YAK ifiak edem isua ifan̄ mbemiso Ezʹra akakade Jerusalem. Morʹde·cai ye Esther ẹdi ata mme ọwọrọiso nditọ Israel ke obio ubọn̄ Persia. Esther edi ọbọn̄ an̄wan, ndien eyeneka ete esie Morʹde·cai edi udiana edidem ke odudu. Yak ise nte emi akasan̄ade.

Ete ye eka Esther ẹkekpa ke enye edide ata ekpri, ntre Morʹde·cai ọkọbọk enye. A·has·u·eʹrus, edidem Persia, enyene ufọk ubọn̄ ke obio Shuʹshan, ndien Morʹde·cai edi asan̄autom esie kiet. Ọfọn, usen kiet n̄wan edidem Vashʹti otụt utọn̄, ntre edidem emek obufa n̄wan ndidi n̄wan ọbọn̄. Nte ọmọfiọk n̄wan emi enye emekde? Ih, ediye n̄kaiferi Esther.

Nte omokụt owo ntan̄idem emi mme owo ẹnuhọde ẹnọ? Emi edi Haʹman. Enye edi ata akpan owo ke Persia. Haʹman oyom Morʹde·cai, emi afo okụtde etiede mi, ọnuhọ ọnọ enye n̄ko. Edi Morʹde·cai idinamke oro. Enye ikereke ke enen ndinuhọ nnọ utọ idiọk owo oro. Emi otịm ayat Haʹman esịt. Ntre emi ke enye anam.

Haʹman osu nsu ọnọ edidem aban̄a nditọ Israel. Enye ọdọhọ, ‘Mmọ edi ndiọi owo emi minịmke mme ibet fo.’ ‘Akpana ẹwot mmọ.’ A·has·u·eʹrus ifiọkke ite ke Esther n̄wan esie edi owo Israel. Ntre enye akpan̄ utọn̄ ọnọ Haʹman, ndien anam ẹnam ibet nte ẹwot kpukpru nditọ Israel ke usen kiet.

Ke Morʹde·cai okopde aban̄a ibet emi, esịt otịm otịmede enye. Enye ọdọn̄ etop ọnọ Esther: ‘Ana afo asian edidem, onyụn̄ eben̄e enye ete anyan̄a nnyịn.’ Atuaha ye ibet ke Persia ndikụt edidem ibọhọke ẹkotde fi. Edi Esther odụk aka ke owo mikotke. Edidem anyan esan̄ gold esie ọnọ enye, emi ọwọrọde nte ke inaha ẹwot enye. Esther okot edidem ye Haʹman edi akamba udia. Do edidem obụp Esther se mfọn enye oyomde oto imọ. Esther ọdọhọ ete iyesian enye ke enye ye Haʹman ẹdidide udia ke udiana usen.

Ke udia oro Esther asian edidem: ‘Ẹmọn̄ ẹsobo iman mi ye ami.’ Edidem ayat esịt. Enye obụp, ‘Anie odomo ndinam utọ n̄kpọ oro?’

Esther ọbọrọ, ‘Owo asua emi, idiọk Haʹman emi!’

Ke emi edidem enen̄ede ayat esịt. Enye owụk ete ẹwot Haʹman. Ke oro ebede, edidem anam Morʹde·cai edi udiana ọnọ enye ke idemesie. Morʹde·cai ndien okụt ete ke ẹnam obufa ibet oro ayakde nditọ Israel ẹn̄wana ẹban̄a uwem mmọ ke usen oro akanade ẹwot mmọ. Koro Morʹde·cai edide utọ ọwọrọiso owo oro ke emi, ediwak owo ẹn̄wam nditọ Israel, ndien mmọ ẹbọhọ mme asua mmọ.