NTE akanam afo omokop ass etịn̄de ikọ? Afo emekeme ndidọhọ, ‘Baba.’ ‘Mme unam isitịn̄ke ikọ.’ Edi Bible etịn̄ aban̄a ass oro eketịn̄de ikọ. Yak ise nte okotịbede.

Nditọ Israel ekpere ndibe ndụk isọn̄ Caʹnaan. Baʹlak, edidem Moʹab, efehe Israel ndịk. Ntre enye ọdọn̄ ekot asian owo ekotde Baʹlaam edi edisụn̄i nditọ Israel. Baʹlak ọn̄wọn̄ọ ndinọ Baʹlaam ekese okụk, ntre Baʹlaam ọdọk ass esie adaha ndikụt Baʹlak.

Jehovah iyomke Baʹlaam osụn̄i ikọt Esie. Ntre enye ọdọn̄ angel ye anyan ofụt ada ke usụn̄ nditre Baʹlaam. Baʹlaam ikemeke ndikụt angel oro, edi ass esie okụt. Ntre ass odomo ndifep angel oro, ndien ke akpatre ọduọ ana ke usụn̄. Baʹlaam otịm ayat esịt, ndien amia ass esie ke eto.

Ndien Jehovah anam Baʹlaam okop ass esie etịn̄de ikọ ọnọ enye. Ass obụp ete ‘Nnam fi nso man afo amia mi?’

Baʹlaam ọbọrọ ete, ‘Afo amanam mi mbiet nditen̄.’ ‘Ke n̄kpakamade ofụt, ami n̄kpowot fi!’

Ass obụp ete, ‘Nte mmanam fi ntem akanam?’ Baʹlaam ọbọrọ ete, ‘Baba.’

Jehovah ndien anam Baʹlaam okụt angel adade ke usụn̄ ye ofụt. Angel oro ọdọhọ: ‘Ntak afo amiade ass fo? Ami mmedi ndibiọn̄ọ fi koro afo ukpakaha ndisụn̄i Israel. Ke ass fo mikpefepke mi, ami n̄kpowot fi, edi n̄kpọ ikpanamke ass fo.’

Baʹlaam ọdọhọ ete: ‘Mmanam idiọkn̄kpọ. N̄kọfiọkke nte afo akada ke usụn̄.’ Angel oro ayak Baʹlaam aka, ndien Baʹlaam aka ndikụt Baʹlak. Enye osụk odomo ndisụn̄i Israel, edi utu ke oro, Jehovah anam enye ọdiọn̄ Israel utịm ikata.