mme owo unan. Mmọ ẹma ẹdomo ndinyịk kpukpru owo ẹdiọk nte mmọ.

Eʹnoch ama akpa, edi owo kiet ama odu ke isọn̄ ke emi ọkọfọnde. Enyịn̄ owo emi ekedi Noah. Enye kpukpru ini akanam se Abasi okoyomde.

Usen kiet, Abasi ọdọhọ Noah ete ke ini ama edi ọnọ Imọ ndisobo kpukpru mme idiọk owo. Edi Abasi ama oyom ndinyan̄a Noah, ubon esie ye ediwak unam. Yak ise nte Abasi akanamde emi.