NTE ỌMỌDIỌN̄Ọ ekpri nsekeyen emi? Ih, edi Jesus. Enye amana idaha oro ke ufọk ufene. Ufọk ufene edi ebiet unịm unam. Mary onịm Jesus ke akwa udia ufene, emi edide ebiet oro esịnde udia ẹnọ mme ass ye unam eken edia. Edi ntak emi Mary ye Joseph ẹdude mi ye mme unam? Emi idịghe ebiet nsekeyen ndimana, nte edi?

Baba, idịghe. Edi emi edi ntak mmọ ẹdude mi: Andikara Rome, Caesar Au·gusʹtus akanam ibet nte kpukpru owo ẹnyọn̄ obio mmọ ẹkemanade ẹkewet enyịn̄ ke n̄wed. Ọfọn, Joseph akamana mi ke Bethʹle·hem. Edi ke enye ye Mary ẹsịmde, ufan̄ ikodụhe inọ mmọ ke ebiet ekededi. Ntre akana mmọ ẹdi mi ye mme unam. Ndien ke ukem usen emi, Mary ama aman Jesus! Edi, nte afo ekemede ndikụt, n̄kpọ inamke enye.

Nte afo emekeme ndikụt mme ekpemerọn̄ ẹdide ndise Jesus? Mmọ ẹkedu ke in̄wan̄ ke okoneyo ẹkpeme mme erọn̄ mmọ, ndien nyayama un̄wana ayama okụk mmọ. Ekedi angel! Ndịk ama anam mme ekpemerọn̄ etieti. Edi angel ama ọdọhọ: ‘Ẹkudịghe! Nda eti mbụk nsọk mbufo. Mfịn, ke Bethʹle·hem, Christ Ọbọn̄ ama amana. Enye eyenyan̄a mme owo! Mbufo ẹyekụt ẹwan̄de enye ke mme ọfọn̄ ẹnịm ke akwa udia ufene.’ Iwiwa, uwak angel ẹma ẹdi ẹditoro Abasi. Ntre, ke usọp, mme ekpemerọn̄ ẹka ẹkeyom Jesus, ke emi mmọ ẹkụt enye.

Nte ọmọfiọk ntak Jesus edide ata akpan owo? Nte ọmọfiọk owo emi enye enen̄ede edi? Ti, ke akpa mbụk n̄wed emi, nnyịn ima ibụk iban̄a akpa Eyen Abasi. Eyen emi akanam utom ye Je­hovah ke ndinam mme heaven ye isọn̄ ye kpukpru n̄kpọ eken. Ọfọn, Jesus edi owo emi!

Ih, Jehovah akada uwem Eyen esie oto heaven edisịn ke idịbi Mary. Inikiet, nsekeyen ama ọtọn̄ọ ndikọri ke idịbi esie kpa nte nditọ nsek eken ẹkọride ke idịbi eka mmọ. Edi nsekeyen emi ekedi Eyen Abasi. Ekem, ẹma ẹman Jesus mi ke ufọk ufene ke Bethʹle·hem. Nte afo omokụt ntak mme angel ẹkenemde esịt ntre ke edikeme nditọt mme owo nte ke Jesus ama amana?