NTE ỌMỌFIỌK owo oro anade do ke isọn̄? Edi Saul. Ti, enye ekekpeme ọfọn̄ ọnọ mme owo oro ẹketọn̄ọde Stephen ke itiat. Sese uyama un̄wana oro! Nso itịbe?

Ke ẹma ẹkewot Stephen, Saul adaiso ke ndibịn ikọt nnyom mme mbet Jesus ndinam mmọ idiọk. Enye odụk kpukpru ufọk okodudi mmọ ọdọn̄ ke ufọk n̄kpọkọbi. Ediwak mme mbet ẹfehe ẹka mme obio efen ẹnyụn̄ ẹtọn̄ọ ndikwọrọ “eti mbụk” do. Edi Saul aka mme obio efen ndiyom mme mbet Jesus. Enye odu ke usụn̄ akade Damascus ke emi. Edi ke usụn̄, n̄kpọ n̄kpaidem otịbede edi ntem:

Ke mbuari un̄wana oto ikpaenyọn̄ asiaha okụk Saul. Enye ọduọ ke isọn̄, nte nnyịn ikụtde mi. Ndien uyo ọdọhọ: ‘Saul, Saul! Nsinam afo ọkọbọde mi?’ Mme owo ẹdude ye Saul ẹkụt un̄wana ẹnyụn̄ ẹkop uyom uyo oro, ẹdi mmọ ifiọkke se ẹtịn̄de an̄wan̄a.

Saul obụp, ‘Afo edi anie, Ọbọn̄?’

Uyo oro ete, ‘Ami ndi Jesus, emi afo ọkọbọde.’ Jesus ọdọhọ emi koro Saul ndikọbọ mme anditiene Jesus etie ye Jesus nte ke ẹkọbọ enye ke idemesie.

Saul ke emi obụp: ‘Ọbọn̄, nso ke ndinam?’

Jesus ete, ‘Daha ke enyọn̄ ka Damascus.’ ‘Do eyesian fi se edinamde.’ Ke Saul adahade ada atat enyịn esie, enye ikemeke ndikụt n̄kpọ. Enye edi nnan! Ntre mme nsan̄a esie ẹmụm enye ubọk ẹda enye ẹdụk Damascus.

Jesus idahaemi asian mbet esie kiet ke Damascus, ete: ‘Daha ke enyọn̄, An·a·niʹas. Ka ke efak emi ẹkotde Nnennen. Ke ufọk Judas, bụp owo oro ẹkotde Saul. Ami mmemek enye edi akpan asan̄autom mi.’

An·a·niʹas anam ntre. Ke enye osịmde Saul, enye odori enye ubọk ndien ọdọhọ: ‘Ọbọn̄ ọdọn̄ mi man afo afiak okụt usụn̄ onyụn̄ ọyọhọ ye edisana spirit.’ Inikiet, n̄kpọ ebietde ikpọk ẹdian̄ade ke enyịn esie ẹduọ, ndien enye ẹkeme ndifiak n̄kụt usụn̄.

Ẹda Saul ke akamba usụn̄ ndikwọrọ ikọ nnọ mme owo ke ediwak idụt. Ẹkabade ẹfiọk enye nte apostle Paul, emi nnyịn idikpepde ekese ikan iban̄a. Edi kan̄a, yak ise se Abasi ọdọn̄de Peter anam.