KE EDIDEM Jer·o·boʹam akpade, ofụri ndidem ẹkarade obio ubọn̄ edere esien-10 Israel ẹdediọk. Edidem Aʹhab ọdiọk akan kpukpru. Nte ọmọfiọk ntak? N̄wan esie edi akwa ntak kiet. Idiọk ọbọn̄ an̄wan Jezʹe·bel.

Jezʹe·bel idịghe n̄wan Israel. Enye edi adiaha edidem Siʹdon. Enye okpono nsunsu abasi Baʹal, onyụn̄ anam Aʹhab ye uwak mbon Israel ẹkpono Baʹal n̄ko. Jezʹe·bel asua Jehovah onyụn̄ owot ediwak prọfet esie. Akana mmọ eken ẹdịbe ke aba itiat man ẹkuwot mmọ. Ke Jezʹe·bel oyomde n̄kpọ, enye eyewot idem owo man ọbọ n̄kpọ oro.

Usen kiet, Edidem Aʹhab ọfụhọ etieti. Do Jezʹe·bel obụp enye: ‘Ntak afo ọfụhọde mfịn-e?’

Aʹhab ọbọrọ ete, ‘Oto se Naʹboth ọdọhọde mi.’ ‘N̄koyom ndidep in̄wan̄ vine esie. Edi enye ọdọhọ ke ndidepke.’

Jezʹe·bel ete, ‘Kukere.’ ‘Nnyebọ enye nnọ fi.’

Ntre Jezʹe·bel ewet leta ọnọ ndusụk mbọn̄ obio emi Naʹboth odụn̄de. Ọdọhọ mmọ, ‘ẹnam mme oburọbụt owo ẹdọhọ ẹte Naʹboth osụn̄i Abasi ye edidem.’ Do ẹda Naʹboth ẹwọrọ ke obio, ẹtọn̄ọ enye ke itiat ẹwot.’

Ndo ndo oro Jezʹe·bel okopde ke Naʹboth akpa, enye ọdọhọ Aʹhab: ‘Ke emi ka kada in̄wan̄ vine esie.’ Nte afo unyịmeke nte Jezʹe·bel odot ufen ke ndinam utọ enyene ndịk n̄kpọ oro?

Mọdo, ekem, Jehovah ọdọn̄ Jeʹhu ete ọkọnọ enye ufen. Ke Jezʹe·bel okopde ete Jeʹhu ke edi, enye abana enyịn esie onyụn̄ an̄wana nditịm idem man itịm iye. Edi ke Jeʹhu edide edikụt Jezʹe·bel ke window, enye okot irenowo ke ufọk edidem ete: ‘Ẹduọk enye ke isọn̄!’ Irenowo oro ẹnam ntre, nte ekemede ndikụt ke ndise oro. Mmọ ẹsio enye ẹduọk ke isọn̄, ndien enye akpa. Emi edi utịt idiọk Ọbọn̄ an̄wan Jezʹe·bel.