KAM se akwa ubon emi. Emi edi nditọ Jacob 12. Enye n̄ko ama enyene nditọ iban. Nte afo ọmọdiọn̄ọ enyịn̄ nditọ oro ndomo kiet? Yak ifiọk usụk mmọ.

Leʹah akaman Reuʹben, Simʹe·on, Leʹvi ye Judah. Ke Rachel okụtde ete imọ inyeneke eyen, enye ama ọfụhọ etieti. Ntre enye ama ọnọ Jacob eyenufọk esie Bilʹhah, ndien Bilʹhah ama enyene nditọ iren iba ẹkekotde Dan ye Naphʹta·li. N̄ko Leʹah ama ọnọ Jacob eyenufọk esie Zilʹpah, ndien Zilʹpah akaman Gad ye Ashʹer. Leʹah ke akpatre ama enyene nditọ iren iba efen, Isʹsa·char ye Zebʹu·lun.

Ke akpatre Rachel ama ekeme ndinyene eyen kiet. Enye okokot enye Joseph. Ama ekem, nnyịn iyekpep ekese iban̄a Joseph, koro enye ama akabade edi ata akpan owo. Emi ekedi nditọ iren 11 oro ẹkemanade enọ Jacob ke enye odụn̄de ye Laʹban, ete Rachel.

Jacob ama enyene nditọ iban n̄ko, edi Bible ọnọ enyịn̄ kiet kpọt ke otu mmọ. Enyịn̄ esie ekedi Diʹnah.

Ini ama ekem oro Jacob ekebierede ndikpọn̄ Laʹban mfiak n̄ka Caʹnaan. Ntre enye ama obon akwa ubon esie ye akamba otu erọn̄ esie ye uwak ufene eken ọtọkiet, onyụn̄ ọtọn̄ọ anyan isan̄ esie.

Ke Jacob ye ubon esie ẹma ẹkenyọn̄ ẹka Caʹnaan esisịt, Rachel ama aman eyeneren efen. Okotịbe ke mmọ ẹkade isan̄. Rachel ama okụt mfịna, ke akpatre enye ama akpa ke ini uman. Edi ekpri eyeneren oro ama ọbọhọ. Jacob okokot enye Benjamin.

Nnyịn iyom nditi enyịn̄ nditọ Jacob 12 koro ofụri idụt Israel ẹketo mmọ. Ke akpanikọ, esien Israel 12 ẹda enyịn̄ mmọ ẹto nditọ iren Jacob 10 ye enyịn̄ nditọ iren Joseph iba. Isaac ama odu uwem ediwak isua ke kpukpru nditọ iren emi ẹmanade, n̄ko esịt ama enem enye etieti ndinyene ediwak nditọ eyen ntre. Edi yak ise se iketịbede inọ eyeyen esie, Dinah.