NTE ọmọfiọk se ekpri n̄kaiferi emi etịn̄de? Enye asian n̄wan oro aban̄a E·liʹsha prọfet Jehovah, ye mme utịbe n̄kpọ oro Jehovah an̄wamde enye ndinam. N̄wan oro ifiọkke iban̄a Jehovah, sia midịghe owo Israel. Yak ise, ndien, ntak n̄kaiferi emi odude ke ufọk n̄wan oro.

N̄wan oro edi owo Syria. Ebe esie edi Naʹa·man, etubom mbon ekọn̄ Syria. Udịm ekọn̄ Syria ẹma ẹmụm ekpri n̄kaiferi Israel emi ẹda ẹsọk n̄wan Naʹa·man ndidi eyen ufọk esie.

Naʹa·man enyene idiọk udọn̄ọ ẹkotde akpa mfia. Udọn̄ọ emi ekeme ndinam obụkidem owo eyemede. Ntem se n̄kaiferi emi etịn̄de ọnọ n̄wan Naʹa·man edi: ‘Etufọk mi ekpetienede prọfet Jehovah ke Israel. Enye ọkpọkọk enye akpa mfia esie.’ Ekem ẹtịn̄ emi ẹnọ ebe eyenan̄wan oro.

Naʹa·man otịm oyom udọn̄ọ emi okụre imọ; ntre enye ebiere ndika Israel. Ke enye osịmde do, enye aka ufọk E·liʹsha. E·liʹsha ọdọn̄ asan̄autom esie ọdọhọ Naʹa·man ete, ekeyere ke Akpa Jordan ikatiaba. Emi ayat Naʹa·man esịt etieti, ndien enye ete: ‘Mme akpa ko ke ufọk ẹfọn ẹkan akpa ekededi ke Israel!’ Ke ama eketịn̄ emi, Naʹa·man ọnyọn̄.

Edi asan̄autom esie kiet ọdọhọ enye ete: ‘Ete, edieke E·liʹsha ọkpọdọhọde anam se isọn̄de, akpanam. Ke emi ntak muyereke nte enye ọdọhọde?’ Naʹa·man okop ọnọ asan̄autom esie onyụn̄ aka ekenyịni idemesie ke Akpa Jordan, ikatiaba. Ke enye anamde, obụkidem esie akabade ọsọn̄ onyụn̄ okop idem.

Naʹa·man enem esịt etieti. Enye edidọhọ E·liʹsha ete: ‘Ke emi ke mfiọk nte Abasi Israel edi n̄kukụre Abasi akpanikọ ke ofụri isọn̄. Ntre, mbọk, bọ mi enọ emi.’ Edi E·liʹsha ọbọrọ ete: ‘Baba, ndibọhọ.’ E·liʹsha ọfiọk ke inenke imọ ndibọ enọ oro, koro edi Jehovah akanam udọn̄ọ okụre Naʹa·man. Edi asan̄autom E·liʹsha, Ge·haʹzi oyom mme enọ oro ke idemesie.

Ntre emi ke Ge·haʹzi anam. Ke Naʹa·man ọnyọn̄de, Ge·haʹzi efehe okosịm enye. Ge·haʹzi ọdọhọ, ‘E·liʹsha ọkọdọn̄ mi nsian fi nte imọ ikpama ndusụk enọ fo ndida nnọ mme ufan emi esụk edide. Ke akpan, emi edi nsu. Edi Naʹa·man ifiọkke ite ke edi nsu; ntre enye ọnọ Ge·haʹzi usụk mme n̄kpọ oro.

Ke Ge·haʹzi osịmde ufọk, E·liʹsha ọfiọk se enye akanamde. Jehovah asian enye. Do enye ete: ‘Sia fo anamde idiọkn̄kpọ emi, akpa mfia Naʹa·man eyeyịre fi.’ Ndien edi ntre, ini kiet!

Nnyịn ikeme ndikpep nso nto kpukpru emi? Akpa, nte ke akpana nnyịn itie nte ekpri n̄kaiferi oro, inyụn̄ itịn̄ iban̄a Jehovah. Oro ekeme ndinam ekese ufọn. Udiana, nnyịn ikutan̄ idem nte Naʹa·man ke akpa, edi ikpokop uyo asan̄autom Abasi. Ọyọhọ ita, inaha nnyịn isu nsu nte Ge·haʹzi. Nte nnyịn ikemeke ndikpep ekese nto edikot Bible?